೪೦೪. ಕಪಿಜಾತಕಂ (೭-೧-೯)

೬೧. ಯತ್ಥ ವೇರೀ ನಿವಸತಿ, ನ ವಸೇ ತತ್ಥ ಪಣ್ಡಿತೋ;

ಏಕರತ್ತಂ ದಿರತ್ತಂ ವಾ, ದುಕ್ಖಂ ವಸತಿ ವೇರಿಸು.

೬೨. ದಿಸೋ ವೇ ಲಹುಚಿತ್ತಸ್ಸ, ಪೋಸಸ್ಸಾನುವಿಧೀಯತೋ;

ಏಕಸ್ಸ ಕಪಿನೋ ಹೇತು, ಯೂಥಸ್ಸ ಅನಯೋ ಕತೋ.

೬೩. ಬಾಲೋವ [ಚ (ಸೀ. ಸ್ಯಾ. ಪೀ.)] ಪಣ್ಡಿತಮಾನೀ, ಯೂಥಸ್ಸ ಪರಿಹಾರಕೋ;

ಸಚಿತ್ತಸ್ಸ ವಸಂ ಗನ್ತ್ವಾ, ಸಯೇಥಾಯಂ [ಪಸ್ಸೇಥಾಯಂ (ಕ.)] ಯಥಾ ಕಪಿ.

೬೪. ನ ಸಾಧು ಬಲವಾ ಬಾಲೋ, ಯೂಥಸ್ಸ ಪರಿಹಾರಕೋ;

ಅಹಿತೋ ಭವತಿ ಞಾತೀನಂ, ಸಕುಣಾನಂವ ಚೇತಕೋ [ಚೇಟಕೋ (ಕ.)].

೬೫. ಧೀರೋವ ಬಲವಾ ಸಾಧು, ಯೂಥಸ್ಸ ಪರಿಹಾರಕೋ;

ಹಿತೋ ಭವತಿ ಞಾತೀನಂ, ತಿದಸಾನಂವ ವಾಸವೋ.

೬೬. ಯೋ ಚ ಸೀಲಞ್ಚ ಪಞ್ಞಞ್ಚ, ಸುತಞ್ಚತ್ತನಿ ಪಸ್ಸತಿ;

ಉಭಿನ್ನಮತ್ಥಂ ಚರತಿ, ಅತ್ತನೋ ಚ ಪರಸ್ಸ ಚ.

೬೭. ತಸ್ಮಾ ತುಲೇಯ್ಯ ಮತ್ತಾನಂ, ಸೀಲಪಞ್ಞಾಸುತಾಮಿವ [ಸೀಲಂ ಪಞ್ಞಂ ಸುತಂಪಿವ (ಸ್ಯಾ.)];

ಗಣಂ ವಾ ಪರಿಹರೇ ಧೀರೋ, ಏಕೋ ವಾಪಿ ಪರಿಬ್ಬಜೇತಿ.

ಕಪಿಜಾತಕಂ ನವಮಂ.