೧೧. ಜತುಕಣ್ಣಿಮಾಣವಪುಚ್ಛಾನಿದ್ದೇಸೋ

೬೫. ಸುತ್ವಾನಹಂ ವೀರ ಅಕಾಮಕಾಮಿಂ, [ಇಚ್ಚಾಯಸ್ಮಾ ಜತುಕಣ್ಣಿ]

ಓಘಾತಿಗಂ ಪುಟ್ಠುಮಕಾಮಮಾಗಮಂ;

ಸನ್ತಿಪದಂ ಬ್ರೂಹಿ ಸಹಜನೇತ್ತ, ಯಥಾತಚ್ಛಂ ಭಗವಾ ಬ್ರೂಹಿ ಮೇತಂ.

ಸುತ್ವಾನಹಂ ವೀರ ಅಕಾಮಕಾಮಿನ್ತಿ ಸುತ್ವಾ ಸುಣಿತ್ವಾ ಉಗ್ಗಹೇತ್ವಾ ಉಪಧಾರೇತ್ವಾ ಉಪಲಕ್ಖಯಿತ್ವಾ. ಇತಿಪಿ ಸೋ ಭಗವಾ ಅರಹಂ…ಪೇ… ಬುದ್ಧೋ ಭಗವಾತಿ – ಸುತ್ವಾನಹಂ. ವೀರಾತಿ ವೀರೋ ಭಗವಾ. ವೀರಿಯವಾತಿ ವೀರೋ, ಪಹೂತಿ ವೀರೋ, ವಿಸವೀತಿ ವೀರೋ, ಅಲಮತ್ತೋತಿ ವೀರೋ, ಸೂರೋತಿ ವೀರೋ, ವಿಕ್ಕನ್ತೋ ಅಭೀರೂ ಅಚ್ಛಮ್ಭೀ ಅನುತ್ರಾಸೀ ಅಪಲಾಯೀ ಪಹೀನಭಯಭೇರವೋ ವಿಗತಲೋಮಹಂಸೋತಿ ವೀರೋ.

ವಿರತೋ ಇಧ ಸಬ್ಬಪಾಪಕೇಹಿ, ನಿರಯದುಕ್ಖಂ ಅತಿಚ್ಚ ವೀರಿಯವಾ [ವಿರಿಯವಾ (ಸ್ಯಾ.) ಸು. ನಿ. ೫೩೬] ಸೋ;

ಸೋ ವೀರಿಯವಾ ಪಧಾನವಾ, ವೀರೋ ತಾದಿ ಪವುಚ್ಚತೇ ತಥತ್ತಾತಿ.

ಸುತ್ವಾನಹಂ ವೀರ. ಅಕಾಮಕಾಮಿನ್ತಿ. ಕಾಮಾತಿ ಉದ್ದಾನತೋ ದ್ವೇ ಕಾಮಾ – ವತ್ಥುಕಾಮಾ ಚ ಕಿಲೇಸಕಾಮಾ ಚ…ಪೇ… ಇಮೇ ವುಚ್ಚನ್ತಿ ವತ್ಥುಕಾಮಾ…ಪೇ… ಇಮೇ ವುಚ್ಚನ್ತಿ ಕಿಲೇಸಕಾಮಾ. ಬುದ್ಧಸ್ಸ ಭಗವತೋ ವತ್ಥುಕಾಮಾ ಪರಿಞ್ಞಾತಾ, ಕಿಲೇಸಕಾಮಾ ಪಹೀನಾ. ವತ್ಥುಕಾಮಾನಂ ಪರಿಞ್ಞಾತತ್ತಾ ಕಿಲೇಸಕಾಮಾನಂ ಪಹೀನತ್ತಾ ಭಗವಾ ನ ಕಾಮೇ ಕಾಮೇತಿ, ನ ಕಾಮೇ ಪತ್ಥೇತಿ, ನ ಕಾಮೇ ಪಿಹೇತಿ, ನ ಕಾಮೇ ಅಭಿಜಪ್ಪತಿ. ಯೇ ಕಾಮೇ ಕಾಮೇನ್ತಿ, ಕಾಮೇ ಪತ್ಥೇನ್ತಿ, ಕಾಮೇ ಪಿಹೇನ್ತಿ, ಕಾಮೇ ಅಭಿಜಪ್ಪನ್ತಿ, ತೇ ಕಾಮಕಾಮಿನೋ ರಾಗರಾಗಿನೋ ಸಞ್ಞಾಸಞ್ಞಿನೋ. ಭಗವಾ ನ ಕಾಮೇ ಕಾಮೇತಿ, ನ ಕಾಮೇ ಪತ್ಥೇತಿ, ನ ಕಾಮೇ ಪಿಹೇತಿ, ನ ಕಾಮೇ ಅಭಿಜಪ್ಪತಿ. ತಸ್ಮಾ ಬುದ್ಧೋ ಅಕಾಮೋ ನಿಕ್ಕಾಮೋ ಚತ್ತಕಾಮೋ ವನ್ತಕಾಮೋ ಮುತ್ತಕಾಮೋ ಪಹೀನಕಾಮೋ ಪಟಿನಿಸ್ಸಟ್ಠಕಾಮೋ ವೀತರಾಗೋ ವಿಗತರಾಗೋ ಚತ್ತರಾಗೋ ವನ್ತರಾಗೋ ಮುತ್ತರಾಗೋ ಪಹೀನರಾಗೋ ಪಟಿನಿಸ್ಸಟ್ಠರಾಗೋ ನಿಚ್ಛಾತೋ ನಿಬ್ಬುತೋ ಸೀತಿಭೂತೋ ಸುಖಪ್ಪಟಿಸಂವೇದೀ ಬ್ರಹ್ಮಭೂತೇನ ಅತ್ತನಾ ವಿಹರತೀತಿ – ಸುತ್ವಾನಹಂ ವೀರ ಅಮಕಾಮಕಾಮಿಂ.

ಇಚ್ಚಾಯಸ್ಮಾ ಜತುಕಣ್ಣೀತಿ. ಇಚ್ಚಾತಿ ಪದಸನ್ಧಿ…ಪೇ… ಪದಾನುಪುಬ್ಬತಾಪೇತಂ – ಇಚ್ಚಾತಿ. ಆಯಸ್ಮಾತಿ ಪಿಯವಚನಂ ಸಗಾರವಸಪ್ಪತಿಸ್ಸಾಧಿವಚನಮೇತಂ ಆಯಸ್ಮಾತಿ. ಜತುಕಣ್ಣೀತಿ ತಸ್ಸ ಬ್ರಾಹ್ಮಣಸ್ಸ ಗೋತ್ತಂ ಸಙ್ಖಾ ಸಮಞ್ಞಾ ಪಞ್ಞತ್ತಿ ವೋಹಾರೋತಿ – ಇಚ್ಚಾಯಸ್ಮಾ ಜತುಕಣ್ಣಿ.

ಓಘಾತಿಗಂ ಪುಟ್ಠುಮಕಾಮಮಾಗಮನ್ತಿ. ಓಘಾತಿಗನ್ತಿ ಓಘಾತಿಗಂ ಓಘಂ ಅತಿಕ್ಕನ್ತಂ ಸಮತಿಕ್ಕನ್ತಂ ವೀತಿವತ್ತನ್ತಿ – ಓಘಾತಿಗಂ. ಪುಟ್ಠುನ್ತಿ ಪುಟ್ಠುಂ ಪುಚ್ಛಿತುಂ ಯಾಚಿತುಂ ಅಜ್ಝೇಸಿತುಂ ಪಸಾದೇತುಂ. ಅಕಾಮಮಾಗಮನ್ತಿ ಅಕಾಮಂ ಪುಟ್ಠುಂ ನಿಕ್ಕಾಮಂ ಚತ್ತಕಾಮಂ ವನ್ತಕಾಮಂ ಮುತ್ತಕಾಮಂ ಪಹೀನಕಾಮಂ ಪಟಿನಿಸ್ಸಟ್ಠಕಾಮಂ ವೀತರಾಗಂ ವಿಗತರಾಗಂ ಚತ್ತರಾಗಂ ವನ್ತರಾಗಂ ಮುತ್ತರಾಗಂ ಪಹೀನರಾಗಂ ಪಟಿನಿಸ್ಸಟ್ಠರಾಗಂ ಆಗಮ್ಹಾ ಆಗತಮ್ಹಾ ಉಪಾಗತಮ್ಹಾ ಸಮ್ಪತ್ತಮ್ಹಾ ತಯಾ ಸದ್ಧಿಂ ಸಮಾಗತಮ್ಹಾತಿ – ಓಘಾತಿಗಂ ಪುಟ್ಠುಮಕಾಮಮಾಗಮಂ.

ಸನ್ತಿಪದಂ ಬ್ರೂಹಿ ಸಹಜನೇತ್ತಾತಿ. ಸನ್ತೀತಿ ಏಕೇನ ಆಕಾರೇನ ಸನ್ತಿಪಿ ಸನ್ತಿಪದಮ್ಪಿ [ಸನ್ತಿಪದನ್ತಿ (ಕ.)] ತಂಯೇವ ಅಮತಂ ನಿಬ್ಬಾನಂ. ಯೋ ಸೋ ಸಬ್ಬಸಙ್ಖಾರಸಮಥೋ ಸಬ್ಬೂಪಧಿಪಟಿನಿಸ್ಸಗ್ಗೋ ತಣ್ಹಕ್ಖಯೋ ವಿರಾಗೋ ನಿರೋಧೋ ನಿಬ್ಬಾನಂ. ವುತ್ತಞ್ಹೇತಂ ಭಗವತಾ – ‘‘ಸನ್ತಮೇತಂ ಪದಂ, ಪಣೀತಮೇತಂ ಪದಂ, ಯದಿದಂ ಸಬ್ಬಸಙ್ಖಾರಸಮಥೋ ಸಬ್ಬೂಪಧಿಪಟಿನಿಸ್ಸಗ್ಗೋ ತಣ್ಹಕ್ಖಯೋ ವಿರಾಗೋ ನಿರೋಧೋ ನಿಬ್ಬಾನ’’ನ್ತಿ. ಅಥಾಪರೇನಾಕಾರೇನ ಯೇ ಧಮ್ಮಾ ಸನ್ತಾಧಿಗಮಾಯ ಸನ್ತಿಫುಸನಾಯ ಸನ್ತಿಸಚ್ಛಿಕಿರಿಯಾಯ ಸಂವತ್ತನ್ತಿ, ಸೇಯ್ಯಥಿದಂ – ಚತ್ತಾರೋ ಸತಿಪಟ್ಠಾನಾ ಚತ್ತಾರೋ ಸಮ್ಮಪ್ಪಧಾನಾ ಚತ್ತಾರೋ ಇದ್ಧಿಪಾದಾ ಪಞ್ಚಿನ್ದ್ರಿಯಾನಿ ಪಞ್ಚ ಬಲಾನಿ ಸತ್ತ ಬೋಜ್ಝಙ್ಗಾ ಅರಿಯೋ ಅಟ್ಠಙ್ಗಿಕೋ ಮಗ್ಗೋ – ಇಮೇ ವುಚ್ಚನ್ತಿ ಸನ್ತಿಪದಾ. ಸನ್ತಿಪದಂ ತಾಣಪದಂ ಲೇಣಪದಂ ಸರಣಪದಂ ಅಭಯಪದಂ ಅಚ್ಚುತಪದಂ ಅಮತಪದಂ ನಿಬ್ಬಾನಪದಂ ಬ್ರೂಹಿ ಆಚಿಕ್ಖಾಹಿ ದೇಸೇಹಿ ಪಞ್ಞಪೇಹಿ ಪಟ್ಠಪೇಹಿ ವಿವರಾಹಿ ವಿಭಜಾಹಿ ಉತ್ತಾನೀಕರೋಹಿ ಪಕಾಸೇಹಿ. ಸಹಜನೇತ್ತಾತಿ ನೇತ್ತಂ ವುಚ್ಚತಿ ಸಬ್ಬಞ್ಞುತಞಾಣಂ. ಬುದ್ಧಸ್ಸ ಭಗವತೋ ನೇತ್ತಞ್ಚ ಜಿನಭಾವೋ ಚ ಬೋಧಿಯಾ ಮೂಲೇ ಅಪುಬ್ಬಂ ಅಚರಿಮಂ ಏಕಸ್ಮಿಂ ಖಣೇ ಉಪ್ಪನ್ನೋ, ತಸ್ಮಾ ಬುದ್ಧೋ ಸಹಜನೇತ್ತೋತಿ – ಸನ್ತಿಪದಂ ಬ್ರೂಹಿ ಸಹಜನೇತ್ತ.

ಯಥಾತಚ್ಛಂ ಭಗವಾ ಬ್ರೂಹಿ ಮೇತನ್ತಿ ಯಥಾತಚ್ಛಂ ವುಚ್ಚತಿ ಅಮತಂ ನಿಬ್ಬಾನಂ…ಪೇ… ನಿರೋಧೋ ನಿಬ್ಬಾನಂ. ಭಗವಾತಿ ಗಾರವಾಧಿವಚನಂ…ಪೇ… ಸಚ್ಛಿಕಾ ಪಞ್ಞತ್ತಿ, ಯದಿದಂ ಭಗವಾತಿ. ಬ್ರೂಹಿ ಮೇತನ್ತಿ ಬ್ರೂಹಿ ಆಚಿಕ್ಖಾಹಿ…ಪೇ… ಪಕಾಸೇಹೀತಿ – ಯಥಾತಚ್ಛಂ ಭಗವಾ ಬ್ರೂಹಿ ಮೇತಂ. ತೇನಾಹ ಸೋ ಬ್ರಾಹ್ಮಣೋ –

‘‘ಸುತ್ವಾನಹಂ ವೀರ ಅಕಾಮಕಾಮಿಂ, [ಇಚ್ಚಾಯಸ್ಮಾ ಜತುಕಣ್ಣಿ]

ಓಘಾತಿಗಂ ಪುಟ್ಠುಮಕಾಮಮಾಗಮಂ;

ಸನ್ತಿಪದಂ ಬ್ರೂಹಿ ಸಹಜನೇತ್ತ, ಯಥಾತಚ್ಛಂ ಭಗವಾ ಬ್ರೂಹಿ ಮೇತ’’ನ್ತಿ.

೬೬. ಭಗವಾ ಹಿ ಕಾಮೇ ಅಭಿಭುಯ್ಯ ಇರಿಯತಿ, ಆದಿಚ್ಚೋವ ಪಥವಿಂ ತೇಜೀ ತೇಜಸಾ;

ಪರಿತ್ತಪಞ್ಞಸ್ಸ ಮೇ ಭೂರಿಪಞ್ಞೋ, ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ;

ಜಾತಿಜರಾಯ ಇಧ ವಿಪ್ಪಹಾನಂ.

ಭಗವಾ ಹಿ ಕಾಮೇ ಅಭಿಭುಯ್ಯ ಇರಿಯತೀತಿ. ಭಗವಾತಿ ಗಾರವಾಧಿವಚನಂ…ಪೇ… ಸಚ್ಛಿಕಾ ಪಞ್ಞತ್ತಿ, ಯದಿದಂ ಭಗವಾತಿ. ಕಾಮಾತಿ ಉದ್ದಾನತೋ ದ್ವೇ ಕಾಮಾ – ವತ್ಥುಕಾಮಾ ಚ ಕಿಲೇಸಕಾಮಾ ಚ…ಪೇ… ಇಮೇ ವುಚ್ಚನ್ತಿ ವತ್ಥುಕಾಮಾ…ಪೇ… ಇಮೇ ವುಚ್ಚನ್ತಿ ಕಿಲೇಸಕಾಮಾ. ಭಗವಾ ವತ್ಥುಕಾಮೇ ಪರಿಜಾನಿತ್ವಾ ಕಿಲೇಸಕಾಮೇ ಪಹಾಯ ಅಭಿಭುಯ್ಯ ಅಭಿಭವಿತ್ವಾ ಅಜ್ಝೋತ್ಥರಿತ್ವಾ ಪರಿಯಾದಿಯಿತ್ವಾ ಚರತಿ ವಿಹರತಿ ಇರಿಯತಿ ವತ್ತೇತಿ ಪಾಲೇತಿ ಯಪೇತಿ ಯಾಪೇತೀತಿ – ಭಗವಾ ಹಿ ಕಾಮೇ ಅಭಿಭುಯ್ಯ ಇರಿಯತಿ.

ಆದಿಚ್ಚೋವ ಪಥವಿಂ ತೇಜೀ ತೇಜಸಾತಿ ಆದಿಚ್ಚೋ ವುಚ್ಚತಿ ಸೂರಿಯೋ [ಸುರಿಯೋ (ಸ್ಯಾ.)]. ಪಥವೀ ವುಚ್ಚತಿ ಜಗತೀ [ಜರಾ (ಸ್ಯಾ.)]. ಯಥಾ ಸೂರಿಯೋ ತೇಜೀ ತೇಜೇನ ಸಮನ್ನಾಗತೋ ಪಥವಿಂ ಅಭಿಭುಯ್ಯ ಅಭಿಭವಿತ್ವಾ ಅಜ್ಝೋತ್ಥರಿತ್ವಾ ಪರಿಯಾದಿಯಿತ್ವಾ ಸನ್ತಾಪಯಿತ್ವಾ ಸಬ್ಬಂ ಆಕಾಸಗತಂ ತಮಗತಂ ಅಭಿವಿಹಚ್ಚ ಅನ್ಧಕಾರಂ ವಿಧಮಿತ್ವಾ ಆಲೋಕಂ ದಸ್ಸಯಿತ್ವಾ ಆಕಾಸೇ ಅನ್ತಲಿಕ್ಖೇ ಗಗನಪಥೇ [ಗಮನಪಥೇ (ಸ್ಯಾ.) ಅಟ್ಠಕಥಾ ಓಲೋಕೇತಬ್ಬಾ] ಗಚ್ಛತಿ, ಏವಮೇವ ಭಗವಾ ಞಾಣತೇಜೀ ಞಾಣತೇಜೇನ ಸಮನ್ನಾಗತೋ ಸಬ್ಬಂ ಅಭಿಸಙ್ಖಾರಸಮುದಯಂ…ಪೇ… ಕಿಲೇಸತಮಂ ಅವಿಜ್ಜನ್ಧಕಾರಂ ವಿಧಮಿತ್ವಾ ಞಾಣಾಲೋಕಂ ದಸ್ಸೇತ್ವಾ ವತ್ಥುಕಾಮೇ ಪರಿಜಾನಿತ್ವಾ ಕಿಲೇಸಕಾಮೇ ಪಹಾಯ ಅಭಿಭುಯ್ಯ ಅಭಿಭವಿತ್ವಾ ಅಜ್ಝೋತ್ಥರಿತ್ವಾ ಪರಿಯಾದಿಯಿತ್ವಾ ಮದ್ದಿತ್ವಾ ಚರತಿ ವಿಹರತಿ ಇರಿಯತಿ ವತ್ತೇತಿ ಪಾಲೇತಿ ಯಪೇತಿ ಯಾಪೇತೀತಿ – ಆದಿಚ್ಚೋವ ಪಥವಿಂ ತೇಜೀ ತೇಜಸಾ.

ಪರಿತ್ತಪಞ್ಞಸ್ಸ ಮೇ ಭೂರಿಪಞ್ಞೋತಿ ಅಹಮಸ್ಮಿ ಪರಿತ್ತಪಞ್ಞೋ ಓಮಕಪಞ್ಞೋ ಲಾಮಕಪಞ್ಞೋ ಛತುಕ್ಕಪಞ್ಞೋ. ತ್ವಮ್ಪಿ ಮಹಾಪಞ್ಞೋ ಪುಥುಪಞ್ಞೋ ಹಾಸಪಞ್ಞೋ ಜವನಪಞ್ಞೋ ತಿಕ್ಖಪಞ್ಞೋ ನಿಬ್ಬೇಧಿಕಪಞ್ಞೋ. ಭೂರಿ ವುಚ್ಚತಿ ಪಥವೀ. ಭಗವಾ ತಾಯ ಪಥವಿಸಮಾಯ ಪಞ್ಞಾಯ ವಿಪುಲಾಯ ವಿತ್ಥತಾಯ ಸಮನ್ನಾಗತೋತಿ – ಪರಿತ್ತಪಞ್ಞಸ್ಸ ಮೇ ಭೂರಿಪಞ್ಞೋ.

ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞನ್ತಿ. ಧಮ್ಮನ್ತಿ ಆದಿಕಲ್ಯಾಣಂ ಮಜ್ಝೇಕಲ್ಯಾಣಂ ಪರಿಯೋಸಾನಕಲ್ಯಾಣಂ ಸಾತ್ಥಂ ಸಬ್ಯಞ್ಜನಂ ಕೇವಲಪರಿಪುಣ್ಣಂ ಪರಿಸುದ್ಧಂ ಬ್ರಹ್ಮಚರಿಯಂ, ಚತ್ತಾರೋ ಸತಿಪಟ್ಠಾನೇ…ಪೇ… ನಿಬ್ಬಾನಞ್ಚ ನಿಬ್ಬಾನಗಾಮಿನಿಞ್ಚ ಪಟಿಪದಂ ಆಚಿಕ್ಖಾಹಿ ದೇಸೇಹಿ ಪಞ್ಞಪೇಹಿ ಪಟ್ಠಪೇಹಿ ವಿವರಾಹಿ ವಿಭಜಾಹಿ ಉತ್ತಾನೀಕರೋಹಿ ಪಕಾಸೇಹಿ. ಯಮಹಂ ವಿಜಞ್ಞನ್ತಿ ಯಮಹಂ ಜಾನೇಯ್ಯಂ ಆಜಾನೇಯ್ಯಂ ವಿಜಾನೇಯ್ಯಂ ಪಟಿಜಾನೇಯ್ಯಂ ಪಟಿವಿಜ್ಝೇಯ್ಯಂ ಅಧಿಗಚ್ಛೇಯ್ಯಂ ಫಸ್ಸೇಯ್ಯಂ ಸಚ್ಛಿಕರೇಯ್ಯನ್ತಿ – ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ.

ಜಾತಿಜರಾಯ ಇಧ ವಿಪ್ಪಹಾನನ್ತಿ ಇಧೇವ ಜಾತಿಜರಾಯ ಮರಣಸ್ಸ ಪಹಾನಂ ವೂಪಸಮಂ ಪಟಿನಿಸ್ಸಗ್ಗಂ ಪಟಿಪ್ಪಸ್ಸದ್ಧಿಂ ಅಮತಂ ನಿಬ್ಬಾನನ್ತಿ – ಜಾತಿಜರಾಯ ಇಧ ವಿಪ್ಪಹಾನಂ. ತೇನಾಹ ಸೋ ಬ್ರಾಹ್ಮಣೋ –

‘‘ಭಗವಾ ಹಿ ಕಾಮೇ ಅಭಿಭುಯ್ಯ ಇರಿಯತಿ, ಆದಿಚ್ಚೋವ ಪಥವಿಂ ತೇಜೀ ತೇಜಸಾ;

ಪರಿತ್ತಪಞ್ಞಸ್ಸ ಮೇ ಭೂರಿಪಞ್ಞೋ, ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ;

ಜಾತಿಜರಾಯ ಇಧ ವಿಪ್ಪಹಾನ’’ನ್ತಿ.

೬೭. ಕಾಮೇಸು ವಿನಯ ಗೇಧಂ, [ಜತುಕಣ್ಣೀತಿ ಭಗವಾ]

ನೇಕ್ಖಮ್ಮಂ ದಟ್ಠು ಖೇಮತೋ;

ಉಗ್ಗಹಿತಂ ನಿರತ್ತಂ ವಾ, ಮಾ ತೇ ವಿಜ್ಜಿತ್ಥ ಕಿಞ್ಚನಂ.

ಕಾಮೇಸು ವಿನಯ ಗೇಧನ್ತಿ. ಕಾಮಾತಿ ಉದ್ದಾನತೋ ದ್ವೇ ಕಾಮಾ – ವತ್ಥುಕಾಮಾ ಚ ಕಿಲೇಸಕಾಮಾ ಚ…ಪೇ… ಇಮೇ ವುಚ್ಚನ್ತಿ ವತ್ಥುಕಾಮಾ…ಪೇ… ಇಮೇ ವುಚ್ಚನ್ತಿ ಕಿಲೇಸಕಾಮಾ. ಗೇಧನ್ತಿ ಗೇಧೋ ವುಚ್ಚತಿ ತಣ್ಹಾ. ಯೋ ರಾಗೋ ಸಾರಾಗೋ…ಪೇ… ಅಭಿಜ್ಝಾ ಲೋಭೋ ಅಕುಸಲಮೂಲಂ. ಕಾಮೇಸು ವಿನಯ ಗೇಧನ್ತಿ ಕಾಮೇಸು ಗೇಧಂ ವಿನಯ ಪಟಿವಿನಯ ಪಜಹ ವಿನೋದೇಹಿ ಬ್ಯನ್ತೀಕರೋಹಿ ಅನಭಾವಂ ಗಮೇಹೀತಿ – ಕಾಮೇಸು ವಿನಯ ಗೇಧಂ. ಜತುಕಣ್ಣೀತಿ ಭಗವಾ ತಂ ಬ್ರಾಹ್ಮಣಂ ಗೋತ್ತೇನ ಆಲಪತಿ. ಭಗವಾತಿ ಗಾರವಾಧಿವಚನಮೇತಂ…ಪೇ… ಸಚ್ಛಿಕಾ ಪಞ್ಞತ್ತಿ, ಯದಿದಂ ಭಗವಾತಿ – ಜತುಕಣ್ಣೀತಿ ಭಗವಾ.

ನೇಕ್ಖಮ್ಮಂ ದಟ್ಠು ಖೇಮತೋತಿ. ನೇಕ್ಖಮ್ಮನ್ತಿ ಸಮ್ಮಾಪಟಿಪದಂ ಅನುಲೋಮಪಟಿಪದಂ ಅಪಚ್ಚನೀಕಪಟಿಪದಂ ಅನ್ವತ್ಥಪಟಿಪದಂ ಧಮ್ಮಾನುಧಮ್ಮಪಟಿಪದಂ ಸೀಲೇಸು ಪರಿಪೂರಕಾರಿತಂ ಇನ್ದ್ರಿಯೇಸು ಗುತ್ತದ್ವಾರತಂ ಭೋಜನೇ ಮತ್ತಞ್ಞುತಂ ಜಾಗರಿಯಾನುಯೋಗಂ ಸತಿಸಮ್ಪಜಞ್ಞಂ ಚತ್ತಾರೋ ಸತಿಪಟ್ಠಾನೇ ಚತ್ತಾರೋ ಸಮ್ಮಪ್ಪಧಾನೇ ಚತ್ತಾರೋ ಇದ್ಧಿಪಾದೇ ಪಞ್ಚಿನ್ದ್ರಿಯಾನಿ ಪಞ್ಚ ಬಲಾನಿ ಸತ್ತ ಬೋಜ್ಝಙ್ಗೇ ಅರಿಯಂ ಅಟ್ಠಙ್ಗಿಕಂ ಮಗ್ಗಂ ನಿಬ್ಬಾನಞ್ಚ ನಿಬ್ಬಾನಗಾಮಿನಿಞ್ಚ ಪಟಿಪದಂ ಖೇಮತೋ ತಾಣತೋ ಲೇಣತೋ ಸರಣತೋ ಸರಣೀಭೂತತೋ ಅಭಯತೋ ಅಚ್ಚುತತೋ ಅಮತತೋ ನಿಬ್ಬಾನತೋ ದಟ್ಠುಂ ಪಸ್ಸಿತ್ವಾ ತುಲಯಿತ್ವಾ ತೀರಯಿತ್ವಾ ವಿಭಾವಯಿತ್ವಾ ವಿಭೂತಂ ಕತ್ವಾತಿ – ನೇಕ್ಖಮ್ಮಂ ದಟ್ಠು ಖೇಮತೋ.

ಉಗ್ಗಹಿತಂ ನಿರತ್ತಂ ವಾತಿ. ಉಗ್ಗಹಿತನ್ತಿ ತಣ್ಹಾವಸೇನ ದಿಟ್ಠಿವಸೇನ ಗಹಿತಂ ಪರಾಮಟ್ಠಂ ಅಭಿನಿವಿಟ್ಠಂ ಅಜ್ಝೋಸಿತಂ ಅಧಿಮುತ್ತಂ. ನಿರತ್ತಂ ವಾತಿ ನಿರತ್ತಂ ವಾ ಮುಞ್ಚಿತಬ್ಬಂ ವಿಜಹಿತಬ್ಬಂ ವಿನೋದಿತಬ್ಬಂ ಬ್ಯನ್ತೀಕಾತಬ್ಬಂ ಅನಭಾವಂ ಗಮೇತಬ್ಬನ್ತಿ – ಉಗ್ಗಹಿತಂ ನಿರತ್ತಂ ವಾ.

ಮಾ ತೇ ವಿಜ್ಜಿತ್ಥ ಕಿಞ್ಚನನ್ತಿ ರಾಗಕಿಞ್ಚನಂ ದೋಸಕಿಞ್ಚನಂ ಮೋಹಕಿಞ್ಚನಂ ಮಾನಕಿಞ್ಚನಂ ದಿಟ್ಠಿಕಿಞ್ಚನಂ ಕಿಲೇಸಕಿಞ್ಚನಂ ದುಚ್ಚರಿತಕಿಞ್ಚನಂ. ಇದಂ ಕಿಞ್ಚನಂ [ಇಮೇ ಕಿಞ್ಚನಾ (ಕ.)] ತುಯ್ಹಂ ಮಾ ವಿಜ್ಜಿತ್ಥ ಮಾ ಪವಿಜ್ಜಿತ್ಥ ಮಾ ಸಂವಿಜ್ಜಿತ್ಥ ಪಜಹ ವಿನೋದೇಹಿ ಬ್ಯನ್ತೀಕರೋಹಿ ಅನಭಾವಂ ಗಮೇಹೀತಿ – ಮಾ ತೇ ವಿಜ್ಜಿತ್ಥ ಕಿಞ್ಚನಂ. ತೇನಾಹ ಭಗವಾ –

‘‘ಕಾಮೇಸು ವಿನಯ ಗೇಧಂ, [ಜತುಕಣ್ಣೀತಿ ಭಗವಾ]

ನೇಕ್ಖಮ್ಮಂ ದಟ್ಠು ಖೇಮತೋ;

ಉಗ್ಗಹಿತಂ ನಿರತ್ತಂ ವಾ, ಮಾ ತೇ ವಿಜ್ಜಿತ್ಥ ಕಿಞ್ಚನ’’ನ್ತಿ.

೬೮. ಯಂ ಪುಬ್ಬೇ ತಂ ವಿಸೋಸೇಹಿ, ಪಚ್ಛಾ ತೇ ಮಾಹು ಕಿಞ್ಚನಂ;

ಮಜ್ಝೇ ಚೇ ನೋ ಗಹೇಸ್ಸಸಿ, ಉಪಸನ್ತೋ ಚರಿಸ್ಸಸಿ.

ಯಂ ಪುಬ್ಬೇ ತಂ ವಿಸೋಸೇಹೀತಿ ಅತೀತೇ ಸಙ್ಖಾರೇ ಆರಬ್ಭ ಯೇ ಕಿಲೇಸಾ ಉಪ್ಪಜ್ಜೇಯ್ಯುಂ ತೇ ಕಿಲೇಸೇ ಸೋಸೇಹಿ ವಿಸೋಸೇಹಿ ಸುಕ್ಖಾಪೇಹಿ ವಿಸುಕ್ಖಾಪೇಹಿ ಅಬೀಜಂ ಕರೋಹಿ ಪಜಹ ವಿನೋದೇಹಿ ಬ್ಯನ್ತೀಕರೋಹಿ ಅನಭಾವಂ ಗಮೇಹೀತಿ – ಏವಮ್ಪಿ ಯಂ ಪುಬ್ಬೇ ತಂ ವಿಸೋಸೇಹಿ. ಅಥ ವಾ, ಯೇ ಅತೀತಾ ಕಮ್ಮಾಭಿಸಙ್ಖಾರಾ ಅವಿಪಕ್ಕವಿಪಾಕಾ ತೇ ಕಮ್ಮಾಭಿಸಙ್ಖಾರೇ ಸೋಸೇಹಿ ವಿಸೋಸೇಹಿ ಸುಕ್ಖಾಪೇಹಿ ವಿಸುಕ್ಖಾಪೇಹಿ ಅಬೀಜಂ [ಅವೀಜಂ (ಸ್ಯಾ.)] ಕರೋಹಿ ಪಜಹ ವಿನೋದೇಹಿ ಬ್ಯನ್ತೀಕರೋಹಿ ಅನಭಾವಂ ಗಮೇಹೀತಿ – ಏವಮ್ಪಿ ಯಂ ಪುಬ್ಬೇ ತಂ ವಿಸೋಸೇಹಿ.

ಪಚ್ಛಾ ತೇ ಮಾಹು ಕಿಞ್ಚನನ್ತಿ ಪಚ್ಛಾ ವುಚ್ಚತಿ ಅನಾಗತೇ ಸಙ್ಖಾರೇ ಆರಬ್ಭ ರಾಗಕಿಞ್ಚನಂ ದೋಸಕಿಞ್ಚನಂ ಮೋಹಕಿಞ್ಚನಂ ಮಾನಕಿಞ್ಚನಂ ದಿಟ್ಠಿಕಿಞ್ಚನಂ ಕಿಲೇಸಕಿಞ್ಚನಂ ದುಚ್ಚರಿತಕಿಞ್ಚನಂ. ಇದಂ ಕಿಞ್ಚನಂ ತುಯ್ಹಂ ಮಾ ಅಹು ಮಾ ಅಹೋಸಿ ಮಾ ಜನೇಸಿ [ಮಾ ಜನೇಹಿ (ಸ್ಯಾ.) ತಥಾವಸೇಸೇಸು ದ್ವೀಸು ಪದೇಸುಪಿ] ಮಾ ಸಞ್ಜನೇಸಿ ಮಾಭಿನಿಬ್ಬತ್ತೇಸಿ ಪಜಹ ವಿನೋದೇಹಿ ಬ್ಯನ್ತೀಕರೋಹಿ ಅನಭಾವಂ ಗಮೇಹೀತಿ – ಪಚ್ಛಾ ತೇ ಮಾಹು ಕಿಞ್ಚನಂ.

ಮಜ್ಝೇ ಚೇ ನೋ ಗಹೇಸ್ಸಸೀತಿ ಮಜ್ಝೇ ವುಚ್ಚತಿ ಪಚ್ಚುಪ್ಪನ್ನಂ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣಂ. ಪಚ್ಚುಪ್ಪನ್ನೇ ಸಙ್ಖಾರೇ ತಣ್ಹಾವಸೇನ ದಿಟ್ಠಿವಸೇನ ನ ಗಹೇಸ್ಸಸಿ ನ ತಣ್ಹಿಸ್ಸಸಿ ನ ಪರಾಮಸಿಸ್ಸಸಿ ನ ನನ್ದಿಸ್ಸಸಿ ನಾಭಿನನ್ದಿಸ್ಸಸಿ ನ ಅಜ್ಝೋಸಿಸ್ಸಸಿ. ಅಭಿನನ್ದನಂ ಅಭಿವದನಂ ಅಜ್ಝೋಸಾನಂ ಗಾಹಂ ಪರಾಮಾಸಂ ಅಭಿನಿವೇಸಂ ಪಜಹಿಸ್ಸಸಿ ವಿನೋದೇಸ್ಸಸಿ ಬ್ಯನ್ತೀಕರಿಸ್ಸಸಿ ಅನಭಾವಂ ಗಮೇಸ್ಸಸೀತಿ – ಮಜ್ಝೇ ಚೇ ನೋ ಗಹೇಸ್ಸಸಿ.

ಉಪಸನ್ತೋ ಚರಿಸ್ಸಸೀತಿ ರಾಗಸ್ಸ ಉಪಸಮಿತತ್ತಾ ಉಪಸನ್ತೋ ಚರಿಸ್ಸಸಿ, ದೋಸಸ್ಸ…ಪೇ… ಸಬ್ಬಾಕುಸಲಾಭಿಸಙ್ಖಾರಾನಂ ಸನ್ತತ್ತಾ ಸಮಿತತ್ತಾ ಉಪಸಮಿತತ್ತಾ ವೂಪಸಮಿತತ್ತಾ ನಿಜ್ಝಾತತ್ತಾ ನಿಬ್ಬುತತ್ತಾ ವಿಗತತ್ತಾ ಪಟಿಪ್ಪಸ್ಸದ್ಧತ್ತಾ ಸನ್ತೋ ಉಪಸನ್ತೋ ವೂಪಸನ್ತೋ ನಿಬ್ಬುತೋ ಪಟಿಪ್ಪಸ್ಸದ್ಧೋ ಚರಿಸ್ಸಸಿ ವಿಹರಿಸ್ಸಸಿ ಇರಿಯಿಸ್ಸಸಿ ವತ್ತಿಸ್ಸಸಿ ಪಾಲೇಸ್ಸಸಿ ಯಪೇಸ್ಸಸಿ ಯಾಪೇಸ್ಸಸೀತಿ – ಉಪಸನ್ತೋ ಚರಿಸ್ಸಸಿ. ತೇನಾಹ ಭಗವಾ –

‘‘ಯಂ ಪುಬ್ಬೇ ತಂ ವಿಸೋಸೇಹಿ, ಪಚ್ಛಾ ತೇ ಮಾಹು ಕಿಞ್ಚನಂ;

ಮಜ್ಝೇ ಚೇ ನೋ ಗಹೇಸ್ಸಸಿ, ಉಪಸನ್ತೋ ಚರಿಸ್ಸಸೀ’’ತಿ.

೬೯. ಸಬ್ಬಸೋ ನಾಮರೂಪಸ್ಮಿಂ, ವೀತಗೇಧಸ್ಸ ಬ್ರಾಹ್ಮಣ;

ಆಸವಾಸ್ಸ ನ ವಿಜ್ಜನ್ತಿ, ಯೇಹಿ ಮಚ್ಚುವಸಂ ವಜೇ.

ಸಬ್ಬಸೋ ನಾಮರೂಪಸ್ಮಿಂ ವೀತಗೇಧಸ್ಸ ಬ್ರಾಹ್ಮಣಾತಿ. ಸಬ್ಬಸೋತಿ ಸಬ್ಬೇನ ಸಬ್ಬಂ ಸಬ್ಬಥಾ ಸಬ್ಬಂ ಅಸೇಸಂ ನಿಸ್ಸೇಸಂ ಪರಿಯಾದಿಯನವಚನಮೇತಂ ಸಬ್ಬಸೋತಿ. ನಾಮನ್ತಿ ಚತ್ತಾರೋ ಅರೂಪಿನೋ ಖನ್ಧಾ. ರೂಪನ್ತಿ ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯ ರೂಪಂ. ಗೇಧೋ ವುಚ್ಚತಿ ತಣ್ಹಾ. ಯೋ ರಾಗೋ ಸಾರಾಗೋ…ಪೇ… ಅಭಿಜ್ಝಾ ಲೋಭೋ ಅಕುಸಲಮೂಲಂ. ಸಬ್ಬಸೋ ನಾಮರೂಪಸ್ಮಿಂ ವೀತಗೇಧಸ್ಸ ಬ್ರಾಹ್ಮಣಾತಿ ಸಬ್ಬಸೋ ನಾಮರೂಪಸ್ಮಿಂ ವೀತಗೇಧಸ್ಸ ವಿಗತಗೇಧಸ್ಸ ಚತ್ತಗೇಧಸ್ಸ ವನ್ತಗೇಧಸ್ಸ ಮುತ್ತಗೇಧಸ್ಸ ಪಹೀನಗೇಧಸ್ಸ ಪಟಿನಿಸ್ಸಟ್ಠಗೇಧಸ್ಸ ವೀತರಾಗಸ್ಸ ವಿಗತರಾಗಸ್ಸ ಚತ್ತರಾಗಸ್ಸ ವನ್ತರಾಗಸ್ಸ ಮುತ್ತರಾಗಸ್ಸ ಪಹೀನರಾಗಸ್ಸ ಪಟಿನಿಸ್ಸಟ್ಠರಾಗಸ್ಸಾತಿ – ಸಬ್ಬಸೋ ನಾಮರೂಪಸ್ಮಿಂ ವೀತಗೇಧಸ್ಸ ಬ್ರಾಹ್ಮಣ.

ಆಸವಾಸ್ಸ ನ ವಿಜ್ಜನ್ತೀತಿ. ಆಸವಾತಿ ಚತ್ತಾರೋ ಆಸವಾ – ಕಾಮಾಸವೋ, ಭವಾಸವೋ, ದಿಟ್ಠಾಸವೋ, ಅವಿಜ್ಜಾಸವೋ. ಅಸ್ಸಾತಿ ಅರಹತೋ ಖೀಣಾಸವಸ್ಸ. ನ ವಿಜ್ಜನ್ತೀತಿ ಇಮೇ ಆಸವಾ ತಸ್ಸ ನತ್ಥಿ ನ ಸನ್ತಿ ನ ಸಂವಿಜ್ಜನ್ತಿ ನುಪಲಬ್ಭನ್ತಿ ಪಹೀನಾ ಸಮುಚ್ಛಿನ್ನಾ ವೂಪಸನ್ತಾ ಪಟಿಪ್ಪಸ್ಸದ್ಧಾ ಅಭಬ್ಬುಪ್ಪತ್ತಿಕಾ ಞಾಣಗ್ಗಿನಾ ದಡ್ಢಾತಿ – ಆಸವಾಸ್ಸ ನ ವಿಜ್ಜನ್ತಿ.

ಯೇಹಿ ಮಚ್ಚುವಸಂ ವಜೇತಿ ಯೇಹಿ ಆಸವೇಹಿ ಮಚ್ಚುನೋ ವಾ ವಸಂ ಗಚ್ಛೇಯ್ಯ, ಮರಣಸ್ಸ ವಾ ವಸಂ ಗಚ್ಛೇಯ್ಯ, ಮಾರಪಕ್ಖಸ್ಸ ವಾ ವಸಂ ಗಚ್ಛೇಯ್ಯ; ತೇ ಆಸವಾ ತಸ್ಸ ನತ್ಥಿ ನ ಸನ್ತಿ ನ ಸಂವಿಜ್ಜನ್ತಿ ನುಪಲಬ್ಭನ್ತಿ ಪಹೀನಾ ಸಮುಚ್ಛಿನ್ನಾ ವೂಪಸನ್ತಾ ಪಟಿಪ್ಪಸ್ಸದ್ಧಾ ಅಭಬ್ಬುಪ್ಪತ್ತಿಕಾ ಞಾಣಗ್ಗಿನಾ ದಡ್ಢಾತಿ – ಯೇಹಿ ಮಚ್ಚುವಸಂ ವಜೇ. ತೇನಾಹ ಭಗವಾ –

‘‘ಸಬ್ಬಸೋ ನಾಮರೂಪಸ್ಮಿಂ, ವೀತಗೇಧಸ್ಸ ಬ್ರಾಹ್ಮಣ;

ಆಸವಾಸ್ಸ ನ ವಿಜ್ಜನ್ತಿ, ಯೇಹಿ ಮಚ್ಚುವಸಂ ವಜೇ’’ತಿ.

ಸಹ ಗಾಥಾಪರಿಯೋಸಾನಾ…ಪೇ… ಸತ್ಥಾ ಮೇ ಭನ್ತೇ ಭಗವಾ, ಸಾವಕೋಹಮಸ್ಮೀತಿ.

ಜತುಕಣ್ಣಿಮಾಣವಪುಚ್ಛಾನಿದ್ದೇಸೋ ಏಕಾದಸಮೋ.