೧೬. ಸಟ್ಠಿಕೂಟಪೇತವತ್ಥು

೮೦೬. ‘‘ಕಿಂ ನು ಉಮ್ಮತ್ತರೂಪೋವ, ಮಿಗೋ ಭನ್ತೋವ ಧಾವಸಿ;

ನಿಸ್ಸಂಸಯಂ ಪಾಪಕಮ್ಮನ್ತೋ [ಪಾಪಕಮ್ಮಂ (ಸ್ಯಾ. ಪೀ.)], ಕಿಂ ನು ಸದ್ದಾಯಸೇ ತುವ’’ನ್ತಿ.

೮೦೭. ‘‘ಅಹಂ ಭದನ್ತೇ ಪೇತೋಮ್ಹಿ, ದುಗ್ಗತೋ ಯಮಲೋಕಿಕೋ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತೋ.

೮೦೮. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ಮಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ.

೮೦೯. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಇದಂ ದುಕ್ಖಂ ನಿಗಚ್ಛಸಿ.

೮೧೦. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ತುಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ.

೮೧೧. ‘‘ಅಥದ್ದಸಾಸಿಂ ಸಮ್ಬುದ್ಧಂ, ಸುನೇತ್ತಂ ಭಾವಿತಿನ್ದ್ರಿಯಂ;

ನಿಸಿನ್ನಂ ರುಕ್ಖಮೂಲಸ್ಮಿಂ, ಝಾಯನ್ತಂ ಅಕುತೋಭಯಂ.

೮೧೨. ‘‘ಸಾಲಿತ್ತಕಪ್ಪಹಾರೇನ, ಭಿನ್ದಿಸ್ಸಂ ತಸ್ಸ ಮತ್ಥಕಂ;

ತಸ್ಸ ಕಮ್ಮವಿಪಾಕೇನ, ಇದಂ ದುಕ್ಖಂ ನಿಗಚ್ಛಿಸಂ.

೮೧೩. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ಮಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ [ನಿಪತನ್ತಿ, ವೋ ಭಿನ್ದನ್ತೇವ (ಸೀ. ಧಮ್ಮಪದಟ್ಠಕಥಾ)] ಮತ್ಥಕ’’ನ್ತಿ.

೮೧೪. ‘‘ಧಮ್ಮೇನ ತೇ ಕಾಪುರಿಸ, ಸಟ್ಠಿಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ತುಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ.

ಸಟ್ಠಿಕೂಟಪೇತವತ್ಥು ಸೋಳಸಮಂ.

ಮಹಾವಗ್ಗೋ ಚತುತ್ಥೋ ನಿಟ್ಠಿತೋ.