೨. ಖರಪುತ್ತವಗ್ಗೋ

೩೮೬. ಖರಪುತ್ತಜಾತಕಂ (೬-೨-೧)

೭೬. ಸಚ್ಚಂ ಕಿರೇವಮಾಹಂಸು, ವಸ್ತಂ [ಭಸ್ತಂ (ಸೀ. ಪೀ.), ಕಲಕಂ (ಸ್ಯಾ.), ಗರಂ (ಕ.)] ಬಾಲೋತಿ ಪಣ್ಡಿತಾ;

ಪಸ್ಸ ಬಾಲೋ ರಹೋಕಮ್ಮಂ, ಆವಿಕುಬ್ಬಂ ನ ಬುಜ್ಝತಿ.

೭೭. ತ್ವಂ ಖೋಪಿ [ತ್ವಂ ನು ಖೋ (ಸೀ. ಸ್ಯಾ.), ತ್ವಞ್ಚ ಖೋ (ಪೀ.)] ಸಮ್ಮ ಬಾಲೋಸಿ, ಖರಪುತ್ತ ವಿಜಾನಹಿ;

ರಜ್ಜುಯಾ ಹಿ [ರಜ್ಜುಯಾಸಿ (ಪೀ.)] ಪರಿಕ್ಖಿತ್ತೋ, ವಙ್ಕೋಟ್ಠೋ ಓಹಿತೋಮುಖೋ.

೭೮. ಅಪರಮ್ಪಿ ಸಮ್ಮ ತೇ ಬಾಲ್ಯಂ [ಅಯಮ್ಪಿ ಸಮ್ಮ ತೇ ಬಾಲೋ (ಕ.)], ಯೋ ಮುತ್ತೋ ನ ಪಲಾಯಸಿ;

ಸೋ ಚ ಬಾಲತರೋ ಸಮ್ಮ, ಯಂ ತ್ವಂ ವಹಸಿ ಸೇನಕಂ.

೭೯. ಯಂ ನು ಸಮ್ಮ ಅಹಂ ಬಾಲೋ, ಅಜರಾಜ ವಿಜಾನಹಿ;

ಅಥ ಕೇನ ಸೇನಕೋ ಬಾಲೋ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೮೦. ಉತ್ತಮತ್ಥಂ ಲಭಿತ್ವಾನ, ಭರಿಯಾಯ ಯೋ ಪದಸ್ಸತಿ [ಭಯಿಯಾ ಯೋ ಪದಸ್ಸತಿ (ಪೀ.), ಭಯಿಯಾ ನ ಭವಿಸ್ಸತಿ (ಕ.)];

ತೇನ ಜಹಿಸ್ಸತತ್ತಾನಂ, ಸಾ ಚೇವಸ್ಸ ನ ಹೇಸ್ಸತಿ.

೮೧. ನ ವೇ ಪಿಯಮ್ಮೇತಿ [ನ ಪಿಯಮೇತಿ (ಕ.), ನ ಪಿಯಮೇದನ್ತಿ (ಕತ್ಥಚಿ)] ಜನಿನ್ದ ತಾದಿಸೋ, ಅತ್ತಂ ನಿರಂಕತ್ವಾ ಪಿಯಾನಿ ಸೇವತಿ [ಸೇವಯೇ (?)];

ಅತ್ತಾವ ಸೇಯ್ಯೋ ಪರಮಾ ಚ ಸೇಯ್ಯೋ, ಲಬ್ಭಾ ಪಿಯಾ ಓಚಿತತ್ಥೇನ ಪಚ್ಛಾತಿ.

ಖರಪುತ್ತಜಾತಕಂ ಪಠಮಂ.

೩೮೭. ಸೂಚಿಜಾತಕಂ (೬-೨-೨)

೮೨. ಅಕಕ್ಕಸಂ ಅಫರುಸಂ, ಖರಧೋತಂ ಸುಪಾಸಿಯಂ;

ಸುಖುಮಂ ತಿಖಿಣಗ್ಗಞ್ಚ, ಕೋ ಸೂಚಿಂ ಕೇತುಮಿಚ್ಛತಿ.

೮೩. ಸುಮಜ್ಜಞ್ಚ ಸುಪಾಸಞ್ಚ, ಅನುಪುಬ್ಬಂ [ಅನುಪುಬ್ಬ (ಸೀ. ಸ್ಯಾ.)] ಸುವಟ್ಟಿತಂ;

ಘನಘಾತಿಮಂ ಪಟಿಥದ್ಧಂ, ಕೋ ಸೂಚಿಂ ಕೇತುಮಿಚ್ಛತಿ.

೮೪. ಇತೋ ದಾನಿ ಪತಾಯನ್ತಿ, ಸೂಚಿಯೋ ಬಳಿಸಾನಿ ಚ;

ಕೋಯಂ ಕಮ್ಮಾರಗಾಮಸ್ಮಿಂ, ಸೂಚಿಂ ವಿಕ್ಕೇತುಮಿಚ್ಛತಿ.

೮೫. ಇತೋ ಸತ್ಥಾನಿ ಗಚ್ಛನ್ತಿ, ಕಮ್ಮನ್ತಾ ವಿವಿಧಾ ಪುಥೂ;

ಕೋಯಂ ಕಮ್ಮಾರಗಾಮಸ್ಮಿಂ, ಸೂಚಿಂ ವಿಕ್ಕೇತುಮಿಚ್ಛತಿ [ಮರಹತಿ (ಸೀ. ಸ್ಯಾ. ಪೀ.)].

೮೬. ಸೂಚಿಂ ಕಮ್ಮಾರಗಾಮಸ್ಮಿಂ, ವಿಕ್ಕೇತಬ್ಬಾ ಪಜಾನತಾ;

ಆಚರಿಯಾವ ಜಾನನ್ತಿ [ಆಚರಿಯಾ ಸಞ್ಜಾನನ್ತಿ (ಕ.), ಆಚರಿಯಾ ಪಜಾನನ್ತಿ (ಸ್ಯಾ.), ಆಚರಿಯಾವ ಸಞ್ಜಾನನ್ತಿ (ಪೀ.)], ಕಮ್ಮಂ ಸುಕತದುಕ್ಕಟಂ [ದುಕ್ಕತಂ (ಸೀ. ಪೀ.)].

೮೭. ಇಮಂ ಚೇ [ಇಮಞ್ಚ (ಸೀ. ಸ್ಯಾ. ಪೀ.)] ತೇ ಪಿತಾ ಭದ್ದೇ, ಸೂಚಿಂ ಜಞ್ಞಾ ಮಯಾ ಕತಂ;

ತಯಾ ಚ ಮಂ ನಿಮನ್ತೇಯ್ಯ, ಯಞ್ಚತ್ಥಞ್ಞಂ ಘರೇ ಧನನ್ತಿ.

ಸೂಚಿಜಾತಕಂ ದುತಿಯಂ.

೩೮೮. ತುಣ್ಡಿಲಜಾತಕಂ (೬-೨-೩)

೮೮. ನವಛನ್ನಕೇ [ನವಛನ್ದಕೇ (ಸೀ. ಪೀ.), ನವಚ್ಛದ್ದಕೇ (ಸ್ಯಾ.)] ದಾನಿ [ದೋಣಿ (ಕ.), ದಾನಂ, ದಾನೇ (ಕತ್ಥಚಿ)] ದಿಯ್ಯತಿ, ಪುಣ್ಣಾಯಂ ದೋಣಿ ಸುವಾಮಿನೀ ಠಿತಾ;

ಬಹುಕೇ ಜನೇ ಪಾಸಪಾಣಿಕೇ, ನೋ ಚ ಖೋ ಮೇ ಪಟಿಭಾತಿ ಭುಞ್ಜಿತುಂ.

೮೯. ತಸಸಿ ಭಮಸಿ ಲೇಣಮಿಚ್ಛಸಿ, ಅತ್ತಾಣೋಸಿ ಕುಹಿಂ ಗಮಿಸ್ಸಸಿ;

ಅಪ್ಪೋಸ್ಸುಕ್ಕೋ ಭುಞ್ಜ ತುಣ್ಡಿಲ, ಮಂಸತ್ಥಾಯ ಹಿ ಪೋಸಿತಾಮ್ಹಸೇ [ಪೋಸಿಯಾಮಸೇ (ಸೀ. ಸ್ಯಾ. ಪೀ.)].

೯೦. ಓಗಹ ರಹದಂ ಅಕದ್ದಮಂ, ಸಬ್ಬಂ ಸೇದಮಲಂ ಪವಾಹಯ;

ಗಣ್ಹಾಹಿ ನವಂ ವಿಲೇಪನಂ, ಯಸ್ಸ ಗನ್ಧೋ ನ ಕದಾಚಿ ಛಿಜ್ಜತಿ.

೯೧. ಕತಮೋ ರಹದೋ ಅಕದ್ದಮೋ, ಕಿಂಸು ಸೇದಮಲನ್ತಿ ವುಚ್ಚತಿ;

ಕತಮಞ್ಚ ನವಂ ವಿಲೇಪನಂ, ಯಸ್ಸ ಗನ್ಧೋ ನ ಕದಾಚಿ ಛಿಜ್ಜತಿ.

೯೨. ಧಮ್ಮೋ ರಹದೋ ಅಕದ್ದಮೋ, ಪಾಪಂ ಸೇದಮಲನ್ತಿ ವುಚ್ಚತಿ;

ಸೀಲಞ್ಚ ನವಂ ವಿಲೇಪನಂ, ತಸ್ಸ ಗನ್ಧೋ ನ ಕದಾಚಿ ಛಿಜ್ಜತಿ.

೯೩. ನನ್ದನ್ತಿ ಸರೀರಘಾತಿನೋ, ನ ಚ ನನ್ದನ್ತಿ ಸರೀರಧಾರಿನೋ;

ಪುಣ್ಣಾಯ ಚ ಪುಣ್ಣಮಾಸಿಯಾ, ರಮಮಾನಾವ ಜಹನ್ತಿ ಜೀವಿತನ್ತಿ.

ತುಣ್ಡಿಲಜಾತಕಂ ತತಿಯಂ.

೩೮೯. ಸುವಣ್ಣಕಕ್ಕಟಜಾತಕಂ (೬-೨-೪)

೯೪. ಸಿಙ್ಗೀಮಿಗೋ ಆಯತಚಕ್ಖುನೇತ್ತೋ, ಅಟ್ಠಿತ್ತಚೋ ವಾರಿಸಯೋ ಅಲೋಮೋ;

ತೇನಾಭಿಭೂತೋ ಕಪಣಂ ರುದಾಮಿ, ಹರೇ ಸಖಾ ಕಿಸ್ಸ ನು ಮಂ ಜಹಾಸಿ.

೯೫. ಸೋ ಪಸ್ಸಸನ್ತೋ ಮಹತಾ ಫಣೇನ, ಭುಜಙ್ಗಮೋ ಕಕ್ಕಟಮಜ್ಝಪತ್ತೋ;

ಸಖಾ ಸಖಾರಂ ಪರಿತಾಯಮಾನೋ, ಭುಜಙ್ಗಮಂ ಕಕ್ಕಟಕೋ ಗಹೇಸಿ.

೯೬. ನ ವಾಯಸಂ ನೋ ಪನ ಕಣ್ಹಸಪ್ಪಂ, ಘಾಸತ್ಥಿಕೋ ಕಕ್ಕಟಕೋ ಅದೇಯ್ಯ;

ಪುಚ್ಛಾಮಿ ತಂ ಆಯತಚಕ್ಖುನೇತ್ತ, ಅಥ ಕಿಸ್ಸ ಹೇತುಮ್ಹ ಉಭೋ ಗಹೀತಾ.

೯೭. ಅಯಂ ಪುರಿಸೋ ಮಮ ಅತ್ಥಕಾಮೋ, ಯೋ ಮಂ ಗಹೇತ್ವಾನ ದಕಾಯ ನೇತಿ;

ತಸ್ಮಿಂ ಮತೇ ದುಕ್ಖಮನಪ್ಪಕಂ ಮೇ, ಅಹಞ್ಚ ಏಸೋ ಚ ಉಭೋ ನ ಹೋಮ.

೯೮. ಮಮಞ್ಚ ದಿಸ್ವಾನ ಪವದ್ಧಕಾಯಂ, ಸಬ್ಬೋ ಜನೋ ಹಿಂಸಿತುಮೇವ ಮಿಚ್ಛೇ;

ಸಾದುಞ್ಚ ಥೂಲಞ್ಚ ಮುದುಞ್ಚ ಮಂಸಂ, ಕಾಕಾಪಿ ಮಂ ದಿಸ್ವಾನ [ದಿಸ್ವ (ಸೀ. ಪೀ.)] ವಿಹೇಠಯೇಯ್ಯುಂ.

೯೯. ಸಚೇತಸ್ಸ ಹೇತುಮ್ಹ ಉಭೋ ಗಹೀತಾ, ಉಟ್ಠಾತು ಪೋಸೋ ವಿಸಮಾವಮಾಮಿ [ವಿಸಮಾಚಮಾಮಿ (ಸೀ. ಪೀ. ಕ.)];

ಮಮಞ್ಚ ಕಾಕಞ್ಚ ಪಮುಞ್ಚ ಖಿಪ್ಪಂ, ಪುರೇ ವಿಸಂ ಗಾಳ್ಹಮುಪೇತಿ ಮಚ್ಚಂ.

೧೦೦. ಸಪ್ಪಂ ಪಮೋಕ್ಖಾಮಿ ನ ತಾವ ಕಾಕಂ, ಪಟಿಬನ್ಧಕೋ [ಪಟಿಬದ್ಧಕೋ (ಸೀ. ಪೀ.)] ಹೋಹಿತಿ [ಹೋತಿ ಹಿ (ಸ್ಯಾ.)] ತಾವ ಕಾಕೋ;

ಪುರಿಸಞ್ಚ ದಿಸ್ವಾನ ಸುಖಿಂ ಅರೋಗಂ, ಕಾಕಂ ಪಮೋಕ್ಖಾಮಿ ಯಥೇವ ಸಪ್ಪಂ.

೧೦೧. ಕಾಕೋ ತದಾ ದೇವದತ್ತೋ ಅಹೋಸಿ, ಮಾರೋ ಪನ ಕಣ್ಹಸಪ್ಪೋ ಅಹೋಸಿ;

ಆನನ್ದಭದ್ದೋ ಕಕ್ಕಟಕೋ ಅಹೋಸಿ, ಅಹಂ ತದಾ ಬ್ರಾಹ್ಮಣೋ ಹೋಮಿ ಸತ್ಥಾತಿ [ತತ್ಥಾತಿ (ಸೀ. ಪೀ.)].

ಸುವಣ್ಣಕಕ್ಕಟಜಾತಕಂ ಚತುತ್ಥಂ.

೩೯೦. ಮಯ್ಹಕಜಾತಕಂ (೬-೨-೫)

೧೦೨. ಸಕುಣೋ ಮಯ್ಹಕೋ ನಾಮ, ಗಿರಿಸಾನುದರೀಚರೋ;

ಪಕ್ಕಂ ಪಿಪ್ಫಲಿಮಾರುಯ್ಹ, ಮಯ್ಹಂ ಮಯ್ಹನ್ತಿ ಕನ್ದತಿ.

೧೦೩. ತಸ್ಸೇವಂ ವಿಲಪನ್ತಸ್ಸ, ದಿಜಸಙ್ಘಾ ಸಮಾಗತಾ;

ಭುತ್ವಾನ ಪಿಪ್ಫಲಿಂ ಯನ್ತಿ, ವಿಲಪತ್ವೇವ ಸೋ ದಿಜೋ.

೧೦೪. ಏವಮೇವ ಇಧೇಕಚ್ಚೋ, ಸಙ್ಘರಿತ್ವಾ ಬಹುಂ ಧನಂ;

ನೇವತ್ತನೋ ನ ಞಾತೀನಂ, ಯಥೋಧಿಂ ಪಟಿಪಜ್ಜತಿ.

೧೦೫. ನ ಸೋ ಅಚ್ಛಾದನಂ ಭತ್ತಂ, ನ ಮಾಲಂ ನ ವಿಲೇಪನಂ;

ಅನುಭೋತಿ [ನಾನುಭೋತಿ (ಸ್ಯಾ. ಕ.)] ಸಕಿಂ ಕಿಞ್ಚಿ, ನ ಸಙ್ಗಣ್ಹಾತಿ ಞಾತಕೇ.

೧೦೬. ತಸ್ಸೇವಂ ವಿಲಪನ್ತಸ್ಸ, ಮಯ್ಹಂ ಮಯ್ಹನ್ತಿ ರಕ್ಖತೋ;

ರಾಜಾನೋ ಅಥ ವಾ ಚೋರಾ, ದಾಯದಾ ಯೇ ವ [ಯೇ ಚ (ಸ್ಯಾ. ಕ.)] ಅಪ್ಪಿಯಾ;

ಧನಮಾದಾಯ ಗಚ್ಛನ್ತಿ, ವಿಲಪತ್ವೇವ ಸೋ ನರೋ.

೧೦೭. ಧೀರೋ [ಧೀರೋ ಚ (ಸೀ.)] ಭೋಗೇ ಅಧಿಗಮ್ಮ, ಸಙ್ಗಣ್ಹಾತಿ ಚ ಞಾತಕೇ;

ತೇನ ಸೋ ಕಿತ್ತಿಂ ಪಪ್ಪೋತಿ, ಪೇಚ್ಚ ಸಗ್ಗೇ ಪಮೋದತೀತಿ [ಸಗ್ಗೇ ಚ ಮೋದತೀತಿ (ಸೀ. ಪೀ.)].

ಮಯ್ಹಕಜಾತಕಂ ಪಞ್ಚಮಂ.

೩೯೧. ವಿಜ್ಜಾಧರಜಾತಕಂ (೬-೨-೬)

೧೦೮. ದುಬ್ಬಣ್ಣರೂಪಂ ತುವಮರಿಯವಣ್ಣೀ, ಪುರಕ್ಖತ್ವಾ [ಪುರಕ್ಖಿತ್ವಾ (ಸ್ಯಾ. ಕ.)] ಪಞ್ಜಲಿಕೋ ನಮಸ್ಸಸಿ;

ಸೇಯ್ಯೋ ನು ತೇ ಸೋ ಉದವಾ [ಉದಾಹು (ಸ್ಯಾ. ಕ.)] ಸರಿಕ್ಖೋ, ನಾಮಂ ಪರಸ್ಸತ್ತನೋ ಚಾಪಿ ಬ್ರೂಹಿ.

೧೦೯. ನ ನಾಮಗೋತ್ತಂ ಗಣ್ಹನ್ತಿ ರಾಜ, ಸಮ್ಮಗ್ಗತಾನುಜ್ಜುಗತಾನ [ಸಮಗ್ಗತಾನುಜ್ಜುಗತಾನ (ಸ್ಯಾ.), ಸಮುಗ್ಗತಾನುಜ್ಜುಗತಾನ (ಕ.)] ದೇವಾ;

ಅಹಞ್ಚ ತೇ ನಾಮಧೇಯ್ಯಂ ವದಾಮಿ, ಸಕ್ಕೋಹಮಸ್ಮೀ ತಿದಸಾನಮಿನ್ದೋ.

೧೧೦. ಯೋ ದಿಸ್ವಾ ಭಿಕ್ಖುಂ ಚರಣೂಪಪನ್ನಂ, ಪುರಕ್ಖತ್ವಾ ಪಞ್ಜಲಿಕೋ ನಮಸ್ಸತಿ;

ಪುಚ್ಛಾಮಿ ತಂ ದೇವರಾಜೇತಮತ್ಥಂ, ಇತೋ ಚುತೋ ಕಿಂ ಲಭತೇ ಸುಖಂ ಸೋ.

೧೧೧. ಯೋ ದಿಸ್ವಾ ಭಿಕ್ಖುಂ ಚರಣೂಪಪನ್ನಂ, ಪುರಕ್ಖತ್ವಾ ಪಞ್ಜಲಿಕೋ ನಮಸ್ಸತಿ;

ದಿಟ್ಠೇವ ಧಮ್ಮೇ ಲಭತೇ ಪಸಂಸಂ, ಸಗ್ಗಞ್ಚ ಸೋ ಯಾತಿ ಸರೀರಭೇದಾ.

೧೧೨. ಲಕ್ಖೀ ವತ ಮೇ ಉದಪಾದಿ ಅಜ್ಜ, ಯಂ ವಾಸವಂ ಭೂತಪತಿದ್ದಸಾಮ;

ಭಿಕ್ಖುಞ್ಚ ದಿಸ್ವಾನ ತುವಞ್ಚ ಸಕ್ಕ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ.

೧೧೩. ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ಭಿಕ್ಖುಞ್ಚ ದಿಸ್ವಾನ ಮಮಞ್ಚ ರಾಜ, ಕರೋಹಿ ಪುಞ್ಞಾನಿ ಅನಪ್ಪಕಾನಿ.

೧೧೪. ಅಕ್ಕೋಧನೋ ನಿಚ್ಚಪಸನ್ನಚಿತ್ತೋ, ಸಬ್ಬಾತಿಥೀಯಾಚಯೋಗೋ ಭವಿತ್ವಾ;

ನಿಹಚ್ಚ ಮಾನಂ ಅಭಿವಾದಯಿಸ್ಸಂ, ಸುತ್ವಾನ ದೇವಿನ್ದ ಸುಭಾಸಿತಾನೀತಿ.

ವಿಜ್ಜಾಧರ [ಧಜವಿಹೇಠಕ (ಸೀ. ಪೀ.), ಪಬ್ಬಜಿತವಿಹೇಠಕ (ಸ್ಯಾ.)] ಜಾತಕಂ ಛಟ್ಠಂ.

೩೯೨. ಸಿಙ್ಘಪುಪ್ಫಜಾತಕಂ (೬-೨-೭)

೧೧೫. ಯಮೇತಂ [ಯಮೇಕಂ (ಪೀ.)] ವಾರಿಜಂ ಪುಪ್ಫಂ, ಅದಿನ್ನಂ ಉಪಸಿಙ್ಘಸಿ;

ಏಕಙ್ಗಮೇತಂ ಥೇಯ್ಯಾನಂ, ಗನ್ಧಥೇನೋಸಿ ಮಾರಿಸ.

೧೧೬. ನ ಹರಾಮಿ ನ ಭಞ್ಜಾಮಿ, ಆರಾ ಸಿಙ್ಘಾಮಿ ವಾರಿಜಂ;

ಅಥ ಕೇನ ನು ವಣ್ಣೇನ, ಗನ್ಧಥೇನೋತಿ ವುಚ್ಚತಿ.

೧೧೭. ಯೋಯಂ ಭಿಸಾನಿ ಖಣತಿ, ಪುಣ್ಡರೀಕಾನಿ ಭಞ್ಜತಿ;

ಏವಂ ಆಕಿಣ್ಣಕಮ್ಮನ್ತೋ, ಕಸ್ಮಾ ಏಸೋ ನ ವುಚ್ಚತಿ.

೧೧೮. ಆಕಿಣ್ಣಲುದ್ದೋ ಪುರಿಸೋ, ಧಾತಿಚೇಲಂವ ಮಕ್ಖಿತೋ;

ತಸ್ಮಿಂ ಮೇ ವಚನಂ ನತ್ಥಿ, ತಞ್ಚಾರಹಾಮಿ ವತ್ತವೇ.

೧೧೯. ಅನಙ್ಗಣಸ್ಸ ಪೋಸಸ್ಸ, ನಿಚ್ಚಂ ಸುಚಿಗವೇಸಿನೋ;

ವಾಲಗ್ಗಮತ್ತಂ ಪಾಪಸ್ಸ, ಅಬ್ಭಾಮತ್ತಂವ ಖಾಯತಿ.

೧೨೦. ಅದ್ಧಾ ಮಂ ಯಕ್ಖ ಜಾನಾಸಿ, ಅಥೋ ಮಂ ಅನುಕಮ್ಪಸಿ;

ಪುನಪಿ ಯಕ್ಖ ವಜ್ಜಾಸಿ, ಯದಾ ಪಸ್ಸಸಿ ಏದಿಸಂ.

೧೨೧. ನೇವ ತಂ ಉಪಜೀವಾಮಿ, ನಪಿ ತೇ ಭತಕಾಮ್ಹಸೇ [ಭತಕಮ್ಹಸೇ (ಸೀ. ಪೀ.), ಭತಿಕಮ್ಹಸೇ (ಸ್ಯಾ.)];

ತ್ವಮೇವ ಭಿಕ್ಖು ಜಾನೇಯ್ಯ, ಯೇನ ಗಚ್ಛೇಯ್ಯ ಸುಗ್ಗತಿನ್ತಿ.

ಸಿಙ್ಘಪುಪ್ಫ [ಭಿಸಪುಪ್ಫ (ಸೀ. ಪೀ.), ಉಪಸಿಙ್ಘಪುಪ್ಫ (ಸ್ಯಾ.)] ಜಾತಕಂ ಸತ್ತಮಂ.

೩೯೩. ವಿಘಾಸಾದಜಾತಕಂ (೬-೨-೮)

೧೨೨. ಸುಸುಖಂ ವತ ಜೀವನ್ತಿ, ಯೇ ಜನಾ ವಿಘಾಸಾದಿನೋ;

ದಿಟ್ಠೇವ ಧಮ್ಮೇ ಪಾಸಂಸಾ, ಸಮ್ಪರಾಯೇ ಚ ಸುಗ್ಗತೀ.

೧೨೩. ಸುಕಸ್ಸ [ಸುವಸ್ಸ (ಸೀ. ಸ್ಯಾ. ಪೀ.)] ಭಾಸಮಾನಸ್ಸ, ನ ನಿಸಾಮೇಥ ಪಣ್ಡಿತಾ;

ಇದಂ ಸುಣಾಥ ಸೋದರಿಯಾ, ಅಮ್ಹೇವಾಯಂ ಪಸಂಸತಿ.

೧೨೪. ನಾಹಂ ತುಮ್ಹೇ ಪಸಂಸಾಮಿ, ಕುಣಪಾದಾ ಸುಣಾಥ ಮೇ;

ಉಚ್ಛಿಟ್ಠಭೋಜಿನೋ [ಭೋಜನಾ (ಕ.)] ತುಮ್ಹೇ, ನ ತುಮ್ಹೇ ವಿಘಾಸಾದಿನೋ.

೧೨೫. ಸತ್ತವಸ್ಸಾ ಪಬ್ಬಜಿತಾ, ಮೇಜ್ಝಾರಞ್ಞೇ [ಮಜ್ಝೇರಞ್ಞೇ (ಕ.)] ಸಿಖಣ್ಡಿನೋ;

ವಿಘಾಸೇನೇವ ಯಾಪೇನ್ತಾ, ಮಯಂ ಚೇ ಭೋತೋ ಗಾರಯ್ಹಾ;

ಕೇ ನು ಭೋತೋ ಪಸಂಸಿಯಾ.

೧೨೬. ತುಮ್ಹೇ ಸೀಹಾನಂ ಬ್ಯಗ್ಘಾನಂ, ವಾಳಾನಞ್ಚಾವಸಿಟ್ಠಕಂ;

ಉಚ್ಛಿಟ್ಠೇನೇವ ಯಾಪೇನ್ತಾ, ಮಞ್ಞಿವ್ಹೋ ವಿಘಾಸಾದಿನೋ.

೧೨೭. ಯೇ ಬ್ರಾಹ್ಮಣಸ್ಸ ಸಮಣಸ್ಸ, ಅಞ್ಞಸ್ಸ ವಾ [ಅಞ್ಞಸ್ಸ ಚ (ಸೀ. ಸ್ಯಾ.), ಅಞ್ಞಸ್ಸೇವ (ಪೀ.)] ವನಿಬ್ಬಿನೋ [ವಣಿಬ್ಬಿನೋ (ಸೀ. ಸ್ಯಾ.)];

ದತ್ವಾವ [ದತ್ವಾನ (ಪೀ. ಕ.)] ಸೇಸಂ ಭುಞ್ಜನ್ತಿ, ತೇ ಜನಾ ವಿಘಾಸಾದಿನೋತಿ.

ವಿಘಾಸಾದಜಾತಕಂ ಅಟ್ಠಮಂ.

೩೯೪. ವಟ್ಟಕಜಾತಕಂ (೬-೨-೯)

೧೨೮. ಪಣೀತಂ ಭುಞ್ಜಸೇ ಭತ್ತಂ, ಸಪ್ಪಿತೇಲಞ್ಚ ಮಾತುಲ;

ಅಥ ಕೇನ ನು ವಣ್ಣೇನ, ಕಿಸೋ ತ್ವಮಸಿ ವಾಯಸ.

೧೨೯. ಅಮಿತ್ತಮಜ್ಝೇ ವಸತೋ, ತೇಸು ಆಮಿಸಮೇಸತೋ;

ನಿಚ್ಚಂ ಉಬ್ಬಿಗ್ಗಹದಯಸ್ಸ, ಕುತೋ ಕಾಕಸ್ಸ ದಳ್ಹಿಯಂ.

೧೩೦. ನಿಚ್ಚಂ ಉಬ್ಬೇಗಿನೋ [ಉಬ್ಬಿಗ್ಗಿನೋ (ಸ್ಯಾ. ಕ.), ಉಬ್ಬೇಧಿನೋ (ಸೀ.)] ಕಾಕಾ, ಧಙ್ಕಾ ಪಾಪೇನ ಕಮ್ಮುನಾ;

ಲದ್ಧೋ ಪಿಣ್ಡೋ ನ ಪೀಣೇತಿ, ಕಿಸೋ ತೇನಸ್ಮಿ ವಟ್ಟಕ.

೧೩೧. ಲೂಖಾನಿ ತಿಣಬೀಜಾನಿ, ಅಪ್ಪಸ್ನೇಹಾನಿ ಭುಞ್ಜಸಿ;

ಅಥ ಕೇನ ನು ವಣ್ಣೇನ, ಥೂಲೋ ತ್ವಮಸಿ ವಟ್ಟಕ.

೧೩೨. ಅಪ್ಪಿಚ್ಛಾ ಅಪ್ಪಚಿನ್ತಾಯ, ಅದೂರಗಮನೇನ ಚ;

ಲದ್ಧಾಲದ್ಧೇನ ಯಾಪೇನ್ತೋ, ಥೂಲೋ ತೇನಸ್ಮಿ ವಾಯಸ.

೧೩೩. ಅಪ್ಪಿಚ್ಛಸ್ಸ ಹಿ ಪೋಸಸ್ಸ, ಅಪ್ಪಚಿನ್ತಸುಖಸ್ಸ [ಅಪ್ಪಚಿನ್ತಿಸುಖಸ್ಸ (ಸೀ. ಸ್ಯಾ. ಪೀ.)] ಚ;

ಸುಸಙ್ಗಹಿತಮಾನಸ್ಸ [ಸುಸಙ್ಗಹಿತಪಮಾಣಸ್ಸ (ಸೀ. ಸ್ಯಾ. ಪೀ.)], ವುತ್ತೀ ಸುಸಮುದಾನಯಾತಿ.

ವಟ್ಟಕಜಾತಕಂ ನವಮಂ.

೩೯೫. ಪಾರಾವತಜಾತಕಂ (೬-೨-೧೦)

೧೩೪. ಚಿರಸ್ಸಂ ವತ ಪಸ್ಸಾಮಿ, ಸಹಾಯಂ ಮಣಿಧಾರಿನಂ;

ಸುಕತಾ [ಸುಕತಾಯ (ಸೀ. ಪೀ.)] ಮಸ್ಸುಕುತ್ತಿಯಾ, ಸೋಭತೇ ವತ ಮೇ ಸಖಾ.

೧೩೫. ಪರೂಳ್ಹಕಚ್ಛನಖಲೋಮೋ, ಅಹಂ ಕಮ್ಮೇಸು ಬ್ಯಾವಟೋ;

ಚಿರಸ್ಸಂ ನ್ಹಾಪಿತಂ ಲದ್ಧಾ, ಲೋಮಂ ತಂ ಅಜ್ಜಂ ಹಾರಯಿಂ [ಅಪಹಾರಯಿಂ (ಸೀ. ಪೀ.)].

೧೩೬. ಯಂ ನು ಲೋಮಂ ಅಹಾರೇಸಿ, ದುಲ್ಲಭಂ ಲದ್ಧ ಕಪ್ಪಕಂ;

ಅಥ ಕಿಞ್ಚರಹಿ ತೇ ಸಮ್ಮ, ಕಣ್ಠೇ ಕಿಣಿಕಿಣಾಯತಿ [ಇದಂ ಕಣ್ಠೇ ಕಿಣಾಯತಿ (ಕ.), ಕಣ್ಠೇ ಕಿಂನಿಕಿಲಾಯತಿ (ಸ್ಯಾ.)].

೧೩೭. ಮನುಸ್ಸಸುಖುಮಾಲಾನಂ, ಮಣಿ ಕಣ್ಠೇಸು ಲಮ್ಬತಿ;

ತೇಸಾಹಂ ಅನುಸಿಕ್ಖಾಮಿ, ಮಾ ತ್ವಂ ಮಞ್ಞಿ ದವಾ ಕತಂ.

೧೩೮. ಸಚೇಪಿಮಂ ಪಿಹಯಸಿ, ಮಸ್ಸುಕುತ್ತಿಂ ಸುಕಾರಿತಂ;

ಕಾರಯಿಸ್ಸಾಮಿ ತೇ ಸಮ್ಮ, ಮಣಿಞ್ಚಾಪಿ ದದಾಮಿ ತೇ.

೧೩೯. ತ್ವಞ್ಞೇವ ಮಣಿನಾ ಛನ್ನೋ, ಸುಕತಾಯ ಚ ಮಸ್ಸುಯಾ;

ಆಮನ್ತ ಖೋ ತಂ ಗಚ್ಛಾಮಿ, ಪಿಯಂ ಮೇ ತವ ದಸ್ಸನನ್ತಿ.