೩೫೧. ಮಣಿಕುಣ್ಡಲಜಾತಕಂ (೫-೧-೧)

೧. ಜೀನೋ ರಥಸ್ಸಂ ಮಣಿಕುಣ್ಡಲೇ ಚ, ಪುತ್ತೇ ಚ ದಾರೇ ಚ ತಥೇವ ಜೀನೋ;

ಸಬ್ಬೇಸು ಭೋಗೇಸು ಅಸೇಸಕೇಸು [ಅಸೇಸಿತೇಸು (ಸೀ. ಪೀ.), ಅಸೇಸಿಕೇಸು (ಕ.)], ಕಸ್ಮಾ ನ ಸನ್ತಪ್ಪಸಿ ಸೋಕಕಾಲೇ.

೨. ಪುಬ್ಬೇವ ಮಚ್ಚಂ ವಿಜಹನ್ತಿ ಭೋಗಾ, ಮಚ್ಚೋ ವಾ ತೇ [ಚ ನೇ (ಪೀ.), ಧನೇ (ಕ.)] ಪುಬ್ಬತರಂ ಜಹಾತಿ;

ಅಸಸ್ಸತಾ ಭೋಗಿನೋ ಕಾಮಕಾಮಿ, ತಸ್ಮಾ ನ ಸೋಚಾಮಹಂ ಸೋಕಕಾಲೇ.

೩. ಉದೇತಿ ಆಪೂರತಿ ವೇತಿ [ಪೂರೇತಿ ಖೀಯತಿ (ಸ್ಯಾ.)] ಚನ್ದೋ, ಅತ್ಥಂ ತಪೇತ್ವಾನ [ಅನ್ಧಂ ತಪೇತ್ವಾನ (ಕ.), ಅತ್ಥಙ್ಗಮೇತ್ವಾನ (ಸ್ಯಾ.), ಏತ್ಥ ‘‘ತಪೇತ್ವಾನ ಅತ್ಥಂ ಪಲೇತೀ’’ತಿ ಸಮ್ಬನ್ಧೋ] ಪಲೇತಿ ಸೂರಿಯೋ;

ವಿದಿತಾ [ವಿಜಿತಾ (ಸ್ಯಾ.)] ಮಯಾ ಸತ್ತುಕ ಲೋಕಧಮ್ಮಾ, ತಸ್ಮಾ ನ ಸೋಚಾಮಹಂ ಸೋಕಕಾಲೇ.

೪. ಅಲಸೋ ಗಿಹೀ ಕಾಮಭೋಗೀ ನ ಸಾಧು, ಅಸಞ್ಞತೋ ಪಬ್ಬಜಿತೋ ನ ಸಾಧು;

ರಾಜಾ ನ ಸಾಧು ಅನಿಸಮ್ಮಕಾರೀ, ಯೋ ಪಣ್ಡಿತೋ ಕೋಧನೋ ತಂ ನ ಸಾಧು.

೫. ನಿಸಮ್ಮ ಖತ್ತಿಯೋ ಕಯಿರಾ, ನಾನಿಸಮ್ಮ ದಿಸಮ್ಪತಿ;

ನಿಸಮ್ಮಕಾರಿನೋ ರಾಜ [ರಞ್ಞೋ (ಸೀ. ಸ್ಯಾ.)], ಯಸೋ ಕಿತ್ತಿ ಚ ವಡ್ಢತೀತಿ.

ಮಣಿಕುಣ್ಡಲಜಾತಕಂ ಪಠಮಂ.