೩೫೬. ಕೋರಣ್ಡಿಯಜಾತಕಂ (೫-೧-೬)

೩೪. ಏಕೋ ಅರಞ್ಞೇ ಗಿರಿಕನ್ದರಾಯಂ, ಪಗ್ಗಯ್ಹ ಪಗ್ಗಯ್ಹ ಸಿಲಂ ಪವೇಚ್ಛಸಿ [ಪವೇಜ್ಝಸಿ (ಸ್ಯಾ. ಸೀ. ಅಟ್ಠ.)];

ಪುನಪ್ಪುನಂ ಸನ್ತರಮಾನರೂಪೋ, ಕೋರಣ್ಡಿಯ [ಕಾರಣ್ಡಿಯ (ಸೀ. ಸ್ಯಾ. ಪೀ.)] ಕೋ ನು ತವ ಯಿಧತ್ಥೋ.

೩೫. ಅಹಞ್ಹಿಮಂ ಸಾಗರ ಸೇವಿತನ್ತಂ, ಸಮಂ ಕರಿಸ್ಸಾಮಿ ಯಥಾಪಿ ಪಾಣಿ;

ವಿಕಿರಿಯ ಸಾನೂನಿ ಚ ಪಬ್ಬತಾನಿ ಚ, ತಸ್ಮಾ ಸಿಲಂ ದರಿಯಾ ಪಕ್ಖಿಪಾಮಿ.

೩೬. ನಯಿಮಂ ಮಹಿಂ ಅರಹತಿ ಪಾಣಿಕಪ್ಪಂ, ಸಮಂ ಮನುಸ್ಸೋ ಕರಣಾಯ ಮೇಕೋ;

ಮಞ್ಞಾಮಿಮಞ್ಞೇವ ದರಿಂ ಜಿಗೀಸಂ [ಜಿಗಿಂಸಂ (ಸೀ. ಸ್ಯಾ. ಪೀ.)], ಕೋರಣ್ಡಿಯ ಹಾಹಸಿ [ಹಾಯಸಿ (ಸ್ಯಾ. ಕ.)] ಜೀವಲೋಕಂ.

೩೭. ಸಚೇ ಅಹಂ [ಅಯಂ (ಸೀ. ಸ್ಯಾ. ಪೀ.)] ಭೂತಧರಂ ನ ಸಕ್ಕಾ [ಸಕ್ಕೋ (ಸ್ಯಾ. ಕ.)], ಸಮಂ ಮನುಸ್ಸೋ ಕರಣಾಯ ಮೇಕೋ;

ಏವಮೇವ ತ್ವಂ ಬ್ರಹ್ಮೇ ಇಮೇ ಮನುಸ್ಸೇ, ನಾನಾದಿಟ್ಠಿಕೇ ನಾನಯಿಸ್ಸಸಿ ತೇ [ನೇ (ಕ.)].

೩೮. ಸಙ್ಖಿತ್ತರೂಪೇನ ಭವಂ ಮಮತ್ಥಂ, ಅಕ್ಖಾಸಿ ಕೋರಣ್ಡಿಯ ಏವಮೇತಂ;

ಯಥಾ ನ ಸಕ್ಕಾ ಪಥವೀ ಸಮಾಯಂ, ಕತ್ತುಂ ಮನುಸ್ಸೇನ ತಥಾ ಮನುಸ್ಸಾತಿ.

ಕೋರಣ್ಡಿಯಜಾತಕಂ ಛಟ್ಠಂ.