೪. ಖೇತ್ತಙ್ಗಪಞ್ಹೋ

೪. ‘‘ಭನ್ತೇ ನಾಗಸೇನ, ‘ಖೇತ್ತಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಖೇತ್ತಂ ಮಾತಿಕಾಸಮ್ಪನ್ನಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸುಚರಿತವತ್ತಪ್ಪಟಿವತ್ತಮಾತಿಕಾಸಮ್ಪನ್ನೇನ ಭವಿತಬ್ಬಂ. ಇದಂ, ಮಹಾರಾಜ, ಖೇತ್ತಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಖೇತ್ತಂ ಮರಿಯಾದಾಸಮ್ಪನ್ನಂ ಹೋತಿ, ತಾಯ ಚ ಮರಿಯಾದಾಯ ಉದಕಂ ರಕ್ಖಿತ್ವಾ ಧಞ್ಞಂ ಪರಿಪಾಚೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸೀಲಹಿರಿಮರಿಯಾದಾಸಮ್ಪನ್ನೇನ ಭವಿತಬ್ಬಂ, ತಾಯ ಚ ಸೀಲಹಿರಿಮರಿಯಾದಾಯ ಸಾಮಞ್ಞಂ ರಕ್ಖಿತ್ವಾ ಚತ್ತಾರಿ ಸಾಮಞ್ಞಫಲಾನಿ ಗಹೇತಬ್ಬಾನಿ. ಇದಂ, ಮಹಾರಾಜ, ಖೇತ್ತಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಖೇತ್ತಂ ಉಟ್ಠಾನಸಮ್ಪನ್ನಂ ಹೋತಿ, ಕಸ್ಸಕಸ್ಸ ಹಾಸಜನಕಂ ಅಪ್ಪಮ್ಪಿ ಬೀಜಂ ವುತ್ತಂ ಬಹು ಹೋತಿ, ಬಹು ವುತ್ತಂ ಬಹುತರಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಉಟ್ಠಾನಸಮ್ಪನ್ನೇನ ವಿಪುಲಫಲದಾಯಿನಾ ಭವಿತಬ್ಬಂ, ದಾಯಕಾನಂ ಹಾಸಜನಕೇನ ಭವಿತಬ್ಬಂ, ಯಥಾ ಅಪ್ಪಂ ದಿನ್ನಂ ಬಹು ಹೋತಿ, ಬಹು ದಿನ್ನಂ ಬಹುತರಂ ಹೋತಿ. ಇದಂ, ಮಹಾರಾಜ, ಖೇತ್ತಸ್ಸ ತತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಉಪಾಲಿನಾ ವಿನಯಧರೇನ –

‘‘‘ಖೇತ್ತೂಪಮೇನ ಭವಿತಬ್ಬಂ, ಉಟ್ಠಾನವಿಪುಲದಾಯಿನಾ;

ಏಸ ಖೇತ್ತವರೋ ನಾಮ, ಯೋ ದದಾತಿ ವಿಪುಲಂ ಫಲ’’’ನ್ತಿ.

ಖೇತ್ತಙ್ಗಪಞ್ಹೋ ಚತುತ್ಥೋ.