೭. ರಾಜಪುತ್ತಪೇತವತ್ಥು

೭೫೩. ಪುಬ್ಬೇ ಕತಾನಂ ಕಮ್ಮಾನಂ, ವಿಪಾಕೋ ಮಥಯೇ ಮನಂ;

ರೂಪೇ ಸದ್ದೇ ರಸೇ ಗನ್ಧೇ, ಫೋಟ್ಠಬ್ಬೇ ಚ ಮನೋರಮೇ.

೭೫೪. ನಚ್ಚಂ ಗೀತಂ ರತಿಂ ಖಿಡ್ಡಂ, ಅನುಭುತ್ವಾ ಅನಪ್ಪಕಂ;

ಉಯ್ಯಾನೇ ಪರಿಚರಿತ್ವಾ, ಪವಿಸನ್ತೋ ಗಿರಿಬ್ಬಜಂ.

೭೫೫. ಇಸಿಂ ಸುನೇತ್ತ [ಸುನಿತ (ಕ.)] ಮದ್ದಕ್ಖಿ, ಅತ್ತದನ್ತಂ ಸಮಾಹಿತಂ;

ಅಪ್ಪಿಚ್ಛಂ ಹಿರಿಸಮ್ಪನ್ನಂ, ಉಞ್ಛೇ ಪತ್ತಗತೇ ರತಂ.

೭೫೬. ಹತ್ಥಿಕ್ಖನ್ಧತೋ ಓರುಯ್ಹ, ಲದ್ಧಾ ಭನ್ತೇತಿ ಚಾಬ್ರವಿ;

ತಸ್ಸ ಪತ್ತಂ ಗಹೇತ್ವಾನ, ಉಚ್ಚಂ ಪಗ್ಗಯ್ಹ ಖತ್ತಿಯೋ.

೭೫೭. ಥಣ್ಡಿಲೇ ಪತ್ತಂ ಭಿನ್ದಿತ್ವಾ, ಹಸಮಾನೋ ಅಪಕ್ಕಮಿ;

‘‘ರಞ್ಞೋ ಕಿತವಸ್ಸಾಹಂ ಪುತ್ತೋ, ಕಿಂ ಮಂ ಭಿಕ್ಖು ಕರಿಸ್ಸಸಿ’’.

೭೫೮. ತಸ್ಸ ಕಮ್ಮಸ್ಸ ಫರುಸಸ್ಸ, ವಿಪಾಕೋ ಕಟುಕೋ ಅಹು;

ಯಂ ರಾಜಪುತ್ತೋ ವೇದೇಸಿ, ನಿರಯಮ್ಹಿ ಸಮಪ್ಪಿತೋ.

೭೫೯. ಛಳೇವ ಚತುರಾಸೀತಿ, ವಸ್ಸಾನಿ ನವುತಾನಿ ಚ;

ಭುಸಂ ದುಕ್ಖಂ ನಿಗಚ್ಛಿತ್ಥೋ, ನಿರಯೇ ಕತಕಿಬ್ಬಿಸೋ.

೭೬೦. ಉತ್ತಾನೋಪಿ ಚ ಪಚ್ಚಿತ್ಥ, ನಿಕುಜ್ಜೋ ವಾಮದಕ್ಖಿಣೋ;

ಉದ್ಧಂಪಾದೋ ಠಿತೋ ಚೇವ, ಚಿರಂ ಬಾಲೋ ಅಪಚ್ಚಥ.

೭೬೧. ಬಹೂನಿ ವಸ್ಸಸಹಸ್ಸಾನಿ, ಪೂಗಾನಿ ನಹುತಾನಿ ಚ;

ಭುಸಂ ದುಕ್ಖಂ ನಿಗಚ್ಛಿತ್ಥೋ, ನಿರಯೇ ಕತಕಿಬ್ಬಿಸೋ.

೭೬೨. ಏತಾದಿಸಂ ಖೋ ಕಟುಕಂ, ಅಪ್ಪದುಟ್ಠಪ್ಪದೋಸಿನಂ;

ಪಚ್ಚನ್ತಿ ಪಾಪಕಮ್ಮನ್ತಾ, ಇಸಿಮಾಸಜ್ಜ ಸುಬ್ಬತಂ.

೭೬೩. ಸೋ ತತ್ಥ ಬಹುವಸ್ಸಾನಿ, ವೇದಯಿತ್ವಾ ಬಹುಂ ದುಖಂ;

ಖುಪ್ಪಿಪಾಸಹತೋ ನಾಮ [ಖುಪ್ಪಿಪಾಸಾಹತೋ ನಾಮ (ಸೀ. ಪೀ)], ಪೇತೋ ಆಸಿ ತತೋ ಚುತೋ.

೭೬೪. ಏತಮಾದೀನವಂ ಞತ್ವಾ [ದಿಸ್ವಾ (ಸೀ.)], ಇಸ್ಸರಮದಸಮ್ಭವಂ;

ಪಹಾಯ ಇಸ್ಸರಮದಂ, ನಿವಾತಮನುವತ್ತಯೇ.

೭೬೫. ದಿಟ್ಠೇವ ಧಮ್ಮೇ ಪಾಸಂಸೋ, ಯೋ ಬುದ್ಧೇಸು ಸಗಾರವೋ;

ಕಾಯಸ್ಸ ಭೇದಾ ಸಪ್ಪಞ್ಞೋ, ಸಗ್ಗಂ ಸೋ ಉಪಪಜ್ಜತೀತಿ.

ರಾಜಪುತ್ತಪೇತವತ್ಥು ಸತ್ತಮಂ.