೫೨೭. ಉಮ್ಮಾದನ್ತೀಜಾತಕಂ (೨)

೫೭. ‘‘ನಿವೇಸನಂ ಕಸ್ಸ ನುದಂ ಸುನನ್ದ, ಪಾಕಾರೇನ ಪಣ್ಡುಮಯೇನ ಗುತ್ತಂ;

ಕಾ ದಿಸ್ಸತಿ ಅಗ್ಗಿಸಿಖಾವ ದೂರೇ, ವೇಹಾಯಸಂ [ವೇಹಾಸಯಂ (ಸೀ. ಪೀ.)] ಪಬ್ಬತಗ್ಗೇವ ಅಚ್ಚಿ.

೫೮. ‘‘ಧೀತಾ ನ್ವಯಂ [ನಯಂ (ಸೀ. ಪೀ.), ನ್ವಾಯಂ (ಸ್ಯಾ.)] ಕಸ್ಸ ಸುನನ್ದ ಹೋತಿ, ಸುಣಿಸಾ ನ್ವಯಂ [ನಯಂ (ಸೀ. ಪೀ.), ನ್ವಾಯಂ (ಸ್ಯಾ.)] ಕಸ್ಸ ಅಥೋಪಿ ಭರಿಯಾ;

ಅಕ್ಖಾಹಿ ಮೇ ಖಿಪ್ಪಮಿಧೇವ ಪುಟ್ಠೋ, ಅವಾವಟಾ ಯದಿ ವಾ ಅತ್ಥಿ ಭತ್ತಾ’’.

೫೯. ‘‘ಅಹಞ್ಹಿ ಜಾನಾಮಿ ಜನಿನ್ದ ಏತಂ, ಮತ್ಯಾ ಚ ಪೇತ್ಯಾ ಚ ಅಥೋಪಿ ಅಸ್ಸಾ;

ತವೇವ ಸೋ ಪುರಿಸೋ ಭೂಮಿಪಾಲ, ರತ್ತಿನ್ದಿವಂ ಅಪ್ಪಮತ್ತೋ ತವತ್ಥೇ.

೬೦. ‘‘ಇದ್ಧೋ ಚ ಫೀತೋ ಚ ಸುವಡ್ಢಿತೋ [ಸುಬಾಳ್ಹಿಕೋ (ಪೀ.)] ಚ, ಅಮಚ್ಚೋ ಚ ತೇ ಅಞ್ಞತರೋ ಜನಿನ್ದ;

ತಸ್ಸೇಸಾ ಭರಿಯಾಭಿಪಾರಕಸ್ಸ [ಅಹಿಪಾರಕಸ್ಸ (ಸೀ. ಪೀ.), ಅಭಿಪಾದಕಸ್ಸ (ಕ.)], ಉಮ್ಮಾದನ್ತೀ [ಉಮ್ಮಾದನ್ತೀತಿ (ಕ.)] ನಾಮಧೇಯ್ಯೇನ ರಾಜ’’.

೬೧. ‘‘ಅಮ್ಭೋ ಅಮ್ಭೋ ನಾಮಮಿದಂ ಇಮಿಸ್ಸಾ, ಮತ್ಯಾ ಚ ಪೇತ್ಯಾ ಚ ಕತಂ ಸುಸಾಧು;

ತದಾ [ತಥಾ (ಸೀ. ಸ್ಯಾ. ಪೀ.)] ಹಿ ಮಯ್ಹಂ ಅವಲೋಕಯನ್ತೀ, ಉಮ್ಮತ್ತಕಂ ಉಮ್ಮದನ್ತೀ ಅಕಾಸಿ’’.

೬೨. ‘‘ಯಾ ಪುಣ್ಣಮಾಸೇ [ಪುಣ್ಣಮಾಯೇ (ಕ.)] ಮಿಗಮನ್ದಲೋಚನಾ, ಉಪಾವಿಸಿ ಪುಣ್ಡರೀಕತ್ತಚಙ್ಗೀ;

ದ್ವೇ ಪುಣ್ಣಮಾಯೋ ತದಹೂ ಅಮಞ್ಞಹಂ, ದಿಸ್ವಾನ ಪಾರಾವತರತ್ತವಾಸಿನಿಂ.

೬೩. ‘‘ಅಳಾರಪಮ್ಹೇಹಿ ಸುಭೇಹಿ ವಗ್ಗುಭಿ, ಪಲೋಭಯನ್ತೀ ಮಂ ಯದಾ ಉದಿಕ್ಖತಿ;

ವಿಜಮ್ಭಮಾನಾ ಹರತೇವ ಮೇ ಮನೋ, ಜಾತಾ ವನೇ ಕಿಮ್ಪುರಿಸೀವ ಪಬ್ಬತೇ.

೬೪. ‘‘ತದಾ ಹಿ ಬ್ರಹತೀ ಸಾಮಾ, ಆಮುತ್ತಮಣಿಕುಣ್ಡಲಾ;

ಏಕಚ್ಚವಸನಾ ನಾರೀ, ಮಿಗೀ ಭನ್ತಾವುದಿಕ್ಖತಿ.

೬೫. ‘‘ಕದಾಸ್ಸು ಮಂ ತಮ್ಬನಖಾ ಸುಲೋಮಾ, ಬಾಹಾಮುದೂ ಚನ್ದನಸಾರಲಿತ್ತಾ;

ವಟ್ಟಙ್ಗುಲೀ ಸನ್ನತಧೀರಕುತ್ತಿಯಾ, ನಾರೀ ಉಪಞ್ಞಿಸ್ಸತಿ ಸೀಸತೋ ಸುಭಾ.

೬೬. ‘‘ಕದಾಸ್ಸು ಮಂ ಕಞ್ಚನಜಾಲುರಚ್ಛದಾ, ಧೀತಾ ತಿರೀಟಿಸ್ಸ ವಿಲಗ್ಗಮಜ್ಝಾ;

ಮುದೂಹಿ ಬಾಹಾಹಿ ಪಲಿಸ್ಸಜಿಸ್ಸತಿ, ಬ್ರಹಾವನೇ ಜಾತದುಮಂವ ಮಾಲುವಾ.

೬೭. ‘‘ಕದಾಸ್ಸು [ಕದಾಸ್ಸು ಮಂ (ಸ್ಯಾ. ಕ.)] ಲಾಖಾರಸರತ್ತಸುಚ್ಛವೀ, ಬಿನ್ದುತ್ಥನೀ ಪುಣ್ಡರೀಕತ್ತಚಙ್ಗೀ;

ಮುಖಂ ಮುಖೇನ ಉಪನಾಮಯಿಸ್ಸತಿ, ಸೋಣ್ಡೋವ ಸೋಣ್ಡಸ್ಸ ಸುರಾಯ ಥಾಲಂ.

೬೮. ‘‘ಯದಾದ್ದಸಂ [ಯಥಾದ್ದಸಂ (ಪೀ.)] ತಂ ತಿಟ್ಠನ್ತಿಂ, ಸಬ್ಬಭದ್ದಂ [ಸಬ್ಬಗತ್ತಂ (ಸೀ. ಸ್ಯಾ. ಪೀ.)] ಮನೋರಮಂ;

ತತೋ ಸಕಸ್ಸ ಚಿತ್ತಸ್ಸ, ನಾವಬೋಧಾಮಿ ಕಞ್ಚಿನಂ [ಕಿಞ್ಚಿನಂ (ಕ.), ಕಿಞ್ಚನಂ (ಪೀ.)].

೬೯. ‘‘ಉಮ್ಮಾದನ್ತಿಮಹಂ ದಟ್ಠಾ [ದಿಟ್ಠಾ (ಸೀ. ಸ್ಯಾ. ಪೀ. ಕ.)], ಆಮುತ್ತಮಣಿಕುಣ್ಡಲಂ;

ನ ಸುಪಾಮಿ ದಿವಾರತ್ತಿಂ, ಸಹಸ್ಸಂವ ಪರಾಜಿತೋ.

೭೦. ‘‘ಸಕ್ಕೋ ಚೇ [ಚ (ಸೀ. ಪೀ.)] ಮೇ ವರಂ ದಜ್ಜಾ, ಸೋ ಚ ಲಬ್ಭೇಥ ಮೇ ವರೋ;

ಏಕರತ್ತಂ ದ್ವಿರತ್ತಂ [ದಿರತ್ತಂ (ಪೀ.)] ವಾ, ಭವೇಯ್ಯಂ ಅಭಿಪಾರಕೋ;

ಉಮ್ಮಾದನ್ತ್ಯಾ ರಮಿತ್ವಾನ, ಸಿವಿರಾಜಾ ತತೋ ಸಿಯಂ’’ [ಸಿಯಾ (ಸ್ಯಾ. ಪೀ.)].

೭೧. ‘‘ಭೂತಾನಿ ಮೇ ಭೂತಪತೀ ನಮಸ್ಸತೋ, ಆಗಮ್ಮ ಯಕ್ಖೋ ಇದಮೇತದಬ್ರವಿ;

ರಞ್ಞೋ ಮನೋ ಉಮ್ಮದನ್ತ್ಯಾ ನಿವಿಟ್ಠೋ, ದದಾಮಿ ತೇ ತಂ ಪರಿಚಾರಯಸ್ಸು’’.

೭೨. ‘‘ಪುಞ್ಞಾ ವಿಧಂಸೇ ಅಮರೋ ನ ಚಮ್ಹಿ, ಜನೋ ಚ ಮೇ ಪಾಪಮಿದಞ್ಚ [ಪಾಪಮಿದನ್ತಿ (ಸೀ. ಪೀ.)] ಜಞ್ಞಾ;

ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.

೭೩. ‘‘ಜನಿನ್ದ ನಾಞ್ಞತ್ರ ತಯಾ ಮಯಾ ವಾ, ಸಬ್ಬಾಪಿ ಕಮ್ಮಸ್ಸ ಕತಸ್ಸ ಜಞ್ಞಾ;

ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.

೭೪. ‘‘ಯೋ ಪಾಪಕಂ ಕಮ್ಮ ಕರಂ ಮನುಸ್ಸೋ, ಸೋ ಮಞ್ಞತಿ ಮಾಯಿದ [ಮಾಯಿಧ (ಕ.)] ಮಞ್ಞಿಂಸು ಅಞ್ಞೇ;

ಪಸ್ಸನ್ತಿ ಭೂತಾನಿ ಕರೋನ್ತಮೇತಂ, ಯುತ್ತಾ ಚ ಯೇ ಹೋನ್ತಿ ನರಾ ಪಥಬ್ಯಾ.

೭೫. ‘‘ಅಞ್ಞೋ ನು ತೇ ಕೋಚಿ [ಕೋಧ (ಪೀ.)] ನರೋ ಪಥಬ್ಯಾ, ಸದ್ಧೇಯ್ಯ [ಸದ್ದಹೇಯ್ಯ (ಸೀ.)] ಲೋಕಸ್ಮಿ ನ ಮೇ ಪಿಯಾತಿ;

ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.

೭೬. ‘‘ಅದ್ಧಾ ಪಿಯಾ ಮಯ್ಹ ಜನಿನ್ದ ಏಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;

ಗಚ್ಛೇವ ತ್ವಂ ಉಮ್ಮದನ್ತಿಂ ಭದನ್ತೇ, ಸೀಹೋವ ಸೇಲಸ್ಸ ಗುಹಂ ಉಪೇತಿ’’.

೭೭. ‘‘ನ ಪೀಳಿತಾ ಅತ್ತದುಖೇನ ಧೀರಾ, ಸುಖಪ್ಫಲಂ ಕಮ್ಮ ಪರಿಚ್ಚಜನ್ತಿ;

ಸಮ್ಮೋಹಿತಾ ವಾಪಿ ಸುಖೇನ ಮತ್ತಾ, ನ ಪಾಪಕಮ್ಮಞ್ಚ [ಪಾಪಕಂ ಕಮ್ಮ (ಪೀ.)] ಸಮಾಚರನ್ತಿ’’.

೭೮. ‘‘ತುವಞ್ಹಿ ಮಾತಾ ಚ ಪಿತಾ ಚ ಮಯ್ಹಂ, ಭತ್ತಾ ಪತೀ ಪೋಸಕೋ ದೇವತಾ ಚ;

ದಾಸೋ ಅಹಂ ತುಯ್ಹ ಸಪುತ್ತದಾರೋ, ಯಥಾಸುಖಂ ಸಾಮಿ [ಸಿಬ್ಬ (ಸೀ.), ಸೀವಿ (ಸ್ಯಾ.)] ಕರೋಹಿ ಕಾಮಂ’’.

೭೯. ‘‘ಯೋ ಇಸ್ಸರೋಮ್ಹೀತಿ ಕರೋತಿ ಪಾಪಂ, ಕತ್ವಾ ಚ ಸೋ ನುತ್ತಸತೇ [ನುತ್ತಪತೇ (ಪೀ.)] ಪರೇಸಂ;

ನ ತೇನ ಸೋ ಜೀವತಿ ದೀಘಮಾಯು [ದೀಘಮಾಯುಂ (ಸೀ. ಸ್ಯಾ.)], ದೇವಾಪಿ ಪಾಪೇನ ಸಮೇಕ್ಖರೇ ನಂ.

೮೦. ‘‘ಅಞ್ಞಾತಕಂ ಸಾಮಿಕೇಹೀ ಪದಿನ್ನಂ, ಧಮ್ಮೇ ಠಿತಾ ಯೇ ಪಟಿಚ್ಛನ್ತಿ ದಾನಂ;

ಪಟಿಚ್ಛಕಾ ದಾಯಕಾ ಚಾಪಿ ತತ್ಥ, ಸುಖಪ್ಫಲಞ್ಞೇವ ಕರೋನ್ತಿ ಕಮ್ಮಂ’’.

೮೧. ‘‘ಅಞ್ಞೋ ನು ತೇ ಕೋಚಿ ನರೋ ಪಥಬ್ಯಾ, ಸದ್ಧೇಯ್ಯ ಲೋಕಸ್ಮಿ ನ ಮೇ ಪಿಯಾತಿ;

ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.

೮೨. ‘‘ಅದ್ಧಾ ಪಿಯಾ ಮಯ್ಹ ಜನಿನ್ದ ಏಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;

ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.

೮೩. ‘‘ಯೋ ಅತ್ತದುಕ್ಖೇನ ಪರಸ್ಸ ದುಕ್ಖಂ, ಸುಖೇನ ವಾ ಅತ್ತಸುಖಂ ದಹಾತಿ;

ಯಥೇವಿದಂ ಮಯ್ಹ ತಥಾ ಪರೇಸಂ, ಯೋ [ಸೋ (ಪೀ.)] ಏವಂ ಜಾನಾತಿ [ಪಜಾನಾತಿ (ಕ.)] ಸ ವೇದಿ ಧಮ್ಮಂ.

೮೪. ‘‘ಅಞ್ಞೋ ನು ತೇ ಕೋಚಿ ನರೋ ಪಥಬ್ಯಾ, ಸದ್ಧೇಯ್ಯ ಲೋಕಸ್ಮಿ ನ ಮೇ ಪಿಯಾತಿ;

ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.

೮೫. ‘‘ಜನಿನ್ದ ಜಾನಾಸಿ ಪಿಯಾ ಮಮೇಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;

ಪಿಯೇನ ತೇ ದಮ್ಮಿ ಪಿಯಂ ಜನಿನ್ದ, ಪಿಯದಾಯಿನೋ ದೇವ ಪಿಯಂ ಲಭನ್ತಿ’’.

೮೬. ‘‘ಸೋ ನೂನಾಹಂ ವಧಿಸ್ಸಾಮಿ, ಅತ್ತಾನಂ ಕಾಮಹೇತುಕಂ;

ನ ಹಿ ಧಮ್ಮಂ ಅಧಮ್ಮೇನ, ಅಹಂ ವಧಿತುಮುಸ್ಸಹೇ’’.

೮೭. ‘‘ಸಚೇ ತುವಂ ಮಯ್ಹ ಸತಿಂ [ಸನ್ತಿ (ಕ.)] ಜನಿನ್ದ, ನ ಕಾಮಯಾಸಿ ನರವೀರ ಸೇಟ್ಠ;

ಚಜಾಮಿ ನಂ ಸಬ್ಬಜನಸ್ಸ ಸಿಬ್ಯಾ [ಸಿಬ್ಬ (ಸೀ. ಪೀ.), ಮಜ್ಝೇ (ಸ್ಯಾ.)], ಮಯಾ ಪಮುತ್ತಂ ತತೋ ಅವ್ಹಯೇಸಿ [ಅವ್ಹಯಾಸಿ (ಕ.)] ನಂ’’.

೮೮. ‘‘ಅದೂಸಿಯಂ ಚೇ ಅಭಿಪಾರಕ ತ್ವಂ, ಚಜಾಸಿ ಕತ್ತೇ ಅಹಿತಾಯ ತ್ಯಸ್ಸ;

ಮಹಾ ಚ ತೇ ಉಪವಾದೋಪಿ ಅಸ್ಸ, ನ ಚಾಪಿ ತ್ಯಸ್ಸ ನಗರಮ್ಹಿ ಪಕ್ಖೋ’’.

೮೯. ‘‘ಅಹಂ ಸಹಿಸ್ಸಂ ಉಪವಾದಮೇತಂ, ನಿನ್ದಂ ಪಸಂಸಂ ಗರಹಞ್ಚ ಸಬ್ಬಂ;

ಮಮೇತಮಾಗಚ್ಛತು ಭೂಮಿಪಾಲ, ಯಥಾಸುಖಂ ಸಿವಿ [ಸಿಬ್ಬ (ಸೀ. ಪೀ.)] ಕರೋಹಿ ಕಾಮಂ’’.

೯೦. ‘‘ಯೋ ನೇವ ನಿನ್ದಂ ನ ಪನಪ್ಪಸಂಸಂ, ಆದಿಯತಿ ಗರಹಂ ನೋಪಿ ಪೂಜಂ;

ಸಿರೀ ಚ ಲಕ್ಖೀ ಚ ಅಪೇತಿ ತಮ್ಹಾ, ಆಪೋ ಸುವುಟ್ಠೀವ ಯಥಾ ಥಲಮ್ಹಾ’’.

೯೧. ‘‘ಯಂ ಕಿಞ್ಚಿ ದುಕ್ಖಞ್ಚ ಸುಖಞ್ಚ ಏತ್ತೋ, ಧಮ್ಮಾತಿಸಾರಞ್ಚ ಮನೋವಿಘಾತಂ;

ಉರಸಾ ಅಹಂ ಪಚ್ಚುತ್ತರಿಸ್ಸಾಮಿ [ಪಟಿಚ್ಛಿಸ್ಸಾಮಿ (ಸೀ. ಸ್ಯಾ.), ಪಚ್ಚುಪದಿಸ್ಸಾಮಿ (ಪೀ.)] ಸಬ್ಬಂ, ಪಥವೀ ಯಥಾ ಥಾವರಾನಂ ತಸಾನಂ’’.

೯೨. ‘‘ಧಮ್ಮಾತಿಸಾರಞ್ಚ ಮನೋವಿಘಾತಂ, ದುಕ್ಖಞ್ಚ ನಿಚ್ಛಾಮಿ ಅಹಂ ಪರೇಸಂ;

ಏಕೋವಿಮಂ ಹಾರಯಿಸ್ಸಾಮಿ ಭಾರಂ, ಧಮ್ಮೇ ಠಿತೋ ಕಿಞ್ಚಿ ಅಹಾಪಯನ್ತೋ’’.

೯೩. ‘‘ಸಗ್ಗೂಪಗಂ ಪುಞ್ಞಕಮ್ಮಂ ಜನಿನ್ದ, ಮಾ ಮೇ ತುವಂ ಅನ್ತರಾಯಂ ಅಕಾಸಿ;

ದದಾಮಿ ತೇ ಉಮ್ಮದನ್ತಿಂ ಪಸನ್ನೋ, ರಾಜಾವ ಯಞ್ಞೇ ಧನಂ ಬ್ರಾಹ್ಮಣಾನಂ’’.

೯೪. ‘‘ಅದ್ಧಾ ತುವಂ ಕತ್ತೇ ಹಿತೇಸಿ ಮಯ್ಹಂ, ಸಖಾ ಮಮಂ ಉಮ್ಮದನ್ತೀ ತುವಞ್ಚ;

ನಿನ್ದೇಯ್ಯು ದೇವಾ ಪಿತರೋ ಚ ಸಬ್ಬೇ, ಪಾಪಞ್ಚ ಪಸ್ಸಂ ಅಭಿಸಮ್ಪರಾಯಂ’’.

೯೫. ‘‘ನ ಹೇತಧಮ್ಮಂ ಸಿವಿರಾಜ ವಜ್ಜುಂ, ಸನೇಗಮಾ ಜಾನಪದಾ ಚ ಸಬ್ಬೇ;

ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.

೯೬. ‘‘ಅದ್ಧಾ ತುವಂ ಕತ್ತೇ ಹಿತೇಸಿ ಮಯ್ಹಂ, ಸಖಾ ಮಮಂ ಉಮ್ಮದನ್ತೀ ತುವಞ್ಚ;

ಸತಞ್ಚ ಧಮ್ಮಾನಿ ಸುಕಿತ್ತಿತಾನಿ, ಸಮುದ್ದವೇಲಾವ ದುರಚ್ಚಯಾನಿ’’.

೯೭. ‘‘ಆಹುನೇಯ್ಯೋ ಮೇಸಿ ಹಿತಾನುಕಮ್ಪೀ, ಧಾತಾ ವಿಧಾತಾ ಚಸಿ ಕಾಮಪಾಲೋ;

ತಯೀ ಹುತಾ ರಾಜ ಮಹಪ್ಫಲಾ ಹಿ [ಮಹಪ್ಫಲಾ ಹಿ ಮೇ (ಪೀ.)], ಕಾಮೇನ ಮೇ ಉಮ್ಮದನ್ತಿಂ ಪಟಿಚ್ಛ’’.

೯೮. ‘‘ಅದ್ಧಾ ಹಿ ಸಬ್ಬಂ ಅಭಿಪಾರಕ ತ್ವಂ, ಧಮ್ಮಂ ಅಚಾರೀ ಮಮ ಕತ್ತುಪುತ್ತ;

ಅಞ್ಞೋ ನು ತೇ ಕೋ ಇಧ ಸೋತ್ಥಿಕತ್ತಾ, ದ್ವಿಪದೋ ನರೋ ಅರುಣೇ ಜೀವಲೋಕೇ’’.

೯೯. ‘‘ತುವಂ ನು ಸೇಟ್ಠೋ ತ್ವಮನುತ್ತರೋಸಿ, ತ್ವಂ ಧಮ್ಮಗೂ [ಧಮ್ಮಗುತ್ತೋ (ಸೀ.)] ಧಮ್ಮವಿದೂ ಸುಮೇಧೋ;

ಸೋ ಧಮ್ಮಗುತ್ತೋ ಚಿರಮೇವ ಜೀವ, ಧಮ್ಮಞ್ಚ ಮೇ ದೇಸಯ ಧಮ್ಮಪಾಲ’’.

೧೦೦. ‘‘ತದಿಙ್ಘ ಅಭಿಪಾರಕ, ಸುಣೋಹಿ ವಚನಂ ಮಮ;

ಧಮ್ಮಂ ತೇ ದೇಸಯಿಸ್ಸಾಮಿ, ಸತಂ ಆಸೇವಿತಂ ಅಹಂ.

೧೦೧. ‘‘ಸಾಧು ಧಮ್ಮರುಚಿ ರಾಜಾ, ಸಾಧು ಪಞ್ಞಾಣವಾ ನರೋ;

ಸಾಧು ಮಿತ್ತಾನಮದ್ದುಬ್ಭೋ, ಪಾಪಸ್ಸಾಕರಣಂ ಸುಖಂ.

೧೦೨. ‘‘ಅಕ್ಕೋಧನಸ್ಸ ವಿಜಿತೇ, ಠಿತಧಮ್ಮಸ್ಸ ರಾಜಿನೋ;

ಸುಖಂ ಮನುಸ್ಸಾ ಆಸೇಥ, ಸೀತಚ್ಛಾಯಾಯ ಸಙ್ಘರೇ.

೧೦೩. ‘‘ನ ಚಾಹಮೇತಂ ಅಭಿರೋಚಯಾಮಿ, ಕಮ್ಮಂ ಅಸಮೇಕ್ಖಕತಂ ಅಸಾಧು;

ಯೇ ವಾಪಿ ಞತ್ವಾನ ಸಯಂ ಕರೋನ್ತಿ, ಉಪಮಾ ಇಮಾ ಮಯ್ಹಂ ತುವಂ ಸುಣೋಹಿ.

೧೦೪. ‘‘ಗವಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;

ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ, ನೇತ್ತೇ ಜಿಮ್ಹಂ ಗತೇ ಸತಿ.

೧೦೫. ‘‘ಏವಮೇವ [ಏವಮೇವಂ (ಪೀ.)] ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ದುಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ.

೧೦೬. ‘‘ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.

೧೦೭. ‘‘ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.

೧೦೮. ‘‘ನ ಚಾಪಾಹಂ ಅಧಮ್ಮೇನ, ಅಮರತ್ತಮಭಿಪತ್ಥಯೇ;

ಇಮಂ ವಾ ಪಥವಿಂ ಸಬ್ಬಂ, ವಿಜೇತುಂ ಅಭಿಪಾರಕ.

೧೦೯. ‘‘ಯಞ್ಹಿ ಕಿಞ್ಚಿ ಮನುಸ್ಸೇಸು, ರತನಂ ಇಧ ವಿಜ್ಜತಿ;

ಗಾವೋ ದಾಸೋ ಹಿರಞ್ಞಞ್ಚ, ವತ್ಥಿಯಂ ಹರಿಚನ್ದನಂ.

೧೧೦. ‘‘ಅಸ್ಸಿತ್ಥಿಯೋ [ಅಸ್ಸಿತ್ಥಿಯೋ ಚ (ಸೀ.)] ರತನಂ ಮಣಿಕಞ್ಚ, ಯಞ್ಚಾಪಿ ಮೇ ಚನ್ದಸೂರಿಯಾ ಅಭಿಪಾಲಯನ್ತಿ;

ನ ತಸ್ಸ ಹೇತು ವಿಸಮಂ ಚರೇಯ್ಯಂ, ಮಜ್ಝೇ ಸಿವೀನಂ ಉಸಭೋಮ್ಹಿ ಜಾತೋ.

೧೧೧. ‘‘ನೇತಾ ಹಿತಾ [ನೇತಾಭಿ ತಾ (ಸೀ.)] ಉಗ್ಗತೋ ರಟ್ಠಪಾಲೋ, ಧಮ್ಮಂ ಸಿವೀನಂ ಅಪಚಾಯಮಾನೋ;

ಸೋ ಧಮ್ಮಮೇವಾನುವಿಚಿನ್ತಯನ್ತೋ, ತಸ್ಮಾ ಸಕೇ ಚಿತ್ತವಸೇ ನ ವತ್ತೋ’’.

೧೧೨. ‘‘ಅದ್ಧಾ ತುವಂ ಮಹಾರಾಜ, ನಿಚ್ಚಂ ಅಬ್ಯಸನಂ ಸಿವಂ;

ಕರಿಸ್ಸಸಿ ಚಿರಂ ರಜ್ಜಂ, ಪಞ್ಞಾ ಹಿ ತವ ತಾದಿಸೀ.

೧೧೩. ‘‘ಏತಂ ತೇ ಅನುಮೋದಾಮ, ಯಂ ಧಮ್ಮಂ ನಪ್ಪಮಜ್ಜಸಿ;

ಧಮ್ಮಂ ಪಮಜ್ಜ ಖತ್ತಿಯೋ, ರಟ್ಠಾ [ಠಾನಾ (ಸೀ.)] ಚವತಿ ಇಸ್ಸರೋ.

೧೧೪. ‘‘ಧಮ್ಮಂ ಚರ ಮಹಾರಾಜ, ಮಾತಾಪಿತೂಸು ಖತ್ತಿಯ;

ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.

೧೧೫. ‘‘ಧಮ್ಮಂ ಚರ ಮಹಾರಾಜ, ಪುತ್ತದಾರೇಸು ಖತ್ತಿಯ…ಪೇ….

೧೧೬. ‘‘ಧಮ್ಮಂ ಚರ ಮಹಾರಾಜ, ಮಿತ್ತಾಮಚ್ಚೇಸು ಖತ್ತಿಯ…ಪೇ….

೧೧೭. ‘‘ಧಮ್ಮಂ ಚರ ಮಹಾರಾಜ, ವಾಹನೇಸು ಬಲೇಸು ಚ…ಪೇ….

೧೧೮. ‘‘ಧಮ್ಮಂ ಚರ ಮಹಾರಾಜ, ಗಾಮೇಸು ನಿಗಮೇಸು ಚ…ಪೇ….

೧೧೯. ‘‘ಧಮ್ಮಂ ಚರ ಮಹಾರಾಜ, ರಟ್ಠೇಸು ಜನಪದೇಸು ಚ…ಪೇ….

೧೨೦. ‘‘ಧಮ್ಮಂ ಚರ ಮಹಾರಾಜ, ಸಮಣಬ್ರಾಹ್ಮಣೇಸು ಚ…ಪೇ….

೧೨೧. ‘‘ಧಮ್ಮಂ ಚರ ಮಹಾರಾಜ, ಮಿಗಪಕ್ಖೀಸು ಖತ್ತಿಯ…ಪೇ….

೧೨೨. ‘‘ಧಮ್ಮಂ ಚರ ಮಹಾರಾಜ, ಧಮ್ಮೋ ಚಿಣ್ಣೋ ಸುಖಾವಹೋ;

ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.

೧೨೩. ‘‘ಧಮ್ಮಂ ಚರ ಮಹಾರಾಜ, ಸಇನ್ದಾ ದೇವಾ ಸಬ್ರಹ್ಮಕಾ;

ಸುಚಿಣ್ಣೇನ ದಿವಂ ಪತ್ತಾ, ಮಾ ಧಮ್ಮಂ ರಾಜ ಪಾಮದೋ’’ತಿ.

ಉಮ್ಮಾದನ್ತೀಜಾತಕಂ ದುತಿಯಂ.