೩೯೬. ಕುಕ್ಕುಜಾತಕಂ (೭-೧-೧)

೧. ದಿಯಡ್ಢಕುಕ್ಕೂ ಉದಯೇನ ಕಣ್ಣಿಕಾ, ವಿದತ್ಥಿಯೋ ಅಟ್ಠ ಪರಿಕ್ಖಿಪನ್ತಿ ನಂ;

ಸಾ ಸಿಂಸಪಾ [ಸಸಿಂಸಪಾ (ಸೀ. ಪೀ.), ಸಾ ಸೀಸಪಾ (ಸ್ಯಾ.), ಯಾ ಸಿಂಸಪಾ (ಕ. ಸೀ. ನಿಯ್ಯ)] ಸಾರಮಯಾ ಅಫೇಗ್ಗುಕಾ, ಕುಹಿಂ ಠಿತಾ ಉಪ್ಪರಿತೋ [ಉಪರಿತೋ (ಸೀ. ಸ್ಯಾ. ಪೀ.)] ನ ಧಂಸತಿ.

೨. ಯಾ ತಿಂಸತಿ ಸಾರಮಯಾ ಅನುಜ್ಜುಕಾ, ಪರಿಕಿರಿಯ [ಪಕಿರಿಯಾ (ಕ.)] ಗೋಪಾಣಸಿಯೋ ಸಮಂ ಠಿತಾ [ಸಮಟ್ಠಿತಾ (ಸೀ. ಸ್ಯಾ.)];

ತಾಹಿ ಸುಸಙ್ಗಹಿತಾ ಬಲಸಾ ಪೀಳಿತಾ [ತಾ ಸಙ್ಗಹಿತಾ ಬಲಸಾ ಚ ಪೀಳಿತಾ (ಸೀ.), ತಾಹಿ ಸುಸಙ್ಗಹಿತಾ ಬಲಸಾ ಚ ಪೀಳಿತಾ (ಸ್ಯಾ.), ತಾಹಿ ಸಙ್ಗಹೀತಾ ಬಲಸಾ ಚ ಪೀಳಿತಾ (ಪೀ.)], ಸಮಂ ಠಿತಾ ಉಪ್ಪರಿತೋ ನ ಧಂಸತಿ.

೩. ಏವಮ್ಪಿ ಮಿತ್ತೇಹಿ ದಳ್ಹೇಹಿ ಪಣ್ಡಿತೋ, ಅಭೇಜ್ಜರೂಪೇಹಿ ಸುಚೀಹಿ ಮನ್ತಿಭಿ;

ಸುಸಙ್ಗಹೀತೋ ಸಿರಿಯಾ ನ ಧಂಸತಿ, ಗೋಪಾಣಸೀ ಭಾರವಹಾವ ಕಣ್ಣಿಕಾ.

೪. ಖರತ್ತಚಂ ಬೇಲ್ಲಂ ಯಥಾಪಿ ಸತ್ಥವಾ, ಅನಾಮಸನ್ತೋಪಿ ಕರೋತಿ ತಿತ್ತಕಂ;

ಸಮಾಹರಂ ಸಾದುಂ ಕರೋತಿ ಪತ್ಥಿವ, ಅಸಾದುಂ ಕಯಿರಾ ತನುಬನ್ಧಮುದ್ಧರಂ [ತನುವಟ್ಟಮುದ್ಧರಂ (ಸೀ. ಪೀ.)].

೫. ಏವಮ್ಪಿ ಗಾಮನಿಗಮೇಸು ಪಣ್ಡಿತೋ, ಅಸಾಹಸಂ ರಾಜಧನಾನಿ ಸಙ್ಘರಂ;

ಧಮ್ಮಾನುವತ್ತೀ ಪಟಿಪಜ್ಜಮಾನೋ, ಸ ಫಾತಿ ಕಯಿರಾ ಅವಿಹೇಠಯಂ ಪರಂ.

೬. ಓದಾತಮೂಲಂ ಸುಚಿವಾರಿಸಮ್ಭವಂ, ಜಾತಂ ಯಥಾ ಪೋಕ್ಖರಣೀಸು ಅಮ್ಬುಜಂ;

ಪದುಮಂ ಯಥಾ ಅಗ್ಗಿನಿಕಾಸಿಫಾಲಿಮಂ, ನ ಕದ್ದಮೋ ನ ರಜೋ ನ ವಾರಿ ಲಿಮ್ಪತಿ.

೭. ಏವಮ್ಪಿ ವೋಹಾರಸುಚಿಂ ಅಸಾಹಸಂ, ವಿಸುದ್ಧಕಮ್ಮನ್ತಮಪೇತಪಾಪಕಂ;

ನ ಲಿಮ್ಪತಿ ಕಮ್ಮಕಿಲೇಸ ತಾದಿಸೋ, ಜಾತಂ ಯಥಾ ಪೋಕ್ಖರಣೀಸು ಅಮ್ಬುಜನ್ತಿ.

ಕುಕ್ಕುಜಾತಕಂ ಪಠಮಂ.