೬. ಸತಪತ್ತಙ್ಗಪಞ್ಹೋ

೬. ‘‘ಭನ್ತೇ ನಾಗಸೇನ, ‘ಸತಪತ್ತಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಸತಪತ್ತೋ ರವಿತ್ವಾ ಪರೇಸಂ ಖೇಮಂ ವಾ ಭಯಂ ವಾ ಆಚಿಕ್ಖತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪರೇಸಂ ಧಮ್ಮಂ ದೇಸಯಮಾನೇನ ವಿನಿಪಾತಂ ಭಯತೋ ದಸ್ಸಯಿತಬ್ಬಂ, ನಿಬ್ಬಾನಂ ಖೇಮತೋ ದಸ್ಸಯಿತಬ್ಬಂ. ಇದಂ, ಮಹಾರಾಜ, ಸತಪತ್ತಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಪಿಣ್ಡೋಲಭಾರದ್ವಾಜೇನ –

‘‘‘ನಿರಯೇ ಭಯಸನ್ತಾಸಂ, ನಿಬ್ಬಾನೇ ವಿಪುಲಂ ಸುಖಂ;

ಉಭಯಾನೇತಾನತ್ಥಾನಿ ದಸ್ಸೇತಬ್ಬಾನಿ ಯೋಗಿನಾ’’’ತಿ.

ಸತಪತ್ತಙ್ಗಪಞ್ಹೋ ಛಟ್ಠೋ.