೮. ಜಲೂಕಙ್ಗಪಞ್ಹೋ

೮. ‘‘ಭನ್ತೇ ನಾಗಸೇನ, ‘ಜಲೂಕಾಯ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಜಲೂಕಾ ಯತ್ಥ ಅಲ್ಲೀಯತಿ, ತತ್ಥೇವ ದಳ್ಹಂ ಅಲ್ಲೀಯಿತ್ವಾ ರುಹಿರಂ ಪಿವತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಸ್ಮಿಂ ಆರಮ್ಮಣೇ ಚಿತ್ತಂ ಅಲ್ಲೀಯತಿ, ತಂ ಆರಮ್ಮಣಂ ವಣ್ಣತೋ ಚ ಸಣ್ಠಾನತೋ ಚ ದಿಸತೋ ಚ ಓಕಾಸತೋ ಚ ಪರಿಚ್ಛೇದತೋ ಚ ಲಿಙ್ಗತೋ ಚ ನಿಮಿತ್ತತೋ ಚ ದಳ್ಹಂ ಪತಿಟ್ಠಾಪೇತ್ವಾ ತೇನೇವಾರಮ್ಮಣೇನ ವಿಮುತ್ತಿರಸಮಸೇಚನಕಂ ಪಾತಬ್ಬಂ. ಇದಂ, ಮಹಾರಾಜ, ಜಲೂಕಾಯ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಅನುರುದ್ಧೇನ –

‘‘‘ಪರಿಸುದ್ಧೇನ ಚಿತ್ತೇನ, ಆರಮ್ಮಣೇ ಪತಿಟ್ಠಾಯ;

ತೇನ ಚಿತ್ತೇನ ಪಾತಬ್ಬಂ, ವಿಮುತ್ತಿರಸಮಸೇಚನ’’’ನ್ತಿ.

ಜಲೂಕಙ್ಗಪಞ್ಹೋ ಅಟ್ಠಮೋ.