೪. ಮೇತ್ತಾಕಥಾ

೨೨. ಸಾವತ್ಥಿನಿದಾನಂ. ‘‘ಮೇತ್ತಾಯ, ಭಿಕ್ಖವೇ, ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ ಏಕಾದಸಾನಿಸಂಸಾ ಪಾಟಿಕಙ್ಖಾ. ಕತಮೇ ಏಕಾದಸ? ಸುಖಂ ಸುಪತಿ, ಸುಖಂ ಪಟಿಬುಜ್ಝತಿ, ನ ಪಾಪಕಂ ಸುಪಿನಂ ಪಸ್ಸತಿ, ಮನುಸ್ಸಾನಂ ಪಿಯೋ ಹೋತಿ, ಅಮನುಸ್ಸಾನಂ ಪಿಯೋ ಹೋತಿ, ದೇವತಾ ರಕ್ಖನ್ತಿ, ನಾಸ್ಸ ಅಗ್ಗಿ ವಾ ವಿಸಂ ವಾ ಸತ್ಥಂ ವಾ ಕಮತಿ, ತುವಟಂ ಚಿತ್ತಂ ಸಮಾಧಿಯತಿ, ಮುಖವಣ್ಣೋ ವಿಪ್ಪಸೀದತಿ, ಅಸಮ್ಮೂಳ್ಹೋ ಕಾಲಙ್ಕರೋತಿ, ಉತ್ತರಿ [ಉತ್ತರಿಂ (ಸ್ಯಾ. ಪೀ.) ಅ. ನಿ. ೧೧.೧೫ ಪಸ್ಸಿತಬ್ಬಾ] ಅಪ್ಪಟಿವಿಜ್ಝನ್ತೋ ಬ್ರಹ್ಮಲೋಕೂಪಗೋ ಹೋತಿ. ಮೇತ್ತಾಯ, ಭಿಕ್ಖವೇ, ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ – ಇಮೇ ಏಕಾದಸಾನಿಸಂಸಾ ಪಾಟಿಕಙ್ಖಾ’’.

ಅತ್ಥಿ ಅನೋಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ಅತ್ಥಿ ಓಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ಅತ್ಥಿ ದಿಸಾಫರಣಾ ಮೇತ್ತಾಚೇತೋವಿಮುತ್ತಿ. ಕತಿಹಾಕಾರೇಹಿ ಅನೋಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ಕತಿಹಾಕಾರೇಹಿ ಓಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ಕತಿಹಾಕಾರೇಹಿ ದಿಸಾಫರಣಾ ಮೇತ್ತಾಚೇತೋವಿಮುತ್ತಿ? ಪಞ್ಚಹಾಕಾರೇಹಿ ಅನೋಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ಸತ್ತಹಾಕಾರೇಹಿ ಓಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ, ದಸಹಾಕಾರೇಹಿ ದಿಸಾಫರಣಾ ಮೇತ್ತಾಚೇತೋವಿಮುತ್ತಿ.

ಕತಮೇಹಿ ಪಞ್ಚಹಾಕಾರೇಹಿ ಅನೋಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ? ಸಬ್ಬೇ ಸತ್ತಾ ಅವೇರಾ ಅಬ್ಯಾಪಜ್ಜಾ [ಅಬ್ಯಾಪಜ್ಝಾ (ಸ್ಯಾ.)] ಅನೀಘಾ ಸುಖೀ ಅತ್ತಾನಂ ಪರಿಹರನ್ತು. ಸಬ್ಬೇ ಪಾಣಾ…ಪೇ… ಸಬ್ಬೇ ಭೂತಾ…ಪೇ… ಸಬ್ಬೇ ಪುಗ್ಗಲಾ…ಪೇ… ಸಬ್ಬೇ ಅತ್ತಭಾವಪರಿಯಾಪನ್ನಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತೂತಿ. ಇಮೇಹಿ ಪಞ್ಚಹಾಕಾರೇಹಿ ಅನೋಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ.

ಕತಮೇಹಿ ಸತ್ತಹಾಕಾರೇಹಿ ಓಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ? ಸಬ್ಬಾ ಇತ್ಥಿಯೋ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತು. ಸಬ್ಬೇ ಪುರಿಸಾ…ಪೇ… ಸಬ್ಬೇ ಅರಿಯಾ…ಪೇ… ಸಬ್ಬೇ ಅನರಿಯಾ…ಪೇ… ಸಬ್ಬೇ ದೇವಾ…ಪೇ… ಸಬ್ಬೇ ಮನುಸ್ಸಾ…ಪೇ… ಸಬ್ಬೇ ವಿನಿಪಾತಿಕಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತೂತಿ. ಇಮೇಹಿ ಸತ್ತಹಾಕಾರೇಹಿ ಓಧಿಸೋ ಫರಣಾ ಮೇತ್ತಾಚೇತೋವಿಮುತ್ತಿ.

ಕತಮೇಹಿ ದಸಹಾಕಾರೇಹಿ ದಿಸಾಫರಣಾ ಮೇತ್ತಾಚೇತೋವಿಮುತ್ತಿ? ಸಬ್ಬೇ ಪುರತ್ಥಿಮಾಯ ದಿಸಾಯ ಸತ್ತಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತು. ಸಬ್ಬೇ ಪಚ್ಛಿಮಾಯ ದಿಸಾಯ ಸತ್ತಾ…ಪೇ… ಸಬ್ಬೇ ಉತ್ತರಾಯ ದಿಸಾಯ ಸತ್ತಾ…ಪೇ… ಸಬ್ಬೇ ದಕ್ಖಿಣಾಯ ದಿಸಾಯ ಸತ್ತಾ…ಪೇ… ಸಬ್ಬೇ ಪುರತ್ಥಿಮಾಯ ಅನುದಿಸಾಯ ಸತ್ತಾ…ಪೇ… ಸಬ್ಬೇ ಪಚ್ಛಿಮಾಯ ಅನುದಿಸಾಯ ಸತ್ತಾ…ಪೇ… ಸಬ್ಬೇ ಉತ್ತರಾಯ ಅನುದಿಸಾಯ ಸತ್ತಾ…ಪೇ… ಸಬ್ಬೇ ದಕ್ಖಿಣಾಯ ಅನುದಿಸಾಯ ಸತ್ತಾ…ಪೇ… ಸಬ್ಬೇ ಹೇಟ್ಠಿಮಾಯ ದಿಸಾಯ ಸತ್ತಾ…ಪೇ… ಸಬ್ಬೇ ಉಪರಿಮಾಯ ದಿಸಾಯ ಸತ್ತಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತು. ಸಬ್ಬೇ ಪುರತ್ಥಿಮಾಯ ದಿಸಾಯ ಪಾಣಾ…ಪೇ… ಭೂತಾ… ಪುಗ್ಗಲಾ… ಅತ್ತಭಾವಪರಿಯಾಪನ್ನಾ… ಸಬ್ಬಾ ಇತ್ಥಿಯೋ… ಸಬ್ಬೇ ಪುರಿಸಾ… ಸಬ್ಬೇ ಅರಿಯಾ… ಸಬ್ಬೇ ಅನರಿಯಾ… ಸಬ್ಬೇ ದೇವಾ… ಸಬ್ಬೇ ಮನುಸ್ಸಾ… ಸಬ್ಬೇ ವಿನಿಪಾತಿಕಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತು. ಸಬ್ಬೇ ಪಚ್ಛಿಮಾಯ ದಿಸಾಯ ವಿನಿಪಾತಿಕಾ…ಪೇ… ಸಬ್ಬೇ ಉತ್ತರಾಯ ದಿಸಾಯ ವಿನಿಪಾತಿಕಾ… ಸಬ್ಬೇ ದಕ್ಖಿಣಾಯ ದಿಸಾಯ ವಿನಿಪಾತಿಕಾ… ಸಬ್ಬೇ ಪುರತ್ಥಿಮಾಯ ಅನುದಿಸಾಯ ವಿನಿಪಾತಿಕಾ… ಸಬ್ಬೇ ಪಚ್ಛಿಮಾಯ ಅನುದಿಸಾಯ ವಿನಿಪಾತಿಕಾ… ಸಬ್ಬೇ ಉತ್ತರಾಯ ಅನುದಿಸಾಯ ವಿನಿಪಾತಿಕಾ… ಸಬ್ಬೇ ದಕ್ಖಿಣಾಯ ಅನುದಿಸಾಯ ವಿನಿಪಾತಿಕಾ… ಸಬ್ಬೇ ಹೇಟ್ಠಿಮಾಯ ದಿಸಾಯ ವಿನಿಪಾತಿಕಾ… ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಾ ಅಬ್ಯಾಪಜ್ಜಾ ಅನೀಘಾ ಸುಖೀ ಅತ್ತಾನಂ ಪರಿಹರನ್ತೂತಿ. ಇಮೇಹಿ ದಸಹಾಕಾರೇಹಿ ದಿಸಾಫರಣಾ ಮೇತ್ತಾಚೇತೋವಿಮುತ್ತಿ.

೧. ಇನ್ದ್ರಿಯವಾರೋ

೨೩. ಸಬ್ಬೇಸಂ ಸತ್ತಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ಸತ್ತಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ಸತ್ತೇ ಮೇತ್ತಾಯತೀತಿ – ಮೇತ್ತಾ. ತಂ ಧಮ್ಮಂ ಚೇತಯತೀತಿ – ಚೇತೋ. ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ. ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ. ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ವೀರಿಯಂ ಪಗ್ಗಣ್ಹಾತಿ. ವೀರಿಯಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸತಿಂ ಉಪಟ್ಠಾಪೇತಿ. ಸತಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಚಿತ್ತಂ ಸಮಾದಹತಿ. ಸಮಾಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಪಞ್ಞಾಯ ಪಜಾನಾತಿ. ಪಞ್ಞಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಭಾವನಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಭಾವೀಯತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಬಹುಲೀಕತಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಬಹುಲೀಕರೀಯತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಅಲಙ್ಕಾರಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಸ್ವಾಲಙ್ಕತಾ ಹೋತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಪರಿಕ್ಖಾರಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಸುಪರಿಕ್ಖತಾ ಹೋತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಪರಿವಾರಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ. ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ [ಸಂಸೀದನಾ (ಕ. ಸೀ. ಅಟ್ಠ.)] ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ, ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

೨. ಬಲವಾರೋ

೨೪. ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಅಸ್ಸದ್ಧಿಯೇ ನ ಕಮ್ಪತಿ. ಸದ್ಧಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಕೋಸಜ್ಜೇ ನ ಕಮ್ಪತಿ. ವೀರಿಯಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಪಮಾದೇ ನ ಕಮ್ಪತಿ. ಸತಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಉದ್ಧಚ್ಚೇ ನ ಕಮ್ಪತಿ. ಸಮಾಧಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಅವಿಜ್ಜಾಯ ನ ಕಮ್ಪತಿ. ಪಞ್ಞಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಭಾವನಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಭಾವೀಯತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಬಹುಲೀಕತಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಬಹುಲೀಕರೀಯತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಅಲಙ್ಕಾರಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಸ್ವಾಲಙ್ಕತಾ ಹೋತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಪರಿಕ್ಖಾರಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಸುಪರಿಕ್ಖತಾ ಹೋತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಪರಿವಾರಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ. ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

೩. ಬೋಜ್ಝಙ್ಗವಾರೋ

೨೫. ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸತಿಂ ಉಪಟ್ಠಾಪೇತಿ. ಸತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಪಞ್ಞಾಯ ಪವಿಚಿನಾತಿ. ಧಮ್ಮವಿಚಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ವೀರಿಯಂ ಪಗ್ಗಣ್ಹಾತಿ. ವೀರಿಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಪರಿಳಾಹಂ ಪಟಿಪ್ಪಸ್ಸಮ್ಭೇತಿ. ಪೀತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ದುಟ್ಠುಲ್ಲಂ ಪಟಿಪ್ಪಸ್ಸಮ್ಭೇತಿ. ಪಸ್ಸದ್ಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಚಿತ್ತಂ ಸಮಾದಹತಿ. ಸಮಾಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಞಾಣೇನ ಕಿಲೇಸೇ ಪಟಿಸಙ್ಖಾತಿ. ಉಪೇಕ್ಖಾಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಭಾವನಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಭಾವೀಯತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಬಹುಲೀಕತಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಬಹುಲೀಕರೀಯತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಅಲಙ್ಕಾರಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸ್ವಾಲಙ್ಕತಾ ಹೋತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿಕ್ಖಾರಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿಕ್ಖತಾ ಹೋತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿವಾರಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ. ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ, ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

೪. ಮಗ್ಗಙ್ಗವಾರೋ

೨೬. ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಸ್ಸತಿ. ಸಮ್ಮಾದಿಟ್ಠಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಅಭಿನಿರೋಪೇತಿ. ಸಮ್ಮಾಸಙ್ಕಪ್ಪಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪರಿಗ್ಗಣ್ಹಾತಿ. ಸಮ್ಮಾವಾಚಾಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಸಮುಟ್ಠಾಪೇತಿ. ಸಮ್ಮಾಕಮ್ಮನ್ತಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ವೋದಾಪೇತಿ. ಸಮ್ಮಾಆಜೀವಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಗ್ಗಣ್ಹಾತಿ. ಸಮ್ಮಾವಾಯಾಮಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಉಪಟ್ಠಾಪೇತಿ. ಸಮ್ಮಾಸತಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಸಮಾದಹತಿ. ಸಮ್ಮಾಸಮಾಧಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಭಾವನಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಭಾವೀಯತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಬಹುಲೀಕತಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಬಹುಲೀಕರೀಯತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಅಲಙ್ಕಾರಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸ್ವಾಲಙ್ಕತಾ ಹೋನ್ತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿಕ್ಖಾರಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿಕ್ಖತಾ ಹೋತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿವಾರಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

೨೭. ಸಬ್ಬೇಸಂ ಪಾಣಾನಂ…ಪೇ… ಸಬ್ಬೇಸಂ ಭೂತಾನಂ… ಸಬ್ಬೇಸಂ ಪುಗ್ಗಲಾನಂ… ಸಬ್ಬೇಸಂ ಅತ್ತಭಾವಪರಿಯಾಪನ್ನಾನಂ… ಸಬ್ಬಾಸಂ ಇತ್ಥೀನಂ… ಸಬ್ಬೇಸಂ ಪುರಿಸಾನಂ… ಸಬ್ಬೇಸಂ ಅರಿಯಾನಂ… ಸಬ್ಬೇಸಂ ಅನರಿಯಾನಂ… ಸಬ್ಬೇಸಂ ದೇವಾನಂ… ಸಬ್ಬೇಸಂ ಮನುಸ್ಸಾನಂ… ಸಬ್ಬೇಸಂ ವಿನಿಪಾತಿಕಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ವಿನಿಪಾತಿಕಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ವಿನಿಪಾತಿಕೇ ಮೇತ್ತಾಯತೀತಿ – ಮೇತ್ತಾ. ತಂ ಧಮ್ಮಂ ಚೇತಯತೀತಿ – ಚೇತೋ. ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ. ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ.

ಸಬ್ಬೇ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ. ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ…ಪೇ… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

ಸಬ್ಬೇಸಂ ಪುರತ್ಥಿಮಾಯ ದಿಸಾಯ ಸತ್ತಾನಂ…ಪೇ… ಸಬ್ಬೇಸಂ ಪಚ್ಛಿಮಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಉತ್ತರಾಯ ದಿಸಾಯ ಸತ್ತಾನಂ… ಸಬ್ಬೇಸಂ ದಕ್ಖಿಣಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಪುರತ್ಥಿಮಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಪಚ್ಛಿಮಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಉತ್ತರಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ದಕ್ಖಿಣಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಹೇಟ್ಠಿಮಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಉಪರಿಮಾಯ ದಿಸಾಯ ಸತ್ತಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ಉಪರಿಮಾಯ ದಿಸಾಯ ಸತ್ತಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ಉಪರಿಮಾಯ ದಿಸಾಯ ಸತ್ತೇ ಮೇತ್ತಾಯತೀತಿ – ಮೇತ್ತಾ. ತಂ ಧಮ್ಮಂ ಚೇತಯತೀತಿ – ಚೇತೋ. ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ. ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಉಪರಿಮಾಯ ದಿಸಾಯ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ. ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ…ಪೇ… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

ಸಬ್ಬೇಸಂ ಪುರತ್ಥಿಮಾಯ ದಿಸಾಯ ಪಾಣಾನಂ…ಪೇ… ಭೂತಾನಂ… ಪುಗ್ಗಲಾನಂ ಅತ್ತಭಾವಪರಿಯಾಪನ್ನಾನಂ… ಸಬ್ಬಾಸಂ ಇತ್ಥೀನಂ… ಸಬ್ಬೇಸಂ ಪುರಿಸಾನಂ… ಸಬ್ಬೇಸಂ ಅರಿಯಾನಂ… ಸಬ್ಬೇಸಂ ಅನರಿಯಾನಂ… ಸಬ್ಬೇಸಂ ದೇವಾನಂ… ಸಬ್ಬೇಸಂ ಮನುಸ್ಸಾನಂ… ಸಬ್ಬೇಸಂ ವಿನಿಪಾತಿಕಾನಂ… ಸಬ್ಬೇಸಂ ಪಚ್ಛಿಮಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉತ್ತರಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ದಕ್ಖಿಣಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಪುರತ್ಥಿಮಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಪಚ್ಛಿಮಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉತ್ತರಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ದಕ್ಖಿಣಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಹೇಟ್ಠಿಮಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉಪರಿಮಾಯ ದಿಸಾಯ ವಿನಿಪಾತಿಕಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕೇ ಮೇತ್ತಾಯತೀತಿ – ಮೇತ್ತಾ. ತಂ ಧಮ್ಮಂ ಚೇತಯತೀತಿ – ಚೇತೋ. ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ. ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ. ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ವೀರಿಯಂ ಪಗ್ಗಣ್ಹಾತಿ. ವೀರಿಯಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಸತಿಂ ಉಪಟ್ಠಾಪೇತಿ. ಸತಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಚಿತ್ತಂ ಸಮಾದಹತಿ. ಸಮಾಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಪಞ್ಞಾಯ ಪಜಾನಾತಿ. ಪಞ್ಞಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಅಸ್ಸದ್ಧಿಯೇ ನ ಕಮ್ಪತಿ. ಸದ್ಧಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಕೋಸಜ್ಜೇ ನ ಕಮ್ಪತಿ. ವೀರಿಯಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಪಮಾದೇ ನ ಕಮ್ಪತಿ. ಸತಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಉದ್ಧಚ್ಚೇ ನ ಕಮ್ಪತಿ. ಸಮಾಧಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಅವಿಜ್ಜಾಯ ನ ಕಮ್ಪತಿ. ಪಞ್ಞಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸತಿಂ ಉಪಟ್ಠಾಪೇತಿ. ಸತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಪಞ್ಞಾಯ ಪವಿಚಿನಾತಿ. ಧಮ್ಮವಿಚಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ವೀರಿಯಂ ಪಗ್ಗಣ್ಹಾತಿ. ವೀರಿಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಪರಿಳಾಹಂ ಪಟಿಪ್ಪಸ್ಸಮ್ಭೇತಿ. ಪೀತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ದುಟ್ಠುಲ್ಲಂ ಪಟಿಪ್ಪಸ್ಸಮ್ಭೇತಿ. ಪಸ್ಸದ್ಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಚಿತ್ತಂ ಸಮಾದಹತಿ. ಸಮಾಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಞಾಣೇನ ಕಿಲೇಸೇ ಪಟಿಸಙ್ಖಾತಿ. ಉಪೇಕ್ಖಾಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ.

ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಸ್ಸತಿ. ಸಮ್ಮಾದಿಟ್ಠಿ ಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಅಭಿನಿರೋಪೇತಿ. ಸಮ್ಮಾಸಙ್ಕಪ್ಪಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಪರಿಗ್ಗಣ್ಹಾತಿ. ಸಮ್ಮಾವಾಚಾಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಸಮುಟ್ಠಾಪೇತಿ. ಸಮ್ಮಾಕಮ್ಮನ್ತಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ವೋದಾಪೇತಿ. ಸಮ್ಮಾ ಆಜೀವಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಪಗ್ಗಣ್ಹಾತಿ. ಸಮ್ಮಾವಾಯಾಮಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಉಪಟ್ಠಾತಿ. ಸಮ್ಮಾಸತಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ. ಸಮ್ಮಾ ಸಮಾದಹತಿ. ಸಮ್ಮಾಸಮಾಧಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ.

ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ… ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿಭಾವಿತಾ ಹೋನ್ತಿ. ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ. ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತೀತಿ.

ಮೇತ್ತಾಕಥಾ ನಿಟ್ಠಿತಾ.