೪. ವಿಚ್ಛಿಕಙ್ಗಪಞ್ಹೋ

೪. ‘‘ಭನ್ತೇ ನಾಗಸೇನ, ‘ವಿಚ್ಛಿಕಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ವಿಚ್ಛಿಕೋ ನಙ್ಗುಲಾವುಧೋ ನಙ್ಗುಲಂ ಉಸ್ಸಾಪೇತ್ವಾ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಞಾಣಾವುಧೇನ ಭವಿತಬ್ಬಂ, ಞಾಣಂ ಉಸ್ಸಾಪೇತ್ವಾ ವಿಹರಿತಬ್ಬಂ. ಇದಂ, ಮಹಾರಾಜ, ವಿಚ್ಛಿಕಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಉಪಸೇನೇನ ವಙ್ಗನ್ತಪುತ್ತೇನ –

‘‘‘ಞಾಣಖಗ್ಗಂ ಗಹೇತ್ವಾನ, ವಿಹರನ್ತೋ ವಿಪಸ್ಸಕೋ;

ಪರಿಮುಚ್ಚತಿ ಸಬ್ಬಭಯಾ, ದುಪ್ಪಸಹೋ ಚ ಸೋ ಭವೇ’’’ತಿ.