೧೧. ವಿಜಯಸುತ್ತಂ

೧೯೫. ಚರಂ ವಾ ಯದಿ ವಾ ತಿಟ್ಠಂ, ನಿಸಿನ್ನೋ ಉದ ವಾ ಸಯಂ;

ಸಮಿಞ್ಜೇತಿ ಪಸಾರೇತಿ, ಏಸಾ ಕಾಯಸ್ಸ ಇಞ್ಜನಾ.

೧೯೬. ಅಟ್ಠಿನಹಾರುಸಂಯುತ್ತೋ, ತಚಮಂಸಾವಲೇಪನೋ;

ಛವಿಯಾ ಕಾಯೋ ಪಟಿಚ್ಛನ್ನೋ, ಯಥಾಭೂತಂ ನ ದಿಸ್ಸತಿ.

೧೯೭. ಅನ್ತಪೂರೋ ಉದರಪೂರೋ, ಯಕನಪೇಳಸ್ಸ [ಯಕಪೇಳಸ್ಸ (ಸೀ. ಸ್ಯಾ.)] ವತ್ಥಿನೋ;

ಹದಯಸ್ಸ ಪಪ್ಫಾಸಸ್ಸ, ವಕ್ಕಸ್ಸ ಪಿಹಕಸ್ಸ ಚ.

೧೯೮. ಸಿಙ್ಘಾಣಿಕಾಯ ಖೇಳಸ್ಸ, ಸೇದಸ್ಸ ಚ ಮೇದಸ್ಸ ಚ;

ಲೋಹಿತಸ್ಸ ಲಸಿಕಾಯ, ಪಿತ್ತಸ್ಸ ಚ ವಸಾಯ ಚ.

೧೯೯. ಅಥಸ್ಸ ನವಹಿ ಸೋತೇಹಿ, ಅಸುಚೀ ಸವತಿ ಸಬ್ಬದಾ;

ಅಕ್ಖಿಮ್ಹಾ ಅಕ್ಖಿಗೂಥಕೋ, ಕಣ್ಣಮ್ಹಾ ಕಣ್ಣಗೂಥಕೋ.

೨೦೦. ಸಿಙ್ಘಾಣಿಕಾ ಚ ನಾಸತೋ, ಮುಖೇನ ವಮತೇಕದಾ;

ಪಿತ್ತಂ ಸೇಮ್ಹಞ್ಚ ವಮತಿ, ಕಾಯಮ್ಹಾ ಸೇದಜಲ್ಲಿಕಾ.

೨೦೧. ಅಥಸ್ಸ ಸುಸಿರಂ ಸೀಸಂ, ಮತ್ಥಲುಙ್ಗಸ್ಸ ಪೂರಿತಂ;

ಸುಭತೋ ನಂ ಮಞ್ಞತಿ, ಬಾಲೋ ಅವಿಜ್ಜಾಯ ಪುರಕ್ಖತೋ.

೨೦೨. ಯದಾ ಚ ಸೋ ಮತೋ ಸೇತಿ, ಉದ್ಧುಮಾತೋ ವಿನೀಲಕೋ;

ಅಪವಿದ್ಧೋ ಸುಸಾನಸ್ಮಿಂ, ಅನಪೇಕ್ಖಾ ಹೋನ್ತಿ ಞಾತಯೋ.

೨೦೩. ಖಾದನ್ತಿ ನಂ ಸುವಾನಾ [ಸುಪಾಣಾ (ಪೀ.)] ಚ, ಸಿಙ್ಗಾಲಾ [ಸಿಗಾಲಾ (ಸೀ. ಸ್ಯಾ. ಕಂ. ಪೀ.)] ವಕಾ ಕಿಮೀ;

ಕಾಕಾ ಗಿಜ್ಝಾ ಚ ಖಾದನ್ತಿ, ಯೇ ಚಞ್ಞೇ ಸನ್ತಿ ಪಾಣಿನೋ.

೨೦೪. ಸುತ್ವಾನ ಬುದ್ಧವಚನಂ, ಭಿಕ್ಖು ಪಞ್ಞಾಣವಾ ಇಧ;

ಸೋ ಖೋ ನಂ ಪರಿಜಾನಾತಿ, ಯಥಾಭೂತಞ್ಹಿ ಪಸ್ಸತಿ.

೨೦೫. ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;

ಅಜ್ಝತ್ತಞ್ಚ ಬಹಿದ್ಧಾ ಚ, ಕಾಯೇ ಛನ್ದಂ ವಿರಾಜಯೇ.

೨೦೬. ಛನ್ದರಾಗವಿರತ್ತೋ ಸೋ, ಭಿಕ್ಖು ಪಞ್ಞಾಣವಾ ಇಧ;

ಅಜ್ಝಗಾ ಅಮತಂ ಸನ್ತಿಂ, ನಿಬ್ಬಾನಂ ಪದಮಚ್ಚುತಂ.

೨೦೭. ದ್ವಿಪಾದಕೋಯಂ [ದಿಪಾದಕೋಯಂ (ಸೀ. ಸ್ಯಾ. ಕಂ. ಪೀ.)] ಅಸುಚಿ, ದುಗ್ಗನ್ಧೋ ಪರಿಹಾರತಿ [ಪರಿಹೀರತಿ (ಸೀ. ಸ್ಯಾ. ಕಂ. ಪೀ.)];

ನಾನಾಕುಣಪಪರಿಪೂರೋ, ವಿಸ್ಸವನ್ತೋ ತತೋ ತತೋ.

೨೦೮. ಏತಾದಿಸೇನ ಕಾಯೇನ, ಯೋ ಮಞ್ಞೇ ಉಣ್ಣಮೇತವೇ [ಉನ್ನಮೇತವೇ (?)];

ಪರಂ ವಾ ಅವಜಾನೇಯ್ಯ, ಕಿಮಞ್ಞತ್ರ ಅದಸ್ಸನಾತಿ.

ವಿಜಯಸುತ್ತಂ ಏಕಾದಸಮಂ ನಿಟ್ಠಿತಂ.