೨. ನಿದ್ದೇಸೋ

೪೮. ಕತಮಂ ಸುಞ್ಞಸುಞ್ಞಂ? ಚಕ್ಖು ಸುಞ್ಞಂ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಸೋತಂ ಸುಞ್ಞಂ…ಪೇ… ಘಾನಂ ಸುಞ್ಞಂ… ಜಿವ್ಹಾ ಸುಞ್ಞಾ… ಕಾಯೋ ಸುಞ್ಞೋ… ಮನೋ ಸುಞ್ಞೋ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಇದಂ ಸುಞ್ಞಸುಞ್ಞಂ.

ಕತಮಂ ಸಙ್ಖಾರಸುಞ್ಞಂ? ತಯೋ ಸಙ್ಖಾರಾ – ಪುಞ್ಞಾಭಿಸಙ್ಖಾರೋ, ಅಪುಞ್ಞಾಭಿಸಙ್ಖಾರೋ, ಆನೇಞ್ಜಾಭಿಸಙ್ಖಾರೋ. ಪುಞ್ಞಾಭಿಸಙ್ಖಾರೋ ಅಪುಞ್ಞಾಭಿಸಙ್ಖಾರೇನ ಚ ಆನೇಞ್ಜಾಭಿಸಙ್ಖಾರೇನ ಚ ಸುಞ್ಞೋ. ಅಪುಞ್ಞಾಭಿಸಙ್ಖಾರೋ ಪುಞ್ಞಾಭಿಸಙ್ಖಾರೇನ ಚ ಆನೇಞ್ಜಾಭಿಸಙ್ಖಾರೇನ ಚ ಸುಞ್ಞೋ. ಆನೇಞ್ಜಾಭಿಸಙ್ಖಾರೋ ಪುಞ್ಞಾಭಿಸಙ್ಖಾರೇನ ಚ ಅಪುಞ್ಞಾಭಿಸಙ್ಖಾರೇನ ಚ ಸುಞ್ಞೋ. ಇಮೇ ತಯೋ ಸಙ್ಖಾರಾ.

ಅಪರೇಪಿ ತಯೋ ಸಙ್ಖಾರಾ – ಕಾಯಸಙ್ಖಾರೋ, ವಚೀಸಙ್ಖಾರೋ, ಚಿತ್ತಸಙ್ಖಾರೋ. ಕಾಯಸಙ್ಖಾರೋ ವಚೀಸಙ್ಖಾರೇನ ಚ ಚಿತ್ತಸಙ್ಖಾರೇನ ಚ ಸುಞ್ಞೋ. ವಚೀಸಙ್ಖಾರೋ ಕಾಯಸಙ್ಖಾರೇನ ಚ ಚಿತ್ತಸಙ್ಖಾರೇನ ಚ ಸುಞ್ಞೋ. ಚಿತ್ತಸಙ್ಖಾರೋ ಕಾಯಸಙ್ಖಾರೇನ ಚ ವಚೀಸಙ್ಖಾರೇನ ಚ ಸುಞ್ಞೋ. ಇಮೇ ತಯೋ ಸಙ್ಖಾರಾ.

ಅಪರೇಪಿ ತಯೋ ಸಙ್ಖಾರಾ – ಅತೀತಾ ಸಙ್ಖಾರಾ, ಅನಾಗತಾ ಸಙ್ಖಾರಾ, ಪಚ್ಚುಪ್ಪನ್ನಾ ಸಙ್ಖಾರಾ. ಅತೀತಾ ಸಙ್ಖಾರಾ ಅನಾಗತೇಹಿ ಚ ಪಚ್ಚುಪ್ಪನ್ನೇಹಿ ಚ ಸಙ್ಖಾರೇಹಿ ಸುಞ್ಞಾ. ಅನಾಗತಾ ಸಙ್ಖಾರಾ ಅತೀತೇಹಿ ಚ ಪಚ್ಚುಪ್ಪನ್ನೇಹಿ ಚ ಸಙ್ಖಾರೇಹಿ ಸುಞ್ಞಾ ಪಚ್ಚುಪ್ಪನ್ನಾ ಸಙ್ಖಾರಾ ಅತೀತೇಹಿ ಚ ಅನಾಗತೇಹಿ ಚ ಸಙ್ಖಾರೇಹಿ ಸುಞ್ಞಾ. ಇಮೇ ತಯೋ ಸಙ್ಖಾರಾ; ಇದಂ ಸಙ್ಖಾರಸುಞ್ಞಂ.

ಕತಮಂ ವಿಪರಿಣಾಮಸುಞ್ಞಂ? ಜಾತಂ ರೂಪಂ ಸಭಾವೇನ ಸುಞ್ಞಂ. ವಿಗತಂ ರೂಪಂ ವಿಪರಿಣತಞ್ಚೇವ ಸುಞ್ಞಞ್ಚ. ಜಾತಾ ವೇದನಾ ಸಭಾವೇನ ಸುಞ್ಞಾ. ವಿಗತಾ ವೇದನಾ ವಿಪರಿಣತಾ ಚೇವ ಸುಞ್ಞಾ ಚ …ಪೇ… ಜಾತಾ ಸಞ್ಞಾ… ಜಾತಾ ಸಙ್ಖಾರಾ… ಜಾತಂ ವಿಞ್ಞಾಣಂ… ಜಾತಂ ಚಕ್ಖು…ಪೇ… ಜಾತೋ ಭವೋ ಸಭಾವೇನ ಸುಞ್ಞೋ. ವಿಗತೋ ಭವೋ ವಿಪರಿಣತೋ ಚೇವ ಸುಞ್ಞೋ ಚ. ಇದಂ ವಿಪರಿಣಾಮಸುಞ್ಞಂ.

ಕತಮಂ ಅಗ್ಗಸುಞ್ಞಂ? ಅಗ್ಗಮೇತಂ ಪದಂ ಸೇಟ್ಠಮೇತಂ ಪದಂ ವಿಸಿಟ್ಠಮೇತಂ [ವಿಸೇಟ್ಠಮೇತಂ (ಕ.)] ಪದಂ ಯದಿದಂ ಸಬ್ಬಸಙ್ಖಾರಸಮಥೋ ಸಬ್ಬೂಪಧಿಪಟಿನಿಸ್ಸಗ್ಗೋ ತಣ್ಹಕ್ಖಯೋ ವಿರಾಗೋ ನಿರೋಧೋ ನಿಬ್ಬಾನಂ. ಇದಂ ಅಗ್ಗಸುಞ್ಞಂ.

ಕತಮಂ ಲಕ್ಖಣಸುಞ್ಞಂ? ದ್ವೇ ಲಕ್ಖಣಾನಿ – ಬಾಲಲಕ್ಖಣಞ್ಚ ಪಣ್ಡಿತಲಕ್ಖಣಞ್ಚ. ಬಾಲಲಕ್ಖಣಂ ಪಣ್ಡಿತಲಕ್ಖಣೇನ ಸುಞ್ಞಂ. ಪಣ್ಡಿತಲಕ್ಖಣಂ ಬಾಲಲಕ್ಖಣೇನ ಸುಞ್ಞಂ. ತೀಣಿ ಲಕ್ಖಣಾನಿ – ಉಪ್ಪಾದಲಕ್ಖಣಂ, ವಯಲಕ್ಖಣಂ, ಠಿತಞ್ಞಥತ್ತಲಕ್ಖಣಂ. ಉಪ್ಪಾದಲಕ್ಖಣಂ ವಯಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ. ವಯಲಕ್ಖಣಂ ಉಪ್ಪಾದಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ, ಠಿತಞ್ಞಥತ್ತಲಕ್ಖಣಂ ಉಪ್ಪಾದಲಕ್ಖಣೇನ ಚ ವಯಲಕ್ಖಣೇನ ಚ ಸುಞ್ಞಂ.

ರೂಪಸ್ಸ ಉಪ್ಪಾದಲಕ್ಖಣಂ ವಯಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ. ರೂಪಸ್ಸ ವಯಲಕ್ಖಣಂ ಉಪ್ಪಾದಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ. ರೂಪಸ್ಸ ಠಿತಞ್ಞಥತ್ತಲಕ್ಖಣಂ ಉಪ್ಪಾದಲಕ್ಖಣೇನ ಚ ವಯಲಕ್ಖಣೇನ ಚ ಸುಞ್ಞಂ. ವೇದನಾಯ…ಪೇ… ಸಞ್ಞಾಯ… ಸಙ್ಖಾರಾನಂ… ವಿಞ್ಞಾಣಸ್ಸ… ಚಕ್ಖುಸ್ಸ… ಜರಾಮರಣಸ್ಸ ಉಪ್ಪಾದಲಕ್ಖಣಂ ವಯಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ. ಜರಾಮರಣಸ್ಸ ವಯಲಕ್ಖಣಂ ಉಪ್ಪಾದಲಕ್ಖಣೇನ ಚ ಠಿತಞ್ಞಥತ್ತಲಕ್ಖಣೇನ ಚ ಸುಞ್ಞಂ. ಜರಾಮರಣಸ್ಸ ಠಿತಞ್ಞಥತ್ತಲಕ್ಖಣಂ ಉಪ್ಪಾದಲಕ್ಖಣೇನ ಚ ವಯಲಕ್ಖಣೇನ ಚ ಸುಞ್ಞಂ. ಇದಂ ಲಕ್ಖಣಸುಞ್ಞಂ.

ಕತಮಂ ವಿಕ್ಖಮ್ಭನಸುಞ್ಞಂ? ನೇಕ್ಖಮ್ಮೇನ ಕಾಮಚ್ಛನ್ದೋ ವಿಕ್ಖಮ್ಭಿತೋ ಚೇವ ಸುಞ್ಞೋ ಚ. ಅಬ್ಯಾಪಾದೇನ ಬ್ಯಾಪಾದೋ ವಿಕ್ಖಮ್ಭಿತೋ ಚೇವ ಸುಞ್ಞೋ ಚ. ಆಲೋಕಸಞ್ಞಾಯ ಥಿನಮಿದ್ಧಂ ವಿಕ್ಖಮ್ಭಿತಞ್ಚೇವ ಸುಞ್ಞಞ್ಚ. ಅವಿಕ್ಖೇಪೇನ ಉದ್ಧಚ್ಚಂ ವಿಕ್ಖಮ್ಭಿತಞ್ಚೇವ ಸುಞ್ಞಞ್ಚ. ಧಮ್ಮವವತ್ಥಾನೇನ ವಿಚಿಕಿಚ್ಛಾ ವಿಕ್ಖಮ್ಭಿತಾ ಚೇವ ಸುಞ್ಞಾ ಚ. ಞಾಣೇನ ಅವಿಜ್ಜಾ ವಿಕ್ಖಮ್ಭಿತಾ ಚೇವ ಸುಞ್ಞಾ ಚ. ಪಾಮೋಜ್ಜೇನ ಅರತಿ ವಿಕ್ಖಮ್ಭಿತಾ ಚೇವ ಸುಞ್ಞಾ ಚ. ಪಠಮೇನ ಝಾನೇನ ನೀವರಣಾ ವಿಕ್ಖಮ್ಭಿತಾ ಚೇವ ಸುಞ್ಞಾ ಚ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾ ವಿಕ್ಖಮ್ಭಿತಾ ಚೇವ ಸುಞ್ಞಾ ಚ. ಇದಂ ವಿಕ್ಖಮ್ಭನಸುಞ್ಞಂ.

ಕತಮಂ ತದಙ್ಗಸುಞ್ಞಂ? ನೇಕ್ಖಮ್ಮೇನ ಕಾಮಚ್ಛನ್ದೋ ತದಙ್ಗಸುಞ್ಞೋ. ಅಬ್ಯಾಪಾದೇನ ಬ್ಯಾಪಾದೋ ತದಙ್ಗಸುಞ್ಞೋ. ಆಲೋಕಸಞ್ಞಾಯ ಥಿನಮಿದ್ಧಂ ತದಙ್ಗಸುಞ್ಞಂ. ಅವಿಕ್ಖೇಪೇನ ಉದ್ಧಚ್ಚಂ ತದಙ್ಗಸುಞ್ಞಂ. ಧಮ್ಮವವತ್ಥಾನೇನ ವಿಚಿಕಿಚ್ಛಾ ತದಙ್ಗಸುಞ್ಞಾ. ಞಾಣೇನ ಅವಿಜ್ಜಾ ತದಙ್ಗಸುಞ್ಞಾ. ಪಾಮೋಜ್ಜೇನ ಅರತಿ ತದಙ್ಗಸುಞ್ಞಾ. ಪಠಮೇನ ಝಾನೇನ ನೀವರಣಾ ತದಙ್ಗಸುಞ್ಞಾ…ಪೇ… ವಿವಟ್ಟನಾನುಪಸ್ಸನಾಯ ಸಞ್ಞೋಗಾಭಿನಿವೇಸೋ ತದಙ್ಗಸುಞ್ಞೋ. ಇದಂ ತದಙ್ಗಸುಞ್ಞಂ.

ಕತಮಂ ಸಮುಚ್ಛೇದಸುಞ್ಞಂ? ನೇಕ್ಖಮ್ಮೇನ ಕಾಮಚ್ಛನ್ದೋ ಸಮುಚ್ಛಿನ್ನೋ ಚೇವ ಸುಞ್ಞೋ ಚ. ಅಬ್ಯಾಪಾದೇನ ಬ್ಯಾಪಾದೋ ಸಮುಚ್ಛಿನ್ನೋ ಚೇವ ಸುಞ್ಞೋ ಚ. ಆಲೋಕಸಞ್ಞಾಯ ಥಿನಮಿದ್ಧಂ ಸಮುಚ್ಛಿನ್ನಞ್ಚೇವ ಸುಞ್ಞಞ್ಚ. ಅವಿಕ್ಖೇಪೇನ ಉದ್ಧಚ್ಚಂ ಸಮುಚ್ಛಿನ್ನಞ್ಚೇವ ಸುಞ್ಞಞ್ಚ. ಧಮ್ಮವವತ್ಥಾನೇನ ವಿಚಿಕಿಚ್ಛಾ ಸಮುಚ್ಛಿನ್ನಾ ಚೇವ ಸುಞ್ಞಾ ಚ. ಞಾಣೇನ ಅವಿಜ್ಜಾ ಸಮುಚ್ಛಿನ್ನಾ ಚೇವ ಸುಞ್ಞಾ ಚ. ಪಾಮೋಜ್ಜೇನ ಅರತಿ ಸಮುಚ್ಛಿನ್ನಾ ಚೇವ ಸುಞ್ಞಾ ಚ. ಪಠಮೇನ ಝಾನೇನ ನೀವರಣಾ ಸಮುಚ್ಛಿನ್ನಾ ಚೇವ ಸುಞ್ಞಾ ಚ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾ ಸಮುಚ್ಛಿನ್ನಾ ಚೇವ ಸುಞ್ಞಾ ಚ. ಇದಂ ಸಮುಚ್ಛೇದಸುಞ್ಞಂ.

ಕತಮಂ ಪಟಿಪ್ಪಸ್ಸದ್ಧಿಸುಞ್ಞಂ? ನೇಕ್ಖಮ್ಮೇನ ಕಾಮಚ್ಛನ್ದೋ ಪಟಿಪ್ಪಸ್ಸದ್ಧೋ ಚೇವ ಸುಞ್ಞೋ ಚ. ಅಬ್ಯಾಪಾದೇನ ಬ್ಯಾಪಾದೋ ಪಟಿಪ್ಪಸ್ಸದ್ಧೋ ಚೇವ ಸುಞ್ಞೋ ಚ. ಆಲೋಕಸಞ್ಞಾಯ ಥಿನಮಿದ್ಧಂ ಪಟಿಪ್ಪಸ್ಸದ್ಧಞ್ಚೇವ ಸುಞ್ಞಞ್ಚ. ಅವಿಕ್ಖೇಪೇನ ಉದ್ಧಚ್ಚಂ ಪಟಿಪ್ಪಸ್ಸದ್ಧಞ್ಚೇವ ಸುಞ್ಞಞ್ಚ. ಧಮ್ಮವವತ್ಥಾನೇನ ವಿಚಿಕಿಚ್ಛಾ ಪಟಿಪ್ಪಸ್ಸದ್ಧಾ ಚೇವ ಸುಞ್ಞಾ ಚ. ಞಾಣೇನ ಅವಿಜ್ಜಾ ಪಟಿಪ್ಪಸ್ಸದ್ಧಾ ಚೇವ ಸುಞ್ಞಾ ಚ. ಪಾಮೋಜ್ಜೇನ ಅರತಿ ಪಟಿಪ್ಪಸ್ಸದ್ಧಾ ಚೇವ ಸುಞ್ಞಾ ಚ. ಪಠಮೇನ ಝಾನೇನ ನೀವರಣಾ ಪಟಿಪ್ಪಸ್ಸದ್ಧಾ ಚೇವ ಸುಞ್ಞಾ ಚ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾ ಪಟಿಪ್ಪಸ್ಸದ್ಧಾ ಚೇವ ಸುಞ್ಞಾ ಚ. ಇದಂ ಪಟಿಪ್ಪಸ್ಸದ್ಧಿಸುಞ್ಞಂ.

ಕತಮಂ ನಿಸ್ಸರಣಸುಞ್ಞಂ? ನೇಕ್ಖಮ್ಮೇನ ಕಾಮಚ್ಛನ್ದೋ ನಿಸ್ಸಟೋ ಚೇವ ಸುಞ್ಞೋ ಚ. ಅಬ್ಯಾಪಾದೇನ ಬ್ಯಾಪಾದೋ ನಿಸ್ಸಟೋ ಚೇವ ಸುಞ್ಞೋ ಚ. ಆಲೋಕಸಞ್ಞಾಯ ಥಿನಮಿದ್ಧಂ ನಿಸ್ಸಟಞ್ಚೇವ ಸುಞ್ಞಞ್ಚ. ಅವಿಕ್ಖೇಪೇನ ಉದ್ಧಚ್ಚಂ ನಿಸ್ಸಟಞ್ಚೇವ ಸುಞ್ಞಞ್ಚ. ಧಮ್ಮವವತ್ಥಾನೇನ ವಿಚಿಕಿಚ್ಛಾ ನಿಸ್ಸಟಾ ಚೇವ ಸುಞ್ಞಾ ಚ. ಞಾಣೇನ ಅವಿಜ್ಜಾ ನಿಸ್ಸಟಾ ಚೇವ ಸುಞ್ಞಾ ಚ. ಪಾಮೋಜ್ಜೇನ ಅರತಿ ನಿಸ್ಸಟಾ ಚೇವ ಸುಞ್ಞಾ ಚ. ಪಠಮೇನ ಝಾನೇನ ನೀವರಣಾ ನಿಸ್ಸಟಾ ಚೇವ ಸುಞ್ಞಾ ಚ …ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾ ನಿಸ್ಸಟಾ ಚೇವ ಸುಞ್ಞಾ ಚ. ಇದಂ ನಿಸ್ಸರಣಸುಞ್ಞಂ.

ಕತಮಂ ಅಜ್ಝತ್ತಸುಞ್ಞಂ? ಅಜ್ಝತ್ತಂ ಚಕ್ಖುಂ ಸುಞ್ಞಂ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಅಜ್ಝತ್ತಂ ಸೋತಂ ಸುಞ್ಞಂ… ಅಜ್ಝತ್ತಂ ಘಾನಂ ಸುಞ್ಞಂ… ಅಜ್ಝತ್ತಂ ಜಿವ್ಹಾ ಸುಞ್ಞಾ… ಅಜ್ಝತ್ತಂ ಕಾಯೋ ಸುಞ್ಞೋ… ಅಜ್ಝತ್ತಂ ಮನೋ ಸುಞ್ಞೋ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಇದಂ ಅಜ್ಝತ್ತಸುಞ್ಞಂ.

ಕತಮಂ ಬಹಿದ್ಧಾಸುಞ್ಞಂ? ಬಹಿದ್ಧಾ ರೂಪಾ ಸುಞ್ಞಾ…ಪೇ… ಬಹಿದ್ಧಾ ಧಮ್ಮಾ ಸುಞ್ಞಾ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಇದಂ ಬಹಿದ್ಧಾಸುಞ್ಞಂ.

ಕತಮಂ ದುಭತೋಸುಞ್ಞಂ? ಯಞ್ಚ ಅಜ್ಝತ್ತಂ ಚಕ್ಖು ಯೇ ಚ ಬಹಿದ್ಧಾ ರೂಪಾ ಉಭಯಮೇತಂ ಸುಞ್ಞಂ [ಉಭಯತೋ ತಂ ಸುಞ್ಞಾ (ಸ್ಯಾ.)] ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಯಞ್ಚ ಅಜ್ಝತ್ತಂ ಸೋತಂ ಯೇ ಚ ಬಹಿದ್ಧಾ ಸದ್ದಾ…ಪೇ… ಯಞ್ಚ ಅಜ್ಝತ್ತಂ ಘಾನಂ ಯೇ ಚ ಬಹಿದ್ಧಾ ಗನ್ಧಾ… ಯಾ ಚ ಅಜ್ಝತ್ತಂ ಜಿವ್ಹಾ ಯೇ ಚ ಬಹಿದ್ಧಾ ರಸಾ… ಯೋ ಚ ಅಜ್ಝತ್ತಂ ಕಾಯೋ ಯೇ ಚ ಬಹಿದ್ಧಾ ಫೋಟ್ಠಬ್ಬಾ… ಯೋ ಚ ಅಜ್ಝತ್ತಂ ಮನೋ ಯೇ ಚ ಬಹಿದ್ಧಾ ಧಮ್ಮಾ ಉಭಯಮೇತಂ ಸುಞ್ಞಂ ಅತ್ತೇನ ವಾ ಅತ್ತನಿಯೇನ ವಾ ನಿಚ್ಚೇನ ವಾ ಧುವೇನ ವಾ ಸಸ್ಸತೇನ ವಾ ಅವಿಪರಿಣಾಮಧಮ್ಮೇನ ವಾ. ಇದಂ ದುಭತೋಸುಞ್ಞಂ.

ಕತಮಂ ಸಭಾಗಸುಞ್ಞಂ? ಛ ಅಜ್ಝತ್ತಿಕಾನಿ ಆಯತನಾನಿ ಸಭಾಗಾನಿ ಚೇವ ಸುಞ್ಞಾನಿ ಚ. ಛ ಬಾಹಿರಾನಿ ಆಯತನಾನಿ ಸಭಾಗಾನಿ ಚೇವ ಸುಞ್ಞಾನಿ ಚ. ಛ ವಿಞ್ಞಾಣಕಾಯಾ ಸಭಾಗಾ ಚೇವ ಸುಞ್ಞಾ ಚ. ಛ ಫಸ್ಸಕಾಯಾ ಸಭಾಗಾ ಚೇವ ಸುಞ್ಞಾ ಚ. ಛ ವೇದನಾಕಾಯಾ ಸಭಾಗಾ ಚೇವ ಸುಞ್ಞಾ ಚ. ಛ ಸಞ್ಞಾಕಾಯಾ ಸಭಾಗಾ ಚೇವ ಸುಞ್ಞಾ ಚ. ಛ ಚೇತನಾಕಾಯಾ ಸಭಾಗಾ ಚೇವ ಸುಞ್ಞಾ ಚ. ಇದಂ ಸಭಾಗಸುಞ್ಞಂ.

ಕತಮಂ ವಿಸಭಾಗಸುಞ್ಞಂ? ಛ ಅಜ್ಝತ್ತಿಕಾನಿ ಆಯತನಾನಿ ಛಹಿ ಬಾಹಿರೇಹಿ ಆಯತನೇಹಿ ವಿಸಭಾಗಾನಿ ಚೇವ ಸುಞ್ಞಾನಿ ಚ. ಛ ಬಾಹಿರಾನಿ ಆಯತನಾನಿ ಛಹಿ ವಿಞ್ಞಾಣಕಾಯೇಹಿ ವಿಸಭಾಗಾನಿ ಚೇವ ಸುಞ್ಞಾನಿ ಚ. ಛ ವಿಞ್ಞಾಣಕಾಯಾ ಛಹಿ ಫಸ್ಸಕಾಯೇಹಿ ವಿಸಭಾಗಾ ಚೇವ ಸುಞ್ಞಾ ಚ. ಛ ಫಸ್ಸಕಾಯಾ ಛಹಿ ವೇದನಾಕಾಯೇಹಿ ವಿಸಭಾಗಾ ಚೇವ ಸುಞ್ಞಾ ಚ. ಛ ವೇದನಾಕಾಯಾ ಛಹಿ ಸಞ್ಞಾಕಾಯೇಹಿ ವಿಸಭಾಗಾ ಚೇವ ಸುಞ್ಞಾ ಚ. ಛ ಸಞ್ಞಾಕಾಯಾ ಛಹಿ ಚೇತನಾಕಾಯೇಹಿ ವಿಸಭಾಗಾ ಚೇವ ಸುಞ್ಞಾ ಚ. ಇದಂ ವಿಸಭಾಗಸುಞ್ಞಂ.

ಕತಮಂ ಏಸನಾಸುಞ್ಞಂ? ನೇಕ್ಖಮ್ಮೇಸನಾ ಕಾಮಚ್ಛನ್ದೇನ ಸುಞ್ಞಾ. ಅಬ್ಯಾಪಾದೇಸನಾ ಬ್ಯಾಪಾದೇನ ಸುಞ್ಞಾ. ಆಲೋಕಸಞ್ಞೇಸನಾ ಥಿನಮಿದ್ಧೇನ ಸುಞ್ಞಾ. ಅವಿಕ್ಖೇಪೇಸನಾ ಉದ್ಧಚ್ಚೇನ ಸುಞ್ಞಾ. ಧಮ್ಮವವತ್ಥಾನೇಸನಾ ವಿಚಿಕಿಚ್ಛಾಯ ಸುಞ್ಞಾ. ಞಾಣೇಸನಾ ಅವಿಜ್ಜಾಯ ಸುಞ್ಞಾ. ಪಾಮೋಜ್ಜೇಸನಾ ಅರತಿಯಾ ಸುಞ್ಞಾ. ಪಠಮಜ್ಝಾನೇಸನಾ ನೀವರಣೇಹಿ ಸುಞ್ಞಾ…ಪೇ… ಅರಹತ್ತಮಗ್ಗೇಸನಾ ಸಬ್ಬಕಿಲೇಸೇಹಿ ಸುಞ್ಞಾ. ಇದಂ ಏಸನಾಸುಞ್ಞಂ.

ಕತಮಂ ಪರಿಗ್ಗಹಸುಞ್ಞಂ? ನೇಕ್ಖಮ್ಮಪರಿಗ್ಗಹೋ ಕಾಮಚ್ಛನ್ದೇನ ಸುಞ್ಞೋ. ಅಬ್ಯಾಪಾದಪರಿಗ್ಗಹೋ ಬ್ಯಾಪಾದೇನ ಸುಞ್ಞೋ. ಆಲೋಕಸಞ್ಞಾಪರಿಗ್ಗಹೋ ಥಿನಮಿದ್ಧೇನ ಸುಞ್ಞೋ. ಅವಿಕ್ಖೇಪಪರಿಗ್ಗಹೋ ಉದ್ಧಚ್ಚೇನ ಸುಞ್ಞೋ. ಧಮ್ಮವವತ್ಥಾನಪರಿಗ್ಗಹೋ ವಿಚಿಕಿಚ್ಛಾಯ ಸುಞ್ಞೋ. ಞಾಣಪರಿಗ್ಗಹೋ ಅವಿಜ್ಜಾಯ ಸುಞ್ಞೋ. ಪಾಮೋಜ್ಜಪರಿಗ್ಗಹೋ ಅರತಿಯಾ ಸುಞ್ಞೋ. ಪಠಮಜ್ಝಾನಪರಿಗ್ಗಹೋ ನೀವರಣೇಹಿ ಸುಞ್ಞೋ…ಪೇ… ಅರಹತ್ತಮಗ್ಗಪರಿಗ್ಗಹೋ ಸಬ್ಬಕಿಲೇಸೇಹಿ ಸುಞ್ಞೋ. ಇದಂ ಪರಿಗ್ಗಹಸುಞ್ಞಂ.

ಕತಮಂ ಪಟಿಲಾಭಸುಞ್ಞಂ? ನೇಕ್ಖಮ್ಮಪಟಿಲಾಭೋ ಕಾಮಚ್ಛನ್ದೇನ ಸುಞ್ಞೋ. ಅಬ್ಯಾಪಾದಪಟಿಲಾಭೋ ಬ್ಯಾಪಾದೇನ ಸುಞ್ಞೋ. ಆಲೋಕಸಞ್ಞಾಪಟಿಲಾಭೋ ಥಿನಮಿದ್ಧೇನ ಸುಞ್ಞೋ. ಅವಿಕ್ಖೇಪಪಟಿಲಾಭೋ ಉದ್ಧಚ್ಚೇನ ಸುಞ್ಞೋ. ಧಮ್ಮವವತ್ಥಾನಪಟಿಲಾಭೋ ವಿಚಿಕಿಚ್ಛಾಯ ಸುಞ್ಞೋ. ಞಾಣಪಟಿಲಾಭೋ ಅವಿಜ್ಜಾಯ ಸುಞ್ಞೋ. ಪಾಮೋಜ್ಜಪಟಿಲಾಭೋ ಅರತಿಯಾ ಸುಞ್ಞೋ. ಪಠಮಜ್ಝಾನಪಟಿಲಾಭೋ ನೀವರಣೇಹಿ ಸುಞ್ಞೋ…ಪೇ… ಅರಹತ್ತಮಗ್ಗಪಟಿಲಾಭೋ ಸಬ್ಬಕಿಲೇಸೇಹಿ ಸುಞ್ಞೋ. ಇದಂ ಪಟಿಲಾಭಸುಞ್ಞಂ.

ಕತಮಂ ಪಟಿವೇಧಸುಞ್ಞಂ? ನೇಕ್ಖಮ್ಮಪ್ಪಟಿವೇಧೋ ಕಾಮಚ್ಛನ್ದೇನ ಸುಞ್ಞೋ. ಅಬ್ಯಾಪಾದಪ್ಪಟಿವೇಧೋ ಬ್ಯಾಪಾದೇನ ಸುಞ್ಞೋ. ಆಲೋಕಸಞ್ಞಾಪ್ಪಟಿವೇಧೋ ಥಿನಮಿದ್ಧೇನ ಸುಞ್ಞೋ. ಅವಿಕ್ಖೇಪಪ್ಪಟಿವೇಧೋ ಉದ್ಧಚ್ಚೇನ ಸುಞ್ಞೋ. ಧಮ್ಮವವತ್ಥಾನಪ್ಪಟಿವೇಧೋ ವಿಚಿಕಿಚ್ಛಾಯ ಸುಞ್ಞೋ. ಞಾಣಪ್ಪಟಿವೇಧೋ ಅವಿಜ್ಜಾಯ ಸುಞ್ಞೋ. ಪಾಮೋಜ್ಜಪ್ಪಟಿವೇಧೋ ಅರತಿಯಾ ಸುಞ್ಞೋ. ಪಠಮಜ್ಝಾನಪ್ಪಟಿವೇಧೋ ನೀವರಣೇಹಿ ಸುಞ್ಞೋ…ಪೇ… ಅರಹತ್ತಮಗ್ಗಪ್ಪಟಿವೇಧೋ ಸಬ್ಬಕಿಲೇಸೇಹಿ ಸುಞ್ಞೋ. ಇದಂ ಪಟಿವೇಧಸುಞ್ಞಂ.

ಕತಮಂ ಏಕತ್ತಸುಞ್ಞಂ, ನಾನತ್ತಸುಞ್ಞಂ? ಕಾಮಚ್ಛನ್ದೋ ನಾನತ್ತಂ, ನೇಕ್ಖಮ್ಮಂ ಏಕತ್ತಂ. ನೇಕ್ಖಮ್ಮೇಕತ್ತಂ ಚೇತಯತೋ ಕಾಮಚ್ಛನ್ದೇನ ಸುಞ್ಞಂ. ಬ್ಯಾಪಾದೋ ನಾನತ್ತಂ, ಅಬ್ಯಾಪಾದೋ ಏಕತ್ತಂ. ಅಬ್ಯಾಪಾದೇಕತ್ತಂ ಚೇತಯತೋ ಬ್ಯಾಪಾದೇನ ಸುಞ್ಞಂ. ಥಿನಮಿದ್ಧಂ ನಾನತ್ತಂ, ಆಲೋಕಸಞ್ಞಾ ಏಕತ್ತಂ. ಆಲೋಕಸಞ್ಞೇಕತ್ತಂ ಚೇತಯತೋ ಥಿನಮಿದ್ಧೇನ ಸುಞ್ಞಂ. ಉದ್ಧಚ್ಚಂ ನಾನತ್ತಂ, ಅವಿಕ್ಖೇಪೋ ಏಕತ್ತಂ. ಅವಿಕ್ಖೇಪೇಕತ್ತಂ ಚೇತಯತೋ ಉದ್ಧಚ್ಚೇನ ಸುಞ್ಞಂ. ವಿಚಿಕಿಚ್ಛಾ ನಾನತ್ತಂ, ಧಮ್ಮವವತ್ಥಾನಂ ಏಕತ್ತಂ. ಧಮ್ಮವವತ್ಥಾನೇಕತ್ತಂ ಚೇತಯತೋ ವಿಚಿಕಿಚ್ಛಾಯ ಸುಞ್ಞಂ. ಅವಿಜ್ಜಾ ನಾನತ್ತಂ, ಞಾಣಂ ಏಕತ್ತಂ. ಞಾಣೇಕತ್ತಂ ಚೇತಯತೋ ಅವಿಜ್ಜಾಯ ಸುಞ್ಞಂ. ಅರತಿ ನಾನತ್ತಂ, ಪಾಮೋಜ್ಜಂ ಏಕತ್ತಂ. ಪಾಮೋಜ್ಜೇಕತ್ತಂ ಚೇತಯತೋ ಅರತಿಯಾ ಸುಞ್ಞಂ. ನೀವರಣಾ ನಾನತ್ತಂ, ಪಠಮಜ್ಝಾನಂ ಏಕತ್ತಂ. ಪಠಮಜ್ಝಾನೇಕತ್ತಂ ಚೇತಯತೋ ನೀವರಣೇಹಿ ಸುಞ್ಞಂ…ಪೇ… ಸಬ್ಬಕಿಲೇಸಾ ನಾನತ್ತಂ, ಅರಹತ್ತಮಗ್ಗೋ ಏಕತ್ತಂ. ಅರಹತ್ತಮಗ್ಗೇಕತ್ತಂ ಚೇತಯತೋ ಸಬ್ಬಕಿಲೇಸೇಹಿ ಸುಞ್ಞಂ. ಇದಂ ಏಕತ್ತಸುಞ್ಞಂ ನಾನತ್ತಸುಞ್ಞಂ.

ಕತಮಂ ಖನ್ತಿಸುಞ್ಞಂ? ನೇಕ್ಖಮ್ಮಖನ್ತಿ ಕಾಮಚ್ಛನ್ದೇನ ಸುಞ್ಞಾ. ಅಬ್ಯಾಪಾದಖನ್ತಿ ಬ್ಯಾಪಾದೇನ ಸುಞ್ಞಾ. ಆಲೋಕಸಞ್ಞಾಖನ್ತಿ ಥಿನಮಿದ್ಧೇನ ಸುಞ್ಞಾ. ಅವಿಕ್ಖೇಪಖನ್ತಿ ಉದ್ಧಚ್ಚೇನ ಸುಞ್ಞಾ. ಧಮ್ಮವವತ್ಥಾನಖನ್ತಿ ವಿಚಿಕಿಚ್ಛಾಯ ಸುಞ್ಞಾ. ಞಾಣಖನ್ತಿ ಅವಿಜ್ಜಾಯ ಸುಞ್ಞಾ. ಪಾಮೋಜ್ಜಖನ್ತಿ ಅರತಿಯಾ ಸುಞ್ಞಾ. ಪಠಮಜ್ಝಾನಖನ್ತಿ ನೀವರಣೇಹಿ ಸುಞ್ಞಾ…ಪೇ… ಅರಹತ್ತಮಗ್ಗಖನ್ತಿ ಸಬ್ಬಕಿಲೇಸೇಹಿ ಸುಞ್ಞಾ. ಇದಂ ಖನ್ತಿಸುಞ್ಞಂ.

ಕತಮಂ ಅಧಿಟ್ಠಾನಸುಞ್ಞಂ? ನೇಕ್ಖಮ್ಮಾಧಿಟ್ಠಾನಂ ಕಾಮಚ್ಛನ್ದೇನ ಸುಞ್ಞಂ. ಅಬ್ಯಾಪಾದಾಧಿಟ್ಠಾನಂ ಬ್ಯಾಪಾದೇನ ಸುಞ್ಞಂ. ಆಲೋಕಸಞ್ಞಾಧಿಟ್ಠಾನಂ ಥಿನಮಿದ್ಧೇನ ಸುಞ್ಞಂ. ಅವಿಕ್ಖೇಪಾಧಿಟ್ಠಾನಂ ಉದ್ಧಚ್ಚೇನ ಸುಞ್ಞಂ. ಧಮ್ಮವವತ್ಥಾನಾಧಿಟ್ಠಾನಂ ವಿಚಿಕಿಚ್ಛಾಯ ಸುಞ್ಞಂ. ಞಾಣಾಧಿಟ್ಠಾನಂ ಅವಿಜ್ಜಾಯ ಸುಞ್ಞಂ. ಪಾಮೋಜ್ಜಾಧಿಟ್ಠಾನಂ ಅರತಿಯಾ ಸುಞ್ಞಂ. ಪಠಮಜ್ಝಾನಾಧಿಟ್ಠಾನಂ ನೀವರಣೇಹಿ ಸುಞ್ಞಂ…ಪೇ… ಅರಹತ್ತಮಗ್ಗಾಧಿಟ್ಠಾನಂ ಸಬ್ಬಕಿಲೇಸೇಹಿ ಸುಞ್ಞಂ. ಇದಂ ಅಧಿಟ್ಠಾನಸುಞ್ಞಂ.

ಕತಮಂ ಪರಿಯೋಗಾಹಣಸುಞ್ಞಂ? ನೇಕ್ಖಮ್ಮಪರಿಯೋಗಾಹಣಂ ಕಾಮಚ್ಛನ್ದೇನ ಸುಞ್ಞಂ. ಅಬ್ಯಾಪಾದಪರಿಯೋಗಾಹಣಂ ಬ್ಯಾಪಾದೇನ ಸುಞ್ಞಂ. ಆಲೋಕಸಞ್ಞಾಪರಿಯೋಗಾಹಣಂ ಥಿನಮಿದ್ಧೇನ ಸುಞ್ಞಂ. ಅವಿಕ್ಖೇಪಪರಿಯೋಗಾಹಣಂ ಉದ್ಧಚ್ಚೇನ ಸುಞ್ಞಂ. ಧಮ್ಮವವತ್ಥಾನಪರಿಯೋಗಾಹಣಂ ವಿಚಿಕಿಚ್ಛಾಯ ಸುಞ್ಞಂ. ಞಾಣಪರಿಯೋಗಾಹಣಂ ಅವಿಜ್ಜಾಯ ಸುಞ್ಞಂ. ಪಾಮೋಜ್ಜಪರಿಯೋಗಾಹಣಂ ಅರತಿಯಾ ಸುಞ್ಞಂ. ಪಠಮಜ್ಝಾನಪರಿಯೋಗಾಹಣಂ ನೀವರಣೇಹಿ ಸುಞ್ಞಂ…ಪೇ… ಅರಹತ್ತಮಗ್ಗಪರಿಯೋಗಾಹಣಂ ಸಬ್ಬಕಿಲೇಸೇಹಿ ಸುಞ್ಞಂ. ಇದಂ ಪರಿಯೋಗಾಹಣಸುಞ್ಞಂ.

ಕತಮಂ ಸಮ್ಪಜಾನಸ್ಸ ಪವತ್ತಪರಿಯಾದಾನಂ ಸಬ್ಬಸುಞ್ಞತಾನಂ ಪರಮತ್ಥಸುಞ್ಞಂ? ಇಧ ಸಮ್ಪಜಾನೋ ನೇಕ್ಖಮ್ಮೇನ ಕಾಮಚ್ಛನ್ದಸ್ಸ ಪವತ್ತಂ ಪರಿಯಾದಿಯತಿ, ಅಬ್ಯಾಪಾದೇನ ಬ್ಯಾಪಾದಸ್ಸ ಪವತ್ತಂ ಪರಿಯಾದಿಯತಿ, ಆಲೋಕಸಞ್ಞಾಯ ಥಿನಮಿದ್ಧಸ್ಸ ಪವತ್ತಂ ಪರಿಯಾದಿಯತಿ, ಅವಿಕ್ಖೇಪೇನ ಉದ್ಧಚ್ಚಸ್ಸ ಪವತ್ತಂ ಪರಿಯಾದಿಯತಿ, ಧಮ್ಮವವತ್ಥಾನೇನ ವಿಚಿಕಿಚ್ಛಾಯ ಪವತ್ತಂ ಪರಿಯಾದಿಯತಿ, ಞಾಣೇನ ಅವಿಜ್ಜಾಯ ಪವತ್ತಂ ಪರಿಯಾದಿಯತಿ, ಪಾಮೋಜ್ಜೇನ ಅರತಿಯಾ ಪವತ್ತಂ ಪರಿಯಾದಿಯತಿ, ಪಠಮೇನ ಝಾನೇನ ನೀವರಣಾನಂ ಪವತ್ತಂ ಪರಿಯಾದಿಯತಿ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾನಂ ಪವತ್ತಂ ಪರಿಯಾದಿಯತಿ. ಅಥ ವಾ ಪನ ಸಮ್ಪಜಾನಸ್ಸ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯನ್ತಸ್ಸ ಇದಂ ಚೇವ ಚಕ್ಖುಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಚಕ್ಖುಪವತ್ತಂ ನ ಉಪ್ಪಜ್ಜತಿ. ಇದಞ್ಚೇವ ಸೋತಪವತ್ತಂ…ಪೇ… ಘಾನಪವತ್ತಂ… ಜಿವ್ಹಾಪವತ್ತಂ… ಕಾಯಪವತ್ತಂ… ಮನೋಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಮನೋಪವತ್ತಂ ನ ಉಪ್ಪಜ್ಜತಿ. ಇದಂ ಸಮ್ಪಜಾನಸ್ಸ ಪವತ್ತಪರಿಯಾದಾನಂ ಸಬ್ಬಸುಞ್ಞತಾನಂ ಪರಮತ್ಥಸುಞ್ಞನ್ತಿ.

ಸುಞ್ಞಕಥಾ ನಿಟ್ಠಿತಾ.

ಯುಗನದ್ಧವಗ್ಗೋ ದುತಿಯೋ.