೯. ಗೂಥಖಾದಕಪೇತಿವತ್ಥು

೭೭೪. ‘‘ಗೂಥಕೂಪತೋ ಉಗ್ಗನ್ತ್ವಾ, ಕಾ ನು ದೀನಾ ಪತಿಟ್ಠಸಿ;

ನಿಸ್ಸಂಸಯಂ ಪಾಪಕಮ್ಮನ್ತಾ, ಕಿಂ ನು ಸದ್ದಹಸೇ ತುವ’’ನ್ತಿ.

೭೭೫. ‘‘ಅಹಂ ಭದನ್ತೇ ಪೇತೀಮ್ಹಿ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ.

೭೭೬. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಇದಂ ದುಕ್ಖಂ ನಿಗಚ್ಛಸೀ’’ತಿ.

೭೭೭. ‘‘ಅಹು ಆವಾಸಿಕೋ ಮಯ್ಹಂ, ಇಸ್ಸುಕೀ ಕುಲಮಚ್ಛರೀ;

ಅಜ್ಝೋಸಿತೋ ಮಯ್ಹಂ ಘರೇ, ಕದರಿಯೋ ಪರಿಭಾಸಕೋ.

೭೭೮. ‘‘ತಸ್ಸಾಹಂ ವಚನಂ ಸುತ್ವಾ, ಭಿಕ್ಖವೋ ಪರಿಭಾಸಿಸಂ;

ತಸ್ಸ ಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ.

೭೭೯. ‘‘ಅಮಿತ್ತೋ ಮಿತ್ತವಣ್ಣೇನ, ಯೋ ತೇ ಆಸಿ ಕುಲೂಪಕೋ;

ಕಾಯಸ್ಸ ಭೇದಾ ದುಪ್ಪಞ್ಞೋ, ಕಿಂ ನು ಪೇಚ್ಚ ಗತಿಂ ಗತೋ’’ತಿ.

೭೮೦. ‘‘ತಸ್ಸೇವಾಹಂ ಪಾಪಕಮ್ಮಸ್ಸ, ಸೀಸೇ ತಿಟ್ಠಾಮಿ ಮತ್ಥಕೇ;

ಸೋ ಚ ಪರವಿಸಯಂ ಪತ್ತೋ, ಮಮೇವ ಪರಿಚಾರಕೋ.

೭೮೧. ‘‘ಯಂ ಭದನ್ತೇ ಹದನ್ತಞ್ಞೇ, ಏತಂ ಮೇ ಹೋತಿ ಭೋಜನಂ;

ಅಹಞ್ಚ ಖೋ ಯಂ ಹದಾಮಿ, ಏತಂ ಸೋ ಉಪಜೀವತೀ’’ತಿ.

ಗೂಥಖಾದಕಪೇತಿವತ್ಥು ನವಮಂ.