೧೦. ಗಣಪೇತವತ್ಥು

೭೮೨. ‘‘ನಗ್ಗಾ ದುಬ್ಬಣ್ಣರೂಪಾತ್ಥ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕಾ [ಉಪ್ಪಾಸುಳಿಕಾ (ಕ.)] ಕಿಸಿಕಾ, ಕೇ ನು ತುಮ್ಹೇತ್ಥ ಮಾರಿಸಾ’’ತಿ.

೭೮೩. ‘‘ಮಯಂ ಭದನ್ತೇ ಪೇತಾಮ್ಹಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ.

೭೮೪. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ.

೭೮೫. ‘‘ಅನಾವಟೇಸು ತಿತ್ಥೇಸು, ವಿಚಿನಿಮ್ಹದ್ಧಮಾಸಕಂ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ.

೭೮೬. ‘‘ನದಿಂ ಉಪೇಮ ತಸಿತಾ, ರಿತ್ತಕಾ ಪರಿವತ್ತತಿ;

ಛಾಯಂ ಉಪೇಮ ಉಣ್ಹೇಸು, ಆತಪೋ ಪರಿವತ್ತತಿ.

೭೮೭. ‘‘ಅಗ್ಗಿವಣ್ಣೋ ಚ ನೋ ವಾತೋ, ಡಹನ್ತೋ ಉಪವಾಯತಿ;

ಏತಞ್ಚ ಭನ್ತೇ ಅರಹಾಮ, ಅಞ್ಞಞ್ಚ ಪಾಪಕಂ ತತೋ.

೭೮೮. ‘‘ಅಪಿ ಯೋಜನಾನಿ [ಅಧಿಯೋಜನಾನಿ (ಸೀ. ಕ.)] ಗಚ್ಛಾಮ, ಛಾತಾ ಆಹಾರಗೇಧಿನೋ;

ಅಲದ್ಧಾವ ನಿವತ್ತಾಮ, ಅಹೋ ನೋ ಅಪ್ಪಪುಞ್ಞತಾ.

೭೮೯. ‘‘ಛಾತಾ ಪಮುಚ್ಛಿತಾ ಭನ್ತಾ, ಭೂಮಿಯಂ ಪಟಿಸುಮ್ಭಿತಾ;

ಉತ್ತಾನಾ ಪಟಿಕಿರಾಮ, ಅವಕುಜ್ಜಾ ಪತಾಮಸೇ.

೭೯೦. ‘‘ತೇ ಚ ತತ್ಥೇವ ಪತಿತಾ [ತತ್ಥ ಪಪಹಿತಾ (ಕ.)], ಭೂಮಿಯಂ ಪಟಿಸುಮ್ಭಿತಾ;

ಉರಂ ಸೀಸಞ್ಚ ಘಟ್ಟೇಮ, ಅಹೋ ನೋ ಅಪ್ಪಪುಞ್ಞತಾ.

೭೯೧. ‘‘ಏತಞ್ಚ ಭನ್ತೇ ಅರಹಾಮ, ಅಞ್ಞಞ್ಚ ಪಾಪಕಂ ತತೋ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ.

೭೯೨. ‘‘ತೇ ಹಿ ನೂನ ಇತೋ ಗನ್ತ್ವಾ, ಯೋನಿಂ ಲದ್ಧಾನ ಮಾನುಸಿಂ;

ವದಞ್ಞೂ ಸೀಲಸಮ್ಪನ್ನಾ, ಕಾಹಾಮ ಕುಸಲಂ ಬಹು’’ನ್ತಿ.

ಗಣಪೇತವತ್ಥು ದಸಮಂ.