೫೨೪. ಸಙ್ಖಪಾಲಜಾತಕಂ (೪)

೧೪೩. ‘‘ಅರಿಯಾವಕಾಸೋಸಿ ಪಸನ್ನನೇತ್ತೋ, ಮಞ್ಞೇ ಭವಂ ಪಬ್ಬಜಿತೋ ಕುಲಮ್ಹಾ;

ಕಥಂ ನು ವಿತ್ತಾನಿ ಪಹಾಯ ಭೋಗೇ, ಪಬ್ಬಜಿ ನಿಕ್ಖಮ್ಮ ಘರಾ ಸಪಞ್ಞ’’ [ಸಪಞ್ಞೋ (ಸ್ಯಾ.), ಸಪಞ್ಞಾ (ಪೀ.)].

೧೪೪. ‘‘ಸಯಂ ವಿಮಾನಂ ನರದೇವ ದಿಸ್ವಾ, ಮಹಾನುಭಾವಸ್ಸ ಮಹೋರಗಸ್ಸ;

ದಿಸ್ವಾನ ಪುಞ್ಞಾನ ಮಹಾವಿಪಾಕಂ, ಸದ್ಧಾಯಹಂ ಪಬ್ಬಜಿತೋಮ್ಹಿ ರಾಜ’’.

೧೪೫. ‘‘ನ ಕಾಮಕಾಮಾ ನ ಭಯಾ ನ ದೋಸಾ, ವಾಚಂ ಮುಸಾ ಪಬ್ಬಜಿತಾ ಭಣನ್ತಿ;

ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಸುತ್ವಾನ ಮೇ ಜಾಯಿಹಿತಿಪ್ಪಸಾದೋ’’.

೧೪೬. ‘‘ವಾಣಿಜ್ಜ [ವಣಿಜ್ಜ (ಪೀ.)] ರಟ್ಠಾಧಿಪ ಗಚ್ಛಮಾನೋ, ಪಥೇ ಅದ್ದಸಾಸಿಮ್ಹಿ ಭೋಜಪುತ್ತೇ [ಮಿಲಾಚಪುತ್ತೇ (ಸೀ. ಪೀ.)];

ಪವದ್ಧಕಾಯಂ ಉರಗಂ ಮಹನ್ತಂ, ಆದಾಯ ಗಚ್ಛನ್ತೇ ಪಮೋದಮಾನೇ’’.

೧೪೭. ‘‘ಸೋಹಂ ಸಮಾಗಮ್ಮ ಜನಿನ್ದ ತೇಹಿ, ಪಹಟ್ಠಲೋಮೋ ಅವಚಮ್ಹಿ ಭೀತೋ;

ಕುಹಿಂ ಅಯಂ ನೀಯತಿ [ನಿಯ್ಯತಿ (ಕ.)] ಭೀಮಕಾಯೋ, ನಾಗೇನ ಕಿಂ ಕಾಹಥ ಭೋಜಪುತ್ತಾ.

೧೪೮. ‘‘ನಾಗೋ ಅಯಂ ನೀಯತಿ ಭೋಜನತ್ಥಾ [ಭೋಜನತ್ಥಂ (ಸೀ. ಸ್ಯಾ. ಪೀ.)], ಪವದ್ಧಕಾಯೋ ಉರಗೋ ಮಹನ್ತೋ;

ಸಾದುಞ್ಚ ಥೂಲಞ್ಚ ಮುದುಞ್ಚ ಮಂಸಂ, ನ ತ್ವಂ ರಸಞ್ಞಾಸಿ ವಿದೇಹಪುತ್ತ.

೧೪೯. ‘‘ಇತೋ ಮಯಂ ಗನ್ತ್ವಾ ಸಕಂ ನಿಕೇತಂ [ನಿಕೇತನಂ (ಪೀ.)], ಆದಾಯ ಸತ್ಥಾನಿ ವಿಕೋಪಯಿತ್ವಾ;

ಮಂಸಾನಿ ಭೋಕ್ಖಾಮ [ಭಕ್ಖಾಮ (ಸ್ಯಾ.)] ಪಮೋದಮಾನಾ, ಮಯಞ್ಹಿ ವೇ ಸತ್ತವೋ ಪನ್ನಗಾನಂ.

೧೫೦. ‘‘ಸಚೇ ಅಯಂ ನೀಯತಿ ಭೋಜನತ್ಥಾ, ಪವದ್ಧಕಾಯೋ ಉರಗೋ ಮಹನ್ತೋ;

ದದಾಮಿ ವೋ ಬಲಿಬದ್ದಾನಿ [ಬಲಿವದ್ದಾನಿ (ಪೀ.)] ಸೋಳಸ, ನಾಗಂ ಇಮಂ ಮುಞ್ಚಥ ಬನ್ಧನಸ್ಮಾ.

೧೫೧. ‘‘ಅದ್ಧಾ ಹಿ ನೋ ಭಕ್ಖೋ ಅಯಂ ಮನಾಪೋ, ಬಹೂ ಚ ನೋ ಉರಗಾ ಭುತ್ತಪುಬ್ಬಾ [ಬಹುಂ ಚ ನೋ ಉರಗೋ ಭುತ್ತಪುಬ್ಬೋ (ಕ.)];

ಕರೋಮ ತೇ ತಂ ವಚನಂ ಅಳಾರ [ಆಳಾರ (ಕ.) ಏವಮುಪರಿಪಿ], ಮಿತ್ತಞ್ಚ ನೋ ಹೋಹಿ ವಿದೇಹಪುತ್ತ.

೧೫೨. ‘‘ತದಸ್ಸು ತೇ ಬನ್ಧನಾ ಮೋಚಯಿಂಸು, ಯಂ ನತ್ಥುತೋ ಪಟಿಮೋಕ್ಕಸ್ಸ ಪಾಸೇ;

ಮುತ್ತೋ ಚ ಸೋ ಬನ್ಧನಾ ನಾಗರಾಜಾ, ಪಕ್ಕಾಮಿ ಪಾಚೀನಮುಖೋ ಮುಹುತ್ತಂ.

೧೫೩. ‘‘ಗನ್ತ್ವಾನ ಪಾಚೀನಮುಖೋ ಮುಹುತ್ತಂ, ಪುಣ್ಣೇಹಿ ನೇತ್ತೇಹಿ ಪಲೋಕಯೀ ಮಂ;

ತದಾಸ್ಸಹಂ ಪಿಟ್ಠಿತೋ ಅನ್ವಗಚ್ಛಿಂ, ದಸಙ್ಗುಲಿಂ ಅಞ್ಜಲಿಂ ಪಗ್ಗಹೇತ್ವಾ.

೧೫೪. ‘‘ಗಚ್ಛೇವ ಖೋ ತ್ವಂ ತರಮಾನರೂಪೋ, ಮಾ ತಂ ಅಮಿತ್ತಾ ಪುನರಗ್ಗಹೇಸುಂ;

ದುಕ್ಖೋ ಹಿ ಲುದ್ದೇಹಿ ಪುನಾ ಸಮಾಗಮೋ, ಅದಸ್ಸನಂ ಭೋಜಪುತ್ತಾನ ಗಚ್ಛ.

೧೫೫. ‘‘ಅಗಮಾಸಿ ಸೋ ರಹದಂ ವಿಪ್ಪಸನ್ನಂ, ನೀಲೋಭಾಸಂ ರಮಣೀಯಂ ಸುತಿತ್ಥಂ;

ಸಮೋತತಂ [ಸಮೋನತಂ (ಸ್ಯಾ. ಕ.)] ಜಮ್ಬುಹಿ ವೇತಸಾಹಿ, ಪಾವೇಕ್ಖಿ ನಿತ್ತಿಣ್ಣಭಯೋ ಪತೀತೋ.

೧೫೬. ‘‘ಸೋ ತಂ ಪವಿಸ್ಸ ನ ಚಿರಸ್ಸ ನಾಗೋ, ದಿಬ್ಬೇನ ಮೇ ಪಾತುರಹುಂ ಜನಿನ್ದ;

ಉಪಟ್ಠಹೀ ಮಂ ಪಿತರಂವ ಪುತ್ತೋ, ಹದಯಙ್ಗಮಂ ಕಣ್ಣಸುಖಂ ಭಣನ್ತೋ.

೧೫೭. ‘‘ತ್ವಂ ಮೇಸಿ ಮಾತಾ ಚ ಪಿತಾ [ಪಿತಾ ಚ (ಪೀ.)] ಅಳಾರ, ಅಬ್ಭನ್ತರೋ ಪಾಣದದೋ ಸಹಾಯೋ;

ಸಕಞ್ಚ ಇದ್ಧಿಂ ಪಟಿಲಾಭಕೋಸ್ಮಿ [ಪಟಿಲಾಭಿತೋಸ್ಮಿ (ಪೀ.)], ಅಳಾರ ಪಸ್ಸ ಮೇ ನಿವೇಸನಾನಿ;

ಪಹೂತಭಕ್ಖಂ ಬಹುಅನ್ನಪಾನಂ, ಮಸಕ್ಕಸಾರಂ ವಿಯ ವಾಸವಸ್ಸ’’.

೧೫೮. ‘‘ತಂ ಭೂಮಿಭಾಗೇಹಿ ಉಪೇತರೂಪಂ, ಅಸಕ್ಖರಾ ಚೇವ ಮುದೂ ಸುಭಾ ಚ;

ನೀಚತ್ತಿಣಾ [ನೀಚಾ ತಿಣಾ (ಸ್ಯಾ. ಪೀ.)] ಅಪ್ಪರಜಾ ಚ ಭೂಮಿ, ಪಾಸಾದಿಕಾ ಯತ್ಥ ಜಹನ್ತಿ ಸೋಕಂ.

೧೫೯. ‘‘ಅನಾವಕುಲಾ ವೇಳುರಿಯೂಪನೀಲಾ, ಚತುದ್ದಿಸಂ ಅಮ್ಬವನಂ ಸುರಮ್ಮಂ;

ಪಕ್ಕಾ ಚ ಪೇಸೀ ಚ ಫಲಾ ಸುಫುಲ್ಲಾ, ನಿಚ್ಚೋತುಕಾ ಧಾರಯನ್ತೀ ಫಲಾನಿ.

೧೬೦. ‘‘ತೇಸಂ ವನಾನಂ ನರದೇವ ಮಜ್ಝೇ, ನಿವೇಸನಂ ಭಸ್ಸರಸನ್ನಿಕಾಸಂ;

ರಜತಗ್ಗಳಂ ಸೋವಣ್ಣಮಯಂ ಉಳಾರಂ, ಓಭಾಸತೀ ವಿಜ್ಜುರಿವನ್ತಲಿಕ್ಖೇ.

೧೬೧. ‘‘ಮಣೀಮಯಾ ಸೋಣ್ಣಮಯಾ [ಸೋವಣ್ಣಮಯಾ (ಸೀ. ಸ್ಯಾ. ಪೀ.)] ಉಳಾರಾ, ಅನೇಕಚಿತ್ತಾ ಸತತಂ ಸುನಿಮ್ಮಿತಾ;

ಪರಿಪೂರಾ ಕಞ್ಞಾಹಿ ಅಲಙ್ಕತಾಭಿ, ಸುವಣ್ಣಕಾಯೂರಧರಾಹಿ ರಾಜ.

೧೬೨. ‘‘ಸೋ ಸಙ್ಖಪಾಲೋ ತರಮಾನರೂಪೋ, ಪಾಸಾದಮಾರುಯ್ಹ ಅನೋಮವಣ್ಣೋ;

ಸಹಸ್ಸಥಮ್ಭಂ ಅತುಲಾನುಭಾವಂ, ಯತ್ಥಸ್ಸ ಭರಿಯಾ ಮಹೇಸೀ ಅಹೋಸಿ.

೧೬೩. ‘‘ಏಕಾ ಚ ನಾರೀ ತರಮಾನರೂಪಾ, ಆದಾಯ ವೇಳುರಿಯಮಯಂ ಮಹಗ್ಘಂ;

ಸುಭಂ ಮಣಿಂ ಜಾತಿಮನ್ತೂಪಪನ್ನಂ, ಅಚೋದಿತಾ ಆಸನಮಬ್ಭಿಹಾಸಿ.

೧೬೪. ‘‘ತತೋ ಮಂ ಉರಗೋ ಹತ್ಥೇ ಗಹೇತ್ವಾ, ನಿಸೀದಯೀ ಪಾಮುಖಆಸನಸ್ಮಿಂ;

ಇದಮಾಸನಂ ಅತ್ರ ಭವಂ ನಿಸೀದತು, ಭವಞ್ಹಿ ಮೇ ಅಞ್ಞತರೋ ಗರೂನಂ.

೧೬೫. ‘‘ಅಞ್ಞಾ ಚ ನಾರೀ ತರಮಾನರೂಪಾ, ಆದಾಯ ವಾರಿಂ ಉಪಸಙ್ಕಮಿತ್ವಾ;

ಪಾದಾನಿ ಪಕ್ಖಾಲಯೀ ಮೇ ಜನಿನ್ದ, ಭರಿಯಾವ [ಭರಿಯಾ ಚ (ಪೀ.)] ಭತ್ತೂ ಪತಿನೋ ಪಿಯಸ್ಸ.

೧೬೬. ‘‘ಅಪರಾ ಚ ನಾರೀ ತರಮಾನರೂಪಾ, ಪಗ್ಗಯ್ಹ ಸೋವಣ್ಣಮಯಾಯ [ಸೋವಣ್ಣಮಯಾ (ಪೀ.)] ಪಾತಿಯಾ;

ಅನೇಕಸೂಪಂ ವಿವಿಧಂ ವಿಯಞ್ಜನಂ, ಉಪನಾಮಯೀ ಭತ್ತ ಮನುಞ್ಞರೂಪಂ.

೧೬೭. ‘‘ತುರಿಯೇಹಿ [ತೂರಿಯೇಹಿ (ಕ.)] ಮಂ ಭಾರತ ಭುತ್ತವನ್ತಂ, ಉಪಟ್ಠಹುಂ ಭತ್ತು ಮನೋ ವಿದಿತ್ವಾ;

ತತುತ್ತರಿಂ [ತದುತ್ತರಿಂ (ಕ.)] ಮಂ ನಿಪತೀ ಮಹನ್ತಂ, ದಿಬ್ಬೇಹಿ ಕಾಮೇಹಿ ಅನಪ್ಪಕೇಹಿ.

೧೬೮. ‘‘ಭರಿಯಾ ಮಮೇತಾ ತಿಸತಾ ಅಳಾರ, ಸಬ್ಬತ್ತಮಜ್ಝಾ ಪದುಮುತ್ತರಾಭಾ;

ಅಳಾರ ಏತಾಸ್ಸು ತೇ ಕಾಮಕಾರಾ, ದದಾಮಿ ತೇ ತಾ ಪರಿಚಾರಯಸ್ಸು.

೧೬೯. ‘‘ಸಂವಚ್ಛರಂ ದಿಬ್ಬರಸಾನುಭುತ್ವಾ, ತದಾಸ್ಸುಹಂ [ತದಸ್ಸಹಂ (ಪೀ.)] ಉತ್ತರಿಮಜ್ಝಭಾಸಿಂ [ಉತ್ತರಿ ಪಚ್ಚಭಾಸಿಂ (ಸೀ. ಸ್ಯಾ.), ಉತ್ತರಿಂ ಪಚ್ಚಭಾಸಿಂ (ಪೀ.)];

ನಾಗಸ್ಸಿದಂ ಕಿನ್ತಿ ಕಥಞ್ಚ ಲದ್ಧಂ, ಕಥಜ್ಝಗಮಾಸಿ ವಿಮಾನಸೇಟ್ಠಂ’’.

೧೭೦. ‘‘ಅಧಿಚ್ಚ ಲದ್ಧಂ ಪರಿಣಾಮಜಂ ತೇ, ಸಯಂಕತಂ ಉದಾಹು ದೇವೇಹಿ ದಿನ್ನಂ;

ಪುಚ್ಛಾಮಿ ತಂ [ತೇ (ಪೀ.)] ನಾಗರಾಜೇತಮತ್ಥಂ, ಕಥಜ್ಝಗಮಾಸಿ ವಿಮಾನಸೇಟ್ಠಂ’’.

೧೭೧. ‘‘ನಾಧಿಚ್ಚ ಲದ್ಧಂ ನ ಪರಿಣಾಮಜಂ ಮೇ, ನ ಸಯಂಕತಂ ನಾಪಿ ದೇವೇಹಿ ದಿನ್ನಂ;

ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನಂ’’.

೧೭೨. ‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ಅಕ್ಖಾಹಿ ಮೇ ನಾಗರಾಜೇತಮತ್ಥಂ, ಕಥಂ ನು ತೇ ಲದ್ಧಮಿದಂ ವಿಮಾನಂ’’.

೧೭೩. ‘‘ರಾಜಾ ಅಹೋಸಿಂ ಮಗಧಾನಮಿಸ್ಸರೋ, ದುಯ್ಯೋಧನೋ ನಾಮ ಮಹಾನುಭಾವೋ;

ಸೋ ಇತ್ತರಂ ಜೀವಿತಂ ಸಂವಿದಿತ್ವಾ, ಅಸಸ್ಸತಂ ವಿಪರಿಣಾಮಧಮ್ಮಂ.

೧೭೪. ‘‘ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ [ಅದಾಸಿ (ಪೀ.)];

ಓಪಾನಭೂತಂ ಮೇ ಘರಂ ತದಾಸಿ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ.

೧೭೫. [ಅಯಂ ಗಾಥಾ ಪೀ. ಪೋತ್ಥಕೇ ನತ್ಥಿ] ‘‘ಮಾಲಞ್ಚ ಗನ್ಧಞ್ಚ ವಿಲೇಪನಞ್ಚ, ಪದೀಪಿಯಂ [ಪದೀಪಯಂ (ಸ್ಯಾ. ಕ.)] ಯಾನಮುಪಸ್ಸಯಞ್ಚ;

ಅಚ್ಛಾದನಂ ಸೇಯ್ಯಮಥನ್ನಪಾನಂ, ಸಕ್ಕಚ್ಚ ದಾನಾನಿ ಅದಮ್ಹ ತತ್ಥ [ಅಯಂ ಗಾಥಾ ಪೀ. ಪೋತ್ಥಕೇ ನತ್ಥಿ].

೧೭೬. ‘‘ತಂ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ತೇನೇವ ಮೇ ಲದ್ಧಮಿದಂ ವಿಮಾನಂ, ಪಹೂತಭಕ್ಖಂ ಬಹುಅನ್ನಪಾನಂ’’;

‘‘ನಚ್ಚೇಹಿ ಗೀತೇಹಿ ಚುಪೇತರೂಪಂ, ಚಿರಟ್ಠಿತಿಕಂ ನ ಚ ಸಸ್ಸತಾಯಂ.

೧೭೭. ‘‘ಅಪ್ಪಾನುಭಾವಾ ತಂ ಮಹಾನುಭಾವಂ, ತೇಜಸ್ಸಿನಂ ಹನ್ತಿ ಅತೇಜವನ್ತೋ;

ಕಿಮೇವ ದಾಠಾವುಧ ಕಿಂ ಪಟಿಚ್ಚ, ಹತ್ಥತ್ತ [ಹತ್ಥತ್ಥ (ಸೀ. ಸ್ಯಾ. ಪೀ.)] ಮಾಗಚ್ಛಿ ವನಿಬ್ಬಕಾನಂ [ವಣಿಬ್ಬಕಾನಂ (ಸೀ.)].

೧೭೮. ‘‘ಭಯಂ ನು ತೇ ಅನ್ವಗತಂ ಮಹನ್ತಂ, ತೇಜೋ ನು ತೇ ನಾನ್ವಗಂ ದನ್ತಮೂಲಂ;

ಕಿಮೇವ ದಾಠಾವುಧ ಕಿಂ ಪಟಿಚ್ಚ, ಕಿಲೇಸಮಾಪಜ್ಜಿ ವನಿಬ್ಬಕಾನಂ’’.

೧೭೯. ‘‘ನ ಮೇ ಭಯಂ ಅನ್ವಗತಂ ಮಹನ್ತಂ, ತೇಜೋ ನ ಸಕ್ಕಾ ಮಮ ತೇಹಿ ಹನ್ತುಂ [ತೇಭಿಹನ್ತುಂ (ಸ್ಯಾ. ಕ.)];

ಸತಞ್ಚ ಧಮ್ಮಾನಿ ಸುಕಿತ್ತಿತಾನಿ, ಸಮುದ್ದವೇಲಾವ ದುರಚ್ಚಯಾನಿ.

೧೮೦. ‘‘ಚಾತುದ್ದಸಿಂ ಪಞ್ಚದಸಿಂ ಅಳಾರ, ಉಪೋಸಥಂ ನಿಚ್ಚಮುಪಾವಸಾಮಿ;

ಅಥಾಗಮುಂ ಸೋಳಸ ಭೋಜಪುತ್ತಾ, ರಜ್ಜುಂ ಗಹೇತ್ವಾನ ದಳ್ಹಞ್ಚ ಪಾಸಂ.

೧೮೧. ‘‘ಭೇತ್ವಾನ ನಾಸಂ ಅತಿಕಸ್ಸ [ಅನ್ತಕಸ್ಸ (ಕ.)] ರಜ್ಜುಂ, ನಯಿಂಸು ಮಂ ಸಮ್ಪರಿಗಯ್ಹ ಲುದ್ದಾ;

ಏತಾದಿಸಂ ದುಕ್ಖಮಹಂ ತಿತಿಕ್ಖಂ [ತಿತಿಕ್ಖಿಂ (ಪೀ.)], ಉಪೋಸಥಂ ಅಪ್ಪಟಿಕೋಪಯನ್ತೋ’’.

೧೮೨. ‘‘ಏಕಾಯನೇ ತಂ ಪಥೇ ಅದ್ದಸಂಸು, ಬಲೇನ ವಣ್ಣೇನ ಚುಪೇತರೂಪಂ;

ಸಿರಿಯಾ ಪಞ್ಞಾಯ ಚ ಭಾವಿತೋಸಿ, ಕಿಂ ಪತ್ಥಯಂ [ಕಿಮತ್ಥಿಯಂ (ಸೀ. ಸ್ಯಾ. ಪೀ.)] ನಾಗ ತಪೋ ಕರೋಸಿ.

೧೮೩. ‘‘ನ ಪುತ್ತಹೇತೂ ನ ಧನಸ್ಸ ಹೇತು, ನ ಆಯುನೋ ಚಾಪಿ ಅಳಾರ ಹೇತು;

ಮನುಸ್ಸಯೋನಿಂ ಅಭಿಪತ್ಥಯಾನೋ, ತಸ್ಮಾ ಪರಕ್ಕಮ್ಮ ತಪೋ ಕರೋಮಿ’’.

೧೮೪. ‘‘ತ್ವಂ ಲೋಹಿತಕ್ಖೋ ವಿಹತನ್ತರಂಸೋ, ಅಲಙ್ಕತೋ ಕಪ್ಪಿತಕೇಸಮಸ್ಸು;

ಸುರೋಸಿತೋ ಲೋಹಿತಚನ್ದನೇನ, ಗನ್ಧಬ್ಬರಾಜಾವ ದಿಸಾ ಪಭಾಸಸಿ [ಪಭಾಸಿ (ಕ.)].

೧೮೫. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ, ಸಬ್ಬೇಹಿ ಕಾಮೇಹಿ ಸಮಙ್ಗಿಭೂತೋ;

ಪುಚ್ಛಾಮಿ ತಂ ನಾಗರಾಜೇತಮತ್ಥಂ, ಸೇಯ್ಯೋ ಇತೋ ಕೇನ ಮನುಸ್ಸಲೋಕೋ’’.

೧೮೬. ‘‘ಅಳಾರ ನಾಞ್ಞತ್ರ ಮನುಸ್ಸಲೋಕಾ, ಸುದ್ಧೀ ವ ಸಂವಿಜ್ಜತಿ ಸಂಯಮೋ ವಾ;

ಅಹಞ್ಚ ಲದ್ಧಾನ ಮನುಸ್ಸಯೋನಿಂ, ಕಾಹಾಮಿ ಜಾತಿಮರಣಸ್ಸ ಅನ್ತಂ’’.

೧೮೭. ‘‘ಸಂವಚ್ಛರೋ ಮೇ ವಸತೋ [ವುಸಿತೋ (ಪೀ.)] ತವನ್ತಿಕೇ, ಅನ್ನೇನ ಪಾನೇನ ಉಪಟ್ಠಿತೋಸ್ಮಿ;

ಆಮನ್ತಯಿತ್ವಾನ ಪಲೇಮಿ ನಾಗ, ಚಿರಪ್ಪವುಟ್ಠೋಸ್ಮಿ [ಚಿರಪ್ಪವುತ್ಥೋ ಅಸ್ಮಿ (ಪೀ.)] ಅಹಂ ಜನಿನ್ದ’’.

೧೮೮. ‘‘ಪುತ್ತಾ ಚ ದಾರಾ ಅನುಜೀವಿನೋ ಚ [ಚ’ನುಜೀವಿನೋ (ಸ್ಯಾ. ಪೀ.)], ನಿಚ್ಚಾನುಸಿಟ್ಠಾ ಉಪತಿಟ್ಠತೇ ತಂ;

ಕಚ್ಚಿನ್ನು ತಂ ನಾಭಿಸಪಿತ್ಥ [ನಾಭಿಸಂಸಿತ್ಥ (ಸ್ಯಾ. ಪೀ.)] ಕೋಚಿ, ಪಿಯಞ್ಹಿ ಮೇ ದಸ್ಸನಂ ತುಯ್ಹಂ [ತುಯ್ಹ (ಪೀ.)] ಅಳಾರ’’.

೧೮೯. ‘‘ಯಥಾಪಿ ಮಾತೂ ಚ ಪಿತೂ ಅಗಾರೇ, ಪುತ್ತೋ ಪಿಯೋ ಪಟಿವಿಹಿತೋ ವಸೇಯ್ಯ [ಸೇಯ್ಯೋ (ಪೀ.)];

ತತೋಪಿ ಮಯ್ಹಂ ಇಧಮೇವ ಸೇಯ್ಯೋ, ಚಿತ್ತಞ್ಹಿ ತೇ ನಾಗ ಮಯೀ ಪಸನ್ನಂ’’.

೧೯೦. ‘‘ಮಣೀ ಮಮಂ ವಿಜ್ಜತಿ ಲೋಹಿತಙ್ಕೋ [ಲೋಹಿತಙ್ಗೋ (ಕ.)], ಧನಾಹರೋ ಮಣಿರತನಂ ಉಳಾರಂ;

ಆದಾಯ ತ್ವಂ [ತಂ (ಪೀ.)] ಗಚ್ಛ ಸಕಂ ನಿಕೇತಂ, ಲದ್ಧಾ ಧನಂ ತಂ ಮಣಿಮೋಸ್ಸಜಸ್ಸು’’.

೧೯೧. ‘‘ದಿಟ್ಠಾ ಮಯಾ ಮಾನುಸಕಾಪಿ ಕಾಮಾ, ಅಸಸ್ಸತಾ ವಿಪರಿಣಾಮಧಮ್ಮಾ;

ಆದೀನವಂ ಕಾಮಗುಣೇಸು ದಿಸ್ವಾ, ಸದ್ಧಾಯಹಂ ಪಬ್ಬಜಿತೋಮ್ಹಿ ರಾಜ.

೧೯೨. ‘‘ದುಮಪ್ಫಲಾನೀವ ಪತನ್ತಿ ಮಾಣವಾ, ದಹರಾ ಚ ವುದ್ಧಾ ಚ ಸರೀರಭೇದಾ;

ಏತಮ್ಪಿ ದಿಸ್ವಾ ಪಬ್ಬಜಿತೋಮ್ಹಿ ರಾಜ, ಅಪಣ್ಣಕಂ ಸಾಮಞ್ಞಮೇವ ಸೇಯ್ಯೋ’’.

೧೯೩. ‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾಗಞ್ಚ ಸುತ್ವಾನ ತವಞ್ಚಳಾರ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ’’.

೧೯೪. ‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾಗಞ್ಚ ಸುತ್ವಾನ ಮಮಞ್ಚ ರಾಜ, ಕರೋಹಿ ಪುಞ್ಞಾನಿ ಅನಪ್ಪಕಾನೀ’’ತಿ.

ಸಙ್ಖಪಾಲಜಾತಕಂ ಚತುತ್ಥಂ.