೨. ಯುಗನದ್ಧವಗ್ಗೋ

೧. ಯುಗನದ್ಧಕಥಾ

೧. ಏವಂ ಮೇ ಸುತಂ – ಏಕಂ ಸಮಯಂ ಆಯಸ್ಮಾ ಆನನ್ದೋ ಕೋಸಮ್ಬಿಯಂ ವಿಹರತಿ ಘೋಸಿತಾರಾಮೇ. ತತ್ರ ಖೋ ಆಯಸ್ಮಾ ಆನನ್ದೋ ಭಿಕ್ಖೂ ಆಮನ್ತೇಸಿ – ‘‘ಆವುಸೋ ಭಿಕ್ಖವೋ’’ತಿ. ‘‘ಆವುಸೋ’’ತಿ ಖೋ ತೇ ಭಿಕ್ಖೂ ಆಯಸ್ಮತೋ ಆನನ್ದಸ್ಸ ಪಚ್ಚಸ್ಸೋಸುಂ. ಆಯಸ್ಮಾ ಆನನ್ದೋ ಏತದವೋಚ –

‘‘ಯೋ ಹಿ ಕೋಚಿ, ಆವುಸೋ, ಭಿಕ್ಖು ವಾ ಭಿಕ್ಖುನೀ ವಾ ಮಮ ಸನ್ತಿಕೇ ಅರಹತ್ತಪತ್ತಂ [ಅರಹತ್ತಂ (ಸ್ಯಾ.), ಅರಹತ್ತಪತ್ತಿಂ ಅ. ನಿ. ೪.೧೭೦] ಬ್ಯಾಕರೋತಿ, ಸಬ್ಬಸೋ ಚತೂಹಿ ಮಗ್ಗೇಹಿ ಏತೇಸಂ ವಾ ಅಞ್ಞತರೇನ. ಕತಮೇಹಿ ಚತೂಹಿ?

‘‘ಇಧಾವುಸೋ, ಭಿಕ್ಖು ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವೇತಿ. ತಸ್ಸ ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವಯತೋ ಮಗ್ಗೋ ಸಞ್ಜಾಯತಿ. ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ [ಬಹುಲಿಂ ಕರೋತಿ (ಕ.) ಅ. ನಿ. ೪.೧೭೦ ಪಸ್ಸಿತಬ್ಬಾ]. ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

‘‘ಪುನ ಚಪರಂ, ಆವುಸೋ, ಭಿಕ್ಖು ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತಿ. ತಸ್ಸ ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವಯತೋ ಮಗ್ಗೋ ಸಞ್ಜಾಯತಿ. ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ. ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

‘‘ಪುನ ಚಪರಂ, ಆವುಸೋ, ಭಿಕ್ಖು ಸಮಥವಿಪಸ್ಸನಂ ಯುಗನದ್ಧಂ [ಯುಗನನ್ಧಂ (ಕ. ಸೀ. ಅಟ್ಠ.)] ಭಾವೇತಿ. ತಸ್ಸ ಸಮಥವಿಪಸ್ಸನಂ ಯುಗನದ್ಧಂ ಭಾವಯತೋ ಮಗ್ಗೋ ಸಞ್ಜಾಯತಿ. ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ. ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

‘‘ಪುನ ಚಪರಂ, ಆವುಸೋ, ಭಿಕ್ಖುನೋ ಧಮ್ಮುದ್ಧಚ್ಚವಿಗ್ಗಹಿತಂ ಮಾನಸಂ ಹೋತಿ. ಸೋ, ಆವುಸೋ, ಸಮಯೋ ಯಂ ತಂ ಚಿತ್ತಂ ಅಜ್ಝತ್ತಮೇವ [ಅಜ್ಝತ್ತಞ್ಞೇವ (ಸ್ಯಾ. ಕ.)] ಸನ್ತಿಟ್ಠತಿ ಸನ್ನಿಸೀದತಿ ಏಕೋದಿ ಹೋತಿ ಸಮಾಧಿಯತಿ. ತಸ್ಸ ಮಗ್ಗೋ ಸಞ್ಜಾಯತಿ. ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ. ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

‘‘ಯೋ ಹಿ ಕೋಚಿ, ಆವುಸೋ, ಭಿಕ್ಖು ವಾ ಭಿಕ್ಖುನೀ ವಾ ಮಮ ಸನ್ತಿಕೇ ಅರಹತ್ತಪತ್ತಂ ಬ್ಯಾಕರೋತಿ, ಸಬ್ಬಸೋ ಇಮೇಹಿ ಚತೂಹಿ ಮಗ್ಗೇಹಿ, ಏತೇಸಂ ವಾ ಅಞ್ಞತರೇನಾ’’ತಿ.

೧. ಸುತ್ತನ್ತನಿದ್ದೇಸೋ

೨. ಕಥಂ ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವೇತಿ? ನೇಕ್ಖಮ್ಮವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ. ತತ್ಥ ಜಾತೇ ಧಮ್ಮೇ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ಇತಿ ಪಠಮಂ ಸಮಥೋ, ಪಚ್ಛಾ ವಿಪಸ್ಸನಾ. ತೇನ ವುಚ್ಚತಿ – ‘‘ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ, ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ, ತದುಪಗವೀರಿಯವಾಹನಟ್ಠೇನ ಭಾವನಾ, ಆಸೇವನಟ್ಠೇನ ಭಾವನಾ.

ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ? ದಸ್ಸನಟ್ಠೇನ ಸಮ್ಮಾದಿಟ್ಠಿ ಮಗ್ಗೋ ಸಞ್ಜಾಯತಿ, ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ಮಗ್ಗೋ ಸಞ್ಜಾಯತಿ, ಪರಿಗ್ಗಹಟ್ಠೇನ ಸಮ್ಮಾವಾಚಾ ಮಗ್ಗೋ ಸಞ್ಜಾಯತಿ, ಸಮುಟ್ಠಾನಟ್ಠೇನ ಸಮ್ಮಾಕಮ್ಮನ್ತೋ ಮಗ್ಗೋ ಸಞ್ಜಾಯತಿ, ವೋದಾನಟ್ಠೇನ ಸಮ್ಮಾಆಜೀವೋ ಮಗ್ಗೋ ಸಞ್ಜಾಯತಿ, ಪಗ್ಗಹಟ್ಠೇನ ಸಮ್ಮಾವಾಯಾಮೋ ಮಗ್ಗೋ ಸಞ್ಜಾಯತಿ, ಉಪಟ್ಠಾನಟ್ಠೇನ ಸಮ್ಮಾಸತಿ ಮಗ್ಗೋ ಸಞ್ಜಾಯತಿ, ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಮಗ್ಗೋ ಸಞ್ಜಾಯತಿ – ಏವಂ ಮಗ್ಗೋ ಸಞ್ಜಾಯತಿ.

ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ ಆಸೇವತೀತಿ ಕಥಂ ಆಸೇವತಿ? ಆವಜ್ಜನ್ತೋ ಆಸೇವತಿ, ಜಾನನ್ತೋ ಆಸೇವತಿ, ಪಸ್ಸನ್ತೋ ಆಸೇವತಿ, ಪಚ್ಚವೇಕ್ಖನ್ತೋ ಆಸೇವತಿ, ಚಿತ್ತಂ ಅಧಿಟ್ಠಹನ್ತೋ ಆಸೇವತಿ, ಸದ್ಧಾಯ ಅಧಿಮುಚ್ಚನ್ತೋ ಆಸೇವತಿ, ವೀರಿಯಂ ಪಗ್ಗಣ್ಹನ್ತೋ ಆಸೇವತಿ, ಸತಿಂ ಉಪಟ್ಠಾಪೇನ್ತೋ ಆಸೇವತಿ, ಚಿತ್ತಂ ಸಮಾದಹನ್ತೋ ಆಸೇವತಿ, ಪಞ್ಞಾಯ ಪಜಾನನ್ತೋ ಆಸೇವತಿ, ಅಭಿಞ್ಞೇಯ್ಯಂ ಅಭಿಜಾನನ್ತೋ ಆಸೇವತಿ, ಪರಿಞ್ಞೇಯ್ಯಂ ಪರಿಜಾನನ್ತೋ ಆಸೇವತಿ, ಪಹಾತಬ್ಬಂ ಪಜಹನ್ತೋ ಆಸೇವತಿ, ಭಾವೇತಬ್ಬಂ ಭಾವೇನ್ತೋ ಆಸೇವತಿ, ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಆಸೇವತಿ – ಏವಂ ಆಸೇವತಿ.

ಭಾವೇತೀತಿ ಕಥಂ ಭಾವೇತಿ? ಆವಜ್ಜನ್ತೋ ಭಾವೇತಿ, ಜಾನನ್ತೋ ಭಾವೇತಿ, ಪಸ್ಸನ್ತೋ ಭಾವೇತಿ, ಪಚ್ಚವೇಕ್ಖನ್ತೋ ಭಾವೇತಿ, ಚಿತ್ತಂ ಅಧಿಟ್ಠಹನ್ತೋ ಭಾವೇತಿ, ಸದ್ಧಾಯ ಅಧಿಮುಚ್ಚನ್ತೋ ಭಾವೇತಿ, ವೀರಿಯಂ ಪಗ್ಗಣ್ಹನ್ತೋ ಭಾವೇತಿ, ಸತಿಂ ಉಪಟ್ಠಾಪೇನ್ತೋ ಭಾವೇತಿ, ಚಿತ್ತಂ ಸಮಾದಹನ್ತೋ ಭಾವೇತಿ, ಪಞ್ಞಾಯ ಪಜಾನನ್ತೋ ಭಾವೇತಿ, ಅಭಿಞ್ಞೇಯ್ಯಂ ಅಭಿಜಾನನ್ತೋ ಭಾವೇತಿ, ಪರಿಞ್ಞೇಯ್ಯಂ ಪರಿಜಾನನ್ತೋ ಭಾವೇತಿ, ಪಹಾತಬ್ಬಂ ಪಜಹನ್ತೋ ಭಾವೇತಿ, ಭಾವೇತಬ್ಬಂ ಭಾವೇನ್ತೋ ಭಾವೇತಿ, ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಭಾವೇತಿ – ಏವಂ ಭಾವೇತಿ.

ಬಹುಲೀಕರೋತೀತಿ ಕಥಂ ಬಹುಲೀಕರೋತಿ? ಆವಜ್ಜನ್ತೋ ಬಹುಲೀಕರೋತಿ, ಜಾನನ್ತೋ ಬಹುಲೀಕರೋತಿ, ಪಸ್ಸನ್ತೋ ಬಹುಲೀಕರೋತಿ, ಪಚ್ಚವೇಕ್ಖನ್ತೋ ಬಹುಲೀಕರೋತಿ, ಚಿತ್ತಂ ಅಧಿಟ್ಠಹನ್ತೋ ಬಹುಲೀಕರೋತಿ, ಸದ್ಧಾಯ ಅಧಿಮುಚ್ಚನ್ತೋ ಬಹುಲೀಕರೋತಿ, ವೀರಿಯಂ ಪಗ್ಗಣ್ಹನ್ತೋ ಬಹುಲೀಕರೋತಿ, ಸತಿಂ ಉಪಟ್ಠಾಪೇನ್ತೋ ಬಹುಲೀಕರೋತಿ, ಚಿತ್ತಂ ಸಮಾದಹನ್ತೋ ಬಹುಲೀಕರೋತಿ, ಪಞ್ಞಾಯ ಪಜಾನನ್ತೋ ಬಹುಲೀಕರೋತಿ, ಅಭಿಞ್ಞೇಯ್ಯಂ ಅಭಿಜಾನನ್ತೋ ಬಹುಲೀಕರೋತಿ, ಪರಿಞ್ಞೇಯ್ಯಂ ಪರಿಜಾನನ್ತೋ ಬಹುಲೀಕರೋತಿ, ಪಹಾತಬ್ಬಂ ಪಜಹನ್ತೋ ಬಹುಲೀಕರೋತಿ, ಭಾವೇತಬ್ಬಂ ಭಾವೇನ್ತೋ ಬಹುಲೀಕರೋತಿ, ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಬಹುಲೀಕರೋತಿ – ಏವಂ ಬಹುಲೀಕರೋತಿ.

ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ ಅನುಸಯಾ ಬ್ಯನ್ತೀಹೋನ್ತೀತಿ ಕಥಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ? ಸೋತಾಪತ್ತಿಮಗ್ಗೇನ, ಸಕ್ಕಾಯದಿಟ್ಠಿ, ವಿಚಿಕಿಚ್ಛಾ, ಸೀಲಬ್ಬತಪರಾಮಾಸೋ – ಇಮಾನಿ ತೀಣಿ ಸಞ್ಞೋಜನಾನಿ ಪಹೀಯನ್ತಿ; ದಿಟ್ಠಾನುಸಯೋ, ವಿಚಿಕಿಚ್ಛಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಸಕದಾಗಾಮಿಮಗ್ಗೇನ ಓಳಾರಿಕಂ ಕಾಮರಾಗಸಞ್ಞೋಜನಂ, ಪಟಿಘಸಞ್ಞೋಜನಂ – ಇಮಾನಿ ದ್ವೇ ಸಞ್ಞೋಜನಾನಿ ಪಹೀಯನ್ತಿ; ಓಳಾರಿಕೋ ಕಾಮರಾಗಾನುಸಯೋ, ಪಟಿಘಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಅನಾಗಾಮಿಮಗ್ಗೇನ ಅನುಸಹಗತಂ ಕಾಮರಾಗಸಞ್ಞೋಜನಂ, ಪಟಿಘಸಞ್ಞೋಜನಂ – ಇಮಾನಿ ದ್ವೇ ಸಞ್ಞೋಜನಾನಿ ಪಹೀಯನ್ತಿ; ಅನುಸಹಗತೋ ಕಾಮರಾಗಾನುಸಯೋ, ಪಟಿಘಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಅರಹತ್ತಮಗ್ಗೇನ ರೂಪರಾಗೋ, ಅರೂಪರಾಗೋ, ಮಾನೋ, ಉದ್ಧಚ್ಚಂ, ಅವಿಜ್ಜಾ – ಇಮಾನಿ ಪಞ್ಚ ಸಞ್ಞೋಜನಾನಿ ಪಹೀಯನ್ತಿ; ಮಾನಾನುಸಯೋ, ಭವರಾಗಾನುಸಯೋ, ಅವಿಜ್ಜಾನುಸಯೋ – ಇಮೇ ತಯೋ ಅನುಸಯಾ ಬ್ಯನ್ತೀಹೋನ್ತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

೩. ಅಬ್ಯಾಪಾದವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ…ಪೇ… ಆಲೋಕಸಞ್ಞಾವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ…ಪೇ… ಪಟಿನಿಸ್ಸಗ್ಗಾನುಪಸ್ಸೀ ಅಸ್ಸಾಸವಸೇನ ಪಟಿನಿಸ್ಸಗ್ಗಾನುಪಸ್ಸೀ ಪಸ್ಸಾಸವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ. ತತ್ಥ ಜಾತೇ ಧಮ್ಮೇ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ಇತಿ ಪಠಮಂ ಸಮಥೋ, ಪಚ್ಛಾ ವಿಪಸ್ಸನಾ. ತೇನ ವುಚ್ಚತಿ – ‘‘ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ, ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ, ತದುಪಗವೀರಿಯವಾಹನಟ್ಠೇನ ಭಾವನಾ, ಆಸೇವನಟ್ಠೇನ ಭಾವನಾ.

ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ? ದಸ್ಸನಟ್ಠೇನ ಸಮ್ಮಾದಿಟ್ಠಿ ಮಗ್ಗೋ ಸಞ್ಜಾಯತಿ, ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ಮಗ್ಗೋ ಸಞ್ಜಾಯತಿ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಮಗ್ಗೋ ಸಞ್ಜಾಯತಿ. ಏವಂ ಮಗ್ಗೋ ಸಞ್ಜಾಯತಿ.

ಸೋ ತಂ ಮಗ್ಗಂ ಆಸೇವತಿ ಭಾವೇತಿ ಬಹುಲೀಕರೋತಿ ಆಸೇವತೀತಿ ಕಥಂ ಆಸೇವತಿ? ಆವಜ್ಜನ್ತೋ ಆಸೇವತಿ…ಪೇ… ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಆಸೇವತಿ, ಏವಂ ಆಸೇವತಿ. ಭಾವೇತೀತಿ ಕಥಂ ಭಾವೇತಿ? ಆವಜ್ಜನ್ತೋ ಭಾವೇತಿ, ಜಾನನ್ತೋ ಭಾವೇತಿ…ಪೇ… ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಭಾವೇತಿ, ಏವಂ ಭಾವೇತಿ. ಬಹುಲೀಕರೋತೀತಿ ಕಥಂ ಬಹುಲೀಕರೋತಿ? ಆವಜ್ಜನ್ತೋ ಬಹುಲೀಕರೋತಿ, ಜಾನನ್ತೋ ಬಹುಲೀಕರೋತಿ…ಪೇ… ಸಚ್ಛಿಕಾತಬ್ಬಂ ಸಚ್ಛಿಕರೋನ್ತೋ ಬಹುಲೀಕರೋತಿ, ಏವಂ ಬಹುಲೀಕರೋತಿ.

ತಸ್ಸ ತಂ ಮಗ್ಗಂ ಆಸೇವತೋ ಭಾವಯತೋ ಬಹುಲೀಕರೋತೋ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತೀತಿ ಕಥಂ ಸಞ್ಞೋಜನಾ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ? ಸೋತಾಪತ್ತಿಮಗ್ಗೇನ ಸಕ್ಕಾಯದಿಟ್ಠಿ ವಿಚಿಕಿಚ್ಛಾ ಸೀಲಬ್ಬತಪರಾಮಾಸೋ – ಇಮಾನಿ ತೀಣಿ ಸಞ್ಞೋಜನಾನಿ ಪಹೀಯನ್ತಿ; ದಿಟ್ಠಾನುಸಯೋ, ವಿಚಿಕಿಚ್ಛಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಸಕದಾಗಾಮಿಮಗ್ಗೇನ ಓಳಾರಿಕಂ ಕಾಮರಾಗಸಞ್ಞೋಜನಂ, ಪಟಿಘಸಞ್ಞೋಜನಂ – ಇಮಾನಿ ದ್ವೇ ಸಞ್ಞೋಜನಾನಿ ಪಹೀಯನ್ತಿ; ಓಳಾರಿಕೋ ಕಾಮರಾಗಾನುಸಯೋ ಪಟಿಘಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಅನಾಗಾಮಿಮಗ್ಗೇನ ಅನುಸಹಗತಂ ಕಾಮರಾಗಸಞ್ಞೋಜನಂ, ಪಟಿಘಸಞ್ಞೋಜನಂ – ಇಮಾನಿ ದ್ವೇ ಸಞ್ಞೋಜನಾನಿ ಪಹೀಯನ್ತಿ; ಅನುಸಹಗತೋ ಕಾಮರಾಗಾನುಸಯೋ, ಪಟಿಘಾನುಸಯೋ – ಇಮೇ ದ್ವೇ ಅನುಸಯಾ ಬ್ಯನ್ತೀಹೋನ್ತಿ. ಅರಹತ್ತಮಗ್ಗೇನ ರೂಪರಾಗೋ, ಅರೂಪರಾಗೋ, ಮಾನೋ, ಉದ್ಧಚ್ಚಂ, ಅವಿಜ್ಜಾ – ಇಮಾನಿ ಪಞ್ಚ ಸಞ್ಞೋಜನಾನಿ ಪಹೀಯನ್ತಿ; ಮಾನಾನುಸಯೋ, ಭವರಾಗಾನುಸಯೋ, ಅವಿಜ್ಜಾನುಸಯೋ – ಇಮೇ ತಯೋ ಅನುಸಯಾ ಬ್ಯನ್ತೀಹೋನ್ತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ. ಏವಂ ಸಮಥಪುಬ್ಬಙ್ಗಮಂ ವಿಪಸ್ಸನಂ ಭಾವೇತಿ.

೪. ಕಥಂ ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತಿ? ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ತತ್ಥ ಜಾತಾನಂ ಧಮ್ಮಾನಞ್ಚ ವೋಸಗ್ಗಾರಮ್ಮಣತಾ [ವೋಸ್ಸಗ್ಗಾರಮ್ಮಣತಾ (ಸ್ಯಾ. ಕ.)] ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ. ಸಮಾಧಿ ಇತಿ ಪಠಮಂ ವಿಪಸ್ಸನಾ, ಪಚ್ಛಾ ಸಮಥೋ. ತೇನ ವುಚ್ಚತಿ – ‘‘ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ಆಸೇವನಟ್ಠೇನ ಭಾವನಾ…ಪೇ… ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

ರೂಪಂ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ರೂಪಂ ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ರೂಪಂ ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ತತ್ಥ ಜಾತಾನಂ ಧಮ್ಮಾನಞ್ಚ ವೋಸಗ್ಗಾರಮ್ಮಣತಾ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ. ಇತಿ ಪಠಮಂ ವಿಪಸ್ಸನಾ, ಪಚ್ಛಾ ಸಮಥೋ. ತೇನ ವುಚ್ಚತಿ – ‘‘ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ಆಸೇವನಟ್ಠೇನ ಭಾವನಾ…ಪೇ… ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

ವೇದನಂ…ಪೇ… ಸಞ್ಞಂ … ಸಙ್ಖಾರೇ… ವಿಞ್ಞಾಣಂ… ಚಕ್ಖುಂ…ಪೇ… ಜರಾಮರಣಂ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಜರಾಮರಣಂ ದುಕ್ಖತೋ…ಪೇ… ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ತತ್ಥ ಜಾತಾನಂ ಧಮ್ಮಾನಞ್ಚ ವೋಸಗ್ಗಾರಮ್ಮಣತಾ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ. ಇತಿ ಪಠಮಂ ವಿಪಸ್ಸನಾ, ಪಚ್ಛಾ ಸಮಥೋ. ತೇನ ವುಚ್ಚತಿ – ‘‘ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ಆಸೇವನಟ್ಠೇನ ಭಾವನಾ…ಪೇ… ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ. ಏವಂ ವಿಪಸ್ಸನಾಪುಬ್ಬಙ್ಗಮಂ ಸಮಥಂ ಭಾವೇತಿ.

೫. ಕಥಂ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಸೋಳಸಹಿ ಆಕಾರೇಹಿ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ. ಆರಮ್ಮಣಟ್ಠೇನ ಗೋಚರಟ್ಠೇನ ಪಹಾನಟ್ಠೇನ ಪರಿಚ್ಚಾಗಟ್ಠೇನ ವುಟ್ಠಾನಟ್ಠೇನ ವಿವಟ್ಟನಟ್ಠೇನ ಸನ್ತಟ್ಠೇನ ಪಣೀತಟ್ಠೇನ ವಿಮುತ್ತಟ್ಠೇನ ಅನಾಸವಟ್ಠೇನ ತರಣಟ್ಠೇನ ಅನಿಮಿತ್ತಟ್ಠೇನ ಅಪ್ಪಣಿಹಿತಟ್ಠೇನ ಸುಞ್ಞತಟ್ಠೇನ ಏಕರಸಟ್ಠೇನ ಅನತಿವತ್ತನಟ್ಠೇನ ಯುಗನದ್ಧಟ್ಠೇನ.

ಕಥಂ ಆರಮ್ಮಣಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಾರಮ್ಮಣೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಾರಮ್ಮಣಾ. ಇತಿ ಆರಮ್ಮಣಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಆರಮ್ಮಣಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ಆಸೇವನಟ್ಠೇನ ಭಾವನಾ…ಪೇ… ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ. ಏವಂ ಆರಮ್ಮಣಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ.

ಕಥಂ ಗೋಚರಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ಗೋಚರಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಗೋಚರಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಪಹಾನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಸಹಗತಕಿಲೇಸೇ ಚ ಖನ್ಧೇ ಚ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಾಸಹಗತಕಿಲೇಸೇ ಚ ಖನ್ಧೇ ಚ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ಪಹಾನಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಪಹಾನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಪರಿಚ್ಚಾಗಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಸಹಗತಕಿಲೇಸೇ ಚ ಖನ್ಧೇ ಚ ಪರಿಚ್ಚಜತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಾಸಹಗತಕಿಲೇಸೇ ಚ ಖನ್ಧೇ ಚ ಪರಿಚ್ಚಜತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ಪರಿಚ್ಚಾಗಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಪರಿಚ್ಚಾಗಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ವುಟ್ಠಾನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಸಹಗತಕಿಲೇಸೇಹಿ ಚ ಖನ್ಧೇಹಿ ಚ ವುಟ್ಠಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಾಸಹಗತಕಿಲೇಸೇಹಿ ಚ ಖನ್ಧೇಹಿ ಚ ವುಟ್ಠಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ವುಟ್ಠಾನಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ವುಟ್ಠಾನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ವಿವಟ್ಟನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಸಹಗತಕಿಲೇಸೇಹಿ ಚ ಖನ್ಧೇಹಿ ಚ ವಿವಟ್ಟತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಾಸಹಗತಕಿಲೇಸೇಹಿ ಚ ಖನ್ಧೇಹಿ ಚ ವಿವಟ್ಟತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ವಿವಟ್ಟನಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ವಿವಟ್ಟನಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಸನ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಸನ್ತೋ ಹೋನ್ತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಸನ್ತಾ ಹೋತಿ ನಿರೋಧಗೋಚರಾ. ಇತಿ ಸನ್ತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಸನ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಪಣೀತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಪಣೀತೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಪಣೀತಾ ಹೋತಿ ನಿರೋಧಗೋಚರಾ. ಇತಿ ಪಣೀತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಪಣೀತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ವಿಮುತ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಕಾಮಾಸವಾ ವಿಮುತ್ತೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಅವಿಜ್ಜಾಸವಾ ವಿಮುತ್ತಾ ಹೋತಿ ನಿರೋಧಗೋಚರಾ. ಇತಿ ರಾಗವಿರಾಗಾ ಚೇತೋವಿಮುತ್ತಿ ಅವಿಜ್ಜಾವಿರಾಗಾ ಪಞ್ಞಾ ವಿಮುತ್ತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ವಿಮುತ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಅನಾಸವಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಕಾಮಾಸವೇನ ಅನಾಸವೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಅವಿಜ್ಜಾಸವೇನ ಅನಾಸವಾ ಹೋತಿ ನಿರೋಧಗೋಚರಾ. ಇತಿ ಅನಾಸವಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಅನಾಸವಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ತರಣಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಸಹಗತಕಿಲೇಸೇ ಚ ಖನ್ಧೇ ಚ ತರತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ನಿರೋಧಗೋಚರೋ, ಅವಿಜ್ಜಾಸಹಗತಕಿಲೇಸೇ ಚ ಖನ್ಧೇ ಚ ತರತೋ ಅನುಪಸ್ಸನಟ್ಠೇನ ವಿಪಸ್ಸನಾ ನಿರೋಧಗೋಚರಾ. ಇತಿ ತರಣಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ತರಣಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಅನಿಮಿತ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಸಬ್ಬನಿಮಿತ್ತೇಹಿ ಅನಿಮಿತ್ತೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಸಬ್ಬನಿಮಿತ್ತೇಹಿ ಅನಿಮಿತ್ತಾ ಹೋತಿ ನಿರೋಧಗೋಚರಾ. ಇತಿ ಅನಿಮಿತ್ತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಅನಿಮಿತ್ತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಅಪ್ಪಣಿಹಿತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಸಬ್ಬಪಣಿಧೀಹಿ ಅಪ್ಪಣಿಹಿತೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಸಬ್ಬಪಣಿಧೀಹಿ ಅಪ್ಪಣಿಹಿತಾ ಹೋತಿ ನಿರೋಧಗೋಚರಾ. ಇತಿ ಅಪ್ಪಣಿಹಿತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಅಪ್ಪಣಿಹಿತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ.

ಕಥಂ ಸುಞ್ಞತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ? ಉದ್ಧಚ್ಚಂ ಪಜಹತೋ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ ಸಬ್ಬಾಭಿನಿವೇಸೇಹಿ ಸುಞ್ಞೋ ಹೋತಿ ನಿರೋಧಗೋಚರೋ, ಅವಿಜ್ಜಂ ಪಜಹತೋ ಅನುಪಸ್ಸನಟ್ಠೇನ ವಿಪಸ್ಸನಾ ಸಬ್ಬಾಭಿನಿವೇಸೇಹಿ ಸುಞ್ಞಾ ಹೋತಿ ನಿರೋಧಗೋಚರಾ. ಇತಿ ಸುಞ್ಞತಟ್ಠೇನ ಸಮಥವಿಪಸ್ಸನಾ ಏಕರಸಾ ಹೋನ್ತಿ, ಯುಗನದ್ಧಾ ಹೋನ್ತಿ, ಅಞ್ಞಮಞ್ಞಂ ನಾತಿವತ್ತನ್ತೀತಿ. ತೇನ ವುಚ್ಚತಿ – ‘‘ಸುಞ್ಞತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತೀ’’ತಿ. ಭಾವೇತೀತಿ ಚತಸ್ಸೋ ಭಾವನಾ – ಆಸೇವನಟ್ಠೇನ ಭಾವನಾ…ಪೇ… ಮಗ್ಗೋ ಸಞ್ಜಾಯತೀತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ. ಏವಂ ಸುಞ್ಞತಟ್ಠೇನ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ. ಇಮೇಹಿ ಸೋಳಸಹಿ ಆಕಾರೇಹಿ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ, ಏವಂ ಸಮಥವಿಪಸ್ಸನಂ ಯುಗನದ್ಧಂ ಭಾವೇತಿ.

ಸುತ್ತನ್ತನಿದ್ದೇಸೋ.

೨. ಧಮ್ಮುದ್ಧಚ್ಚವಾರನಿದ್ದೇಸೋ

೬. ಕಥಂ ಧಮ್ಮುದ್ಧಚ್ಚವಿಗ್ಗಹಿತಂ ಮಾನಸಂ ಹೋತಿ? ಅನಿಚ್ಚತೋ ಮನಸಿಕರೋತೋ ಓಭಾಸೋ ಉಪ್ಪಜ್ಜತಿ, ಓಭಾಸೋ ಧಮ್ಮೋತಿ ಓಭಾಸಂ ಆವಜ್ಜತಿ, ತತೋ ವಿಕ್ಖೇಪೋ ಉದ್ಧಚ್ಚಂ. ತೇನ ಉದ್ಧಚ್ಚೇನ ವಿಗ್ಗಹಿತಮಾನಸೋ ಅನಿಚ್ಚತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ, ದುಕ್ಖತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ, ಅನತ್ತತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ. ತೇನ ವುಚ್ಚತಿ – ‘‘ಧಮ್ಮುದ್ಧಚ್ಚವಿಗ್ಗಹಿತಮಾನಸೋ ಹೋತಿ ಸೋ ಸಮಯೋ, ಯಂ ತಂ ಚಿತ್ತಂ ಅಜ್ಝತ್ತಮೇವ ಸನ್ತಿಟ್ಠತಿ ಸನ್ನಿಸೀದತಿ ಏಕೋದಿ ಹೋತಿ ಸಮಾಧಿಯತಿ. ತಸ್ಸ ಮಗ್ಗೋ ಸಞ್ಜಾಯತೀ’’ತಿ ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ, ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

ಅನಿಚ್ಚತೋ ಮನಸಿಕರೋತೋ ಞಾಣಂ ಉಪ್ಪಜ್ಜತಿ, ಪೀತಿ ಉಪ್ಪಜ್ಜತಿ, ಪಸ್ಸದ್ಧಿ ಉಪ್ಪಜ್ಜತಿ, ಸುಖಂ ಉಪ್ಪಜ್ಜತಿ, ಅಧಿಮೋಕ್ಖೋ ಉಪ್ಪಜ್ಜತಿ, ಪಗ್ಗಹೋ ಉಪ್ಪಜ್ಜತಿ, ಉಪಟ್ಠಾನಂ ಉಪ್ಪಜ್ಜತಿ, ಉಪೇಕ್ಖಾ ಉಪ್ಪಜ್ಜತಿ, ನಿಕನ್ತಿ ಉಪ್ಪಜ್ಜತಿ, ‘ನಿಕನ್ತಿ ಧಮ್ಮೋ’ತಿ ನಿಕನ್ತಿಂ ಆವಜ್ಜತಿ. ತತೋ ವಿಕ್ಖೇಪೋ ಉದ್ಧಚ್ಚಂ. ತೇನ ಉದ್ಧಚ್ಚೇನ ವಿಗ್ಗಹಿತಮಾನಸೋ ಅನಿಚ್ಚತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ, ದುಕ್ಖತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ, ಅನತ್ತತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ. ತೇನ ವುಚ್ಚತಿ – ‘‘ಧಮ್ಮುದ್ಧಚ್ಚವಿಗ್ಗಹಿತಮಾನಸೋ ಹೋತಿ ಸೋ ಸಮಯೋ, ಯಂ ತಂ ಚಿತ್ತಂ ಅಜ್ಝತ್ತಮೇವ ಸನ್ತಿಟ್ಠತಿ ಸನ್ನಿಸೀದತಿ ಏಕೋದಿ ಹೋತಿ ಸಮಾಧಿಯತಿ. ತಸ್ಸ ಮಗ್ಗೋ ಸಞ್ಜಾಯತೀ’’ತಿ. ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ, ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ.

ದುಕ್ಖತೋ ಮನಸಿಕರೋತೋ…ಪೇ… ಅನತ್ತತೋ ಮನಸಿಕರೋತೋ ಓಭಾಸೋ ಉಪ್ಪಜ್ಜತಿ…ಪೇ… ಞಾಣಂ ಉಪ್ಪಜ್ಜತಿ, ಪೀತಿ ಉಪ್ಪಜ್ಜತಿ, ಪಸ್ಸದ್ಧಿ ಉಪ್ಪಜ್ಜತಿ, ಸುಖಂ ಉಪ್ಪಜ್ಜತಿ, ಅಧಿಮೋಕ್ಖೋ ಉಪ್ಪಜ್ಜತಿ, ಪಗ್ಗಹೋ ಉಪ್ಪಜ್ಜತಿ, ಉಪಟ್ಠಾನಂ ಉಪ್ಪಜ್ಜತಿ, ಉಪೇಕ್ಖಾ ಉಪ್ಪಜ್ಜತಿ, ನಿಕನ್ತಿ ಉಪ್ಪಜ್ಜತಿ, ‘ನಿಕನ್ತಿ ಧಮ್ಮೋ’ತಿ ನಿಕನ್ತಿಂ ಆವಜ್ಜತಿ. ತತೋ ವಿಕ್ಖೇಪೋ ಉದ್ಧಚ್ಚಂ. ತೇನ ಉದ್ಧಚ್ಚೇನ ವಿಗ್ಗಹಿತಮಾನಸೋ ಅನತ್ತತೋ ಉಪಟ್ಠಾನಂ, ಅನಿಚ್ಚತೋ ಉಪಟ್ಠಾನಂ, ದುಕ್ಖತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ. ತೇನ ವುಚ್ಚತಿ – ‘‘ಧಮ್ಮುದ್ಧಚ್ಚವಿಗ್ಗಹಿತಮಾನಸೋ…ಪೇ… ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ’’.

ರೂಪಂ ಅನಿಚ್ಚತೋ ಮನಸಿಕರೋತೋ…ಪೇ… ರೂಪಂ ದುಕ್ಖತೋ ಮನಸಿಕರೋತೋ… ರೂಪಂ ಅನತ್ತತೋ ಮನಸಿಕರೋತೋ… ವೇದನಂ…ಪೇ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ… ಚಕ್ಖುಂ…ಪೇ… ಜರಾಮರಣಂ ಅನಿಚ್ಚತೋ ಮನಸಿಕರೋತೋ…ಪೇ… ಜರಾಮರಣಂ ದುಕ್ಖತೋ ಮನಸಿಕರೋತೋ, ಜರಾಮರಣಂ ಅನತ್ತತೋ ಮನಸಿಕರೋತೋ ಓಭಾಸೋ ಉಪ್ಪಜ್ಜತಿ…ಪೇ… ಞಾಣಂ ಉಪ್ಪಜ್ಜತಿ, ಪೀತಿ ಉಪ್ಪಜ್ಜತಿ, ಪಸ್ಸದ್ಧಿ ಉಪ್ಪಜ್ಜತಿ, ಸುಖಂ ಉಪ್ಪಜ್ಜತಿ, ಅಧಿಮೋಕ್ಖೋ ಉಪ್ಪಜ್ಜತಿ, ಪಗ್ಗಹೋ ಉಪ್ಪಜ್ಜತಿ, ಉಪಟ್ಠಾನಂ ಉಪ್ಪಜ್ಜತಿ, ಉಪೇಕ್ಖಾ ಉಪ್ಪಜ್ಜತಿ, ನಿಕನ್ತಿ ಉಪ್ಪಜ್ಜತಿ, ‘ನಿಕನ್ತಿ ಧಮ್ಮೋ’ತಿ ನಿಕನ್ತಿಂ ಆವಜ್ಜತಿ. ತತೋ ವಿಕ್ಖೇಪೋ ಉದ್ಧಚ್ಚಂ. ತೇನ ಉದ್ಧಚ್ಚೇನ ವಿಗ್ಗಹಿತಮಾನಸೋ. ಜರಾಮರಣಂ ಅನತ್ತತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ. ಜರಾಮರಣಂ ಅನಿಚ್ಚತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ, ಜರಾಮರಣಂ ದುಕ್ಖತೋ ಉಪಟ್ಠಾನಂ ಯಥಾಭೂತಂ ನಪ್ಪಜಾನಾತಿ. ತೇನ ವುಚ್ಚತಿ – ‘‘ಧಮ್ಮುದ್ಧಚ್ಚವಿಗ್ಗಹಿತಮಾನಸೋ ಹೋತಿ. ಸೋ ಸಮಯೋ, ಯಂ ತಂ ಚಿತ್ತಂ ಅಜ್ಝತ್ತಮೇವ ಸನ್ತಿಟ್ಠತಿ ಸನ್ನಿಸೀದತಿ ಏಕೋದಿ ಹೋತಿ ಸಮಾಧಿಯತಿ. ತಸ್ಸ ಮಗ್ಗೋ ಸಞ್ಜಾಯತೀ’’ತಿ. ಕಥಂ ಮಗ್ಗೋ ಸಞ್ಜಾಯತಿ…ಪೇ… ಏವಂ ಮಗ್ಗೋ ಸಞ್ಜಾಯತಿ. ಏವಂ ಸಞ್ಞೋಜನಾನಿ ಪಹೀಯನ್ತಿ, ಅನುಸಯಾ ಬ್ಯನ್ತೀಹೋನ್ತಿ. ಏವಂ ಧಮ್ಮುದ್ಧಚ್ಚವಿಗ್ಗಹಿತಂ ಮಾನಸಂ ಹೋತಿ.

೭. ಓಭಾಸೇ ಚೇವ ಞಾಣೇ ಚ, ಪೀತಿಯಾ ಚ ವಿಕಮ್ಪತಿ;

ಪಸ್ಸದ್ಧಿಯಾ ಸುಖೇ ಚೇವ, ಯೇಹಿ ಚಿತ್ತಂ ಪವೇಧತಿ.

ಅಧಿಮೋಕ್ಖೇ ಚ ಪಗ್ಗಾಹೇ, ಉಪಟ್ಠಾನೇ ಚ ಕಮ್ಪತಿ;

ಉಪೇಕ್ಖಾವಜ್ಜನಾಯ ಚೇವ, ಉಪೇಕ್ಖಾಯ ಚ ನಿಕನ್ತಿಯಾ.

ಇಮಾನಿ ದಸ ಠಾನಾನಿ, ಪಞ್ಞಾ ಯಸ್ಸ ಪರಿಚ್ಚಿತಾ;

ಧಮ್ಮುದ್ಧಚ್ಚಕುಸಲೋ ಹೋತಿ, ನ ಚ ಸಮ್ಮೋಹ ಗಚ್ಛತಿ.

ವಿಕ್ಖಿಪತಿ ಚೇವ ಕಿಲಿಸ್ಸತಿ ಚ, ಚವತಿ ಚಿತ್ತಭಾವನಾ;

ವಿಕ್ಖಿಪತಿ ನ ಕಿಲಿಸ್ಸತಿ, ಭಾವನಾ ಪರಿಹಾಯತಿ.

ವಿಕ್ಖಿಪತಿ ನ ಕಿಲಿಸ್ಸತಿ, ಭಾವನಾ ನ ಪರಿಹಾಯತಿ;

ನ ಚ ವಿಕ್ಖಿಪತೇ ಚಿತ್ತಂ ನ ಕಿಲಿಸ್ಸತಿ, ನ ಚವತಿ ಚಿತ್ತಭಾವನಾ.

ಇಮೇಹಿ ಚತೂಹಿ ಠಾನೇಹಿ ಚಿತ್ತಸ್ಸ ಸಙ್ಖೇಪವಿಕ್ಖೇಪವಿಗ್ಗಹಿತಂ [ಸಙ್ಖೇಪಂ ವಿಕ್ಖೇಪಂ ವಿಗ್ಗಹಿತಂ (ಸ್ಯಾ.)] ದಸ ಠಾನೇ ಸಮ್ಪಜಾನಾತೀತಿ.

ಯುಗನದ್ಧಕಥಾ ನಿಟ್ಠಿತಾ.

೨. ಸಚ್ಚಕಥಾ

೮. ಪುರಿಮನಿದಾನಂ. ‘‘ಚತ್ತಾರಿಮಾನಿ, ಭಿಕ್ಖವೇ [ಸಂ. ನಿ. ೫.೧೦೯೦], ತಥಾನಿ ಅವಿತಥಾನಿ ಅನಞ್ಞಥಾನಿ. ಕತಮಾನಿ ಚತ್ತಾರಿ? ‘ಇದಂ ದುಕ್ಖ’ನ್ತಿ, ಭಿಕ್ಖವೇ, ತಥಮೇತಂ ಅವಿತಥಮೇತಂ ಅನಞ್ಞಥಮೇತಂ; ‘ಅಯಂ ದುಕ್ಖಸಮುದಯೋ’ತಿ ತಥಮೇತಂ ಅವಿತಥಮೇತಂ ಅನಞ್ಞಥಮೇತಂ, ‘ಅಯಂ ದುಕ್ಖನಿರೋಧೋ’ತಿ ತಥಮೇತಂ ಅವಿತಥಮೇತಂ ಅನಞ್ಞಥಮೇತಂ, ‘ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾ’ತಿ ತಥಮೇತಂ ಅವಿತಥಮೇತಂ ಅನಞ್ಞಥಮೇತಂ. ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ತಥಾನಿ ಅವಿತಥಾನಿ ಅನಞ್ಞಥಾನಿ’’.

೧. ಪಠಮಸುತ್ತನ್ತನಿದ್ದೇಸೋ

ಕಥಂ ದುಕ್ಖಂ ತಥಟ್ಠೇನ ಸಚ್ಚಂ? ಚತ್ತಾರೋ ದುಕ್ಖಸ್ಸ ದುಕ್ಖಟ್ಠಾ ತಥಾ ಅವಿತಥಾ ಅನಞ್ಞಥಾ. ದುಕ್ಖಸ್ಸ ಪೀಳನಟ್ಠೋ, ಸಙ್ಖತಟ್ಠೋ, ಸನ್ತಾಪಟ್ಠೋ, ವಿಪರಿಣಾಮಟ್ಠೋ – ಇಮೇ ಚತ್ತಾರೋ ದುಕ್ಖಸ್ಸ ದುಕ್ಖಟ್ಠಾ ತಥಾ ಅವಿತಥಾ ಅನಞ್ಞಥಾ. ಏವಂ ದುಕ್ಖಂ ತಥಟ್ಠೇನ ಸಚ್ಚಂ.

ಕಥಂ ಸಮುದಯೋ ತಥಟ್ಠೇನ ಸಚ್ಚಂ? ಚತ್ತಾರೋ ಸಮುದಯಸ್ಸ ಸಮುದಯಟ್ಠಾ ತಥಾ ಅವಿತಥಾ ಅನಞ್ಞಥಾ. ಸಮುದಯಸ್ಸ ಆಯೂಹನಟ್ಠೋ, ನಿದಾನಟ್ಠೋ, ಸಂಯೋಗಟ್ಠೋ ಪಲಿಬೋಧಟ್ಠೋ – ಇಮೇ ಚತ್ತಾರೋ ಸಮುದಯಸ್ಸ ಸಮುದಯಟ್ಠಾ ತಥಾ ಅವಿತಥಾ ಅನಞ್ಞಥಾ. ಏವಂ ಸಮುದಯೋ ತಥಟ್ಠೇನ ಸಚ್ಚಂ.

ಕಥಂ ನಿರೋಧೋ ತಥಟ್ಠೇನ ಸಚ್ಚಂ? ಚತ್ತಾರೋ ನಿರೋಧಸ್ಸ ನಿರೋಧಟ್ಠಾ ತಥಾ ಅವಿತಥಾ ಅನಞ್ಞಥಾ. ನಿರೋಧಸ್ಸ ನಿಸ್ಸರಣಟ್ಠೋ, ವಿವೇಕಟ್ಠೋ, ಅಸಙ್ಖತಟ್ಠೋ, ಅಮತಟ್ಠೋ – ಇಮೇ ಚತ್ತಾರೋ ನಿರೋಧಸ್ಸ ನಿರೋಧಟ್ಠಾ ತಥಾ ಅವಿತಥಾ ಅನಞ್ಞಥಾ. ಏವಂ ನಿರೋಧೋ ತಥಟ್ಠೇನ ಸಚ್ಚಂ.

ಕಥಂ ಮಗ್ಗೋ ತಥಟ್ಠೇನ ಸಚ್ಚಂ? ಚತ್ತಾರೋ ಮಗ್ಗಸ್ಸ ಮಗ್ಗಟ್ಠಾ ತಥಾ ಅವಿತಥಾ ಅನಞ್ಞಥಾ. ಮಗ್ಗಸ್ಸ ನಿಯ್ಯಾನಟ್ಠೋ, ಹೇತುಟ್ಠೋ, ದಸ್ಸನಟ್ಠೋ, ಆಧಿಪತೇಯ್ಯಟ್ಠೋ – ಇಮೇ ಚತ್ತಾರೋ ಮಗ್ಗಸ್ಸ ಮಗ್ಗಟ್ಠಾ ತಥಾ ಅವಿತಥಾ ಅನಞ್ಞಥಾ. ಏವಂ ಮಗ್ಗೋ ತಥಟ್ಠೇನ ಸಚ್ಚಂ.

೯. ಕತಿಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಚತೂಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ತಥಟ್ಠೇನ, ಅನತ್ತಟ್ಠೇನ, ಸಚ್ಚಟ್ಠೇನ, ಪಟಿವೇಧಟ್ಠೇನ – ಇಮೇಹಿ ಚತೂಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಚತೂಹಾಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ತಥಟ್ಠೋ, ಸಮುದಯಸ್ಸ ಸಮುದಯಟ್ಠೋ ತಥಟ್ಠೋ, ನಿರೋಧಸ್ಸ ನಿರೋಧಟ್ಠೋ ತಥಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ತಥಟ್ಠೋ – ಇಮೇಹಿ ಚತೂಹಾಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ಅನತ್ತಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಚತೂಹಾಕಾರೇಹಿ ಅನತ್ತಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ಅನತ್ತಟ್ಠೋ, ಸಮುದಯಸ್ಸ ಸಮುದಯಟ್ಠೋ ಅನತ್ತಟ್ಠೋ, ನಿರೋಧಸ್ಸ ನಿರೋಧಟ್ಠೋ ಅನತ್ತಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ಅನತ್ತಟ್ಠೋ – ಇಮೇಹಿ ಚತೂಹಾಕಾರೇಹಿ ಅನತ್ತಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ಸಚ್ಚಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಚತೂಹಾಕಾರೇಹಿ ಸಚ್ಚಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ಸಚ್ಚಟ್ಠೋ, ಸಮುದಯಸ್ಸ ಸಮುದಯಟ್ಠೋ ಸಚ್ಚಟ್ಠೋ, ನಿರೋಧಸ್ಸ ನಿರೋಧಟ್ಠೋ ಸಚ್ಚಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ಸಚ್ಚಟ್ಠೋ – ಇಮೇಹಿ ಚತೂಹಾಕಾರೇಹಿ ಸಚ್ಚಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಚತೂಹಾಕಾರೇಹಿ ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ಪಟಿವೇಧಟ್ಠೋ, ಸಮುದಯಸ್ಸ ಸಮುದಯಟ್ಠೋ ಪಟಿವೇಧಟ್ಠೋ ನಿರೋಧಸ್ಸ ನಿರೋಧಟ್ಠೋ ಪಟಿವೇಧಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ಪಟಿವೇಧಟ್ಠೋ – ಇಮೇಹಿ ಚತೂಹಾಕಾರೇಹಿ ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

೧೦. ಕತಿಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಯಂ ಅನಿಚ್ಚಂ ತಂ ದುಕ್ಖಂ, ಯಂ ದುಕ್ಖಂ ತಂ ಅನಿಚ್ಚಂ, ಯಂ ಅನಿಚ್ಚಞ್ಚ ದುಕ್ಖಞ್ಚ ತಂ ಅನತ್ತಾ. ಯಂ ಅನಿಚ್ಚಞ್ಚ ದುಕ್ಖಞ್ಚ ಅನತ್ತಾ ಚ ತಂ ತಥಂ. ಯಂ ಅನಿಚ್ಚಂ ಚ ದುಕ್ಖಞ್ಚ ಅನತ್ತಾ ಚ ತಥಞ್ಚ ತಂ ಸಚ್ಚಂ. ಯಂ ಅನಿಚ್ಚಞ್ಚ ದುಕ್ಖಞ್ಚ ಅನತ್ತಾ ಚ ತಥಞ್ಚ ಸಚ್ಚಞ್ಚ ತಂ ಏಕಸಙ್ಗಹಿತಂ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕತಿಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ನವಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ತಥಟ್ಠೇನ, ಅನತ್ತಟ್ಠೇನ, ಸಚ್ಚಟ್ಠೇನ, ಪಟಿವೇಧಟ್ಠೇನ, ಅಭಿಞ್ಞಟ್ಠೇನ, ಪರಿಞ್ಞಟ್ಠೇನ, ಪಹಾನಟ್ಠೇನ, ಭಾವನಟ್ಠೇನ, ಸಚ್ಛಿಕಿರಿಯಟ್ಠೇನ – ಇಮೇಹಿ ನವಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ನವಹಾಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ತಥಟ್ಠೋ, ಸಮುದಯಸ್ಸ ಸಮುದಯಟ್ಠೋ ತಥಟ್ಠೋ, ನಿರೋಧಸ್ಸ ನಿರೋಧಟ್ಠೋ ತಥಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ತಥಟ್ಠೋ, ಅಭಿಞ್ಞಾಯ ಅಭಿಞ್ಞಟ್ಠೋ ತಥಟ್ಠೋ, ಪರಿಞ್ಞಾಯ ಪರಿಞ್ಞಟ್ಠೋ ತಥಟ್ಠೋ, ಪಹಾನಸ್ಸ ಪಹಾನಟ್ಠೋ ತಥಟ್ಠೋ, ಭಾವನಾಯ ಭಾವನಟ್ಠೋ ತಥಟ್ಠೋ, ಸಚ್ಛಿಕಿರಿಯಾಯ ಸಚ್ಛಿಕಿರಿಯಟ್ಠೋ ತಥಟ್ಠೋ – ಇಮೇಹಿ ನವಹಾಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ಅನತ್ತಟ್ಠೇನ… ಸಚ್ಚಟ್ಠೇನ… ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ನವಹಾಕಾರೇಹಿ ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ದುಕ್ಖಟ್ಠೋ ಪಟಿವೇಧಟ್ಠೋ, ಸಮುದಯಸ್ಸ ಸಮುದಯಟ್ಠೋ ಪಟಿವೇಧಟ್ಠೋ, ನಿರೋಧಸ್ಸ ನಿರೋಧಟ್ಠೋ ಪಟಿವೇಧಟ್ಠೋ, ಮಗ್ಗಸ್ಸ ಮಗ್ಗಟ್ಠೋ ಪಟಿವೇಧಟ್ಠೋ, ಅಭಿಞ್ಞಾಯ ಅಭಿಞ್ಞಟ್ಠೋ ಪಟಿವೇಧಟ್ಠೋ, ಪರಿಞ್ಞಾಯ ಪರಿಞ್ಞಟ್ಠೋ ಪಟಿವೇಧಟ್ಠೋ, ಪಹಾನಸ್ಸ ಪಹಾನಟ್ಠೋ ಪಟಿವೇಧಟ್ಠೋ, ಭಾವನಾಯ ಭಾವನಟ್ಠೋ ಪಟಿವೇಧಟ್ಠೋ, ಸಚ್ಛಿಕಿರಿಯಾಯ ಸಚ್ಛಿಕಿರಿಯಟ್ಠೋ ಪಟಿವೇಧಟ್ಠೋ – ಇಮೇಹಿ ನವಹಾಕಾರೇಹಿ ಪಟಿವೇಧಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

೧೧. ಕತಿಹಾಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ದ್ವಾದಸಹಿ ಆಕಾರೇಹಿ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ತಥಟ್ಠೇನ, ಅನತ್ತಟ್ಠೇನ, ಸಚ್ಚಟ್ಠೇನ, ಪಟಿವೇಧಟ್ಠೇನ, ಅಭಿಜಾನನಟ್ಠೇನ, ಪರಿಜಾನನಟ್ಠೇನ, ಧಮ್ಮಟ್ಠೇನ, ತಥಟ್ಠೇನ, ಞಾತಟ್ಠೇನ, ಸಚ್ಛಿಕಿರಿಯಟ್ಠೇನ, ಫಸ್ಸನಟ್ಠೇನ, ಅಭಿಸಮಯಟ್ಠೇನ – ಇಮೇಹಿ ದ್ವಾದಸಹಿ ಆಕಾರೇಹಿ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಸೋಳಸಹಿ ಆಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ಪೀಳನಟ್ಠೋ, ಸಙ್ಖತಟ್ಠೋ, ಸನ್ತಾಪಟ್ಠೋ, ವಿಪರಿಣಾಮಟ್ಠೋ, ತಥಟ್ಠೋ; ಸಮುದಯಸ್ಸ ಆಯೂಹನಟ್ಠೋ, ನಿದಾನಟ್ಠೋ, ಸಂಯೋಗಟ್ಠೋ, ಪಲಿಬೋಧಟ್ಠೋ ತಥಟ್ಠೋ; ನಿರೋಧಸ್ಸ ನಿಸ್ಸರಣಟ್ಠೋ, ವಿವೇಕಟ್ಠೋ, ಅಸಙ್ಖತಟ್ಠೋ, ಅಮತಟ್ಠೋ ತಥಟ್ಠೋ; ಮಗ್ಗಸ್ಸ ನಿಯ್ಯಾನಟ್ಠೋ, ಹೇತುಟ್ಠೋ, ದಸ್ಸನಟ್ಠೋ, ಆಧಿಪತೇಯ್ಯಟ್ಠೋ ತಥಟ್ಠೋ – ಇಮೇಹಿ ಸೋಳಸಹಿ ಆಕಾರೇಹಿ ತಥಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

ಕಥಂ ಅನತ್ತಟ್ಠೇನ…ಪೇ… ಸಚ್ಚಟ್ಠೇನ… ಪಟಿವೇಧಟ್ಠೇನ… ಅಭಿಜಾನನಟ್ಠೇನ… ಪರಿಜಾನನಟ್ಠೇನ… ಧಮ್ಮಟ್ಠೇನ… ತಥಟ್ಠೇನ… ಞಾತಟ್ಠೇನ… ಸಚ್ಛಿಕಿರಿಯಟ್ಠೇನ… ಫಸ್ಸನಟ್ಠೇನ… ಅಭಿಸಮಯಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ? ಸೋಳಸಹಿ ಆಕಾರೇಹಿ ಅಭಿಸಮಯಟ್ಠೇನ ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ. ದುಕ್ಖಸ್ಸ ಪೀಳನಟ್ಠೋ, ಸಙ್ಖತಟ್ಠೋ, ಸನ್ತಾಪಟ್ಠೋ, ವಿಪರಿಣಾಮಟ್ಠೋ, ಅಭಿಸಮಯಟ್ಠೋ; ಸಮುದಯಸ್ಸ ಆಯೂಹನಟ್ಠೋ, ನಿದಾನಟ್ಠೋ, ಸಂಯೋಗಟ್ಠೋ, ಪಲಿಬೋಧಟ್ಠೋ, ಅಭಿಸಮಯಟ್ಠೋ; ನಿರೋಧಸ್ಸ ನಿಸ್ಸರಣಟ್ಠೋ, ವಿವೇಕಟ್ಠೋ, ಅಸಙ್ಖತಟ್ಠೋ, ಅಮತಟ್ಠೋ, ಅಭಿಸಮಯಟ್ಠೋ; ಮಗ್ಗಸ್ಸ ನಿಯ್ಯಾನಟ್ಠೋ, ಹೇತುಟ್ಠೋ, ದಸ್ಸನಟ್ಠೋ, ಆಧಿಪತೇಯ್ಯಟ್ಠೋ, ಅಭಿಸಮಯಟ್ಠೋ – ಇಮೇಹಿ ಸೋಳಸಹಿ ಆಕಾರೇಹಿ ಅಭಿಸಮಯಟ್ಠೇನ ಚತ್ತಾರಿ ಸಚ್ಚಾನಿ ಏಕಸಙ್ಗಹಿತಾನಿ. ಯಂ ಏಕಸಙ್ಗಹಿತಂ ತಂ ಏಕತ್ತಂ. ಏಕತ್ತಂ ಏಕೇನ ಞಾಣೇನ ಪಟಿವಿಜ್ಝತೀತಿ – ಚತ್ತಾರಿ ಸಚ್ಚಾನಿ ಏಕಪ್ಪಟಿವೇಧಾನಿ.

೧೨. ಸಚ್ಚಾನಂ ಕತಿ ಲಕ್ಖಣಾನಿ? ಸಚ್ಚಾನಂ ದ್ವೇ ಲಕ್ಖಣಾನಿ. ಸಙ್ಖತಲಕ್ಖಣಞ್ಚ, ಅಸಙ್ಖತಲಕ್ಖಣಞ್ಚ – ಸಚ್ಚಾನಂ ಇಮಾನಿ ದ್ವೇ ಲಕ್ಖಣಾನಿ.

ಸಚ್ಚಾನಂ ಕತಿ ಲಕ್ಖಣಾನಿ? ಸಚ್ಚಾನಂ ಛ ಲಕ್ಖಣಾನಿ. ಸಙ್ಖತಾನಂ ಸಚ್ಚಾನಂ ಉಪ್ಪಾದೋ ಪಞ್ಞಾಯತಿ, ವಯೋ ಪಞ್ಞಾಯತಿ, ಠಿತಾನಂ ಅಞ್ಞಥತ್ತಂ ಪಞ್ಞಾಯತಿ ಅಸಙ್ಖತಸ್ಸ ಸಚ್ಚಸ್ಸ ನ ಉಪ್ಪಾದೋ ಪಞ್ಞಾಯತಿ, ನ ವಯೋ ಪಞ್ಞಾಯತಿ, ನ ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ – ಸಚ್ಚಾನಂ ಇಮಾನಿ ಛ ಲಕ್ಖಣಾನಿ.

ಸಚ್ಚಾನಂ ಕತಿ ಲಕ್ಖಣಾನಿ? ಸಚ್ಚಾನಂ ದ್ವಾದಸ ಲಕ್ಖಣಾನಿ. ದುಕ್ಖಸಚ್ಚಸ್ಸ ಉಪ್ಪಾದೋ ಪಞ್ಞಾಯತಿ, ವಯೋ ಪಞ್ಞಾಯತಿ, ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ; ಸಮುದಯಸಚ್ಚಸ್ಸ ಉಪ್ಪಾದೋ ಪಞ್ಞಾಯತಿ, ವಯೋ ಪಞ್ಞಾಯತಿ, ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ; ಮಗ್ಗಸಚ್ಚಸ್ಸ ಉಪ್ಪಾದೋ ಪಞ್ಞಾಯತಿ, ವಯೋ ಪಞ್ಞಾಯತಿ, ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ; ನಿರೋಧಸಚ್ಚಸ್ಸ ನ ಉಪ್ಪಾದೋ ಪಞ್ಞಾಯತಿ, ನ ವಯೋ ಪಞ್ಞಾಯತಿ, ನ ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ – ಸಚ್ಚಾನಂ ಇಮಾನಿ ದ್ವಾದಸ ಲಕ್ಖಣಾನಿ.

ಚತುನ್ನಂ ಸಚ್ಚಾನಂ ಕತಿ ಕುಸಲಾ, ಕತಿ ಅಕುಸಲಾ, ಕತಿ ಅಬ್ಯಾಕತಾ? ಸಮುದಯಸಚ್ಚಂ ಅಕುಸಲಂ, ಮಗ್ಗಸಚ್ಚಂ ಕುಸಲಂ, ನಿರೋಧಸಚ್ಚಂ ಅಬ್ಯಾಕತಂ. ದುಕ್ಖಸಚ್ಚಂ ಸಿಯಾ ಕುಸಲಂ, ಸಿಯಾ ಅಕುಸಲಂ, ಸಿಯಾ ಅಬ್ಯಾಕತಂ.

ಸಿಯಾ ತೀಣಿ ಸಚ್ಚಾನಿ ಏಕಸಚ್ಚೇನ ಸಙ್ಗಹಿತಾನಿ, ಏಕಸಚ್ಚಂ ತೀಹಿ ಸಚ್ಚೇಹಿ ಸಙ್ಗಹಿತಂ? ವತ್ಥುವಸೇನ ಪರಿಯಾಯೇನ ಸಿಯಾತಿ. ಕಥಞ್ಚ ಸಿಯಾ? ಯಂ ದುಕ್ಖಸಚ್ಚಂ ಅಕುಸಲಂ, ಸಮುದಯಸಚ್ಚಂ ಅಕುಸಲಂ – ಏವಂ ಅಕುಸಲಟ್ಠೇನ ದ್ವೇ ಸಚ್ಚಾನಿ ಏಕಸಚ್ಚೇನ ಸಙ್ಗಹಿತಾನಿ, ಏಕಸಚ್ಚಂ ದ್ವೀಹಿ ಸಚ್ಚೇಹಿ ಸಙ್ಗಹಿತಂ. ಯಂ ದುಕ್ಖಸಚ್ಚಂ ಕುಸಲಂ, ಮಗ್ಗಸಚ್ಚಂ ಕುಸಲಂ – ಏವಂ ಕುಸಲಟ್ಠೇನ ದ್ವೇ ಸಚ್ಚಾನಿ ಏಕಸಚ್ಚೇನ ಸಙ್ಗಹಿತಾನಿ, ಏಕಸಚ್ಚಂ ದ್ವೀಹಿ ಸಚ್ಚೇಹಿ ಸಙ್ಗಹಿತಂ. ಯಂ ದುಕ್ಖಸಚ್ಚಂ ಅಬ್ಯಾಕತಂ, ನಿರೋಧಸಚ್ಚಂ ಅಬ್ಯಾಕತಂ – ಏವಂ ಅಬ್ಯಾಕತಟ್ಠೇನ ದ್ವೇ ಸಚ್ಚಾನಿ ಏಕಸಚ್ಚೇನ ಸಙ್ಗಹಿತಾನಿ, ಏಕಸಚ್ಚಂ ದ್ವೀಹಿ ಸಚ್ಚೇಹಿ ಸಙ್ಗಹಿತಂ. ಏವಂ ಸಿಯಾ ತೀಣಿ ಸಚ್ಚಾನಿ ಏಕಸಚ್ಚೇನ ಸಙ್ಗಹಿತಾನಿ, ಏಕಸಚ್ಚಂ ತೀಹಿ ಸಚ್ಚೇಹಿ ಸಙ್ಗಹಿತಂ ವತ್ಥುವಸೇನ ಪರಿಯಾಯೇನಾತಿ.

೨. ದುತಿಯಸುತ್ತನ್ತಪಾಳಿ

೧೩. ‘‘ಪುಬ್ಬೇ ಮೇ, ಭಿಕ್ಖವೇ [ಸಂ. ನಿ. ೩.೨೬], ಸಮ್ಬೋಧಾ ಅನಭಿಸಮ್ಬುದ್ಧಸ್ಸ ಬೋಧಿಸತ್ತಸ್ಸೇವ ಸತೋ ಏತದಹೋಸಿ – ‘ಕೋ ನು ಖೋ ರೂಪಸ್ಸ ಅಸ್ಸಾದೋ, ಕೋ ಆದೀನವೋ, ಕಿಂ ನಿಸ್ಸರಣಂ; ಕೋ ವೇದನಾಯ ಅಸ್ಸಾದೋ, ಕೋ ಆದೀನವೋ, ಕಿಂ ನಿಸ್ಸರಣಂ; ಕೋ ಸಞ್ಞಾಯ ಅಸ್ಸಾದೋ, ಕೋ ಆದೀನವೋ, ಕಿಂ ನಿಸ್ಸರಣಂ; ಕೋ ಸಙ್ಖಾರಾನಂ ಅಸ್ಸಾದೋ, ಕೋ ಆದೀನವೋ, ಕಿಂ ನಿಸ್ಸರಣಂ; ಕೋ ವಿಞ್ಞಾಣಸ್ಸ ಅಸ್ಸಾದೋ, ಕೋ ಆದೀನವೋ, ಕಿಂ ನಿಸ್ಸರಣ’ನ್ತಿ? ತಸ್ಸ ಮಯ್ಹಂ, ಭಿಕ್ಖವೇ, ಏತದಹೋಸಿ – ‘ಯಂ ಖೋ ರೂಪಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ – ಅಯಂ ರೂಪಸ್ಸ ಅಸ್ಸಾದೋ. ಯಂ ರೂಪಂ ಅನಿಚ್ಚಂ, ತಂ ದುಕ್ಖಂ ವಿಪರಿಣಾಮಧಮ್ಮಂ – ಅಯಂ ರೂಪಸ್ಸ ಆದೀನವೋ. ಯೋ ರೂಪಸ್ಮಿಂ ಛನ್ದರಾಗವಿನಯೋ ಛನ್ದರಾಗಪ್ಪಹಾನಂ – ಇದಂ ರೂಪಸ್ಸ ನಿಸ್ಸರಣಂ. ಯಂ ವೇದನಂ ಪಟಿಚ್ಚ…ಪೇ… ಯಂ ಸಞ್ಞಂ ಪಟಿಚ್ಚ… ಯಂ ಸಙ್ಖಾರೇ ಪಟಿಚ್ಚ… ಯಂ ವಿಞ್ಞಾಣಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ – ಅಯಂ ವಿಞ್ಞಾಣಸ್ಸ ಅಸ್ಸಾದೋ. ಯಂ ವಿಞ್ಞಾಣಂ ಅನಿಚ್ಚಂ ತಂ ದುಕ್ಖಂ ವಿಪರಿಣಾಮಧಮ್ಮಂ – ಅಯಂ ವಿಞ್ಞಾಣಸ್ಸ ಆದೀನವೋ. ಯೋ ವಿಞ್ಞಾಣಸ್ಮಿಂ ಛನ್ದರಾಗವಿನಯೋ ಛನ್ದರಾಗಪ್ಪಹಾನಂ – ಇದಂ ವಿಞ್ಞಾಣಸ್ಸ ನಿಸ್ಸರಣಂ’’.

‘‘ಯಾವಕೀವಞ್ಚಾಹಂ, ಭಿಕ್ಖವೇ, ಇಮೇಸಂ ಪಞ್ಚನ್ನಂ ಉಪಾದಾನಕ್ಖನ್ಧಾನಂ ಏವಂ ಅಸ್ಸಾದಞ್ಚ ಅಸ್ಸಾದತೋ ಆದೀನವಞ್ಚ ಆದೀನವತೋ ನಿಸ್ಸರಣಞ್ಚ ನಿಸ್ಸರಣತೋ ಯಥಾಭೂತಂ ನಾಬ್ಭಞ್ಞಾಸಿಂ, ನೇವ ತಾವಾಹಂ, ಭಿಕ್ಖವೇ, ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ‘ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ ಪಚ್ಚಞ್ಞಾಸಿಂ [ಅಭಿಸಮ್ಬುದ್ಧೋ ಪಚ್ಚಞ್ಞಾಸಿಂ (ಸ್ಯಾ.) ಸಂ. ನಿ. ೩.೨೬ ಪಸ್ಸಿತಬ್ಬಾ] ಯತೋ ಚ ಖ್ವಾಹಂ, ಭಿಕ್ಖವೇ, ಇಮೇಸಂ ಪಞ್ಚನ್ನಂ ಉಪಾದಾನಕ್ಖನ್ಧಾನಂ ಏವಂ ಅಸ್ಸಾದಞ್ಚ ಅಸ್ಸಾದತೋ ಆದೀನವಞ್ಚ ಆದೀನವತೋ ನಿಸ್ಸರಣಞ್ಚ ನಿಸ್ಸರಣತೋ ಯಥಾಭೂತಂ ಅಬ್ಭಞ್ಞಾಸಿಂ, ಅಥಾಹಂ, ಭಿಕ್ಖವೇ, ‘ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ ಪಚ್ಚಞ್ಞಾಸಿಂ. ಞಾಣಞ್ಚ ಪನ ಮೇ ದಸ್ಸನಂ ಉದಪಾದಿ – ‘ಅಕುಪ್ಪಾ ಮೇ ವಿಮುತ್ತಿ [ಚೇತೋವಿಮುತ್ತಿ (ಸ್ಯಾ. ಕ.) ಸಂ. ನಿ. ೩.೨೭ ಪಸ್ಸಿತಬ್ಬಾ]. ಅಯಮನ್ತಿಮಾ ಜಾತಿ, ನತ್ಥಿ ದಾನಿ ಪುನಬ್ಭವೋ’’’ತಿ.

೩. ದುತಿಯಸುತ್ತನ್ತನಿದ್ದೇಸೋ

೧೪. ಯಂ ರೂಪಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ, ಅಯಂ ರೂಪಸ್ಸ ಅಸ್ಸಾದೋತಿ – ಪಹಾನಪ್ಪಟಿವೇಧೋ ಸಮುದಯಸಚ್ಚಂ. ಯಂ ರೂಪಂ ಅನಿಚ್ಚಂ ತಂ ದುಕ್ಖಂ ವಿಪರಿಣಾಮಧಮ್ಮಂ, ಅಯಂ ರೂಪಸ್ಸ ಆದೀನವೋತಿ – ಪರಿಞ್ಞಾಪಟಿವೇಧೋ ದುಕ್ಖಸಚ್ಚಂ. ಯೋ ರೂಪಸ್ಮಿಂ ಛನ್ದರಾಗವಿನಯೋ ಛನ್ದರಾಗಪ್ಪಹಾನಂ, ಇದಂ ರೂಪಸ್ಸ ನಿಸ್ಸರಣನ್ತಿ – ಸಚ್ಛಿಕಿರಿಯಾಪಟಿವೇಧೋ ನಿರೋಧಸಚ್ಚಂ. ಯಾ ಇಮೇಸು ತೀಸು ಠಾನೇಸು ದಿಟ್ಠಿ ಸಙ್ಕಪ್ಪೋ ವಾಚಾ ಕಮ್ಮನ್ತೋ ಆಜೀವೋ ವಾಯಾಮೋ ಸತಿ ಸಮಾಧಿ – ಭಾವನಾಪಟಿವೇಧೋ ಮಗ್ಗಸಚ್ಚಂ.

ಯಂ ವೇದನಂ ಪಟಿಚ್ಚ…ಪೇ… ಯಂ ಸಞ್ಞಂ ಪಟಿಚ್ಚ… ಯಂ ಸಙ್ಖಾರೇ ಪಟಿಚ್ಚ… ಯಂ ವಿಞ್ಞಾಣಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ, ಅಯಂ ವಿಞ್ಞಾಣಸ್ಸ ಅಸ್ಸಾದೋತಿ – ಪಹಾನಪ್ಪಟಿವೇಧೋ ಸಮುದಯಸಚ್ಚಂ. ಯಂ ವಿಞ್ಞಾಣಂ ಅನಿಚ್ಚಂ ತಂ ದುಕ್ಖಂ ವಿಪರಿಣಾಮಧಮ್ಮಂ, ಅಯಂ ವಿಞ್ಞಾಣಸ್ಸ ಆದೀನವೋತಿ – ಪರಿಞ್ಞಾಪಟಿವೇಧೋ ದುಕ್ಖಸಚ್ಚಂ. ಯೋ ವಿಞ್ಞಾಣಸ್ಮಿಂ ಛನ್ದರಾಗವಿನಯೋ ಛನ್ದರಾಗಪ್ಪಹಾನಂ, ಇದಂ ವಿಞ್ಞಾಣಸ್ಸ ನಿಸ್ಸರಣನ್ತಿ – ಸಚ್ಛಿಕಿರಿಯಾಪಟಿವೇಧೋ ನಿರೋಧಸಚ್ಚಂ. ಯಾ ಇಮೇಸು ತೀಸು ಠಾನೇಸು ದಿಟ್ಠಿ ಸಙ್ಕಪ್ಪೋ ವಾಚಾ ಕಮ್ಮನ್ತೋ ಆಜೀವೋ ವಾಯಾಮೋ ಸತಿ ಸಮಾಧಿ – ಭಾವನಾಪಟಿವೇಧೋ ಮಗ್ಗಸಚ್ಚಂ.

೧೫. ಸಚ್ಚನ್ತಿ ಕತಿಹಾಕಾರೇಹಿ ಸಚ್ಚಂ? ಏಸನಟ್ಠೇನ, ಪರಿಗ್ಗಹಟ್ಠೇನ, ಪಟಿವೇಧಟ್ಠೇನ. ಕಥಂ ಏಸನಟ್ಠೇನ ಸಚ್ಚಂ? ಜರಾಮರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವನ್ತಿ – ಏವಂ ಏಸನಟ್ಠೇನ ಸಚ್ಚಂ. ಜರಾಮರಣಂ ಜಾತಿನಿದಾನಂ, ಜಾತಿಸಮುದಯಂ, ಜಾತಿಜಾತಿಕಂ, ಜಾತಿಪ್ಪಭವನ್ತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಜರಾಮರಣಞ್ಚ ಪಜಾನಾತಿ, ಜರಾಮರಣಸಮುದಯಞ್ಚ ಪಜಾನಾತಿ, ಜರಾಮರಣನಿರೋಧಞ್ಚ ಪಜಾನಾತಿ, ಜರಾಮರಣನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಜಾತಿ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾತಿ – ಏವಂ ಏಸನಟ್ಠೇನ ಸಚ್ಚಂ. ಜಾತಿ ಭವನಿದಾನಾ, ಭವಸಮುದಯಾ, ಭವಜಾತಿಕಾ, ಭವಪ್ಪಭವಾತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಜಾತಿಞ್ಚ ಪಜಾನಾತಿ, ಜಾತಿಸಮುದಯಞ್ಚ ಪಜಾನಾತಿ, ಜಾತಿನಿರೋಧಞ್ಚ ಪಜಾನಾತಿ, ಜಾತಿನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಭವೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋತಿ – ಏವಂ ಏಸನಟ್ಠೇನ ಸಚ್ಚಂ. ಭವೋ ಉಪಾದಾನನಿದಾನೋ, ಉಪಾದಾನಸಮುದಯೋ, ಉಪಾದಾನಜಾತಿಕೋ, ಉಪಾದಾನಪ್ಪಭವೋತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಭವಂ ಚ ಪಜಾನಾತಿ, ಭವಸಮುದಯಞ್ಚ ಪಜಾನಾತಿ, ಭವನಿರೋಧಞ್ಚ ಪಜಾನಾತಿ, ಭವನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಉಪಾದಾನಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವನ್ತಿ – ಏವಂ ಏಸನಟ್ಠೇನ ಸಚ್ಚಂ. ಉಪಾದಾನಂ ತಣ್ಹಾನಿದಾನಂ, ತಣ್ಹಾಸಮುದಯಂ, ತಣ್ಹಾಜಾತಿಕಂ, ತಣ್ಹಾಪಭವನ್ತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಉಪಾದಾನಞ್ಚ ಪಜಾನಾತಿ, ಉಪಾದಾನಸಮುದಯಞ್ಚ ಪಜಾನಾತಿ, ಉಪಾದಾನನಿರೋಧಞ್ಚ ಪಜಾನಾತಿ ಉಪಾದಾನನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ತಣ್ಹಾ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾತಿ – ಏವಂ ಏಸನಟ್ಠೇನ ಸಚ್ಚಂ. ತಣ್ಹಾ ವೇದನಾನಿದಾನಾ, ವೇದನಾಸಮುದಯಾ, ವೇದನಾಜಾತಿಕಾ, ವೇದನಾಪಭವಾತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ತಣ್ಹಞ್ಚ ಪಜಾನಾತಿ, ತಣ್ಹಾಸಮುದಯಞ್ಚ ಪಜಾನಾತಿ, ತಣ್ಹಾನಿರೋಧಞ್ಚ ಪಜಾನಾತಿ, ತಣ್ಹಾನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ವೇದನಾ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾತಿ – ಏವಂ ಏಸನಟ್ಠೇನ ಸಚ್ಚಂ. ವೇದನಾ ಫಸ್ಸನಿದಾನಾ, ಫಸ್ಸಸಮುದಯಾ, ಫಸ್ಸಜಾತಿಕಾ, ಫಸ್ಸಪ್ಪಭವಾತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ವೇದನಞ್ಚ ಪಜಾನಾತಿ, ವೇದನಾಸಮುದಯಞ್ಚ ಪಜಾನಾತಿ, ವೇದನಾನಿರೋಧಞ್ಚ ಪಜಾನಾತಿ, ವೇದನಾನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಫಸ್ಸೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋತಿ – ಏವಂ ಏಸನಟ್ಠೇನ ಸಚ್ಚಂ. ಫಸ್ಸೋ ಸಳಾಯತನನಿದಾನೋ, ಸಳಾಯತನಸಮುದಯೋ, ಸಳಾಯತನಜಾತಿಕೋ, ಸಳಾಯತನಪ್ಪಭವೋತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಫಸ್ಸಞ್ಚ ಪಜಾನಾತಿ, ಫಸ್ಸಸಮುದಯಞ್ಚ ಪಜಾನಾತಿ, ಫಸ್ಸನಿರೋಧಞ್ಚ ಪಜಾನಾತಿ, ಫಸ್ಸನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಸಳಾಯತನಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವನ್ತಿ – ಏವಂ ಏಸನಟ್ಠೇನ ಸಚ್ಚಂ. ಸಳಾಯತನಂ ನಾಮರೂಪನಿದಾನಂ, ನಾಮರೂಪಸಮುದಯಂ, ನಾಮರೂಪಜಾತಿಕಂ, ನಾಮರೂಪಪ್ಪಭವನ್ತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಸಳಾಯತನಞ್ಚ ಪಜಾನಾತಿ, ಸಳಾಯತನಸಮುದಯಞ್ಚ ಪಜಾನಾತಿ, ಸಳಾಯತನನಿರೋಧಞ್ಚ ಪಜಾನಾತಿ, ಸಳಾಯತನನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ನಾಮರೂಪಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವನ್ತಿ – ಏವಂ ಏಸನಟ್ಠೇನ ಸಚ್ಚಂ. ನಾಮರೂಪಂ ವಿಞ್ಞಾಣನಿದಾನಂ, ವಿಞ್ಞಾಣಸಮುದಯಂ, ವಿಞ್ಞಾಣಜಾತಿಕಂ, ವಿಞ್ಞಾಣಪ್ಪಭವನ್ತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ನಾಮರೂಪಞ್ಚ ಪಜಾನಾತಿ, ನಾಮರೂಪಸಮುದಯಞ್ಚ ಪಜಾನಾತಿ, ನಾಮರೂಪನಿರೋಧಞ್ಚ ಪಜಾನಾತಿ, ನಾಮರೂಪನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ವಿಞ್ಞಾಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವನ್ತಿ – ಏವಂ ಏಸನಟ್ಠೇನ ಸಚ್ಚಂ. ವಿಞ್ಞಾಣಂ ಸಙ್ಖಾರನಿದಾನಂ, ಸಙ್ಖಾರಸಮುದಯಂ, ಸಙ್ಖಾರಜಾತಿಕಂ, ಸಙ್ಖಾರಪ್ಪಭವನ್ತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ವಿಞ್ಞಾಣಞ್ಚ ಪಜಾನಾತಿ, ವಿಞ್ಞಾಣಸಮುದಯಞ್ಚ ಪಜಾನಾತಿ, ವಿಞ್ಞಾಣನಿರೋಧಞ್ಚ ಪಜಾನಾತಿ, ವಿಞ್ಞಾಣನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

ಸಙ್ಖಾರಾ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾತಿ – ಏವಂ ಏಸನಟ್ಠೇನ ಸಚ್ಚಂ. ಸಙ್ಖಾರಾ ಅವಿಜ್ಜಾನಿದಾನಾ, ಅವಿಜ್ಜಾಸಮುದಯಾ, ಅವಿಜ್ಜಾಜಾತಿಕಾ, ಅವಿಜ್ಜಾಪಭವಾತಿ – ಏವಂ ಪರಿಗ್ಗಹಟ್ಠೇನ ಸಚ್ಚಂ. ಸಙ್ಖಾರೇ ಚ ಪಜಾನಾತಿ, ಸಙ್ಖಾರಸಮುದಯಞ್ಚ ಪಜಾನಾತಿ, ಸಙ್ಖಾರನಿರೋಧಞ್ಚ ಪಜಾನಾತಿ, ಸಙ್ಖಾರನಿರೋಧಗಾಮಿನಿಂ ಪಟಿಪದಞ್ಚ ಪಜಾನಾತಿ – ಏವಂ ಪಟಿವೇಧಟ್ಠೇನ ಸಚ್ಚಂ.

೧೬. ಜರಾಮರಣಂ ದುಕ್ಖಸಚ್ಚಂ, ಜಾತಿ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಜಾತಿ ದುಕ್ಖಸಚ್ಚಂ, ಭವೋ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಭವೋ ದುಕ್ಖಸಚ್ಚಂ, ಉಪಾದಾನಂ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಉಪಾದಾನಂ ದುಕ್ಖಸಚ್ಚಂ, ತಣ್ಹಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ತಣ್ಹಾ ದುಕ್ಖಸಚ್ಚಂ, ವೇದನಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ವೇದನಾ ದುಕ್ಖಸಚ್ಚಂ, ಫಸ್ಸೋ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಫಸ್ಸೋ ದುಕ್ಖಸಚ್ಚಂ, ಸಳಾಯತನಂ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಸಳಾಯತನಂ ದುಕ್ಖಸಚ್ಚಂ, ನಾಮರೂಪಂ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ನಾಮರೂಪಂ ದುಕ್ಖಸಚ್ಚಂ, ವಿಞ್ಞಾಣಂ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ವಿಞ್ಞಾಣಂ ದುಕ್ಖಸಚ್ಚಂ, ಸಙ್ಖಾರಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಸಙ್ಖಾರಾ ದುಕ್ಖಸಚ್ಚಂ, ಅವಿಜ್ಜಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ.

ಜರಾಮರಣಂ ಸಿಯಾ ದುಕ್ಖಸಚ್ಚಂ, ಸಿಯಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚಂ. ಜಾತಿ ಸಿಯಾ ದುಕ್ಖಸಚ್ಚಂ, ಸಿಯಾ ಸಮುದಯಸಚ್ಚಂ…ಪೇ… ಭವೋ ಸಿಯಾ ದುಕ್ಖಸಚ್ಚಂ, ಸಿಯಾ ಸಮುದಯಸಚ್ಚಂ, ಉಭಿನ್ನಮ್ಪಿ ನಿಸ್ಸರಣಂ ನಿರೋಧಸಚ್ಚಂ, ನಿರೋಧಪ್ಪಜಾನನಾ ಮಗ್ಗಸಚ್ಚನ್ತಿ.

ಭಾಣವಾರೋ.

ಸಚ್ಚಕಥಾ ನಿಟ್ಠಿತಾ.

೩. ಬೋಜ್ಝಙ್ಗಕಥಾ

೧೭. ಸಾವತ್ಥಿನಿದಾನಂ. ‘‘ಸತ್ತಿಮೇ, ಭಿಕ್ಖವೇ [ಸಂ. ನಿ. ೫.೨೦೦], ಬೋಜ್ಝಙ್ಗಾ. ಕತಮೇ ಸತ್ತ? ಸತಿಸಮ್ಬೋಜ್ಝಙ್ಗೋ, ಧಮ್ಮವಿಚಯಸಮ್ಬೋಜ್ಝಙ್ಗೋ, ವೀರಿಯಸಮ್ಬೋಜ್ಝಙ್ಗೋ, ಪೀತಿಸಮ್ಬೋಜ್ಝಙ್ಗೋ, ಪಸ್ಸದ್ಧಿಸಮ್ಬೋಜ್ಝಙ್ಗೋ, ಸಮಾಧಿಸಮ್ಬೋಜ್ಝಙ್ಗೋ, ಉಪೇಕ್ಖಾಸಮ್ಬೋಜ್ಝಙ್ಗೋ – ಇಮೇ ಖೋ, ಭಿಕ್ಖವೇ, ಸತ್ತ ಬೋಜ್ಝಙ್ಗಾ’’.

ಬೋಜ್ಝಙ್ಗಾತಿ ಕೇನಟ್ಠೇನ ಬೋಜ್ಝಙ್ಗಾ? ಬೋಧಾಯ ಸಂವತ್ತನ್ತೀತಿ – ಬೋಜ್ಝಙ್ಗಾ. ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನುಬುಜ್ಝನ್ತೀತಿ – ಬೋಜ್ಝಙ್ಗಾ. ಪಟಿಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮ್ಬುಜ್ಝನ್ತೀತಿ – ಬೋಜ್ಝಙ್ಗಾ.

ಬುಜ್ಝನಟ್ಠೇನ ಬೋಜ್ಝಙ್ಗಾ, ಅನುಬುಜ್ಝನಟ್ಠೇನ ಬೋಜ್ಝಙ್ಗಾ, ಪಟಿಬುಜ್ಝನಟ್ಠೇನ ಬೋಜ್ಝಙ್ಗಾ, ಸಮ್ಬುಜ್ಝನಟ್ಠೇನ ಬೋಜ್ಝಙ್ಗಾ.

ಬೋಧೇನ್ತೀತಿ – ಬೋಜ್ಝಙ್ಗಾ. ಅನುಬೋಧೇನ್ತೀತಿ – ಬೋಜ್ಝಙ್ಗಾ. ಪಟಿಬೋಧೇನ್ತೀತಿ – ಬೋಜ್ಝಙ್ಗಾ. ಸಮ್ಬೋಧೇನ್ತೀತಿ – ಬೋಜ್ಝಙ್ಗಾ.

ಬೋಧನಟ್ಠೇನ ಬೋಜ್ಝಙ್ಗಾ, ಅನುಬೋಧನಟ್ಠೇನ ಬೋಜ್ಝಙ್ಗಾ, ಪಟಿಬೋಧನಟ್ಠೇನ ಬೋಜ್ಝಙ್ಗಾ, ಸಮ್ಬೋಧನಟ್ಠೇನ ಬೋಜ್ಝಙ್ಗಾ.

ಬೋಧಿಪಕ್ಖಿಯಟ್ಠೇನ ಬೋಜ್ಝಙ್ಗಾ, ಅನುಬೋಧಿಪಕ್ಖಿಯಟ್ಠೇನ ಬೋಜ್ಝಙ್ಗಾ, ಪಟಿಬೋಧಿಪಕ್ಖಿಯಟ್ಠೇನ ಬೋಜ್ಝಙ್ಗಾ, ಸಮ್ಬೋಧಿಪಕ್ಖಿಯಟ್ಠೇನ ಬೋಜ್ಝಙ್ಗಾ.

ಬುದ್ಧಿಲಭನಟ್ಠೇನ ಬೋಜ್ಝಙ್ಗಾ, ಬುದ್ಧಿಪಟಿಲಭನಟ್ಠೇನ ಬೋಜ್ಝಙ್ಗಾ, ಬುದ್ಧಿರೋಪನಟ್ಠೇನ ಬೋಜ್ಝಙ್ಗಾ, ಬುದ್ಧಿಅಭಿರೋಪನಟ್ಠೇನ ಬೋಜ್ಝಙ್ಗಾ, ಬುದ್ಧಿಪಾಪನಟ್ಠೇನ ಬೋಜ್ಝಙ್ಗಾ, ಬುದ್ಧಿಸಮ್ಪಾಪನಟ್ಠೇನ ಬೋಜ್ಝಙ್ಗಾ.

ಮೂಲಮೂಲಕಾದಿದಸಕಂ

೧೮. ಮೂಲಟ್ಠೇನ ಬೋಜ್ಝಙ್ಗಾ, ಮೂಲಚರಿಯಟ್ಠೇನ ಬೋಜ್ಝಙ್ಗಾ, ಮೂಲಪರಿಗ್ಗಹಟ್ಠೇನ ಬೋಜ್ಝಙ್ಗಾ, ಮೂಲಪರಿವಾರಟ್ಠೇನ ಬೋಜ್ಝಙ್ಗಾ, ಮೂಲಪರಿಪೂರಣಟ್ಠೇನ [ಮೂಲಪರಿಪೂರಟ್ಠೇನ (ಸ್ಯಾ. ಕ.) ಏವಮುಪರಿಪಿ] ಬೋಜ್ಝಙ್ಗಾ, ಮೂಲಪರಿಪಾಕಟ್ಠೇನ ಬೋಜ್ಝಙ್ಗಾ, ಮೂಲಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ಮೂಲಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ಮೂಲಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ಮೂಲಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ಹೇತುಟ್ಠೇನ ಬೋಜ್ಝಙ್ಗಾ, ಹೇತುಚರಿಯಟ್ಠೇನ ಬೋಜ್ಝಙ್ಗಾ, ಹೇತುಪರಿಗ್ಗಹಟ್ಠೇನ ಬೋಜ್ಝಙ್ಗಾ, ಹೇತುಪರಿವಾರಟ್ಠೇನ ಬೋಜ್ಝಙ್ಗಾ, ಹೇತುಪರಿಪೂರಣಟ್ಠೇನ ಬೋಜ್ಝಙ್ಗಾ, ಹೇತುಪರಿಪಾಕಟ್ಠೇನ ಬೋಜ್ಝಙ್ಗಾ, ಹೇತುಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ಹೇತುಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ಹೇತುಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ಹೇತುಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ಪಚ್ಚಯಟ್ಠೇನ ಬೋಜ್ಝಙ್ಗಾ, ಪಚ್ಚಯಚರಿಯಟ್ಠೇನ ಬೋಜ್ಝಙ್ಗಾ, ಪಚ್ಚಯಪರಿಗ್ಗಹಟ್ಠೇನ ಬೋಜ್ಝಙ್ಗಾ, ಪಚ್ಚಯಪರಿವಾರಟ್ಠೇನ ಬೋಜ್ಝಙ್ಗಾ, ಪಚ್ಚಯಪರಿಪೂರಣಟ್ಠೇನ ಬೋಜ್ಝಙ್ಗಾ, ಪಚ್ಚಯಪರಿಪಾಕಟ್ಠೇನ ಬೋಜ್ಝಙ್ಗಾ, ಪಚ್ಚಯಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ಪಚ್ಚಯಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ಪಚ್ಚಯಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ಪಚ್ಚಯಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ವಿಸುದ್ಧಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಚರಿಯಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪರಿಗ್ಗಹಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪರಿವಾರಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪರಿಪೂರಣಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪರಿಪಾಕಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ವಿಸುದ್ಧಿಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ಅನವಜ್ಜಟ್ಠೇನ ಬೋಜ್ಝಙ್ಗಾ, ಅನವಜ್ಜಚರಿಯಟ್ಠೇನ ಬೋಜ್ಝಙ್ಗಾ, ಅನವಜ್ಜಪರಿಗ್ಗಹಟ್ಠೇನ ಬೋಜ್ಝಙ್ಗಾ, ಅನವಜ್ಜಪರಿವಾರಟ್ಠೇನ ಬೋಜ್ಝಙ್ಗಾ, ಅನವಜ್ಜಪರಿಪೂರಣಟ್ಠೇನ ಬೋಜ್ಝಙ್ಗಾ, ಅನವಜ್ಜಪರಿಪಾಕಟ್ಠೇನ ಬೋಜ್ಝಙ್ಗಾ, ಅನವಜ್ಜಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ಅನವಜ್ಜಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ಅನವಜ್ಜಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ಅನವಜ್ಜಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ನೇಕ್ಖಮ್ಮಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಚರಿಯಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪರಿಗ್ಗಹಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪರಿವಾರಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪರಿಪೂರಣಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪರಿಪಾಕಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ನೇಕ್ಖಮ್ಮಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ವಿಮುತ್ತಟ್ಠೇನ ಬೋಜ್ಝಙ್ಗಾ, ವಿಮುತ್ತಿಚರಿಯಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪರಿಗ್ಗಹಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪರಿವಾರಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪರಿಪೂರಣಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪರಿಪಾಕಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ವಿಮುತ್ತಿಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ಅನಾಸವಟ್ಠೇನ ಬೋಜ್ಝಙ್ಗಾ, ಅನಾಸವಚರಿಯಟ್ಠೇನ ಬೋಜ್ಝಙ್ಗಾ, ಅನಾಸವಪರಿಗ್ಗಹಟ್ಠೇನ ಬೋಜ್ಝಙ್ಗಾ, ಅನಾಸವಪರಿವಾರಟ್ಠೇನ ಬೋಜ್ಝಙ್ಗಾ, ಅನಾಸವಪರಿಪೂರಣಟ್ಠೇನ ಬೋಜ್ಝಙ್ಗಾ, ಅನಾಸವಪರಿಪಾಕಟ್ಠೇನ ಬೋಜ್ಝಙ್ಗಾ, ಅನಾಸವಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ಅನಾಸವಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ಅನಾಸವಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ಅನಾಸವಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ವಿವೇಕಟ್ಠೇನ ಬೋಜ್ಝಙ್ಗಾ, ವಿವೇಕಚರಿಯಟ್ಠೇನ ಬೋಜ್ಝಙ್ಗಾ, ವಿವೇಕಪರಿಗ್ಗಹಟ್ಠೇನ ಬೋಜ್ಝಙ್ಗಾ, ವಿವೇಕಪರಿವಾರಟ್ಠೇನ ಬೋಜ್ಝಙ್ಗಾ, ವಿವೇಕಪರಿಪೂರಣಟ್ಠೇನ ಬೋಜ್ಝಙ್ಗಾ, ವಿವೇಕಪರಿಪಾಕಟ್ಠೇನ ಬೋಜ್ಝಙ್ಗಾ, ವಿವೇಕಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ವಿವೇಕಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ವಿವೇಕಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ವಿವೇಕಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

ವೋಸಗ್ಗಟ್ಠೇನ ಬೋಜ್ಝಙ್ಗಾ, ವೋಸಗ್ಗಚರಿಯಟ್ಠೇನ ಬೋಜ್ಝಙ್ಗಾ, ವೋಸಗ್ಗಪರಿಗ್ಗಹಟ್ಠೇನ ಬೋಜ್ಝಙ್ಗಾ, ವೋಸಗ್ಗಪರಿವಾರಟ್ಠೇನ ಬೋಜ್ಝಙ್ಗಾ, ವೋಸಗ್ಗಪರಿಪೂರಣಟ್ಠೇನ ಬೋಜ್ಝಙ್ಗಾ, ವೋಸಗ್ಗಪರಿಪಾಕಟ್ಠೇನ ಬೋಜ್ಝಙ್ಗಾ, ವೋಸಗ್ಗಪಟಿಸಮ್ಭಿದಟ್ಠೇನ ಬೋಜ್ಝಙ್ಗಾ, ವೋಸಗ್ಗಪಟಿಸಮ್ಭಿದಾಪಾಪನಟ್ಠೇನ ಬೋಜ್ಝಙ್ಗಾ, ವೋಸಗ್ಗಪಟಿಸಮ್ಭಿದಾಯ ವಸೀಭಾವಟ್ಠೇನ ಬೋಜ್ಝಙ್ಗಾ, ವೋಸಗ್ಗಪಟಿಸಮ್ಭಿದಾಯ ವಸೀಭಾವಪ್ಪತ್ತಾನಮ್ಪಿ ಬೋಜ್ಝಙ್ಗಾ.

೧೯. ಮೂಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಹೇತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಚ್ಚಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಸುದ್ಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನವಜ್ಜಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನೇಕ್ಖಮ್ಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಾಸವಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿವೇಕಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೋಸಗ್ಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಮೂಲಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಹೇತುಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಚ್ಚಯಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಸುದ್ಧಿಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನವಜ್ಜಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನೇಕ್ಖಮ್ಮಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಿಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಾಸವಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿವೇಕಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೋಸಗ್ಗಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಮೂಲಪರಿಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪರಿಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪರಿವಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪರಿವಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪರಿಪೂರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪರಿಪೂರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪರಿಪಾಕಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪರಿಪಾಕಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪಟಿಸಮ್ಭಿದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪಟಿಸಮ್ಭಿದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪಟಿಸಮ್ಭಿದಾಪಾಪನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪಟಿಸಮ್ಭಿದಾಪಾಪನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮೂಲಪಟಿಸಮ್ಭಿದಾಯ ವಸೀಭಾವಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೋಸಗ್ಗಪಟಿಸಮ್ಭಿದಾಯ ವಸೀಭಾವಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ….

ಪರಿಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿವಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿಪೂರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕಗ್ಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅವಿಕ್ಖೇಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅವಿಸಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಾವಿಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಿಞ್ಜನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತುಪಟ್ಠಾನವಸೇನ ಚಿತ್ತಸ್ಸ ಠಿತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆರಮ್ಮಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಗೋಚರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಹಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿಚ್ಚಾಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವುಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿವಟ್ಟನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸನ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಣೀತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಾಸವಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ತರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನಿಮಿತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಪ್ಪಣಿಹಿತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸುಞ್ಞತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕರಸಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನತಿವತ್ತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಯುಗನದ್ಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿಯ್ಯಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಹೇತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆಧಿಪತೇಯ್ಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಸಮಥಸ್ಸ ಅವಿಕ್ಖೇಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಪಸ್ಸನಾಯ ಅನುಪಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮಥವಿಪಸ್ಸನಾನಂ ಏಕರಸಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಯುಗನದ್ಧಸ್ಸ ಅನತಿವತ್ತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಿಕ್ಖಾಯ ಸಮಾದಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆರಮ್ಮಣಸ್ಸ ಗೋಚರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಲೀನಸ್ಸ ಚಿತ್ತಸ್ಸ ಪಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಉದ್ಧತಸ್ಸ ಚಿತ್ತಸ್ಸ ನಿಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಉಭೋವಿಸುದ್ಧಾನಂ ಅಜ್ಝುಪೇಕ್ಖನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಸೇಸಾಧಿಗಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಉತ್ತರಿ ಪಟಿವೇಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಚ್ಚಾಭಿಸಮಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿರೋಧೇ ಪತಿಟ್ಠಾಪಕಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಸದ್ಧಿನ್ದ್ರಿಯಸ್ಸ ಅಧಿಮೋಕ್ಖಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಪಞ್ಞಿನ್ದ್ರಿಯಸ್ಸ ದಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸದ್ಧಾಬಲಸ್ಸ ಅಸ್ಸದ್ಧಿಯೇ ಅಕಮ್ಪಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಪಞ್ಞಾಬಲಸ್ಸ ಅವಿಜ್ಜಾಯ ಅಕಮ್ಪಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸತಿಸಮ್ಬೋಜ್ಝಙ್ಗಸ್ಸ ಉಪಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಉಪೇಕ್ಖಾಸಮ್ಬೋಜ್ಝಙ್ಗಸ್ಸ ಪಟಿಸಙ್ಖಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮ್ಮಾದಿಟ್ಠಿಯಾ ದಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಸಮ್ಮಾಸಮಾಧಿಸ್ಸ ಅವಿಕ್ಖೇಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಇನ್ದ್ರಿಯಾನಂ ಆಧಿಪತೇಯ್ಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಬಲಾನಂ ಅಕಮ್ಪಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿಯ್ಯಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮಗ್ಗಸ್ಸ ಹೇತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸತಿಪಟ್ಠಾನಾನಂ ಉಪಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮ್ಮಪ್ಪಧಾನಾನಂ ಪದಹನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಇದ್ಧಿಪಾದಾನಂ ಇಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಚ್ಚಾನಂ ತಥಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಯೋಗಾನಂ ಪಟಿಪ್ಪಸ್ಸದ್ಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಫಲಾನಂ ಸಚ್ಛಿಕಿರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ವಿತಕ್ಕಸ್ಸ ಅಭಿನಿರೋಪನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಚಾರಸ್ಸ ಉಪವಿಚಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪೀತಿಯಾ ಫರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸುಖಸ್ಸ ಅಭಿಸನ್ದನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಏಕಗ್ಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಆವಜ್ಜನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಞ್ಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕೋದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಭಿಞ್ಞಾಯ ಞಾತಟ್ಠಂ [ಅಭಿಞ್ಞೇಯ್ಯತ್ಥಂ (ಸ್ಯಾ.)] ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿಞ್ಞಾಯ ತೀರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಹಾನಸ್ಸ ಪರಿಚ್ಚಾಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಭಾವನಾಯ ಏಕರಸಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಚ್ಛಿಕಿರಿಯಾಯ ಫಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಖನ್ಧಾನಂ ಖನ್ಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಧಾತೂನಂ ಧಾತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆಯತನಾನಂ ಆಯತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಙ್ಖತಾನಂ ಸಙ್ಖತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಸಙ್ಖತಸ್ಸ ಅಸಙ್ಖತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಚಿತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಾನನ್ತರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ವುಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ವಿವಟ್ಟನಟ್ಠಂ [ವಿವಜ್ಜನಟ್ಠಂ (ಸ್ಯಾ.)] ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಹೇತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಪಚ್ಚಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ವತ್ಥುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಭೂಮಟ್ಠಂ [ಭುಮ್ಮಟ್ಠಂ (ಸ್ಯಾ.) ಪಟಿ. ಮ. ೧.೧೪ ಪಸ್ಸಿತಬ್ಬಾ] ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಆರಮ್ಮಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಗೋಚರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಗತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ಅಭಿನೀಹಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ನಿಯ್ಯಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಚಿತ್ತಸ್ಸ ನಿಸ್ಸರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಏಕತ್ತೇ ಆವಜ್ಜನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ವಿಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಞ್ಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಏಕೋದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ( ) [(ಏಕತ್ತೇ ಉಪನಿಬನ್ಧನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ) (ಸಬ್ಬತ್ಥ)]. ಏಕತ್ತೇ ಪಕ್ಖನ್ದನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಸೀದನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸನ್ತಿಟ್ಠನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ವಿಮುಚ್ಚನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಏತಂ ಸನ್ತನ್ತಿ ಪಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಯಾನೀಕತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ವತ್ಥುಕತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅನುಟ್ಠಿತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪರಿಚಿತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸುಸಮಾರದ್ಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪರಿಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪರಿವಾರಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪರಿಪೂರಣಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಮೋಧಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅಧಿಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಆಸೇವನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಭಾವನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಬಹುಲೀಕಮ್ಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸುಸಮುಗ್ಗತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸುವಿಮುತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಬುಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅನುಬುಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಟಿಬುಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಮ್ಬುಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಬೋಧನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅನುಬೋಧನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಟಿಬೋಧನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಮ್ಬುಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಬೋಧಿಪಕ್ಖಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅನುಬೋಧಿಪಕ್ಖಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಟಿಬೋಧಿಪಕ್ಖಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಮ್ಬೋಧಿಪಕ್ಖಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಜೋತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಉಜ್ಜೋತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಅನುಜೋತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಪಟಿಜೋತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಏಕತ್ತೇ ಸಞ್ಜೋತನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಪತಾಪನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿರೋಚನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಕಿಲೇಸಾನಂ ಸನ್ತಾಪನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಮಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿಮ್ಮಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿವೇಕಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿವೇಕಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿರಾಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿರಾಗಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿರೋಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿರೋಧಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೋಸಗ್ಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೋಸಗ್ಗಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಿಚರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಛನ್ದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಮೂಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಪಾದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಪಧಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಇಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಅಧಿಮೋಕ್ಖಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಪಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಉಪಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ಅವಿಕ್ಖೇಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಛನ್ದಸ್ಸ ದಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ವೀರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಚಿತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ವೀಮಂಸಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಮೂಲಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಪಾದಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಪಧಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಇಜ್ಝನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಅಧಿಮೋಕ್ಖಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಪಗ್ಗಹಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಉಪಟ್ಠಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ಅವಿಕ್ಖೇಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೀಮಂಸಾಯ ದಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ದುಕ್ಖಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದುಕ್ಖಸ್ಸ ಪೀಳನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದುಕ್ಖಸ್ಸ ಸಙ್ಖತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದುಕ್ಖಸ್ಸ ಸನ್ತಾಪಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದುಕ್ಖಸ್ಸ ವಿಪರಿಣಾಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮುದಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮುದಯಸ್ಸ ಆಯೂಹನಟ್ಠಂ ನಿದಾನಟ್ಠಂ ಸಞ್ಞೋಗಟ್ಠಂ ಪಲಿಬೋಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿರೋಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿರೋಧಸ್ಸ ನಿಸ್ಸರಣಟ್ಠಂ ವಿವೇಕಟ್ಠಂ ಅಸಙ್ಖತಟ್ಠಂ ಅಮತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮಗ್ಗಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮಗ್ಗಸ್ಸ ನಿಯ್ಯಾನಟ್ಠಂ ಹೇತುಟ್ಠಂ ದಸ್ಸನಟ್ಠಂ ಆಧಿಪತೇಯ್ಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ತಥಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನತ್ತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಚ್ಚಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಟಿವೇಧಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಭಿಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿಜಾನನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಧಮ್ಮಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಧಾತುಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಞಾತಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಚ್ಛಿಕಿರಿಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಫಸ್ಸನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಭಿಸಮಯಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ನೇಕ್ಖಮ್ಮಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಬ್ಯಾಪಾದಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆಲೋಕಸಞ್ಞಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅವಿಕ್ಖೇಪಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಧಮ್ಮವವತ್ಥಾನಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಞಾಣಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಾಮೋಜ್ಜಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಠಮಂ ಝಾನಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಅರಹತ್ತಮಗ್ಗಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅರಹತ್ತಫಲಸಮಾಪತ್ತಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಸ್ಸದ್ಧಿಯೇ ಅಕಮ್ಪಿಯಟ್ಠೇನ ಸದ್ಧಾಬಲಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಅವಿಜ್ಜಾಯ ಅಕಮ್ಪಿಯಟ್ಠೇನ ಪಞ್ಞಾಬಲಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಉಪಟ್ಠಾನಟ್ಠೇನ ಸತಿಸಮ್ಬೋಜ್ಝಙ್ಗಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಪಟಿಸಙ್ಖಾನಟ್ಠೇನ ಉಪೇಕ್ಖಾಸಮ್ಬೋಜ್ಝಙ್ಗಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ದಸ್ಸನಟ್ಠೇನ ಸಮ್ಮಾದಿಟ್ಠಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಆಧಿಪತೇಯ್ಯಟ್ಠೇನ ಇನ್ದ್ರಿಯಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಕಮ್ಪಿಯಟ್ಠೇನ ಬಲಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ನಿಯ್ಯಾನಟ್ಠಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಹೇತುಟ್ಠೇನ ಮಗ್ಗಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಉಪಟ್ಠಾನಟ್ಠೇನ ಸತಿಪಟ್ಠಾನಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪದಹನಟ್ಠೇನ ಸಮ್ಮಪ್ಪಧಾನಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಇಜ್ಝನಟ್ಠೇನ ಇದ್ಧಿಪಾದಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ತಥಟ್ಠೇನ ಸಚ್ಚಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅವಿಕ್ಖೇಪಟ್ಠೇನ ಸಮಥಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನುಪಸ್ಸನಟ್ಠೇ ವಿಪಸ್ಸನಂ …ಪೇ… ಏಕರಸಟ್ಠೇನ ಸಮಥವಿಪಸ್ಸನಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅನತಿವತ್ತನಟ್ಠೇನ ಯುಗನದ್ಧಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಂವರಟ್ಠೇನ ಸೀಲವಿಸುದ್ಧಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅವಿಕ್ಖೇಪಟ್ಠೇನ ಚಿತ್ತವಿಸುದ್ಧಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ದಸ್ಸನಟ್ಠೇನ ದಿಟ್ಠಿವಿಸುದ್ಧಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮುತ್ತಟ್ಠೇನ ವಿಮೋಕ್ಖಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಟಿವೇಧಟ್ಠೇನ ವಿಜ್ಜಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪರಿಚ್ಚಾಗಟ್ಠೇನ ವಿಮುತ್ತಿಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮುಚ್ಛೇದಟ್ಠೇನ ಖಯೇ ಞಾಣಂ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ಬುಜ್ಝನ್ತೀತಿ – ಬೋಜ್ಝಙ್ಗಾ.

ಛನ್ದಂ ಮೂಲಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಮನಸಿಕಾರಂ ಸಮುಟ್ಠಾನಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಫಸ್ಸಂ ಸಮೋಧಾನಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ವೇದನಂ ಸಮೋಸರಣಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸಮಾಧಿಂ ಪಮುಖಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಸತಿಂ ಆಧಿಪತೇಯ್ಯಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಪಞ್ಞಂ ತತುತ್ತರಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ವಿಮುತ್ತಿಂ ಸಾರಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ. ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಬುಜ್ಝನ್ತೀತಿ – ಬೋಜ್ಝಙ್ಗಾ.

೨೦. ಸಾವತ್ಥಿನಿದಾನಂ. ತತ್ರ ಖೋ ಆಯಸ್ಮಾ ಸಾರಿಪುತ್ತೋ ಭಿಕ್ಖೂ ಆಮನ್ತೇಸಿ – ‘‘ಆವುಸೋ ಭಿಕ್ಖವೋ’’ತಿ [ಆವುಸೋತಿ (ಸ್ಯಾ.) ಸಂ. ನಿ. ೫.೧೮೫ ಪಸ್ಸಿತಬ್ಬಾ]. ‘‘ಆವುಸೋ’’ತಿ ಖೋ ತೇ ಭಿಕ್ಖೂ ಆಯಸ್ಮತೋ ಸಾರಿಪುತ್ತಸ್ಸ ಪಚ್ಚಸ್ಸೋಸುಂ. ಆಯಸ್ಮಾ ಸಾರಿಪುತ್ತೋ ಏತದವೋಚ –

‘‘ಸತ್ತಿಮೇ, ಆವುಸೋ, ಬೋಜ್ಝಙ್ಗಾ. ಕತಮೇ ಸತ್ತ? ಸತಿಸಮ್ಬೋಜ್ಝಙ್ಗೋ, ಧಮ್ಮವಿಚಯಸಮ್ಬೋಜ್ಝಙ್ಗೋ…ಪೇ… ಉಪೇಕ್ಖಾಸಮ್ಬೋಜ್ಝಙ್ಗೋ – ಇಮೇ ಖೋ, ಆವುಸೋ, ಸತ್ತ ಬೋಜ್ಝಙ್ಗಾ. ಇಮೇಸಂ ಖ್ವಾಹಂ, ಆವುಸೋ, ಸತ್ತನ್ನಂ ಬೋಜ್ಝಙ್ಗಾನಂ ಯೇನ ಯೇನ ಬೋಜ್ಝಙ್ಗೇನ ಆಕಙ್ಖಾಮಿ ಪುಬ್ಬಣ್ಹಸಮಯಂ ವಿಹರಿತುಂ, ತೇನ ತೇನ ಬೋಜ್ಝಙ್ಗೇನ ಪುಬ್ಬಣ್ಹಸಮಯಂ ವಿಹರಾಮಿ. ಯೇನ ಯೇನ ಬೋಜ್ಝಙ್ಗೇನ ಆಕಙ್ಖಾಮಿ ಮಜ್ಝನ್ಹಿಕಸಮಯಂ…ಪೇ… ಸಾಯನ್ಹಸಮಯಂ ವಿಹರಿತುಂ, ತೇನ ತೇನ ಬೋಜ್ಝಙ್ಗೇನ ಸಾಯನ್ಹಸಮಯಂ ವಿಹರಾಮಿ. ಸತಿಸಮ್ಬೋಜ್ಝಙ್ಗೋ ಇತಿ ಚೇ ಮೇ, ‘ಆವುಸೋ, ಹೋತಿ, ಅಪ್ಪಮಾಣೋ’ತಿ ಮೇ ಹೋತಿ, ‘ಸುಸಮಾರದ್ಧೋ’ತಿ ಮೇ ಹೋತಿ. ತಿಟ್ಠನ್ತಞ್ಚ ನಂ [ತಿಟ್ಠನ್ತಂ ಚರಂ (ಸ್ಯಾ.) ಸಂ. ನಿ. ೫.೧೮೫ ಪಸ್ಸಿತಬ್ಬಾ] ‘ತಿಟ್ಠತೀ’ತಿ ಪಜಾನಾಮಿ. ಸಚೇಪಿ ಮೇ ಚವತಿ, ‘ಇದಪ್ಪಚ್ಚಯಾ ಮೇ ಚವತೀ’ತಿ ಪಜಾನಾಮಿ. ಧಮ್ಮವಿಚಯಸಮ್ಬೋಜ್ಝಙ್ಗೋ…ಪೇ… ಉಪೇಕ್ಖಾಸಮ್ಬೋಜ್ಝಙ್ಗೋ ಇತಿ ಚೇ ಮೇ, ಆವುಸೋ, ಹೋತಿ, ‘ಅಪ್ಪಮಾಣೋ’ತಿ ಮೇ ಹೋತಿ, ‘ಸುಸಮಾರದ್ಧೋ’ತಿ ಮೇ ಹೋತಿ. ತಿಟ್ಠನ್ತಞ್ಚ ನಂ ‘ತಿಟ್ಠತೀ’ತಿ ಪಜಾನಾಮಿ. ಸಚೇಪಿ ಮೇ ಚವತಿ, ‘ಇದಪ್ಪಚ್ಚಯಾ ಮೇ ಚವತೀ’ತಿ ಪಜಾನಾಮಿ.

‘‘ಸೇಯ್ಯಥಾಪಿ, ಆವುಸೋ, ರಞ್ಞೋ ವಾ ರಾಜಮಹಾಮತ್ತಸ್ಸ ವಾ ನಾನಾರತ್ತಾನಂ ದುಸ್ಸಾನಂ ದುಸ್ಸಕರಣ್ಡಕೋ ಪೂರೋ ಅಸ್ಸ. ಸೋ ಯಞ್ಞದೇವ ದುಸ್ಸಯುಗಂ ಆಕಙ್ಖೇಯ್ಯ ಪುಬ್ಬಣ್ಹಸಮಯಂ ಪಾರುಪಿತುಂ, ತಂ ತದೇವ ದುಸ್ಸಯುಗಂ ಪುಬ್ಬಣ್ಹಸಮಯಂ ಪಾರುಪೇಯ್ಯ. ಯಞ್ಞದೇವ ದುಸ್ಸಯುಗಂ ಆಕಙ್ಖೇಯ್ಯ ಮಜ್ಝನ್ಹಿಕಸಮಯಂ…ಪೇ… ಸಾಯನ್ಹಸಮಯಂ ಪಾರುಪಿತುಂ, ತಂ ತದೇವ ದುಸ್ಸಯುಗಂ ಸಾಯನ್ಹಸಮಯಂ ಪಾರುಪೇಯ್ಯ. ಏವಮೇವ ಖ್ವಾಹಂ, ಆವುಸೋ, ಇಮೇಸಂ ಸತ್ತನ್ನಂ ಬೋಜ್ಝಙ್ಗಾನಂ ಯೇನ ಯೇನ ಬೋಜ್ಝಙ್ಗೇನ ಆಕಙ್ಖಾಮಿ ಪುಬ್ಬಣ್ಹಸಮಯಂ ವಿಹರಿತುಂ, ತೇನ ತೇನ ಬೋಜ್ಝಙ್ಗೇನ ಪುಬ್ಬಣ್ಹಸಮಯಂ ವಿಹರಾಮಿ. ಯೇನ ಯೇನ ಬೋಜ್ಝಙ್ಗೇನ ಆಕಙ್ಖಾಮಿ ಮಜ್ಝನ್ಹಿಕಸಮಯಂ…ಪೇ… ಸಾಯನ್ಹಸಮಯಂ ವಿಹರಿತುಂ, ತೇನ ತೇನ ಬೋಜ್ಝಙ್ಗೇನ ಸಾಯನ್ಹಸಮಯಂ ವಿಹರಾಮಿ. ಸತಿಸಮ್ಬೋಜ್ಝಙ್ಗೋ ಇತಿ ಚೇ ಮೇ, ಆವುಸೋ, ಹೋತಿ, ‘ಅಪ್ಪಮಾಣೋ’ತಿ ಮೇ ಹೋತಿ, ‘ಸುಸಮಾರದ್ಧೋ’ತಿ ಮೇ ಹೋತಿ. ತಿಟ್ಠನ್ತಞ್ಚ ನಂ ‘ತಿಟ್ಠತೀ’ತಿ ಪಜಾನಾಮಿ. ಸಚೇಪಿ ಮೇ ಚವತಿ, ‘ಇದಪ್ಪಚ್ಚಯಾ ಮೇ ಚವತೀ’ತಿ ಪಜಾನಾಮಿ…ಪೇ… ಉಪೇಕ್ಖಾಸಮ್ಬೋಜ್ಝಙ್ಗೋ ಇತಿ ಚೇ ಮೇ, ಆವುಸೋ, ಹೋತಿ, ‘ಅಪ್ಪಮಾಣೋ’ತಿ ಮೇ ಹೋತಿ, ‘ಸುಸಮಾರದ್ಧೋ’ತಿ ಮೇ ಹೋತಿ. ತಿಟ್ಠನ್ತಞ್ಚ ನಂ ‘ತಿಟ್ಠತೀ’ತಿ ಪಜಾನಾಮಿ. ಸಚೇಪಿ ಮೇ ಚವತಿ, ‘ಇದಪ್ಪಚ್ಚಯಾ ಮೇ ಚವತೀ’ತಿ ಪಜಾನಾಮಿ’’.

ಸುತ್ತನ್ತನಿದ್ದೇಸೋ

೨೧. ಕಥಂ ಸತಿಸಮ್ಬೋಜ್ಝಙ್ಗೋ ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ? ಯಾವತಾ ನಿರೋಧೂಪಟ್ಠಾತಿ ತಾವತಾ ಸತಿಸಮ್ಬೋಜ್ಝಙ್ಗೋ. ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ. ಸೇಯ್ಯಥಾಪಿ ತೇಲಪ್ಪದೀಪಸ್ಸ ಝಾಯತೋ ಯಾವತಾ ಅಚ್ಚಿ ತಾವತಾ ವಣ್ಣೋ, ಯಾವತಾ ವಣ್ಣೋ ತಾವತಾ ಅಚ್ಚಿ. ಏವಮೇವ ಯಾವತಾ ನಿರೋಧೂಪಟ್ಠಾತಿ ತಾವತಾ ಸತಿಸಮ್ಬೋಜ್ಝಙ್ಗೋ. ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ.

ಕಥಂ ಅಪ್ಪಮಾಣೋ ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ? ಪಮಾಣಬದ್ಧಾ [ಪಮಾಣವನ್ತಾ (ಸ್ಯಾ.), ಅಟ್ಠಕಥಾ ಓಲೋಕೇತಬ್ಬಾ] ಕಿಲೇಸಾ, ಸಬ್ಬೇ ಚ ಪರಿಯುಟ್ಠಾನಾ, ಯೇ ಚ ಸಙ್ಖಾರಾ ಪೋನೋಭವಿಕಾ ಅಪ್ಪಮಾಣೋ ನಿರೋಧೋ ಅಚಲಟ್ಠೇನ ಅಸಙ್ಖತಟ್ಠೇನ. ಯಾವತಾ ನಿರೋಧೂಪಟ್ಠಾತಿ ತಾವತಾ ಅಪ್ಪಮಾಣೋ. ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ.

ಕಥಂ ಸುಸಮಾರದ್ಧೋ ಇತಿ ಚೇ ಮೇ ಹೋತೀತಿ – ಬೋಜ್ಝಙ್ಗೋ? ವಿಸಮಾ ಕಿಲೇಸಾ, ಸಬ್ಬೇ ಚ ಪರಿಯುಟ್ಠಾನಾ, ಯೇ ಚ ಸಙ್ಖಾರಾ ಪೋನೋಭವಿಕಾ, ಸಮಧಮ್ಮೋ ನಿರೋಧೋ ಸನ್ತಟ್ಠೇನ ಪಣೀತಟ್ಠೇನ. ಯಾವತಾ ನಿರೋಧೂಪಟ್ಠಾತಿ ತಾವತಾ ಸುಸಮಾರದ್ಧೋ ಇತಿ ಚೇ ಮೇ ಹೋತೀತಿ ಬೋಜ್ಝಙ್ಗೋ.

ಕಥಂ ‘‘ತಿಟ್ಠನ್ತಞ್ಚ ನಂ ತಿಟ್ಠತೀ’’ತಿ ಪಜಾನಾಮಿ; ಸಚೇಪಿ ಚವತಿ ‘‘ಇದಪ್ಪಚ್ಚಯಾ ಚವತೀ’’ತಿ ಪಜಾನಾಮಿ? ಕತಿಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ? ಕತಿಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ಚವತಿ? ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ. ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ಚವತಿ.

ಕತಮೇಹಿ ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ? ಅನುಪ್ಪಾದಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ಉಪ್ಪಾದಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ಅಪ್ಪವತ್ತಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ಪವತ್ತಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ಅನಿಮಿತ್ತಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ನಿಮಿತ್ತಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ನಿರೋಧಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ, ಸಙ್ಖಾರೇ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ – ಇಮೇಹಿ ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ತಿಟ್ಠತಿ.

ಕತಮೇಹಿ ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ಚವತಿ? ಉಪ್ಪಾದಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ಅನುಪ್ಪಾದಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ಪವತ್ತಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ಅಪ್ಪವತ್ತಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ನಿಮಿತ್ತಂ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ಅನಿಮಿತ್ತಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ಸಙ್ಖಾರೇ ಆವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ, ನಿರೋಧಂ ಅನಾವಜ್ಜಿತತ್ತಾ ಸತಿಸಮ್ಬೋಜ್ಝಙ್ಗೋ ಚವತಿ – ಇಮೇಹಿ ಅಟ್ಠಹಾಕಾರೇಹಿ ಸತಿಸಮ್ಬೋಜ್ಝಙ್ಗೋ ಚವತಿ. ಏವಂ ‘‘ತಿಟ್ಠನ್ತಞ್ಚ ನಂ ತಿಟ್ಠತೀ’’ತಿ ಪಜಾನಾಮಿ. ಸಚೇಪಿ ಚವತಿ, ‘‘ಇದಪ್ಪಚ್ಚಯಾ ಮೇ ಚವತೀ’’ತಿ ಪಜಾನಾಮಿ…ಪೇ….