೭. ಸಚ್ಚವಾರೋ

೩೬. ‘‘‘ಯಾವತಾ ದುಕ್ಖಸ್ಸ ದುಕ್ಖಟ್ಠೋ, ಞಾತೋ ದಿಟ್ಠೋ ವಿದಿತೋ ಸಚ್ಛಿಕತೋ ಫಸ್ಸಿತೋ ಪಞ್ಞಾಯ. ಅಫಸ್ಸಿತೋ ಪಞ್ಞಾಯ ದುಕ್ಖಟ್ಠೋ ನತ್ಥೀ’ತಿ – ಚಕ್ಖುಂ ಉದಪಾದಿ, ಞಾಣಂ ಉದಪಾದಿ, ಪಞ್ಞಾ ಉದಪಾದಿ, ವಿಜ್ಜಾ ಉದಪಾದಿ, ಆಲೋಕೋ ಉದಪಾದಿ’’. ದುಕ್ಖಸ್ಸ ದುಕ್ಖಟ್ಠೇ ಪಞ್ಚವೀಸತಿ ಧಮ್ಮಾ, ಪಞ್ಚವೀಸತಿ ಅತ್ಥಾ, ಪಞ್ಞಾಸ ನಿರುತ್ತಿಯೋ, ಸತಂ ಞಾಣಾನಿ.

‘‘‘ಯಾವತಾ ಸಮುದಯಸ್ಸ ಸಮುದಯಟ್ಠೋ…ಪೇ… ಯಾವತಾ ನಿರೋಧಸ್ಸ ನಿರೋಧಟ್ಠೋ…ಪೇ… ಯಾವತಾ ಮಗ್ಗಸ್ಸ ಮಗ್ಗಟ್ಠೋ ಞಾತೋ ದಿಟ್ಠೋ ವಿದಿತೋ ಸಚ್ಛಿಕತೋ ಫಸ್ಸಿತೋ ಪಞ್ಞಾಯ. ಅಫಸ್ಸಿತೋ ಪಞ್ಞಾಯ ಮಗ್ಗಟ್ಠೋ ನತ್ಥೀ’ತಿ – ಚಕ್ಖುಂ ಉದಪಾದಿ…ಪೇ… ಆಲೋಕೋ ಉದಪಾದಿ’’. ಮಗ್ಗಸ್ಸ ಮಗ್ಗಟ್ಠೇ ಪಞ್ಚವೀಸತಿ ಧಮ್ಮಾ, ಪಞ್ಚವೀಸತಿ ಅತ್ಥಾ, ಪಞ್ಞಾಸ ನಿರುತ್ತಿಯೋ, ಸತಂ ಞಾಣಾನಿ.

ಚತೂಸು ಅರಿಯಸಚ್ಚೇಸು ಸತಂ ಧಮ್ಮಾ, ಸತಂ ಅತ್ಥಾ, ದ್ವೇ ನಿರುತ್ತಿಸತಾನಿ, ಚತ್ತಾರಿ ಞಾಣಸತಾನಿ.