೧೨. ಭದ್ರಾವುಧಮಾಣವಪುಚ್ಛಾನಿದ್ದೇಸೋ

೭೦. ಓಕಞ್ಜಹಂ ತಣ್ಹಚ್ಛಿದಂ ಅನೇಜಂ, [ಇಚ್ಚಾಯಸ್ಮಾ ಭದ್ರಾವುಧೋ]

ನನ್ದಿಞ್ಜಹಂ ಓಘತಿಣ್ಣಂ ವಿಮುತ್ತಂ;

ಕಪ್ಪಞ್ಜಹಂ ಅಭಿಯಾಚೇ ಸುಮೇಧಂ, ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ [ಅಪಗಮಿಸ್ಸನ್ತಿ (ಕ.)] ಇತೋ.

ಓಕಞ್ಜಹಂ ತಣ್ಹಚ್ಛಿದಂ ಅನೇಜನ್ತಿ. ಓಕಞ್ಜಹನ್ತಿ ರೂಪಧಾತುಯಾ ಯೋ ಛನ್ದೋ ಯೋ ರಾಗೋ ಯಾ ನನ್ದೀ ಯಾ ತಣ್ಹಾ ಯೇ ಉಪಾಯುಪಾದಾನಾ [ಉಪಯುಪಾದಾನಾ (ಕ.)] ಚೇತಸೋ ಅಧಿಟ್ಠಾನಾಭಿನಿವೇಸಾನುಸಯಾ, ತೇ ಬುದ್ಧಸ್ಸ ಭಗವತೋ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ತಸ್ಮಾ ಬುದ್ಧೋ ಓಕಞ್ಜಹೋ. ವೇದನಾಧಾತುಯಾ…ಪೇ… ಸಞ್ಞಾಧಾತುಯಾ… ಸಙ್ಖಾರಧಾತುಯಾ… ವಿಞ್ಞಾಣಧಾತುಯಾ ಯೋ ಛನ್ದೋ ಯೋ ರಾಗೋ ಯಾ ನನ್ದೀ ಯಾ ತಣ್ಹಾ ಯೇ ಉಪಾಯುಪಾದಾನಾ ಚೇತಸೋ ಅಧಿಟ್ಠಾನಾಭಿನಿವೇಸಾನುಸಯಾ, ತೇ ಬುದ್ಧಸ್ಸ ಭಗವತೋ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ತಸ್ಮಾ ಬುದ್ಧೋ ಓಕಞ್ಜಹೋ.

ತಣ್ಹಚ್ಛಿದನ್ತಿ. ತಣ್ಹಾತಿ ರೂಪತಣ್ಹಾ…ಪೇ… ಧಮ್ಮತಣ್ಹಾ. ಸಾ ತಣ್ಹಾ ಬುದ್ಧಸ್ಸ ಭಗವತೋ ಛಿನ್ನಾ ಉಚ್ಛಿನ್ನಾ ಸಮುಚ್ಛಿನ್ನಾ ವೂಪಸನ್ತಾ ಪಟಿಪ್ಪಸ್ಸದ್ಧಾ ಅಭಬ್ಬುಪ್ಪತ್ತಿಕಾ ಞಾಣಗ್ಗಿನಾ ದಡ್ಢಾ. ತಸ್ಮಾ ಬುದ್ಧೋ ತಣ್ಹಚ್ಛಿದೋ. ಅನೇಜೋತಿ ಏಜಾ ವುಚ್ಚತಿ ತಣ್ಹಾ. ಯೋ ರಾಗೋ ಸಾರಾಗೋ …ಪೇ… ಅಭಿಜ್ಝಾ ಲೋಭೋ ಅಕುಸಲಮೂಲಂ. ಸಾ ಏಜಾ ತಣ್ಹಾ ಬುದ್ಧಸ್ಸ ಭಗವತೋ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ತಸ್ಮಾ ಬುದ್ಧೋ ಅನೇಜೋ. ಏಜಾಯ ಪಹೀನತ್ತಾ ಅನೇಜೋ ಭಗವಾ ಲಾಭೇಪಿ ನ ಇಞ್ಜತಿ, ಅಲಾಭೇಪಿ ನ ಇಞ್ಜತಿ, ಯಸೇಪಿ ನ ಇಞ್ಜತಿ, ಅಯಸೇಪಿ ನ ಇಞ್ಜತಿ, ಪಸಂಸಾಯಪಿ ನ ಇಞ್ಜತಿ, ನಿನ್ದಾಯಪಿ ನ ಇಞ್ಜತಿ, ಸುಖೇಪಿ ನ ಇಞ್ಜತಿ, ದುಕ್ಖೇಪಿ ನ ಇಞ್ಜತಿ ನ ಚಲತಿ ನ ವೇಧತಿ ನ ಪವೇಧತಿ ನ ಸಮ್ಪವೇಧತೀತಿ. ತಸ್ಮಾ ಬುದ್ಧೋ ಅನೇಜೋತಿ – ಓಕಞ್ಜಹಂ ತಣ್ಹಚ್ಛಿದಂ ಅನೇಜಂ. ಇಚ್ಚಾಯಸ್ಮಾ ಭದ್ರಾವುಧೋತಿ. ಇಚ್ಚಾತಿ ಪದಸನ್ಧಿ…ಪೇ… ಆಯಸ್ಮಾತಿ, ಪಿಯವಚನಂ…ಪೇ… ಭದ್ರಾವುಧೋತಿ ತಸ್ಸ ಬ್ರಾಹ್ಮಣಸ್ಸ ನಾಮಂ…ಪೇ… ಅಭಿಲಾಪೋತಿ – ಇಚ್ಚಾಯಸ್ಮಾ ಭದ್ರಾವುಧೋ.

ನನ್ದಿಞ್ಜಹಂ ಓಘತಿಣ್ಣಂ ವಿಮುತ್ತನ್ತಿ ನನ್ದೀ ವುಚ್ಚತಿ ತಣ್ಹಾ. ಯೋ ರಾಗೋ ಸಾರಾಗೋ…ಪೇ… ಅಭಿಜ್ಝಾ ಲೋಭೋ ಅಕುಸಲಮೂಲಂ. ಸಾ ನನ್ದೀ ಸಾ ತಣ್ಹಾ ಬುದ್ಧಸ್ಸ ಭಗವತೋ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ತಸ್ಮಾ ಬುದ್ಧೋ ನನ್ದಿಞ್ಜಹೋ. ಓಘತಿಣ್ಣನ್ತಿ ಭಗವಾ ಕಾಮೋಘಂ ತಿಣ್ಣೋ ಭವೋಘಂ ತಿಣ್ಣೋ ದಿಟ್ಠೋಘಂ ತಿಣ್ಣೋ ಅವಿಜ್ಜೋಘಂ ತಿಣ್ಣೋ ಸಬ್ಬಸಂಸಾರಪಥಂ ತಿಣ್ಣೋ ಉತ್ತಿಣ್ಣೋ ನಿತ್ಥಿಣ್ಣೋ ಅತಿಕ್ಕನ್ತೋ ಸಮತಿಕ್ಕನ್ತೋ ವೀತಿವತ್ತೋ. ಸೋ ವುತ್ಥವಾಸೋ ಚಿಣ್ಣಚರಣೋ…ಪೇ… ಜಾತಿಮರಣಸಂಸಾರೋ ನತ್ಥಿ ತಸ್ಸ ಪುನಬ್ಭವೋತಿ – ನನ್ದಿಞ್ಜಹಂ ಓಘತಿಣ್ಣಂ. ವಿಮುತ್ತನ್ತಿ ಭಗವತೋ ರಾಗಾ ಚಿತ್ತಂ ಮುತ್ತಂ ವಿಮುತ್ತಂ ಸುವಿಮುತ್ತಂ, ದೋಸಾ ಚಿತ್ತಂ… ಮೋಹಾ ಚಿತ್ತಂ…ಪೇ… ಸಬ್ಬಾಕುಸಲಾಭಿಸಙ್ಖಾರೇಹಿ ಚಿತ್ತಂ ಮುತ್ತಂ ವಿಮುತ್ತಂ ಸುವಿಮುತ್ತನ್ತಿ – ನನ್ದಿಞ್ಜಹಂ ಓಘತಿಣ್ಣಂ ವಿಮುತ್ತಂ.

ಕಪ್ಪಞ್ಜಹಂ ಅಭಿಯಾಚೇ ಸುಮೇಧನ್ತಿ. ಕಪ್ಪಾತಿ ದ್ವೇ ಕಪ್ಪಾ – ತಣ್ಹಾಕಪ್ಪೋ ಚ ದಿಟ್ಠಿಕಪ್ಪೋ ಚ…ಪೇ… ಅಯಂ ತಣ್ಹಾಕಪ್ಪೋ…ಪೇ… ಅಯಂ ದಿಟ್ಠಿಕಪ್ಪೋ. ಬುದ್ಧಸ್ಸ ಭಗವತೋ ತಣ್ಹಾಕಪ್ಪೋ ಪಹೀನೋ ದಿಟ್ಠಿಕಪ್ಪೋ ಪಟಿನಿಸ್ಸಟ್ಠೋ. ತಣ್ಹಾಕಪ್ಪಸ್ಸ ಪಹೀನತ್ತಾ ದಿಟ್ಠಿಕಪ್ಪಸ್ಸ ಪಟಿನಿಸ್ಸಟ್ಠತ್ತಾ ತಸ್ಮಾ ಬುದ್ಧೋ ಕಪ್ಪಞ್ಜಹೋ. ಅಭಿಯಾಚೇತಿ ಯಾಚಾಮಿ ಅಭಿಯಾಚಾಮಿ ಅಜ್ಝೇಸಾಮಿ ಸಾದಿಯಾಮಿ ಪತ್ಥಯಾಮಿ ಪಿಹಯಾಮಿ ಜಪ್ಪಾಮಿ ಅಭಿಜಪ್ಪಾಮಿ. ಸುಮೇಧಾ ವುಚ್ಚತಿ ಪಞ್ಞಾ. ಯಾ ಪಞ್ಞಾ ಪಜಾನನಾ…ಪೇ… ಅಮೋಹೋ ಧಮ್ಮವಿಚಯೋ ಸಮ್ಮಾದಿಟ್ಠಿ. ಭಗವಾ ಇಮಾಯ ಮೇಧಾಯ ಪಞ್ಞಾಯ ಉಪೇತೋ ಸಮುಪೇತೋ ಉಪಾಗತೋ ಸಮುಪಾಗತೋ ಉಪಪನ್ನೋ ಸಮುಪಪನ್ನೋ ಸಮನ್ನಾಗತೋ. ತಸ್ಮಾ ಬುದ್ಧೋ ಸುಮೇಧೋತಿ – ಕಪ್ಪಞ್ಜಹಂ ಅಭಿಯಾಚೇ ಸುಮೇಧಂ.

ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋತಿ. ನಾಗಸ್ಸಾತಿ ನಾಗೋ. ಭಗವಾ ಆಗುಂ ನ ಕರೋತೀತಿ ನಾಗೋ, ನ ಗಚ್ಛತೀತಿ ನಾಗೋ, ನ ಆಗಚ್ಛತೀತಿ ನಾಗೋ…ಪೇ… ಏವಂ ಭಗವಾ ನ ಗಚ್ಛತೀತಿ ನಾಗೋ. ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋತಿ ತುಯ್ಹಂ ವಚನಂ ಬ್ಯಪ್ಪಥಂ ದೇಸನಂ ಅನುಸಾಸನಂ ಅನುಸಿಟ್ಠಂ ಸುತ್ವಾ ಸುಣಿತ್ವಾ ಉಗ್ಗಹೇತ್ವಾ ಉಪಧಾರಯಿತ್ವಾ ಉಪಲಕ್ಖಯಿತ್ವಾ ಇತೋ ಅಪನಮಿಸ್ಸನ್ತಿ ವಜಿಸ್ಸನ್ತಿ ಪಕ್ಕಮಿಸ್ಸನ್ತಿ ದಿಸಾವಿದಿಸಂ ಗಮಿಸ್ಸನ್ತೀತಿ – ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋ. ತೇನಾಹ ಸೋ ಬ್ರಾಹ್ಮಣೋ –

‘‘ಓಕಞ್ಜಹಂ ತಣ್ಹಚ್ಛಿದಂ ಅನೇಜಂ, [ಇಚ್ಚಾಯಸ್ಮಾ ಭದ್ರಾವುಧೋ]

ನನ್ದಿಞ್ಜಹಂ ಓಘತಿಣ್ಣಂ ವಿಮುತ್ತಂ;

ಕಪ್ಪಞ್ಜಹಂ ಅಭಿಯಾಚೇ ಸುಮೇಧಂ, ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋ’’ತಿ.

೭೧. ನಾನಾಜನಾ ಜನಪದೇಹಿ ಸಙ್ಗತಾ, ತವ ವೀರ ವಾಕ್ಯಂ ಅಭಿಕಙ್ಖಮಾನಾ;

ತೇಸಂ ತುವಂ ಸಾಧು ವಿಯಾಕರೋಹಿ, ತಥಾ ಹಿ ತೇ ವಿದಿತೋ ಏಸ ಧಮ್ಮೋ.

ನಾನಾಜನಾ ಜನಪದೇಹಿ ಸಙ್ಗತಾತಿ. ನಾನಾಜನಾತಿ ಖತ್ತಿಯಾ ಚ ಬ್ರಾಹ್ಮಣಾ ಚ ವೇಸ್ಸಾ ಚ ಸುದ್ದಾ ಚ ಗಹಟ್ಠಾ ಚ ಪಬ್ಬಜಿತಾ ಚ ದೇವಾ ಚ ಮನುಸ್ಸಾ ಚ. ಜನಪದೇಹಿ ಸಙ್ಗತಾತಿ ಅಙ್ಗಾ ಚ ಮಗಧಾ ಚ ಕಲಿಙ್ಗಾ ಚ ಕಾಸಿಯಾ ಚ ಕೋಸಲಾ ಚ ವಜ್ಜಿಯಾ ಚ ಮಲ್ಲಾ ಚ ಚೇತಿಯಮ್ಹಾ ಚ [ಚೇತಿಯಮ್ಹಾ ಚ ಸಾಗರಮ್ಹಾ ಚ (ಸ್ಯಾ.)] ವಂಸಾ ಚ ಕುರುಮ್ಹಾ ಚ ಪಞ್ಚಾಲಾ ಚ ಮಚ್ಛಾ ಚ ಸುರಸೇನಾ ಚ ಅಸ್ಸಕಾ ಚ ಅವನ್ತಿಯಾ ಚ ಯೋನಾ [ಯೋನಕಾ (ಕ.) ಮಹಾನಿ. ೫೫] ಚ ಕಮ್ಬೋಜಾ ಚ. ಸಙ್ಗತಾತಿ ಸಙ್ಗತಾ ಸಮಾಗತಾ ಸಮೋಹಿತಾ ಸನ್ನಿಪತಿತಾತಿ – ನಾನಾಜನಾ ಜನಪದೇಹಿ ಸಙ್ಗತಾ.

ತವ ವೀರ ವಾಕ್ಯಂ ಅಭಿಕಙ್ಖಮಾನಾತಿ. ವೀರಾತಿ ವೀರೋ. ಭಗವಾ ವೀರಿಯವಾತಿ ವೀರೋ, ಪಹೂತಿ ವೀರೋ, ವಿಸವೀತಿ ವೀರೋ, ಅಲಮತ್ತೋತಿ ವೀರೋ, ವಿಗತಲೋಮಹಂಸೋತಿಪಿ ವೀರೋ.

ವಿರತೋ ಇಧ ಸಬ್ಬಪಾಪಕೇಹಿ, ನಿರಯದುಕ್ಖಂ ಅತಿಚ್ಚ ವೀರಿಯವಾ ಸೋ;

ಸೋ ವೀರಿಯವಾ ಪಧಾನವಾ, ವೀರೋ ತಾದಿ ಪವುಚ್ಚತೇ ತಥತ್ತಾತಿ.

ತವ ವೀರ ವಾಕ್ಯಂ ಅಭಿಕಙ್ಖಮಾನಾತಿ ತುಯ್ಹಂ ವಚನಂ ಬ್ಯಪ್ಪಥಂ ದೇಸನಂ ಅನುಸಾಸನಂ ಅನುಸಿಟ್ಠಂ. ಅಭಿಕಙ್ಖಮಾನಾತಿ ಅಭಿಕಙ್ಖಮಾನಾ ಇಚ್ಛಮಾನಾ ಸಾದಿಯಮಾನಾ ಪತ್ಥಯಮಾನಾ ಪಿಹಯಮಾನಾ ಅಭಿಜಪ್ಪಮಾನಾತಿ – ತವ ವೀರ ವಾಕ್ಯಂ ಅಭಿಕಙ್ಖಮಾನಾ.

ತೇಸಂ ತುವಂ ಸಾಧು ವಿಯಾಕರೋಹೀತಿ. ತೇಸನ್ತಿ ತೇಸಂ ಖತ್ತಿಯಾನಂ ಬ್ರಾಹ್ಮಣಾನಂ ವೇಸ್ಸಾನಂ ಸುದ್ದಾನಂ ಗಹಟ್ಠಾನಂ ಪಬ್ಬಜಿತಾನಂ ದೇವಾನಂ ಮನುಸ್ಸಾನಂ. ತುವನ್ತಿ ಭಗವನ್ತಂ ಭಣತಿ. ಸಾಧು ವಿಯಾಕರೋಹೀತಿ ಸಾಧು ಆಚಿಕ್ಖಾಹಿ ದೇಸೇಹಿ ಪಞ್ಞಪೇಹಿ ಪಟ್ಠಪೇಹಿ ವಿವರಾಹಿ ವಿಭಜಾಹಿ ಉತ್ತಾನೀಕರೋಹಿ ಪಕಾಸೇಹೀತಿ – ತೇಸಂ ತುವಂ ಸಾಧು ವಿಯಾಕರೋಹಿ.

ತಥಾ ಹಿ ತೇ ವಿದಿತೋ ಏಸ ಧಮ್ಮೋತಿ ತಥಾ ಹಿ ತೇ ವಿದಿತೋ ತುಲಿತೋ ತೀರಿತೋ ವಿಭೂತೋ ವಿಭಾವಿತೋ ಏಸ ಧಮ್ಮೋತಿ – ತಥಾ ಹಿ ತೇ ವಿದಿತೋ ಏಸ ಧಮ್ಮೋ. ತೇನಾಹ ಸೋ ಬ್ರಾಹ್ಮಣೋ –

‘‘ನಾನಾಜನಾ ಜನಪದೇಹಿ ಸಙ್ಗತಾ, ತವ ವೀರ ವಾಕ್ಯಂ ಅಭಿಕಙ್ಖಮಾನಾ;

ತೇಸಂ ತುವಂ ಸಾಧು ವಿಯಾಕರೋಹಿ, ತಥಾ ಹಿ ತೇ ವಿದಿತೋ ಏಸ ಧಮ್ಮೋ’’ತಿ.

೭೨. ಆದಾನತಣ್ಹಂ ವಿನಯೇಥ ಸಬ್ಬಂ, [ಭದ್ರಾವುಧಾತಿ ಭಗವಾ]

ಉದ್ಧಂ ಅಧೋ ತಿರಿಯಞ್ಚಾಪಿ ಮಜ್ಝೇ;

ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತಿ, ತೇನೇವ ಮಾರೋ ಅನ್ವೇತಿ ಜನ್ತುಂ.

ಆದಾನತಣ್ಹಂ ವಿನಯೇಥ ಸಬ್ಬನ್ತಿ ಆದಾನತಣ್ಹಂ ವುಚ್ಚತಿ ರೂಪತಣ್ಹಾ…ಪೇ… ಆದಾನತಣ್ಹಾತಿ ಕಿಂಕಾರಣಾ ವುಚ್ಚತಿ ಆದಾನತಣ್ಹಾ? ತಾಯ ತಣ್ಹಾಯ ರೂಪಂ ಆದಿಯನ್ತಿ ಉಪಾದಿಯನ್ತಿ ಗಣ್ಹನ್ತಿ ಪರಾಮಸನ್ತಿ ಅಭಿನಿವಿಸನ್ತಿ. ವೇದನಂ…ಪೇ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ… ಗತಿಂ… ಉಪಪತ್ತಿಂ… ಪಟಿಸನ್ಧಿಂ… ಭವಂ… ಸಂಸಾರಂ… ವಟ್ಟಂ ಆದಿಯನ್ತಿ ಉಪಾದಿಯನ್ತಿ ಗಣ್ಹನ್ತಿ ಪರಾಮಸನ್ತಿ ಅಭಿನಿವಿಸನ್ತಿ. ತಂಕಾರಣಾ ವುಚ್ಚತಿ ಆದಾನತಣ್ಹಾ. ಆದಾನತಣ್ಹಂ ವಿನಯೇಥ ಸಬ್ಬನ್ತಿ ಸಬ್ಬಂ ಆದಾನತಣ್ಹಂ ವಿನಯೇಯ್ಯ ಪಟಿವಿನಯೇಯ್ಯ ಪಜಹೇಯ್ಯ ವಿನೋದೇಯ್ಯ ಬ್ಯನ್ತೀಕರೇಯ್ಯ ಅನಭಾವಂ ಗಮೇಯ್ಯಾತಿ – ಆದಾನತಣ್ಹಂ ವಿನಯೇಥ ಸಬ್ಬಂ. ಭದ್ರಾವುಧಾತಿ ಭಗವಾತಿ. ಭದ್ರಾವುಧಾತಿ ಭಗವಾ ತಂ ಬ್ರಾಹ್ಮಣಂ ನಾಮೇನ ಆಲಪತಿ. ಭಗವಾತಿ ಗಾರವಾಧಿವಚನಮೇತಂ…ಪೇ… ಸಚ್ಛಿಕಾ ಪಞ್ಞತ್ತಿ, ಯದಿದಂ ಭಗವಾತಿ – ಭದ್ರಾವುಧಾತಿ ಭಗವಾ.

ಉದ್ಧಂ ಅಧೋ ತಿರಿಯಞ್ಚಾಪಿ ಮಜ್ಝೇತಿ. ಉದ್ಧನ್ತಿ ಅನಾಗತಂ; ಅಧೋತಿ ಅತೀತಂ; ತಿರಿಯಞ್ಚಾಪಿ ಮಜ್ಝೇತಿ ಪಚ್ಚುಪ್ಪನ್ನಂ. ಉದ್ಧನ್ತಿ ದೇವಲೋಕೋ; ಅಧೋತಿ ನಿರಯಲೋಕೋ; ತಿರಿಯಞ್ಚಾಪಿ ಮಜ್ಝೇತಿ ಮನುಸ್ಸಲೋಕೋ. ಅಥ ವಾ, ಉದ್ಧನ್ತಿ ಕುಸಲಾ ಧಮ್ಮಾ; ಅಧೋತಿ ಅಕುಸಲಾ ಧಮ್ಮಾ; ತಿರಿಯಞ್ಚಾಪಿ ಮಜ್ಝೇತಿ ಅಬ್ಯಾಕತಾ ಧಮ್ಮಾ. ಉದ್ಧನ್ತಿ ಅರೂಪಧಾತು; ಅಧೋತಿ ಕಾಮಧಾತು; ತಿರಿಯಞ್ಚಾಪಿ ಮಜ್ಝೇತಿ ರೂಪಧಾತು. ಉದ್ಧನ್ತಿ ಸುಖಾ ವೇದನಾ; ಅಧೋತಿ ದುಕ್ಖಾ ವೇದನಾ; ತಿರಿಯಞ್ಚಾಪಿ ಮಜ್ಝೇತಿ ಅದುಕ್ಖಮಸುಖಾ ವೇದನಾ. ಉದ್ಧನ್ತಿ ಉದ್ಧಂ ಪಾದತಲಾ; ಅಧೋತಿ ಅಧೋ ಕೇಸಮತ್ಥಕಾ; ತಿರಿಯಞ್ಚಾಪಿ ಮಜ್ಝೇತಿ ವೇಮಜ್ಝೇತಿ – ಉದ್ಧಂ ಅಧೋ ತಿರಿಯಞ್ಚಾಪಿ ಮಜ್ಝೇ.

ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತೀತಿ ಯಂ ಯಂ ರೂಪಗತಂ ವೇದನಾಗತಂ ಸಞ್ಞಾಗತಂ ಸಙ್ಖಾರಗತಂ ವಿಞ್ಞಾಣಗತಂ ಆದಿಯನ್ತಿ ಉಪಾದಿಯನ್ತಿ ಗಣ್ಹನ್ತಿ ಪರಾಮಸನ್ತಿ ಅಭಿನಿವಿಸನ್ತಿ. ಲೋಕಸ್ಮಿನ್ತಿ ಅಪಾಯಲೋಕೇ…ಪೇ… ಆಯತನಲೋಕೇತಿ – ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತಿ.

ತೇನೇವ ಮಾರೋ ಅನ್ವೇತಿ ಜನ್ತುನ್ತಿ ತೇನೇವ ಕಮ್ಮಾಭಿಸಙ್ಖಾರವಸೇನ ಪಟಿಸನ್ಧಿಕೋ ಖನ್ಧಮಾರೋ ಧಾತುಮಾರೋ ಆಯತನಮಾರೋ ಗತಿಮಾರೋ ಉಪಪತ್ತಿಮಾರೋ ಪಟಿಸನ್ಧಿಮಾರೋ ಭವಮಾರೋ ಸಂಸಾರಮಾರೋ ವಟ್ಟಮಾರೋ ಅನ್ವೇತಿ ಅನುಗಚ್ಛತಿ ಅನ್ವಾಯಿಕೋ ಹೋತಿ. ಜನ್ತುನ್ತಿ ಸತ್ತಂ ಜನಂ ನರಂ ಮಾಣವಂ [ಮಾನವಂ (ಸ್ಯಾ.)] ಪೋಸಂ ಪುಗ್ಗಲಂ ಜೀವಂ ಜಾಗುಂ ಜನ್ತುಂ ಇನ್ದಗುಂ ಮನುಜನ್ತಿ – ತೇನೇವ ಮಾರೋ ಅನ್ವೇತಿ ಜನ್ತುಂ. ತೇನಾಹ ಭಗವಾ –

‘‘ಆದಾನತಣ್ಹಂ ವಿನಯೇಥ ಸಬ್ಬಂ, [ಭದ್ರಾವುಧಾತಿ ಭಗವಾ]

ಉದ್ಧಂ ಅಧೋ ತಿರಿಯಞ್ಚಾಪಿ ಮಜ್ಝೇ;

ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತಿ, ತೇನೇವ ಮಾರೋ ಅನ್ವೇತಿ ಜನ್ತು’’ನ್ತಿ.

೭೩. ತಸ್ಮಾ ಪಜಾನಂ ನ ಉಪಾದಿಯೇಥ,ಭಿಕ್ಖು ಸತೋ ಕಿಞ್ಚನಂ ಸಬ್ಬಲೋಕೇ;

ಆದಾನಸತ್ತೇ ಇತಿ ಪೇಕ್ಖಮಾನೋ, ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತಂ.

ತಸ್ಮಾ ಪಜಾನಂ ನ ಉಪಾದಿಯೇಥಾತಿ. ತಸ್ಮಾತಿ ತಸ್ಮಾ ತಂಕಾರಣಾ ತಂಹೇತು ತಪ್ಪಚ್ಚಯಾ ತಂನಿದಾನಾ, ಏತಂ ಆದೀನವಂ ಸಮ್ಪಸ್ಸಮಾನೋ ಆದಾನತಣ್ಹಾಯಾತಿ – ತಸ್ಮಾ. ಪಜಾನನ್ತಿ ಜಾನನ್ತೋ ಪಜಾನನ್ತೋ ಆಜಾನನ್ತೋ ವಿಜಾನನ್ತೋ ಪಟಿವಿಜಾನನ್ತೋ ಪಟಿವಿಜ್ಝನ್ತೋ ‘‘ಸಬ್ಬೇ ಸಙ್ಖಾರಾ ಅನಿಚ್ಚಾ’’ತಿ…ಪೇ… ‘‘ಯಂ ಕಿಞ್ಚಿ ಸಮುದಯಧಮ್ಮಂ ಸಬ್ಬಂ ತಂ ನಿರೋಧಧಮ್ಮ’’ನ್ತಿ ಜಾನನ್ತೋ ಪಜಾನನ್ತೋ ಆಜಾನನ್ತೋ ವಿಜಾನನ್ತೋ ಪಟಿವಿಜಾನನ್ತೋ ಪಟಿವಿಜ್ಝನ್ತೋ. ನ ಉಪಾದಿಯೇಥಾತಿ ರೂಪಂ ನಾದಿಯೇಯ್ಯ ನ ಉಪಾದಿಯೇಯ್ಯ ನ ಗಣ್ಹೇಯ್ಯ ನ ಪರಾಮಸೇಯ್ಯ ನಾಭಿನಿವಿಸೇಯ್ಯ; ವೇದನಂ…ಪೇ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ… ಗತಿಂ … ಉಪಪತ್ತಿಂ… ಪಟಿಸನ್ಧಿಂ… ಭವಂ… ಸಂಸಾರಂ… ವಟ್ಟಂ ನಾದಿಯೇಯ್ಯ ನ ಉಪಾದಿಯೇಯ್ಯ ನ ಗಣ್ಹೇಯ್ಯ ನ ಪರಾಮಸೇಯ್ಯ ನಾಭಿನಿವಿಸೇಯ್ಯಾತಿ – ತಸ್ಮಾ ಪಜಾನಂ ನ ಉಪಾದಿಯೇಥ.

ಭಿಕ್ಖು ಸತೋ ಕಿಞ್ಚನಂ ಸಬ್ಬಲೋಕೇತಿ. ಭಿಕ್ಖೂತಿ ಪುಥುಜ್ಜನಕಲ್ಯಾಣಕೋ ವಾ ಭಿಕ್ಖು, ಸೇಕ್ಖೋ ವಾ ಭಿಕ್ಖು. ಸತೋತಿ ಚತೂಹಿ ಕಾರಣೇಹಿ ಸತೋ – ಕಾಯೇ ಕಾಯಾನುಪಸ್ಸನಾಸತಿಪಟ್ಠಾನಂ ಭಾವೇನ್ತೋ ಸತೋ…ಪೇ… ಸೋ ವುಚ್ಚತಿ ಸತೋತಿ – ಭಿಕ್ಖು ಸತೋ. ಕಿಞ್ಚನನ್ತಿ ಕಿಞ್ಚಿ ರೂಪಗತಂ ವೇದನಾಗತಂ ಸಞ್ಞಾಗತಂ ಸಙ್ಖಾರಗತಂ ವಿಞ್ಞಾಣಗತಂ. ಸಬ್ಬಲೋಕೇತಿ ಸಬ್ಬಅಪಾಯಲೋಕೇ ಸಬ್ಬಮನುಸ್ಸಲೋಕೇ ಸಬ್ಬದೇವಲೋಕೇ ಸಬ್ಬಖನ್ಧಲೋಕೇ ಸಬ್ಬಧಾತುಲೋಕೇ ಸಬ್ಬಆಯತನಲೋಕೇತಿ – ಭಿಕ್ಖು ಸತೋ ಕಿಞ್ಚನಂ ಸಬ್ಬಲೋಕೇ.

ಆದಾನಸತ್ತೇ ಇತಿ ಪೇಕ್ಖಮಾನೋತಿ ಆದಾನಸತ್ತಾ ವುಚ್ಚನ್ತಿ ಯೇ ರೂಪಂ ಆದಿಯನ್ತಿ ಉಪಾದಿಯನ್ತಿ ಗಣ್ಹನ್ತಿ ಪರಾಮಸನ್ತಿ ಅಭಿನಿವಿಸನ್ತಿ; ವೇದನಂ…ಪೇ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ… ಗತಿಂ… ಉಪಪತ್ತಿಂ… ಪಟಿಸನ್ಧಿಂ… ಭವಂ… ಸಂಸಾರಂ… ವಟ್ಟಂ ಆದಿಯನ್ತಿ ಉಪಾದಿಯನ್ತಿ ಗಣ್ಹನ್ತಿ ಪರಾಮಸನ್ತಿ ಅಭಿನಿವಿಸನ್ತಿ. ಇತೀತಿ ಪದಸನ್ಧಿ…ಪೇ… ಪದಾನುಪುಬ್ಬತಾಪೇತಂ ಇತೀತಿ. ಪೇಕ್ಖಮಾನೋತಿ ಪೇಕ್ಖಮಾನೋ ದಕ್ಖಮಾನೋ ದಿಸ್ಸಮಾನೋ ಪಸ್ಸಮಾನೋ ಓಲೋಕಯಮಾನೋ ನಿಜ್ಝಾಯಮಾನೋ ಉಪಪರಿಕ್ಖಮಾನೋತಿ – ಆದಾನಸತ್ತೇ ಇತಿ ಪೇಕ್ಖಮಾನೋ.

ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತನ್ತಿ. ಪಜಾತಿ ಸತ್ತಾಧಿವಚನಂ ಮಚ್ಚುಧೇಯ್ಯಾ ವುಚ್ಚನ್ತಿ ಕಿಲೇಸಾ ಚ ಖನ್ಧಾ ಚ ಅಭಿಸಙ್ಖಾರಾ ಚ. ಪಜಾ ಮಚ್ಚುಧೇಯ್ಯೇ ಮಾರಧೇಯ್ಯೇ ಮರಣಧೇಯ್ಯೇ ಸತ್ತಾ ವಿಸತ್ತಾ ಆಸತ್ತಾ ಲಗ್ಗಾ ಲಗ್ಗಿತಾ ಪಲಿಬುದ್ಧಾ. ಯಥಾ ಭಿತ್ತಿಖಿಲೇ ವಾ ನಾಗದನ್ತೇ ವಾ ಭಣ್ಡಂ ಸತ್ತಂ ವಿಸತ್ತಂ ಆಸತ್ತಂ ಲಗ್ಗಂ ಲಗ್ಗಿತಂ ಪಲಿಬುದ್ಧಂ, ಏವಮೇವ ಪಜಾ ಮಚ್ಚುಧೇಯ್ಯೇ ಮಾರಧೇಯ್ಯೇ ಮರಣಧೇಯ್ಯೇ ಸತ್ತಾ ವಿಸತ್ತಾ ಆಸತ್ತಾ ಲಗ್ಗಾ ಲಗ್ಗಿತಾ ಪಲಿಬುದ್ಧಾತಿ – ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತಂ. ತೇನಾಹ ಭಗವಾ –

‘‘ತಸ್ಮಾ ಪಜಾನಂ ನ ಉಪಾದಿಯೇಥ, ಭಿಕ್ಖು ಸತೋ ಕಿಞ್ಚನಂ ಸಬ್ಬಲೋಕೇ;

ಆದಾನಸತ್ತೇ ಇತಿ ಪೇಕ್ಖಮಾನೋ, ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತ’’ನ್ತಿ.

ಸಹ ಗಾಥಾಪರಿಯೋಸಾನಾ…ಪೇ… ಸತ್ಥಾ ಮೇ ಭನ್ತೇ ಭಗವಾ, ಸಾವಕೋಹಮಸ್ಮೀತಿ.

ಭದ್ರಾವುಧಮಾಣವಪುಚ್ಛಾನಿದ್ದೇಸೋ ದ್ವಾದಸಮೋ.