೧೨. ನಿಬ್ಬಾನಸನ್ನಿಹಿತಪಞ್ಹೋ

೧೨. ‘‘ಭನ್ತೇ ನಾಗಸೇನ, ಅತ್ಥಿ ಸೋ ಪದೇಸೋ ಪುರತ್ಥಿಮಾಯ ವಾ ದಿಸಾಯ ದಕ್ಖಿಣಾಯ ವಾ ದಿಸಾಯ ಪಚ್ಛಿಮಾಯ ವಾ ದಿಸಾಯ ಉತ್ತರಾಯ ವಾ ದಿಸಾಯ ಉದ್ಧಂ ವಾ ಅಧೋ ವಾ ತಿರಿಯಂ ವಾ, ಯತ್ಥ ನಿಬ್ಬಾನಂ ಸನ್ನಿಹಿತ’’ನ್ತಿ? ‘‘ನತ್ಥಿ, ಮಹಾರಾಜ, ಸೋ ಪದೇಸೋ ಪುರತ್ಥಿಮಾಯ ವಾ ದಿಸಾಯ ದಕ್ಖಿಣಾಯ ವಾ ದಿಸಾಯ ಪಚ್ಛಿಮಾಯ ವಾ ದಿಸಾಯ ಉತ್ತರಾಯ ವಾ ದಿಸಾಯ ಉದ್ಧಂ ವಾ ಅಧೋ ವಾ ತಿರಿಯಂ ವಾ, ಯತ್ಥ ನಿಬ್ಬಾನಂ ಸನ್ನಿಹಿತ’’ನ್ತಿ.

‘‘ಯದಿ, ಭನ್ತೇ ನಾಗಸೇನ, ನತ್ಥಿ ನಿಬ್ಬಾನಸ್ಸ ಸನ್ನಿಹಿತೋಕಾಸೋ, ತೇನ ಹಿ ನತ್ಥಿ ನಿಬ್ಬಾನಂ? ಯೇಸಞ್ಚ ತಂ ನಿಬ್ಬಾನಂ ಸಚ್ಛಿಕತಂ, ತೇಸಮ್ಪಿ ಸಚ್ಛಿಕಿರಿಯಾ ಮಿಚ್ಛಾ, ಕಾರಣಂ ತತ್ಥ ವಕ್ಖಾಮಿ, ಯಥಾ, ಭನ್ತೇ ನಾಗಸೇನ, ಮಹಿಯಾ ಧಞ್ಞುಟ್ಠಾನಂ ಖೇತ್ತಂ ಅತ್ಥಿ, ಗನ್ಧುಟ್ಠಾನಂ ಪುಪ್ಫಂ ಅತ್ಥಿ, ಪುಪ್ಫುಟ್ಠಾನಂ ಗುಮ್ಬೋ ಅತ್ಥಿ, ಫಲುಟ್ಠಾನಂ ರುಕ್ಖೋ ಅತ್ಥಿ, ರತನುಟ್ಠಾನಂ ಆಕರೋ ಅತ್ಥಿ, ತತ್ಥ ಯೋ ಕೋಚಿ ಯಂ ಯಂ ಇಚ್ಛತಿ, ಸೋ ತತ್ಥ ಗನ್ತ್ವಾ ತಂ ತಂ ಹರತಿ, ಏವಮೇವ ಖೋ, ಭನ್ತೇ ನಾಗಸೇನ, ಯದಿ ನಿಬ್ಬಾನಂ ಅತ್ಥಿ, ತಸ್ಸ ನಿಬ್ಬಾನಸ್ಸ ಉಟ್ಠಾನೋಕಾಸೋಪಿ ಇಚ್ಛಿತಬ್ಬೋ, ಯಸ್ಮಾ ಚ ಖೋ, ಭನ್ತೇ ನಾಗಸೇನ, ನಿಬ್ಬಾನಸ್ಸ ಉಟ್ಠಾನೋಕಾಸೋ ನತ್ಥಿ, ತಸ್ಮಾ ನತ್ಥಿ ನಿಬ್ಬಾನನ್ತಿ ಬ್ರೂಮಿ, ಯೇಸಞ್ಚ ನಿಬ್ಬಾನಂ ಸಚ್ಛಿಕತಂ, ತೇಸಮ್ಪಿ ಸಚ್ಛಿಕಿರಿಯಾ ಮಿಚ್ಛಾ’’ತಿ.

‘‘ನತ್ಥಿ, ಮಹಾರಾಜ, ನಿಬ್ಬಾನಸ್ಸ ಸನ್ನಿಹಿತೋಕಾಸೋ, ಅತ್ಥಿ ಚೇತಂ ನಿಬ್ಬಾನಂ, ಸಮ್ಮಾಪಟಿಪನ್ನೋ ಯೋನಿಸೋ ಮನಸಿಕಾರೇನ ನಿಬ್ಬಾನಂ ಸಚ್ಛಿಕರೋತಿ. ಯಥಾ ಪನ, ಮಹಾರಾಜ, ಅತ್ಥಿ ಅಗ್ಗಿ ನಾಮ, ನತ್ಥಿ ತಸ್ಸ ಸನ್ನಿಹಿತೋಕಾಸೋ, ದ್ವೇ ಕಟ್ಠಾನಿ ಸಙ್ಘಟ್ಟೇನ್ತೋ ಅಗ್ಗಿಂ ಅಧಿಗಚ್ಛತಿ. ಏವಮೇವ ಖೋ, ಮಹಾರಾಜ, ಅತ್ಥಿ ನಿಬ್ಬಾನಂ, ನತ್ಥಿ ತಸ್ಸ ಸನ್ನಿಹಿತೋಕಾಸೋ, ಸಮ್ಮಾಪಟಿಪನ್ನೋ ಯೋನಿಸೋ ಮನಸಿಕಾರೇನ ನಿಬ್ಬಾನಂ ಸಚ್ಛಿಕರೋತಿ.

‘‘ಯಥಾ ವಾ ಪನ, ಮಹಾರಾಜ, ಅತ್ಥಿ ಸತ್ತ ರತನಾನಿ ನಾಮ. ಸೇಯ್ಯಥಿದಂ, ಚಕ್ಕರತನಂ ಹತ್ಥಿರತನಂ ಅಸ್ಸರತನಂ ಮಣಿರತನಂ ಇತ್ಥಿರತನಂ ಗಹಪತಿರತನಂ ಪರಿಣಾಯಕರತನಂ. ನ ಚ ತೇಸಂ ರತನಾನಂ ಸನ್ನಿಹಿತೋಕಾಸೋ ಅತ್ಥಿ, ಖತ್ತಿಯಸ್ಸ ಪನ ಸಮ್ಮಾಪಟಿಪನ್ನಸ್ಸ ಪಟಿಪತ್ತಿಬಲೇನ ತಾನಿ ರತನಾನಿ ಉಪಗಚ್ಛನ್ತಿ. ಏವಮೇವ ಖೋ, ಮಹಾರಾಜ, ಅತ್ಥಿ ನಿಬ್ಬಾನಂ, ನತ್ಥಿ ತಸ್ಸ ಸನ್ನಿಹಿತೋಕಾಸೋ, ಸಮ್ಮಾಪಟಿಪನ್ನೋ ಯೋನಿಸೋ ಮನಸಿಕಾರೇನ ನಿಬ್ಬಾನಂ ಸಚ್ಛಿಕರೋತೀ’’ತಿ.

‘‘ಭನ್ತೇ ನಾಗಸೇನ, ನಿಬ್ಬಾನಸ್ಸ ಸನ್ನಿಹಿತೋಕಾಸೋ ಮಾ ಹೋತು, ಅತ್ಥಿ ಪನ ತಂ ಠಾನಂ, ಯತ್ಥ ಠಿತೋ ಸಮ್ಮಾಪಟಿಪನ್ನೋ ನಿಬ್ಬಾನಂ ಸಚ್ಛಿಕರೋತೀ’’ತಿ? ‘‘ಆಮ, ಮಹಾರಾಜ, ಅತ್ಥಿ ತಂ ಠಾನಂ, ಯತ್ಥ ಠಿತೋ ಸಮ್ಮಾಪಟಿಪನ್ನೋ ನಿಬ್ಬಾನಂ ಸಚ್ಛಿಕರೋತೀ’’ತಿ.

‘‘ಕತಮಂ ಪನ, ಭನ್ತೇ, ತಂ ಠಾನಂ, ಯತ್ಥ ಠಿತೋ ಸಮ್ಮಾಪಟಿಪನ್ನೋ ನಿಬ್ಬಾನಂ ಸಚ್ಛಿಕರೋತೀ’’ತಿ? ‘‘ಸೀಲಂ, ಮಹಾರಾಜ, ಠಾನಂ, ಸೀಲೇ ಪತಿಟ್ಠಿತೋ ಯೋನಿಸೋ ಮನಸಿಕರೋನ್ತೋ ಸಕ್ಕಯವನೇಪಿ ಚೀನವಿಲಾತೇಪಿ ಅಲಸನ್ದೇಪಿ ನಿಗುಮ್ಬೇಪಿ [ನಿಕುಮ್ಬೇಪಿ (ಸೀ. ಸ್ಯಾ. ಪೀ.)] ಕಾಸಿಕೋಸಲೇಪಿ ಕಸ್ಮೀರೇಪಿ ಗನ್ಧಾರೇಪಿ ನಗಮುದ್ಧನಿಪಿ ಬ್ರಹ್ಮಲೋಕೇಪಿ ಯತ್ಥ ಕತ್ಥಚಿಪಿ ಠಿತೋ ಸಮ್ಮಾಪಟಿಪನ್ನೋ ನಿಬ್ಬಾನಂ ಸಚ್ಛಿಕರೋತಿ. ಯಥಾ, ಮಹಾರಾಜ, ಯೋ ಕೋಚಿ ಚಕ್ಖುಮಾ ಪುರಿಸೋ ಸಕಯವನೇಪಿ ಚೀನವಿಲಾತೇಪಿ ಅಲಸನ್ದೇಪಿ ನಿಗುಮ್ಬೇಪಿ ಕಾಸಿಕೋಸಲೇಪಿ ಕಸ್ಮೀರೇಪಿ ಗನ್ಧಾರೇಪಿ ನಗಮುದ್ಧನಿಪಿ ಬ್ರಹ್ಮಲೋಕೇಪಿ ಯತ್ಥ ಕತ್ಥಚಿಪಿ ಠಿತೋ ಆಕಾಸಂ ಪಸ್ಸತಿ, ಏವಮೇವ ಖೋ, ಮಹಾರಾಜ, ಸೀಲೇ ಪತಿಟ್ಠಿತೋ ಯೋನಿಸೋ ಮನಸಿಕರೋನ್ತೋ ಸಕಯವನೇಪಿ…ಪೇ… ಯತ್ಥ ಕತ್ಥಚಿಪಿ ಠಿತೋ ಸಮ್ಮಾಪಟಿಪನ್ನೋ ನಿಬ್ಬಾನಂ ಸಚ್ಛಿಕರೋತಿ.

‘‘ಯಥಾ ವಾ ಪನ, ಮಹಾರಾಜ, ಸಕಯವನೇಪಿ…ಪೇ… ಯತ್ಥ ಕತ್ಥಚಿಪಿ ಠಿತಸ್ಸ ಪುಬ್ಬದಿಸಾ ಅತ್ಥಿ, ಏವಮೇವ ಖೋ, ಮಹಾರಾಜ, ಸೀಲೇ ಪತಿಟ್ಠಿತಸ್ಸ ಯೋನಿಸೋ ಮನಸಿಕರೋನ್ತಸ್ಸ ಸಕ್ಕಯವನೇಪಿ…ಪೇ… ಯತ್ಥ ಕತ್ಥಚಿಪಿ ಠಿತಸ್ಸ ಸಮ್ಮಾಪಟಿಪನ್ನಸ್ಸ ಅತ್ಥಿ ನಿಬ್ಬಾನಸಚ್ಛಿಕಿರಿಯಾ’’ತಿ. ‘‘ಸಾಧು, ಭನ್ತೇ ನಾಗಸೇನ, ದೇಸಿತಂ ತಯಾ ನಿಬ್ಬಾನಂ, ದೇಸಿತಾ ನಿಬ್ಬಾನಸಚ್ಛಿಕಿರಿಯಾ, ಪರಿಕ್ಖತಾ ಸೀಲಗುಣಾ, ದಸ್ಸಿತಾ ಸಮ್ಮಾಪಟಿಪತ್ತಿ, ಉಸ್ಸಾಪಿತೋ ಧಮ್ಮದ್ಧಜೋ, ಸಣ್ಠಪಿತಾ ಧಮ್ಮನೇತ್ತಿ, ಅವಞ್ಝೋ ಸುಪ್ಪಯುತ್ತಾನಂ ಸಮ್ಮಾಪಯೋಗೋ, ಏವಮೇತಂ ಗಣಿವರಪವರ ತಥಾ ಸಮ್ಪಟಿಚ್ಛಾಮೀ’’ತಿ.

ನಿಬ್ಬಾನಸನ್ನಿಹಿತಪಞ್ಹೋ ದ್ವಾದಸಮೋ.

ವೇಸ್ಸನ್ತರವಗ್ಗೋ ತತಿಯೋ.

ಇಮಸ್ಮಿಂ ವಗ್ಗೇ ದ್ವಾದಸ ಪಞ್ಹಾ.