೨. ಸೋಳಸಞಾಣನಿದ್ದೇಸೋ

೧೫೩. ಇಮೇಹಿ ಸೋಳಸಹಿ ಆಕಾರೇಹಿ ಉದುಚಿತ್ತಂ ಚಿತ್ತಂ ಸಮುದುಚಿತಂ ಚಿತ್ತಂ ಏಕತ್ತೇ ಸನ್ತಿಟ್ಠತಿ, ನೀವರಣೇಹಿ ವಿಸುಜ್ಝತಿ. ಕತಮೇ ತೇ ಏಕತ್ತಾ? ನೇಕ್ಖಮ್ಮಂ ಏಕತ್ತಂ, ಅಬ್ಯಾಪಾದೋ ಏಕತ್ತಂ, ಆಲೋಕಸಞ್ಞಾ ಏಕತ್ತಂ, ಅವಿಕ್ಖೇಪೋ ಏಕತ್ತಂ, ಧಮ್ಮವವತ್ಥಾನಂ ಏಕತ್ತಂ, ಞಾಣಂ ಏಕತ್ತಂ, ಪಾಮೋಜ್ಜಂ ಏಕತ್ತಂ, ಸಬ್ಬೇಪಿ ಕುಸಲಾ ಧಮ್ಮಾ ಏಕತ್ತಾ.

ನೀವರಣಾತಿ, ಕತಮೇ ತೇ ನೀವರಣಾ? ಕಾಮಚ್ಛನ್ದೋ ನೀವರಣಂ, ಬ್ಯಾಪಾದೋ ನೀವರಣಂ, ಥಿನಮಿದ್ಧಂ ನೀವರಣಂ, ಉದ್ಧಚ್ಚಕುಕ್ಕುಚ್ಚಂ ನೀವರಣಂ, ವಿಚಿಕಿಚ್ಛಾ ನೀವರಣಂ, ಅವಿಜ್ಜಾ ನೀವರಣಂ, ಅರತಿ ನೀವರಣಂ, ಸಬ್ಬೇಪಿ ಅಕುಸಲಾ ಧಮ್ಮಾ ನೀವರಣಾ.

ನೀವರಣಾತಿ, ಕೇನಟ್ಠೇನ ನೀವರಣಾ? ನಿಯ್ಯಾನಾವರಣಟ್ಠೇನ ನೀವರಣಾ. ಕತಮೇ ತೇ ನಿಯ್ಯಾನಾ? ನೇಕ್ಖಮ್ಮಂ ಅರಿಯಾನಂ ನಿಯ್ಯಾನಂ. ತೇನ ಚ ನೇಕ್ಖಮ್ಮೇನ ಅರಿಯಾ ನಿಯ್ಯನ್ತಿ. ಕಾಮಚ್ಛನ್ದೋ ನಿಯ್ಯಾನಾವರಣಂ. ತೇನ ಚ ಕಾಮಚ್ಛನ್ದೇನ ನಿವುತತ್ತಾ ನೇಕ್ಖಮ್ಮಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಕಾಮಚ್ಛನ್ದೋ ನಿಯ್ಯಾನಾವರಣಂ. ಅಬ್ಯಾಪಾದೋ ಅರಿಯಾನಂ ನಿಯ್ಯಾನಂ. ತೇನ ಚ ಅಬ್ಯಾಪಾದೇನ ಅರಿಯಾ ನಿಯ್ಯನ್ತಿ. ಬ್ಯಾಪಾದೋ ನಿಯ್ಯಾನಾವರಣಂ. ತೇನ ಚ ಬ್ಯಾಪಾದೇನ ನಿವುತತ್ತಾ ಅಬ್ಯಾಪಾದಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಬ್ಯಾಪಾದೋ ನಿಯ್ಯಾನಾವರಣಂ. ಆಲೋಕಸಞ್ಞಾ ಅರಿಯಾನಂ ನಿಯ್ಯಾನಂ. ತಾಯ ಚ ಆಲೋಕಸಞ್ಞಾಯ ಅರಿಯಾ ನಿಯ್ಯನ್ತಿ. ಥಿನಮಿದ್ಧಂ ನಿಯ್ಯಾನಾವರಣಂ. ತೇನ ಚ ಥಿನಮಿದ್ಧೇನ ನಿವುತತ್ತಾ ಆಲೋಕಸಞ್ಞಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಥಿನಮಿದ್ಧಂ ನಿಯ್ಯಾನಾವರಣಂ. ಅವಿಕ್ಖೇಪೋ ಅರಿಯಾನಂ ನಿಯ್ಯಾನಂ. ತೇನ ಚ ಅವಿಕ್ಖೇಪೇನ ಅರಿಯಾ ನಿಯ್ಯನ್ತಿ. ಉದ್ಧಚ್ಚಂ ನಿಯ್ಯಾನಾವರಣಂ. ತೇನ ಚ ಉದ್ಧಚ್ಚೇನ ನಿವುತತ್ತಾ ಅವಿಕ್ಖೇಪಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಉದ್ಧಚ್ಚಂ ನಿಯ್ಯಾನಾವರಣಂ. ಧಮ್ಮವವತ್ಥಾನಂ ಅರಿಯಾನಂ ನಿಯ್ಯಾನಂ. ತೇನ ಚ ಧಮ್ಮವವತ್ಥಾನೇನ ಅರಿಯಾ ನಿಯ್ಯನ್ತಿ. ವಿಚಿಕಿಚ್ಛಾ ನಿಯ್ಯಾನಾವರಣಂ. ತಾಯ ಚ ವಿಚಿಕಿಚ್ಛಾಯ ನಿವುತತ್ತಾ ಧಮ್ಮವವತ್ಥಾನಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ವಿಚಿಕಿಚ್ಛಾ ನಿಯ್ಯಾನಾವರಣಂ. ಞಾಣಂ ಅರಿಯಾನಂ ನಿಯ್ಯಾನಂ. ತೇನ ಚ ಞಾಣೇನ ಅರಿಯಾ ನಿಯ್ಯನ್ತಿ. ಅವಿಜ್ಜಾ ನಿಯ್ಯಾನಾವರಣಂ. ತಾಯ ಚ ಅವಿಜ್ಜಾಯ ನಿವುತತ್ತಾ ಞಾಣಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಅವಿಜ್ಜಾ ನಿಯ್ಯಾನಾವರಣಂ. ಪಾಮೋಜ್ಜಂ ಅರಿಯಾನಂ ನಿಯ್ಯಾನಂ. ತೇನ ಚ ಪಾಮೋಜ್ಜೇನ ಅರಿಯಾ ನಿಯ್ಯನ್ತಿ. ಅರತಿ ನಿಯ್ಯಾನಾವರಣಂ. ತಾಯ ಚ ಅರತಿಯಾ ನಿವುತತ್ತಾ ಪಾಮೋಜ್ಜಂ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಅರತಿ ನಿಯ್ಯಾನಾವರಣಂ. ಸಬ್ಬೇಪಿ ಕುಸಲಾ ಧಮ್ಮಾ ಅರಿಯಾನಂ ನಿಯ್ಯಾನಂ. ತೇಹಿ ಚ ಕುಸಲೇಹಿ ಧಮ್ಮೇಹಿ ಅರಿಯಾ ನಿಯ್ಯನ್ತಿ. ಸಬ್ಬೇಪಿ ಅಕುಸಲಾ ಧಮ್ಮಾ ನಿಯ್ಯಾನಾವರಣಾ. ತೇಹಿ ಚ ಅಕುಸಲೇಹಿ ಧಮ್ಮೇಹಿ ನಿವುತತ್ತಾ ಕುಸಲೇ ಧಮ್ಮೇ ಅರಿಯಾನಂ ನಿಯ್ಯಾನಂ ನಪ್ಪಜಾನಾತೀತಿ – ಸಬ್ಬೇಪಿ ಅಕುಸಲಾ ಧಮ್ಮಾ ನಿಯ್ಯಾನಾವರಣಾ. ಇಮೇಹಿ ಚ ಪನ ನೀವರಣೇಹಿ ವಿಸುದ್ಧಚಿತ್ತಸ್ಸ ಸೋಳಸವತ್ಥುಕಂ ಆನಾಪಾನಸ್ಸತಿಸಮಾಧಿಂ ಭಾವಯತೋ ಖಣಿಕಸಮೋಧಾನಾ.

ಸೋಳಸಞಾಣನಿದ್ದೇಸೋ ದುತಿಯೋ.