೫೨೮. ಮಹಾಬೋಧಿಜಾತಕಂ (೩)

೧೨೪. ‘‘ಕಿಂ ನು ದಣ್ಡಂ ಕಿಮಜಿನಂ, ಕಿಂ ಛತ್ತಂ ಕಿಮುಪಾಹನಂ;

ಕಿಮಙ್ಕುಸಞ್ಚ ಪತ್ತಞ್ಚ, ಸಙ್ಘಾಟಿಞ್ಚಾಪಿ ಬ್ರಾಹ್ಮಣ;

ತರಮಾನರೂಪೋಹಾಸಿ [ಗಣ್ಹಾಸಿ (ಸೀ. ಸ್ಯಾ. ಪೀ.)], ಕಿಂ ನು ಪತ್ಥಯಸೇ ದಿಸಂ’’.

೧೨೫. ‘‘ದ್ವಾದಸೇತಾನಿ ವಸ್ಸಾನಿ, ವುಸಿತಾನಿ ತವನ್ತಿಕೇ;

ನಾಭಿಜಾನಾಮಿ ಸೋಣೇನ, ಪಿಙ್ಗಲೇನಾಭಿಕೂಜಿತಂ.

೧೨೬. ‘‘ಸ್ವಾಯಂ ದಿತ್ತೋವ ನದತಿ, ಸುಕ್ಕದಾಠಂ ವಿದಂಸಯಂ;

ತವ ಸುತ್ವಾ ಸಭರಿಯಸ್ಸ, ವೀತಸದ್ಧಸ್ಸ ಮಂ ಪತಿ’’.

೧೨೭. ‘‘ಅಹು ಏಸ ಕತೋ ದೋಸೋ, ಯಥಾ ಭಾಸಸಿ ಬ್ರಾಹ್ಮಣ;

ಏಸ ಭಿಯ್ಯೋ ಪಸೀದಾಮಿ, ವಸ ಬ್ರಾಹ್ಮಣ ಮಾಗಮಾ’’.

೧೨೮. ‘‘ಸಬ್ಬಸೇತೋ ಪುರೇ ಆಸಿ, ತತೋಪಿ ಸಬಲೋ ಅಹು;

ಸಬ್ಬಲೋಹಿತಕೋ ದಾನಿ, ಕಾಲೋ ಪಕ್ಕಮಿತುಂ ಮಮ.

೧೨೯. ‘‘ಅಬ್ಭನ್ತರಂ ಪುರೇ ಆಸಿ, ತತೋ ಮಜ್ಝೇ ತತೋ ಬಹಿ;

ಪುರಾ ನಿದ್ಧಮನಾ ಹೋತಿ, ಸಯಮೇವ ವಜಾಮಹಂ.

೧೩೦. ‘‘ವೀತಸದ್ಧಂ ನ ಸೇವೇಯ್ಯ, ಉದಪಾನಂವನೋದಕಂ;

ಸಚೇಪಿ ನಂ ಅನುಖಣೇ, ವಾರಿ ಕದ್ದಮಗನ್ಧಿಕಂ.

೧೩೧. ‘‘ಪಸನ್ನಮೇವ ಸೇವೇಯ್ಯ, ಅಪ್ಪಸನ್ನಂ ವಿವಜ್ಜಯೇ;

ಪಸನ್ನಂ ಪಯಿರುಪಾಸೇಯ್ಯ, ರಹದಂ ವುದಕತ್ಥಿಕೋ.

೧೩೨. ‘‘ಭಜೇ ಭಜನ್ತಂ ಪುರಿಸಂ, ಅಭಜನ್ತಂ ನ ಭಜ್ಜಯೇ [ಭಾಜಯೇ (ಪೀ.)];

ಅಸಪ್ಪುರಿಸಧಮ್ಮೋ ಸೋ, ಯೋ ಭಜನ್ತಂ ನ ಭಜ್ಜತಿ [ಭಾಜತಿ (ಪೀ.)].

೧೩೩. ‘‘ಯೋ ಭಜನ್ತಂ ನ ಭಜತಿ, ಸೇವಮಾನಂ ನ ಸೇವತಿ;

ಸ ವೇ ಮನುಸ್ಸಪಾಪಿಟ್ಠೋ, ಮಿಗೋ ಸಾಖಸ್ಸಿತೋ ಯಥಾ.

೧೩೪. ‘‘ಅಚ್ಚಾಭಿಕ್ಖಣಸಂಸಗ್ಗಾ, ಅಸಮೋಸರಣೇನ ಚ;

ಏತೇನ ಮಿತ್ತಾ ಜೀರನ್ತಿ, ಅಕಾಲೇ ಯಾಚನಾಯ ಚ.

೧೩೫. ‘‘ತಸ್ಮಾ ನಾಭಿಕ್ಖಣಂ ಗಚ್ಛೇ, ನ ಚ ಗಚ್ಛೇ ಚಿರಾಚಿರಂ;

ಕಾಲೇನ ಯಾಚಂ ಯಾಚೇಯ್ಯ, ಏವಂ ಮಿತ್ತಾ ನ ಜೀಯರೇ [ಜೀರರೇ (ಸ್ಯಾ. ಪೀ.)].

೧೩೬. ‘‘ಅತಿಚಿರಂ ನಿವಾಸೇನ, ಪಿಯೋ ಭವತಿ ಅಪ್ಪಿಯೋ;

ಆಮನ್ತ ಖೋ ತಂ ಗಚ್ಛಾಮ, ಪುರಾ ತೇ ಹೋಮ ಅಪ್ಪಿಯಾ’’.

೧೩೭. ‘‘ಏವಂ ಚೇ ಯಾಚಮಾನಾನಂ, ಅಞ್ಜಲಿಂ ನಾವಬುಜ್ಝಸಿ;

ಪರಿಚಾರಕಾನಂ ಸತಂ [ಪರಿಚಾರಿಕಾನಂ ಸತ್ತಾನಂ (ಸೀ. ಸ್ಯಾ. ಪೀ.)], ವಚನಂ ನ ಕರೋಸಿ ನೋ;

ಏವಂ ತಂ ಅಭಿಯಾಚಾಮ, ಪುನ ಕಯಿರಾಸಿ ಪರಿಯಾಯಂ’’.

೧೩೮. ‘‘ಏವಂ ಚೇ ನೋ ವಿಹರತಂ, ಅನ್ತರಾಯೋ ನ ಹೇಸ್ಸತಿ;

ತುಯ್ಹಂ ವಾಪಿ [ತುಮ್ಹಞ್ಚಾಪಿ (ಸೀ.), ತುಯ್ಹಞ್ಚಾಪಿ (ಪೀ.)] ಮಹಾರಾಜ, ಮಯ್ಹಂ ವಾ [ಅಮ್ಹಂ ವಾ (ಸೀ.), ಮಯ್ಹಞ್ಚ (ಪೀ.)] ರಟ್ಠವದ್ಧನ;

ಅಪ್ಪೇವ ನಾಮ ಪಸ್ಸೇಮ, ಅಹೋರತ್ತಾನಮಚ್ಚಯೇ’’.

೧೩೯. ‘‘ಉದೀರಣಾ ಚೇ ಸಂಗತ್ಯಾ, ಭಾವಾಯ ಮನುವತ್ತತಿ;

ಅಕಾಮಾ ಅಕರಣೀಯಂ ವಾ, ಕರಣೀಯಂ ವಾಪಿ ಕುಬ್ಬತಿ;

ಆಕಾಮಾಕರಣೀಯಮ್ಹಿ, ಕ್ವಿಧ ಪಾಪೇನ ಲಿಪ್ಪತಿ [ಲಿಮ್ಪತಿ (ಸ್ಯಾ. ಕ.)].

೧೪೦. ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;

ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.

೧೪೧. ‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ [ವಿಜಾನಿಯ (ಸೀ. ಸ್ಯಾ. ಪೀ.)];

ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.

೧೪೨. ‘‘ಇಸ್ಸರೋ ಸಬ್ಬಲೋಕಸ್ಸ, ಸಚೇ ಕಪ್ಪೇತಿ ಜೀವಿತಂ;

ಇದ್ಧಿಂ [ಇದ್ಧಿ (ಪೀ. ಕ.)] ಬ್ಯಸನಭಾವಞ್ಚ, ಕಮ್ಮಂ ಕಲ್ಯಾಣಪಾಪಕಂ;

ನಿದ್ದೇಸಕಾರೀ ಪುರಿಸೋ, ಇಸ್ಸರೋ ತೇನ ಲಿಪ್ಪತಿ.

೧೪೩. ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;

ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.

೧೪೪. ‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;

ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.

೧೪೫. ‘‘ಸಚೇ ಪುಬ್ಬೇಕತಹೇತು, ಸುಖದುಕ್ಖಂ ನಿಗಚ್ಛತಿ;

ಪೋರಾಣಕಂ ಕತಂ ಪಾಪಂ, ತಮೇಸೋ ಮುಚ್ಚತೇ [ಮುಞ್ಚತೇ (ಸೀ. ಸ್ಯಾ.)] ಇಣಂ;

ಪೋರಾಣಕಇಣಮೋಕ್ಖೋ, ಕ್ವಿಧ ಪಾಪೇನ ಲಿಪ್ಪತಿ.

೧೪೬. ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;

ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.

೧೪೭. ‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;

ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.

೧೪೮. ‘‘ಚತುನ್ನಂಯೇವುಪಾದಾಯ, ರೂಪಂ ಸಮ್ಭೋತಿ ಪಾಣಿನಂ;

ಯತೋ ಚ ರೂಪಂ ಸಮ್ಭೋತಿ, ತತ್ಥೇವಾನುಪಗಚ್ಛತಿ;

ಇಧೇವ ಜೀವತಿ ಜೀವೋ, ಪೇಚ್ಚ ಪೇಚ್ಚ ವಿನಸ್ಸತಿ.

೧೪೯. ಉಚ್ಛಿಜ್ಜತಿ ಅಯಂ ಲೋಕೋ, ಯೇ ಬಾಲಾ ಯೇ ಚ ಪಣ್ಡಿತಾ;

ಉಚ್ಛಿಜ್ಜಮಾನೇ ಲೋಕಸ್ಮಿಂ, ಕ್ವಿಧ ಪಾಪೇನ ಲಿಪ್ಪತಿ.

೧೫೦. ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;

ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.

೧೫೧. ‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;

ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.

೧೫೨. ‘‘ಆಹು ಖತ್ತವಿದಾ [ಖತ್ತವಿಧಾ (ಸೀ. ಸ್ಯಾ. ಪೀ.)] ಲೋಕೇ, ಬಾಲಾ ಪಣ್ಡಿತಮಾನಿನೋ.

ಮಾತರಂ ಪಿತರಂ ಹಞ್ಞೇ, ಅಥೋ ಜೇಟ್ಠಮ್ಪಿ ಭಾತರಂ;

ಹನೇಯ್ಯ ಪುತ್ತ [ಪುತ್ತೇ ಚ (ಪೀ.)] ದಾರೇ ಚ, ಅತ್ಥೋ ಚೇ ತಾದಿಸೋ ಸಿಯಾ.

೧೫೩. ‘‘ಯಸ್ಸ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;

ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ [ಮಿತ್ತದೂಭೀ (ಪೀ.)] ಹಿ ಪಾಪಕೋ.

೧೫೪. ‘‘ಅಥ ಅತ್ಥೇ ಸಮುಪ್ಪನ್ನೇ, ಸಮೂಲಮಪಿ ಅಬ್ಬಹೇ [ಅಬ್ಭಹೇ (ಸ್ಯಾ. ಕ.)];

ಅತ್ಥೋ ಮೇ ಸಮ್ಬಲೇನಾಪಿ, ಸುಹತೋ ವಾನರೋ ಮಯಾ.

೧೫೫. [ಅಯಂ ಗಾಥಾ ಸೀಹಳಪೋತ್ಥಕೇ ನತ್ಥಿ] ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;

ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ [ಅಯಂ ಗಾಥಾ ಸೀಹಳಪೋತ್ಥಕೇ ನತ್ಥಿ].

೧೫೬. ‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;

ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ.

೧೫೭. ‘‘ಅಹೇತುವಾದೋ ಪುರಿಸೋ, ಯೋ ಚ ಇಸ್ಸರಕುತ್ತಿಕೋ;

ಪುಬ್ಬೇಕತೀ ಚ ಉಚ್ಛೇದೀ, ಯೋ ಚ ಖತ್ತವಿದೋ ನರೋ.

೧೫೮. ‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;

ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;

ಅಸಪ್ಪುರಿಸಸಂಸಗ್ಗೋ, ದುಕ್ಖನ್ತೋ [ದುಕ್ಕಟೋ (ಸೀ.)] ಕಟುಕುದ್ರಯೋ.

೧೫೯. ‘‘ಉರಬ್ಭರೂಪೇನ ವಕಸ್ಸು [ಬಕಾಸು (ಸೀ. ಸ್ಯಾ.), ವಕಾಸು (ಪೀ.)] ಪುಬ್ಬೇ, ಅಸಂಕಿತೋ ಅಜಯೂಥಂ ಉಪೇತಿ;

ಹನ್ತ್ವಾ ಉರಣಿಂ ಅಜಿಕಂ [ಅಜಿಯಂ (ಸೀ. ಸ್ಯಾ. ಪೀ.)] ಅಜಞ್ಚ, ಉತ್ರಾಸಯಿತ್ವಾ [ಚಿತ್ರಾಸಯಿತ್ವಾ (ಸೀ. ಪೀ.)] ಯೇನ ಕಾಮಂ ಪಲೇತಿ.

೧೬೦. ‘‘ತಥಾವಿಧೇಕೇ ಸಮಣಬ್ರಾಹ್ಮಣಾಸೇ, ಛದನಂ ಕತ್ವಾ ವಞ್ಚಯನ್ತಿ ಮನುಸ್ಸೇ;

ಅನಾಸಕಾ ಥಣ್ಡಿಲಸೇಯ್ಯಕಾ ಚ, ರಜೋಜಲ್ಲಂ ಉಕ್ಕುಟಿಕಪ್ಪಧಾನಂ;

ಪರಿಯಾಯಭತ್ತಞ್ಚ ಅಪಾನಕತ್ತಾ, ಪಾಪಾಚಾರಾ ಅರಹನ್ತೋ ವದಾನಾ.

೧೬೧. ‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;

ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;

ಅಸಪ್ಪುರಿಸಸಂಸಗ್ಗೋ, ದುಕ್ಖನ್ತೋ ಕಟುಕುದ್ರಯೋ.

೧೬೨. ‘‘ಯಮಾಹು ನತ್ಥಿ ವೀರಿಯನ್ತಿ, ಅಹೇತುಞ್ಚ ಪವದನ್ತಿ [ಹೇತುಞ್ಚ ಅಪವದನ್ತಿ (ಸೀ. ಸ್ಯಾ. ಪೀ.)] ಯೇ;

ಪರಕಾರಂ ಅತ್ತಕಾರಞ್ಚ, ಯೇ ತುಚ್ಛಂ ಸಮವಣ್ಣಯುಂ.

೧೬೩. ‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;

ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;

ಅಸಪ್ಪುರಿಸಸಂಸಗ್ಗೋ, ದುಕ್ಖನ್ತೋ ಕಟುಕುದ್ರಯೋ.

೧೬೪. ‘‘ಸಚೇ ಹಿ ವೀರಿಯಂ ನಾಸ್ಸ, ಕಮ್ಮಂ ಕಲ್ಯಾಣಪಾಪಕಂ;

ನ ಭರೇ ವಡ್ಢಕಿಂ ರಾಜಾ, ನಪಿ ಯನ್ತಾನಿ ಕಾರಯೇ.

೧೬೫. ‘‘ಯಸ್ಮಾ ಚ ವೀರಿಯಂ ಅತ್ಥಿ, ಕಮ್ಮಂ ಕಲ್ಯಾಣಪಾಪಕಂ;

ತಸ್ಮಾ ಯನ್ತಾನಿ ಕಾರೇತಿ, ರಾಜಾ ಭರತಿ ವಡ್ಢಕಿಂ.

೧೬೬. ‘‘ಯದಿ ವಸ್ಸಸತಂ ದೇವೋ, ನ ವಸ್ಸೇ ನ ಹಿಮಂ ಪತೇ;

ಉಚ್ಛಿಜ್ಜೇಯ್ಯ ಅಯಂ ಲೋಕೋ, ವಿನಸ್ಸೇಯ್ಯ ಅಯಂ ಪಜಾ.

೧೬೭. ‘‘ಯಸ್ಮಾ ಚ ವಸ್ಸತೀ ದೇವೋ, ಹಿಮಞ್ಚಾನುಫುಸಾಯತಿ;

ತಸ್ಮಾ ಸಸ್ಸಾನಿ ಪಚ್ಚನ್ತಿ, ರಟ್ಠಞ್ಚ ಪಾಲಿತೇ [ಪಲ್ಲತೇ (ಸೀ. ಪೀ.), ಪೋಲಯತೇ (ಸ್ಯಾ.)] ಚಿರಂ.

೧೬೮. ‘‘ಗವಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;

ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ, ನೇತ್ತೇ ಜಿಮ್ಹಂ [ಜಿಮ್ಹ (ಪೀ.)] ಗತೇ ಸತಿ.

೧೬೯. ‘‘ಏವಮೇವ [ಏವಮೇವಂ (ಪೀ.)] ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ದುಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ.

೧೭೦. ‘‘ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ [ಉಜೂ (ಪೀ.)] ಗತೇ ಸತಿ.

೧೭೧. ‘‘ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ [ಚೇವ (ಸೀ.), ಚೇಪಿ (ಕ.)] ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.

೧೭೨. ‘‘ಮಹಾರುಕ್ಖಸ್ಸ ಫಲಿನೋ, ಆಮಂ ಛಿನ್ದತಿ ಯೋ ಫಲಂ;

ರಸಞ್ಚಸ್ಸ ನ ಜಾನಾತಿ, ಬೀಜಞ್ಚಸ್ಸ ವಿನಸ್ಸತಿ.

೧೭೩. ‘‘ಮಹಾರುಕ್ಖೂಪಮಂ ರಟ್ಠಂ, ಅಧಮ್ಮೇನ ಪಸಾಸತಿ;

ರಸಞ್ಚಸ್ಸ ನ ಜಾನಾತಿ, ರಟ್ಠಞ್ಚಸ್ಸ ವಿನಸ್ಸತಿ.

೧೭೪. ‘‘ಮಹಾರುಕ್ಖಸ್ಸ ಫಲಿನೋ, ಪಕ್ಕಂ ಛಿನ್ದತಿ ಯೋ ಫಲಂ;

ರಸಞ್ಚಸ್ಸ ವಿಜಾನಾತಿ, ಬೀಜಞ್ಚಸ್ಸ ನ ನಸ್ಸತಿ.

೧೭೫. ‘‘ಮಹಾರುಕ್ಖೂಪಮಂ ರಟ್ಠಂ, ಧಮ್ಮೇನ ಯೋ ಪಸಾಸತಿ;

ರಸಞ್ಚಸ್ಸ ವಿಜಾನಾತಿ, ರಟ್ಠಞ್ಚಸ್ಸ ನ ನಸ್ಸತಿ.

೧೭೬. ‘‘ಯೋ ಚ ರಾಜಾ ಜನಪದಂ, ಅಧಮ್ಮೇನ ಪಸಾಸತಿ;

ಸಬ್ಬೋಸಧೀಹಿ ಸೋ ರಾಜಾ, ವಿರುದ್ಧೋ ಹೋತಿ ಖತ್ತಿಯೋ.

೧೭೭. ‘‘ತಥೇವ ನೇಗಮೇ ಹಿಂಸಂ, ಯೇ ಯುತ್ತಾ ಕಯವಿಕ್ಕಯೇ;

ಓಜದಾನಬಲೀಕಾರೇ, ಸ ಕೋಸೇನ ವಿರುಜ್ಝತಿ.

೧೭೮. ‘‘ಪಹಾರವರಖೇತ್ತಞ್ಞೂ, ಸಙ್ಗಾಮೇ ಕತನಿಸ್ಸಮೇ [ಕತನಿಯಮೇ (ಕ.)];

ಉಸ್ಸಿತೇ ಹಿಂಸಯಂ ರಾಜಾ, ಸ ಬಲೇನ ವಿರುಜ್ಝತಿ.

೧೭೯. ‘‘ತಥೇವ ಇಸಯೋ ಹಿಂಸಂ, ಸಞ್ಞತೇ [ಸಂಯಮೇ (ಸ್ಯಾ. ಕ.)] ಬ್ರಹ್ಮಚಾರಿಯೋ [ಬ್ರಹ್ಮಚಾರಿನೋ (ಸೀ.)];

ಅಧಮ್ಮಚಾರೀ ಖತ್ತಿಯೋ, ಸೋ ಸಗ್ಗೇನ ವಿರುಜ್ಝತಿ.

೧೮೦. ‘‘ಯೋ ಚ ರಾಜಾ ಅಧಮ್ಮಟ್ಠೋ, ಭರಿಯಂ ಹನ್ತಿ ಅದೂಸಿಕಂ;

ಲುದ್ದಂ ಪಸವತೇ ಠಾನಂ [ಪಾಪಂ (ಸೀ.)], ಪುತ್ತೇಹಿ ಚ ವಿರುಜ್ಝತಿ.

೧೮೧. ‘‘ಧಮ್ಮಂ ಚರೇ ಜಾನಪದೇ, ನೇಗಮೇಸು [ನಿಗಮೇಸು (ಸೀ.)] ಬಲೇಸು ಚ;

ಇಸಯೋ ಚ ನ ಹಿಂಸೇಯ್ಯ, ಪುತ್ತದಾರೇ ಸಮಂ ಚರೇ.

೧೮೨. ‘‘ಸ ತಾದಿಸೋ ಭೂಮಿಪತಿ, ರಟ್ಠಪಾಲೋ ಅಕೋಧನೋ;

ಸಪತ್ತೇ [ಸಾಮನ್ತೇ (ಸೀ. ಸ್ಯಾ. ಪೀ.)] ಸಮ್ಪಕಮ್ಪೇತಿ, ಇನ್ದೋವ ಅಸುರಾಧಿಪೋ’’ತಿ.

ಮಹಾಬೋಧಿಜಾತಕಂ ತತಿಯಂ.

ಪಣ್ಣಾಸನಿಪಾತಂ ನಿಟ್ಠಿತಂ.