೧೨. ಮುನಿಸುತ್ತಂ

೨೦೯. ಸನ್ಥವಾತೋ [ಸನ್ಧವತೋ (ಕ.)] ಭಯಂ ಜಾತಂ, ನಿಕೇತಾ ಜಾಯತೇ ರಜೋ;

ಅನಿಕೇತಮಸನ್ಥವಂ, ಏತಂ ವೇ ಮುನಿದಸ್ಸನಂ.

೨೧೦. ಯೋ ಜಾತಮುಚ್ಛಿಜ್ಜ ನ ರೋಪಯೇಯ್ಯ, ಜಾಯನ್ತಮಸ್ಸ ನಾನುಪ್ಪವೇಚ್ಛೇ;

ತಮಾಹು ಏಕಂ ಮುನಿನಂ ಚರನ್ತಂ, ಅದ್ದಕ್ಖಿ ಸೋ ಸನ್ತಿಪದಂ ಮಹೇಸಿ.

೨೧೧. ಸಙ್ಖಾಯ ವತ್ಥೂನಿ ಪಮಾಯ [ಪಹಾಯ (ಕ. ಸೀ. ಕ.), ಸಮಾಯ (ಕ.) ಪ + ಮೀ + ತ್ವಾ = ಪಮಾಯ, ಯಥಾ ನಿಸ್ಸಾಯಾತಿಪದಂ] ಬೀಜಂ, ಸಿನೇಹಮಸ್ಸ ನಾನುಪ್ಪವೇಚ್ಛೇ;

ಸ ವೇ ಮುನೀ ಜಾತಿಖಯನ್ತದಸ್ಸೀ, ತಕ್ಕಂ ಪಹಾಯ ನ ಉಪೇತಿ ಸಙ್ಖಂ.

೨೧೨. ಅಞ್ಞಾಯ ಸಬ್ಬಾನಿ ನಿವೇಸನಾನಿ, ಅನಿಕಾಮಯಂ ಅಞ್ಞತರಮ್ಪಿ ತೇಸಂ;

ಸ ವೇ ಮುನೀ ವೀತಗೇಧೋ ಅಗಿದ್ಧೋ, ನಾಯೂಹತೀ ಪಾರಗತೋ ಹಿ ಹೋತಿ.

೨೧೩. ಸಬ್ಬಾಭಿಭುಂ ಸಬ್ಬವಿದುಂ ಸುಮೇಧಂ, ಸಬ್ಬೇಸು ಧಮ್ಮೇಸು ಅನೂಪಲಿತ್ತಂ;

ಸಬ್ಬಞ್ಜಹಂ ತಣ್ಹಕ್ಖಯೇ ವಿಮುತ್ತಂ, ತಂ ವಾಪಿ ಧೀರಾ ಮುನಿ [ಮುನಿಂ (ಸೀ. ಪೀ.)] ವೇದಯನ್ತಿ.

೨೧೪. ಪಞ್ಞಾಬಲಂ ಸೀಲವತೂಪಪನ್ನಂ, ಸಮಾಹಿತಂ ಝಾನರತಂ ಸತೀಮಂ;

ಸಙ್ಗಾ ಪಮುತ್ತಂ ಅಖಿಲಂ ಅನಾಸವಂ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೧೫. ಏಕಂ ಚರನ್ತಂ ಮುನಿಮಪ್ಪಮತ್ತಂ, ನಿನ್ದಾಪಸಂಸಾಸು ಅವೇಧಮಾನಂ;

ಸೀಹಂವ ಸದ್ದೇಸು ಅಸನ್ತಸನ್ತಂ, ವಾತಂವ ಜಾಲಮ್ಹಿ ಅಸಜ್ಜಮಾನಂ;

ಪದ್ಮಂವ [ಪದುಮಂವ (ಸೀ. ಸ್ಯಾ. ಪೀ.)] ತೋಯೇನ ಅಲಿಪ್ಪಮಾನಂ [ಅಲಿಮ್ಪಮಾನಂ (ಸ್ಯಾ. ಕ.)], ನೇತಾರಮಞ್ಞೇಸಮನಞ್ಞನೇಯ್ಯಂ;

ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೧೬. ಯೋ ಓಗಹಣೇ ಥಮ್ಭೋರಿವಾಭಿಜಾಯತಿ, ಯಸ್ಮಿಂ ಪರೇ ವಾಚಾಪರಿಯನ್ತಂ [ವಾಚಂ ಪರಿಯನ್ತಂ (ಕ.)] ವದನ್ತಿ;

ತಂ ವೀತರಾಗಂ ಸುಸಮಾಹಿತಿನ್ದ್ರಿಯಂ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೧೭. ಯೋ ವೇ ಠಿತತ್ತೋ ತಸರಂವ ಉಜ್ಜು, ಜಿಗುಚ್ಛತಿ ಕಮ್ಮೇಹಿ ಪಾಪಕೇಹಿ;

ವೀಮಂಸಮಾನೋ ವಿಸಮಂ ಸಮಞ್ಚ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೧೮. ಯೋ ಸಞ್ಞತತ್ತೋ ನ ಕರೋತಿ ಪಾಪಂ, ದಹರೋ ಮಜ್ಝಿಮೋ ಚ ಮುನಿ [ದಹರೋ ಚ ಮಜ್ಝೋ ಚ ಮುನೀ (ಸೀ. ಸ್ಯಾ. ಕಂ. ಪೀ.)] ಯತತ್ತೋ;

ಅರೋಸನೇಯ್ಯೋ ನ ಸೋ ರೋಸೇತಿ ಕಞ್ಚಿ [ನ ರೋಸೇತಿ (ಸ್ಯಾ.)], ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೧೯. ಯದಗ್ಗತೋ ಮಜ್ಝತೋ ಸೇಸತೋ ವಾ, ಪಿಣ್ಡಂ ಲಭೇಥ ಪರದತ್ತೂಪಜೀವೀ;

ನಾಲಂ ಥುತುಂ ನೋಪಿ ನಿಪಚ್ಚವಾದೀ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೨೦. ಮುನಿಂ ಚರನ್ತಂ ವಿರತಂ ಮೇಥುನಸ್ಮಾ, ಯೋ ಯೋಬ್ಬನೇ ನೋಪನಿಬಜ್ಝತೇ ಕ್ವಚಿ;

ಮದಪ್ಪಮಾದಾ ವಿರತಂ ವಿಪ್ಪಮುತ್ತಂ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೨೧. ಅಞ್ಞಾಯ ಲೋಕಂ ಪರಮತ್ಥದಸ್ಸಿಂ, ಓಘಂ ಸಮುದ್ದಂ ಅತಿತರಿಯ ತಾದಿಂ;

ತಂ ಛಿನ್ನಗನ್ಥಂ ಅಸಿತಂ ಅನಾಸವಂ, ತಂ ವಾಪಿ ಧೀರಾ ಮುನಿ ವೇದಯನ್ತಿ.

೨೨೨. ಅಸಮಾ ಉಭೋ ದೂರವಿಹಾರವುತ್ತಿನೋ, ಗಿಹೀ [ಗಿಹಿ (ಕ.)] ದಾರಪೋಸೀ ಅಮಮೋ ಚ ಸುಬ್ಬತೋ;

ಪರಪಾಣರೋಧಾಯ ಗಿಹೀ ಅಸಞ್ಞತೋ, ನಿಚ್ಚಂ ಮುನೀ ರಕ್ಖತಿ ಪಾಣಿನೇ [ಪಾಣಿನೋ (ಸೀ.)] ಯತೋ.

೨೨೩. ಸಿಖೀ ಯಥಾ ನೀಲಗೀವೋ [ನೀಲಗಿವೋ (ಸ್ಯಾ.)] ವಿಹಙ್ಗಮೋ, ಹಂಸಸ್ಸ ನೋಪೇತಿ ಜವಂ ಕುದಾಚನಂ;

ಏವಂ ಗಿಹೀ ನಾನುಕರೋತಿ ಭಿಕ್ಖುನೋ, ಮುನಿನೋ ವಿವಿತ್ತಸ್ಸ ವನಮ್ಹಿ ಝಾಯತೋತಿ.

ಮುನಿಸುತ್ತಂ ದ್ವಾದಸಮಂ ನಿಟ್ಠಿತಂ.

ಉರಗವಗ್ಗೋ ಪಠಮೋ ನಿಟ್ಠಿತೋ.