೭. ಸಮಸೀಸಕಥಾ

೩೩. ಸಬ್ಬಧಮ್ಮಾನಂ [ಸಬ್ಬೇಸಂ ಧಮ್ಮಾನಂ (ಕ.) ಪಟಿ. ಮ. ೧.೮೭ ಪಸ್ಸಿತಬ್ಬಾ] ಸಮ್ಮಾಸಮುಚ್ಛೇದೇ ನಿರೋಧೇ ಚ ಅನುಪಟ್ಠಾನತಾ ಪಞ್ಞಾ ಸಮಸೀಸಟ್ಠೇ ಞಾಣಂ.

ಸಬ್ಬಧಮ್ಮಾನನ್ತಿ ಪಞ್ಚಕ್ಖನ್ಧಾ, ದ್ವಾದಸಾಯತನಾನಿ, ಅಟ್ಠಾರಸ ಧಾತುಯೋ, ಕುಸಲಾ ಧಮ್ಮಾ, ಅಕುಸಲಾ ಧಮ್ಮಾ, ಅಬ್ಯಾಕತಾ ಧಮ್ಮಾ, ಕಾಮಾವಚರಾ ಧಮ್ಮಾ, ರೂಪಾವಚರಾ ಧಮ್ಮಾ, ಅರೂಪಾವಚರಾ ಧಮ್ಮಾ, ಅಪರಿಯಾಪನ್ನಾ ಧಮ್ಮಾ. ಸಮ್ಮಾ ಸಮುಚ್ಛೇದೇತಿ ನೇಕ್ಖಮ್ಮೇನ ಕಾಮಚ್ಛನ್ದಂ ಸಮ್ಮಾ ಸಮುಚ್ಛಿನ್ದತಿ, ಅಬ್ಯಾಪಾದೇನ ಬ್ಯಾಪಾದಂ ಸಮ್ಮಾ ಸಮುಚ್ಛಿನ್ದತಿ, ಆಲೋಕಸಞ್ಞಾಯ ಥಿನಮಿದ್ಧಂ ಸಮ್ಮಾ ಸಮುಚ್ಛಿನ್ದತಿ, ಅವಿಕ್ಖೇಪೇನ ಉದ್ಧಚ್ಚಂ ಸಮ್ಮಾ ಸಮುಚ್ಛಿನ್ದತಿ, ಧಮ್ಮವವತ್ಥಾನೇನ ವಿಚಿಕಿಚ್ಛಂ ಸಮ್ಮಾ ಸಮುಚ್ಛಿನ್ದತಿ, ಞಾಣೇನ ಅವಿಜ್ಜಂ ಸಮ್ಮಾ ಸಮುಚ್ಛಿನ್ದತಿ, ಪಾಮೋಜ್ಜೇನ ಅರತಿಂ ಸಮ್ಮಾ ಸಮುಚ್ಛಿನ್ದತಿ, ಪಠಮೇನ ಝಾನೇನ ನೀವರಣೇ ಸಮ್ಮಾ ಸಮುಚ್ಛಿನ್ದತಿ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸೇ ಸಮ್ಮಾ ಸಮುಚ್ಛಿನ್ದತಿ.

ನಿರೋಧೇತಿ ನೇಕ್ಖಮ್ಮೇನ ಕಾಮಚ್ಛನ್ದಂ ನಿರೋಧೇತಿ, ಅಬ್ಯಾಪಾದೇನ ಬ್ಯಾಪಾದಂ ನಿರೋಧೇತಿ, ಆಲೋಕಸಞ್ಞಾಯ ಥಿನಮಿದ್ಧಂ ನಿರೋಧೇತಿ, ಅವಿಕ್ಖೇಪೇನ ಉದ್ಧಚ್ಚಂ ನಿರೋಧೇತಿ, ಧಮ್ಮವವತ್ಥಾನೇನ ವಿಚಿಕಿಚ್ಛಂ ನಿರೋಧೇತಿ, ಞಾಣೇನ ಅವಿಜ್ಜಂ ನಿರೋಧೇತಿ, ಪಾಮೋಜ್ಜೇನ ಅರತಿಂ ನಿರೋಧೇತಿ, ಪಠಮೇನ ಝಾನೇನ ನೀವರಣೇ ನಿರೋಧೇತಿ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸೇ ನಿರೋಧೇತಿ.

ಅನುಪಟ್ಠಾನತಾತಿ ನೇಕ್ಖಮ್ಮಂ ಪಟಿಲದ್ಧಸ್ಸ ಕಾಮಚ್ಛನ್ದೋ ನ ಉಪಟ್ಠಾತಿ, ಅಬ್ಯಾಪಾದಂ ಪಟಿಲದ್ಧಸ್ಸ ಬ್ಯಾಪಾದೋ ನ ಉಪಟ್ಠಾತಿ, ಆಲೋಕಸಞ್ಞಂ ಪಟಿಲದ್ಧಸ್ಸ ಥಿನಮಿದ್ಧಂ ನ ಉಪಟ್ಠಾತಿ, ಅವಿಕ್ಖೇಪಂ ಪಟಿಲದ್ಧಸ್ಸ ಉದ್ಧಚ್ಚಂ ನ ಉಪಟ್ಠಾತಿ, ಧಮ್ಮವವತ್ಥಾನಂ ಪಟಿಲದ್ಧಸ್ಸ ವಿಚಿಕಿಚ್ಛಾ ನ ಉಪಟ್ಠಾತಿ, ಞಾಣಂ ಪಟಿಲದ್ಧಸ್ಸ ಅವಿಜ್ಜಾ ನ ಉಪಟ್ಠಾತಿ, ಪಾಮೋಜ್ಜಂ ಪಟಿಲದ್ಧಸ್ಸ ಅರತಿ ನ ಉಪಟ್ಠಾತಿ, ಪಠಮಂ ಝಾನಂ ಪಟಿಲದ್ಧಸ್ಸ ನೀವರಣಾ ನ ಉಪಟ್ಠನ್ತಿ…ಪೇ… ಅರಹತ್ತಮಗ್ಗಂ ಪಟಿಲದ್ಧಸ್ಸ ಸಬ್ಬಕಿಲೇಸಾ ನ ಉಪಟ್ಠನ್ತಿ.

ಸಮನ್ತಿ ಕಾಮಚ್ಛನ್ದಸ್ಸ ಪಹೀನತ್ತಾ ನೇಕ್ಖಮ್ಮಂ ಸಮಂ, ಬ್ಯಾಪಾದಸ್ಸ ಪಹೀನತ್ತಾ ಅಬ್ಯಾಪಾದೋ ಸಮಂ, ಥಿನಮಿದ್ಧಸ್ಸ ಪಹೀನತ್ತಾ ಆಲೋಕಸಞ್ಞಾ ಸಮಂ, ಉದ್ಧಚ್ಚಸ್ಸ ಪಹೀನತ್ತಾ ಅವಿಕ್ಖೇಪೋ ಸಮಂ, ವಿಚಿಕಿಚ್ಛಾಯ ಪಹೀನತ್ತಾ ಧಮ್ಮವವತ್ಥಾನಂ ಸಮಂ, ಅವಿಜ್ಜಾಯ ಪಹೀನತ್ತಾ ಞಾಣಂ ಸಮಂ, ಅರತಿಯಾ ಪಹೀನತ್ತಾ ಪಾಮೋಜ್ಜಂ ಸಮಂ, ನೀವರಣಾನಂ ಪಹೀನತ್ತಾ ಪಠಮಂ ಝಾನಂ ಸಮಂ…ಪೇ… ಸಬ್ಬಕಿಲೇಸಾನಂ ಪಹೀನತ್ತಾ ಅರಹತ್ತಮಗ್ಗೋ ಸಮಂ.

ಸೀಸನ್ತಿ ತೇರಸ ಸೀಸಾನಿ – ಪಲಿಬೋಧಸೀಸಞ್ಚ ತಣ್ಹಾ, ವಿನಿಬನ್ಧನಸೀಸಞ್ಚ ಮಾನೋ, ಪರಾಮಾಸಸೀಸಞ್ಚ ದಿಟ್ಠಿ, ವಿಕ್ಖೇಪಸೀಸಞ್ಚ ಉದ್ಧಚ್ಚಂ, ಸಂಕಿಲೇಸಸೀಸಞ್ಚ ಅವಿಜ್ಜಾ, ಅಧಿಮೋಕ್ಖಸೀಸಞ್ಚ ಸದ್ಧಾ, ಪಗ್ಗಹಸೀಸಞ್ಚ ವೀರಿಯಂ, ಉಪಟ್ಠಾನಸೀಸಞ್ಚ ಸತಿ, ಅವಿಕ್ಖೇಪಸೀಸಞ್ಚ ಸಮಾಧಿ, ದಸ್ಸನಸೀಸಞ್ಚ ಪಞ್ಞಾ, ಪವತ್ತಸೀಸಞ್ಚ ಜೀವಿತಿನ್ದ್ರಿಯಂ, ಗೋಚರಸೀಸಞ್ಚ ವಿಮೋಕ್ಖೋ, ಸಙ್ಖಾರಸೀಸಞ್ಚ ನಿರೋಧೋತಿ.

ಸಮಸೀಸಕಥಾ ನಿಟ್ಠಿತಾ.