೬. ಕುಮಾರಪೇತವತ್ಥು

೭೪೬. ‘‘ಸಾವತ್ಥಿ ನಾಮ ನಗರಂ, ಹಿಮವನ್ತಸ್ಸ ಪಸ್ಸತೋ;

ತತ್ಥ ಆಸುಂ ದ್ವೇ ಕುಮಾರಾ, ರಾಜಪುತ್ತಾತಿ ಮೇ ಸುತಂ.

೭೪೭. ‘‘ಸಮ್ಮತ್ತಾ [ಪಮತ್ತಾ (ಕ.)] ರಜನೀಯೇಸು, ಕಾಮಸ್ಸಾದಾಭಿನನ್ದಿನೋ;

ಪಚ್ಚುಪ್ಪನ್ನಸುಖೇ ಗಿದ್ಧಾ, ನ ತೇ ಪಸ್ಸಿಂಸುನಾಗತಂ.

೭೪೮. ‘‘ತೇ ಚುತಾ ಚ ಮನುಸ್ಸತ್ತಾ, ಪರಲೋಕಂ ಇತೋ ಗತಾ;

ತೇಧ ಘೋಸೇನ್ತ್ಯದಿಸ್ಸನ್ತಾ, ಪುಬ್ಬೇ ದುಕ್ಕಟಮತ್ತನೋ.

೭೪೯. ‘‘‘ಬಹೂಸು ವತ [ಬಹುಸ್ಸುತೇಸು (ಸೀ. ಕ.)] ಸನ್ತೇಸು, ದೇಯ್ಯಧಮ್ಮೇ ಉಪಟ್ಠಿತೇ;

ನಾಸಕ್ಖಿಮ್ಹಾ ಚ ಅತ್ತಾನಂ, ಪರಿತ್ತಂ ಕಾತುಂ ಸುಖಾವಹಂ.

೭೫೦. ‘‘‘ಕಿಂ ತತೋ ಪಾಪಕಂ ಅಸ್ಸ, ಯಂ ನೋ ರಾಜಕುಲಾ ಚುತಾ;

ಉಪಪನ್ನಾ ಪೇತ್ತಿವಿಸಯಂ, ಖುಪ್ಪಿಪಾಸಸಮಪ್ಪಿತಾ [ಖುಪ್ಪಿಪಾಸಾಸಮಪ್ಪಿತಾ (ಸೀ. ಪೀ.)].

೭೫೧. ‘‘ಸಾಮಿನೋ ಇಧ ಹುತ್ವಾನ, ಹೋನ್ತಿ ಅಸಾಮಿನೋ ತಹಿಂ;

ಭಮನ್ತಿ [ಚರನ್ತಿ (ಸೀ. ಪೀ.), ಮರನ್ತಿ (ಸ್ಯಾ.)] ಖುಪ್ಪಿಪಾಸಾಯ, ಮನುಸ್ಸಾ ಉನ್ನತೋನತಾ.

೭೫೨. ‘‘ಏತಮಾದೀನವಂ ಞತ್ವಾ, ಇಸ್ಸರಮದಸಮ್ಭವಂ;

ಪಹಾಯ ಇಸ್ಸರಮದಂ, ಭವೇ ಸಗ್ಗಗತೋ ನರೋ;

ಕಾಯಸ್ಸ ಭೇದಾ ಸಪ್ಪಞ್ಞೋ, ಸಗ್ಗಂ ಸೋ ಉಪಪಜ್ಜತೀ’’ತಿ.

ಕುಮಾರಪೇತವತ್ಥು ಛಟ್ಠಂ.