೩೯೩. ವಿಘಾಸಾದಜಾತಕಂ (೬-೨-೮)

೧೨೨. ಸುಸುಖಂ ವತ ಜೀವನ್ತಿ, ಯೇ ಜನಾ ವಿಘಾಸಾದಿನೋ;

ದಿಟ್ಠೇವ ಧಮ್ಮೇ ಪಾಸಂಸಾ, ಸಮ್ಪರಾಯೇ ಚ ಸುಗ್ಗತೀ.

೧೨೩. ಸುಕಸ್ಸ [ಸುವಸ್ಸ (ಸೀ. ಸ್ಯಾ. ಪೀ.)] ಭಾಸಮಾನಸ್ಸ, ನ ನಿಸಾಮೇಥ ಪಣ್ಡಿತಾ;

ಇದಂ ಸುಣಾಥ ಸೋದರಿಯಾ, ಅಮ್ಹೇವಾಯಂ ಪಸಂಸತಿ.

೧೨೪. ನಾಹಂ ತುಮ್ಹೇ ಪಸಂಸಾಮಿ, ಕುಣಪಾದಾ ಸುಣಾಥ ಮೇ;

ಉಚ್ಛಿಟ್ಠಭೋಜಿನೋ [ಭೋಜನಾ (ಕ.)] ತುಮ್ಹೇ, ನ ತುಮ್ಹೇ ವಿಘಾಸಾದಿನೋ.

೧೨೫. ಸತ್ತವಸ್ಸಾ ಪಬ್ಬಜಿತಾ, ಮೇಜ್ಝಾರಞ್ಞೇ [ಮಜ್ಝೇರಞ್ಞೇ (ಕ.)] ಸಿಖಣ್ಡಿನೋ;

ವಿಘಾಸೇನೇವ ಯಾಪೇನ್ತಾ, ಮಯಂ ಚೇ ಭೋತೋ ಗಾರಯ್ಹಾ;

ಕೇ ನು ಭೋತೋ ಪಸಂಸಿಯಾ.

೧೨೬. ತುಮ್ಹೇ ಸೀಹಾನಂ ಬ್ಯಗ್ಘಾನಂ, ವಾಳಾನಞ್ಚಾವಸಿಟ್ಠಕಂ;

ಉಚ್ಛಿಟ್ಠೇನೇವ ಯಾಪೇನ್ತಾ, ಮಞ್ಞಿವ್ಹೋ ವಿಘಾಸಾದಿನೋ.

೧೨೭. ಯೇ ಬ್ರಾಹ್ಮಣಸ್ಸ ಸಮಣಸ್ಸ, ಅಞ್ಞಸ್ಸ ವಾ [ಅಞ್ಞಸ್ಸ ಚ (ಸೀ. ಸ್ಯಾ.), ಅಞ್ಞಸ್ಸೇವ (ಪೀ.)] ವನಿಬ್ಬಿನೋ [ವಣಿಬ್ಬಿನೋ (ಸೀ. ಸ್ಯಾ.)];

ದತ್ವಾವ [ದತ್ವಾನ (ಪೀ. ಕ.)] ಸೇಸಂ ಭುಞ್ಜನ್ತಿ, ತೇ ಜನಾ ವಿಘಾಸಾದಿನೋತಿ.

ವಿಘಾಸಾದಜಾತಕಂ ಅಟ್ಠಮಂ.