೫೨೫. ಚೂಳಸುತಸೋಮಜಾತಕಂ (೫)

೧೯೫. ‘‘ಆಮನ್ತಯಾಮಿ ನಿಗಮಂ, ಮಿತ್ತಾಮಚ್ಚೇ ಪರಿಸ್ಸಜೇ [ಪಾರಿಸಜ್ಜೇ (ಸೀ. ಸ್ಯಾ.)];

ಸಿರಸ್ಮಿಂ ಪಲಿತಂ ಜಾತಂ, ಪಬ್ಬಜ್ಜಂ ದಾನಿ ರೋಚಹಂ’’.

೧೯೬. ‘‘ಅಭುಮ್ಮೇ ಕಥಂ ನು ಭಣಸಿ, ಸಲ್ಲಂ ಮೇ ದೇವ ಉರಸಿ ಕಪ್ಪೇಸಿ [ಕಮ್ಪೇಸಿ (ಪೀ.)];

ಸತ್ತಸತಾ ತೇ ಭರಿಯಾ, ಕಥಂ ನು ತೇ ತಾ ಭವಿಸ್ಸನ್ತಿ’’.

೧೯೭. ‘‘ಪಞ್ಞಾಯಿಹಿನ್ತಿ ಏತಾ, ದಹರಾ ಅಞ್ಞಮ್ಪಿ ತಾ ಗಮಿಸ್ಸನ್ತಿ;

ಸಗ್ಗಞ್ಚಸ್ಸ ಪತ್ಥಯಾನೋ, ತೇನ ಅಹಂ ಪಬ್ಬಜಿಸ್ಸಾಮಿ’’.

೧೯೮. ‘‘ದುಲ್ಲದ್ಧಂ ಮೇ ಆಸಿ ಸುತಸೋಮ, ಯಸ್ಸ ತೇ ಹೋಮಹಂ ಮಾತಾ;

ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ.

೧೯೯. ‘‘ದುಲ್ಲದ್ಧಂ ಮೇ ಆಸಿ ಸುತಸೋಮ, ಯಂ ತಂ ಅಹಂ ವಿಜಾಯಿಸ್ಸಂ;

ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ’’.

೨೦೦. ‘‘ಕೋ ನಾಮೇಸೋ ಧಮ್ಮೋ, ಸುತಸೋಮ ಕಾ ಚ ನಾಮ ಪಬ್ಬಜ್ಜಾ;

ಯಂ ನೋ ಅಮ್ಹೇ ಜಿಣ್ಣೇ, ಅನಪೇಕ್ಖೋ ಪಬ್ಬಜಸಿ ದೇವ.

೨೦೧. ‘‘ಪುತ್ತಾಪಿ ತುಯ್ಹಂ ಬಹವೋ, ದಹರಾ ಅಪ್ಪತ್ತಯೋಬ್ಬನಾ;

ಮಞ್ಜೂ ತೇಪಿ [ತೇ (ಸೀ. ಪೀ.)] ತಂ ಅಪಸ್ಸನ್ತಾ, ಮಞ್ಞೇ ದುಕ್ಖಂ ನಿಗಚ್ಛನ್ತಿ’’.

೨೦೨. ‘‘ಪುತ್ತೇಹಿ ಚ ಮೇ ಏತೇಹಿ, ದಹರೇಹಿ ಅಪ್ಪತ್ತಯೋಬ್ಬನೇಹಿ;

ಮಞ್ಜೂಹಿ ಸಬ್ಬೇಹಿಪಿ ತುಮ್ಹೇಹಿ, ಚಿರಮ್ಪಿ ಠತ್ವಾ ವಿನಾಸಭಾವೋ’’ [ವಿನಾಭಾವೋ (ಸೀ. ಸ್ಯಾ. ಪೀ.)].

೨೦೩. ‘‘ಛಿನ್ನಂ ನು ತುಯ್ಹಂ ಹದಯಂ, ಅದು ತೇ [ಆದು (ಸೀ. ಪೀ.), ಆದೂ (ಸ್ಯಾ.)] ಕರುಣಾ ಚ ನತ್ಥಿ ಅಮ್ಹೇಸು;

ಯಂ ನೋ ವಿಕನ್ದನ್ತಿಯೋ [ವಿಕ್ಕನ್ದನ್ತಿಯೋ (ಸೀ.)], ಅನಪೇಕ್ಖೋ ಪಬ್ಬಜಸಿ ದೇವ’’.

೨೦೪. ‘‘ನ ಚ ಮಯ್ಹಂ ಛಿನ್ನಂ ಹದಯಂ, ಅತ್ಥಿ ಕರುಣಾಪಿ ಮಯ್ಹಂ ತುಮ್ಹೇಸು;

ಸಗ್ಗಞ್ಚ ಪತ್ಥಯಾನೋ, ತೇನ ಅಹಂ [ತೇನಾಹಂ (ಸೀ. ಸ್ಯಾ.), ತೇನಮಹಂ (ಪೀ.)] ಪಬ್ಬಜಿಸ್ಸಾಮಿ’’.

೨೦೫. ‘‘ದುಲ್ಲದ್ಧಂ ಮೇ ಆಸಿ, ಸುತಸೋಮ ಯಸ್ಸ ತೇ ಅಹಂ ಭರಿಯಾ;

ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ.

೨೦೬. ‘‘ದುಲ್ಲದ್ಧಂ ಮೇ ಆಸಿ, ಸುತಸೋಮ ಯಸ್ಸ ತೇ ಅಹಂ ಭರಿಯಾ;

ಯಂ ಮೇ ಕುಚ್ಛಿಪಟಿಸನ್ಧಿಂ [ಮಂ ಕುಚ್ಛಿಮತಿಂ ಸನ್ತಿಂ (ಪೀ.)], ಅನಪೇಕ್ಖೋ ಪಬ್ಬಜಸಿ ದೇವ.

೨೦೭. ‘‘ಪರಿಪಕ್ಕೋ ಮೇ ಗಬ್ಭೋ, ಕುಚ್ಛಿಗತೋ ಯಾವ ನಂ ವಿಜಾಯಾಮಿ;

ಮಾಹಂ ಏಕಾ ವಿಧವಾ, ಪಚ್ಛಾ ದುಕ್ಖಾನಿ ಅದ್ದಕ್ಖಿಂ’’.

೨೦೮. ‘‘ಪರಿಪಕ್ಕೋ ತೇ ಗಬ್ಭೋ, ಕುಚ್ಛಿಗತೋ ಇಙ್ಘ ತ್ವಂ [ತ್ವ (ಸೀ.), ನಂ (ಪೀ.)] ವಿಜಾಯಸ್ಸು;

ಪುತ್ತಂ ಅನೋಮವಣ್ಣಂ, ತಂ ಹಿತ್ವಾ ಪಬ್ಬಜಿಸ್ಸಾಮಿ’’.

೨೦೯. ‘‘ಮಾ ತ್ವಂ ಚನ್ದೇ ರುದಿ, ಮಾ ಸೋಚಿ ವನತಿಮಿರಮತ್ತಕ್ಖಿ;

ಆರೋಹ ವರಪಾಸಾದಂ [ಚ ಪಾಸಾದಂ (ಪೀ.)], ಅನಪೇಕ್ಖೋ ಅಹಂ ಗಮಿಸ್ಸಾಮಿ’’.

೨೧೦. ‘‘ಕೋ ತಂ ಅಮ್ಮ ಕೋಪೇಸಿ, ಕಿಂ ರೋದಸಿ ಪೇಕ್ಖಸಿ ಚ ಮಂ ಬಾಳ್ಹಂ;

ಕಂ ಅವಜ್ಝಂ ಘಾತೇಮಿ [ಘಾತೇಮಿ ಕಂ ಅವಜ್ಝಂ (ಪೀ.), ತಂ ಅವಜ್ಝಂ ಘಾತೇಮಿ (ಕ.)], ಞಾತೀನಂ ಉದಿಕ್ಖಮಾನಾನಂ’’.

೨೧೧. ‘‘ನ ಹಿ ಸೋ ಸಕ್ಕಾ ಹನ್ತುಂ, ವಿಜಿತಾವೀ [ಜೀವಿತಾವೀ (ಪೀ.)] ಯೋ ಮಂ ತಾತ ಕೋಪೇಸಿ;

ಪಿತಾ ತೇ ಮಂ ತಾತ ಅವಚ, ಅನಪೇಕ್ಖೋ ಅಹಂ ಗಮಿಸ್ಸಾಮಿ’’.

೨೧೨. ‘‘ಯೋಹಂ ಪುಬ್ಬೇ ನಿಯ್ಯಾಮಿ, ಉಯ್ಯಾನಂ ಮತ್ತಕುಞ್ಜರೇ ಚ ಯೋಧೇಮಿ;

ಸುತಸೋಮೇ ಪಬ್ಬಜಿತೇ, ಕಥಂ ನು ದಾನಿ ಕರಿಸ್ಸಾಮಿ’’.

೨೧೩. ‘‘ಮಾತುಚ್ಚ [ಮಾತು ಚ (ಸೀ. ಸ್ಯಾ.)] ಮೇ ರುದನ್ತ್ಯಾ [ರುದತ್ಯಾ (ಪೀ.)], ಜೇಟ್ಠಸ್ಸ ಚ ಭಾತುನೋ ಅಕಾಮಸ್ಸ;

ಹತ್ಥೇಪಿ ತೇ ಗಹೇಸ್ಸಂ, ನ ಹಿ ಗಚ್ಛಸಿ [ಗಞ್ಛಿಸಿ (ಪೀ.)] ನೋ ಅಕಾಮಾನಂ’’.

೨೧೪. ‘‘ಉಟ್ಠೇಹಿ ತ್ವಂ ಧಾತಿ, ಇಮಂ ಕುಮಾರಂ ರಮೇಹಿ ಅಞ್ಞತ್ಥ;

ಮಾ ಮೇ ಪರಿಪನ್ಥಮಕಾಸಿ [ಮಕಾ (ಸೀ. ಪೀ.)], ಸಗ್ಗಂ ಮಮ ಪತ್ಥಯಾನಸ್ಸ’’.

೨೧೫. ‘‘ಯಂ ನೂನಿಮಂ ದದೇಯ್ಯಂ [ಜಹೇಯ್ಯಂ (ಪೀ.)] ಪಭಙ್ಕರಂ, ಕೋ ನು ಮೇ ಇಮಿನಾತ್ಥೋ [ಕೋ ನು ಮೇ ಇಮಿನಾ ಅತ್ಥೋ (ಸೀ. ಸ್ಯಾ.), ಕೋ ನು ಮೇ ನತ್ಥೋ (ಪೀ.)];

ಸುತಸೋಮೇ ಪಬ್ಬಜಿತೇ, ಕಿಂ ನು ಮೇನಂ ಕರಿಸ್ಸಾಮಿ’’.

೨೧೬. ‘‘ಕೋಸೋ ಚ ತುಯ್ಹಂ ವಿಪುಲೋ, ಕೋಟ್ಠಾಗಾರಞ್ಚ ತುಯ್ಹಂ ಪರಿಪೂರಂ;

ಪಥವೀ ಚ ತುಯ್ಹಂ ವಿಜಿತಾ, ರಮಸ್ಸು ಮಾ ಪಬ್ಬಜಿ [ಪಬ್ಬಜಸ್ಸು (ಸೀ.), ಪಬ್ಬಜ (ಪೀ.)] ದೇವ’’.

೨೧೭. ‘‘ಕೋಸೋ ಚ ಮಯ್ಹಂ ವಿಪುಲೋ, ಕೋಟ್ಠಾಗಾರಞ್ಚ ಮಯ್ಹಂ ಪರಿಪೂರಂ;

ಪಥವೀ ಚ ಮಯ್ಹಂ ವಿಜಿತಾ, ತಂ ಹಿತ್ವಾ ಪಬ್ಬಜಿಸ್ಸಾಮಿ’’.

೨೧೮. ‘‘ಮಯ್ಹಮ್ಪಿ ಧನಂ ಪಹೂತಂ, ಸಙ್ಖಾತುಂ [ಸಙ್ಖ್ಯಾತುಂ (ಸೀ.)] ನೋಪಿ ದೇವ ಸಕ್ಕೋಮಿ;

ತಂ ತೇ ದದಾಮಿ ಸಬ್ಬಮ್ಪಿ [ತಂ ದೇವ ತೇ ದದಾಮಿ ಸಬ್ಬಮ್ಪಿ (ಸೀ.), ತಂ ತೇ ದದಾಮಿ ಸಬ್ಬಂ (ಪೀ.)], ರಮಸ್ಸು ಮಾ ಪಬ್ಬಜಿ ದೇವ’’.

೨೧೯. ‘‘ಜಾನಾಮಿ [ಜಾನಾಮಿ ತೇ (ಸೀ. ಸ್ಯಾ.)] ಧನಂ ಪಹೂತಂ, ಕುಲವದ್ಧನ ಪೂಜಿತೋ ತಯಾ ಚಸ್ಮಿ;

ಸಗ್ಗಞ್ಚ ಪತ್ಥಯಾನೋ, ತೇನ ಅಹಂ ಪಬ್ಬಜಿಸ್ಸಾಮಿ’’.

೨೨೦. ‘‘ಉಕ್ಕಣ್ಠಿತೋಸ್ಮಿ ಬಾಳ್ಹಂ, ಅರತಿ ಮಂ ಸೋಮದತ್ತ ಆವಿಸತಿ [ಆವೀಸತಿ (ಕ.)];

ಬಹುಕಾಪಿ [ಬಹುಕಾ ಹಿ (ಸೀ. ಸ್ಯಾ.)] ಮೇ ಅನ್ತರಾಯಾ, ಅಜ್ಜೇವಾಹಂ ಪಬ್ಬಜಿಸ್ಸಾಮಿ’’.

೨೨೧. ‘‘ಇದಞ್ಚ ತುಯ್ಹಂ ರುಚಿತಂ, ಸುತಸೋಮ ಅಜ್ಜೇವ ದಾನಿ ತ್ವಂ ಪಬ್ಬಜ;

ಅಹಮ್ಪಿ ಪಬ್ಬಜಿಸ್ಸಾಮಿ, ನ ಉಸ್ಸಹೇ ತಯಾ ವಿನಾ ಅಹಂ ಠಾತುಂ’’.

೨೨೨. ‘‘ನ ಹಿ ಸಕ್ಕಾ ಪಬ್ಬಜಿತುಂ, ನಗರೇ ನ ಹಿ ಪಚ್ಚತಿ ಜನಪದೇ ಚ’’;

‘‘ಸುತಸೋಮೇ ಪಬ್ಬಜಿತೇ, ಕಥಂ ನು ದಾನಿ ಕರಿಸ್ಸಾಮ’’.

೨೨೩. ‘‘ಉಪನೀಯತಿದಂ ಮಞ್ಞೇ, ಪರಿತ್ತಂ ಉದಕಂವ ಚಙ್ಕವಾರಮ್ಹಿ;

ಏವಂ ಸುಪರಿತ್ತಕೇ ಜೀವಿತೇ, ನ ಚ ಪಮಜ್ಜಿತುಂ ಕಾಲೋ.

೨೨೪. ‘‘ಉಪನೀಯತಿದಂ ಮಞ್ಞೇ, ಪರಿತ್ತಂ ಉದಕಂವ ಚಙ್ಕವಾರಮ್ಹಿ;

ಏವಂ ಸುಪರಿತ್ತಕೇ ಜೀವಿತೇ, ಅನ್ಧಬಾಲಾ [ಅಥ ಬಾಲಾ (ಸೀ. ಸ್ಯಾ. ಪೀ.)] ಪಮಜ್ಜನ್ತಿ.

೨೨೫. ‘‘ತೇ ವಡ್ಢಯನ್ತಿ ನಿರಯಂ, ತಿರಚ್ಛಾನಯೋನಿಞ್ಚ ಪೇತ್ತಿವಿಸಯಞ್ಚ;

ತಣ್ಹಾಯ ಬನ್ಧನಬದ್ಧಾ, ವಡ್ಢೇನ್ತಿ ಅಸುರಕಾಯಂ’’.

೨೨೬. ‘‘ಊಹಞ್ಞತೇ ರಜಗ್ಗಂ, ಅವಿದೂರೇ ಪುಬ್ಬಕಮ್ಹಿ ಚ [ಪುಪ್ಫಕಮ್ಹಿ ಚ (ಸೀ. ಪೀ.)] ಪಾಸಾದೇ;

ಮಞ್ಞೇ ನೋ ಕೇಸಾ ಛಿನ್ನಾ, ಯಸಸ್ಸಿನೋ ಧಮ್ಮರಾಜಸ್ಸ’’.

೨೨೭. ‘‘ಅಯಮಸ್ಸ ಪಾಸಾದೋ, ಸೋವಣ್ಣ [ಸೋವಣ್ಣೋ (ಪೀ.)] ಪುಪ್ಫಮಾಲ್ಯವೀತಿಕಿಣ್ಣೋ;

ಯಹಿ [ಯಮ್ಹಿ (ಪೀ.)] ಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೨೮. ‘‘ಅಯಮಸ್ಸ ಪಾಸಾದೋ, ಸೋವಣ್ಣಪುಪ್ಫಮಾಲ್ಯವೀತಿಕಿಣ್ಣೋ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೨೯. ‘‘ಇದಮಸ್ಸ ಕೂಟಾಗಾರಂ, ಸೋವಣ್ಣಪುಪ್ಫಮಾಲ್ಯವೀತಿಕಿಣ್ಣಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೩೦. ‘‘ಇದಮಸ್ಸ ಕೂಟಾಗಾರಂ, ಸೋವಣ್ಣ [ಸೋವಣ್ಣಂ (ಪೀ.)] ಪುಪ್ಫಮಾಲ್ಯವೀತಿಕಿಣ್ಣಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೩೧. ‘‘ಅಯಮಸ್ಸ ಅಸೋಕವನಿಕಾ, ಸುಪುಪ್ಫಿತಾ ಸಬ್ಬಕಾಲಿಕಾ ರಮ್ಮಾ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೩೨. ‘‘ಅಯಮಸ್ಸ ಅಸೋಕವನಿಕಾ, ಸುಪುಪ್ಫಿತಾ ಸಬ್ಬಕಾಲಿಕಾ ರಮ್ಮಾ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೩೩. ‘‘ಇದಮಸ್ಸ ಉಯ್ಯಾನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೩೪. ‘‘ಇದಮಸ್ಸ ಉಯ್ಯಾನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೩೫. ‘‘ಇದಮಸ್ಸ ಕಣಿಕಾರವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೩೬. ‘‘ಇದಮಸ್ಸ ಕಣಿಕಾರವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೩೭. ‘‘ಇದಮಸ್ಸ ಪಾಟಲಿವನಂ [ಪಾಟಲೀವನಂ (ಸೀ.)], ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೩೮. ‘‘ಇದಮಸ್ಸ ಪಾಟಲಿವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೩೯. ‘‘ಇದಮಸ್ಸ ಅಮ್ಬವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೪೦. ‘‘ಇದಮಸ್ಸ ಅಮ್ಬವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.

೨೪೧. ‘‘ಅಯಮಸ್ಸ ಪೋಕ್ಖರಣೀ, ಸಞ್ಛನ್ನಾ ಅಣ್ಡಜೇಹಿ ವೀತಿಕಿಣ್ಣಾ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.

೨೪೨. ‘‘ಅಯಮಸ್ಸ ಪೋಕ್ಖರಣೀ, ಸಞ್ಛನ್ನಾ ಅಣ್ಡಜೇಹಿ ವೀತಿಕಿಣ್ಣಾ;

ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ’’.

೨೪೩. ‘‘ರಾಜಾ ವೋ ಖೋ [ರಾಜಾ ಖೋ (ಸೀ. ಸ್ಯಾ. ಪೀ.)] ಪಬ್ಬಜಿತೋ, ಸುತಸೋಮೋ ರಜ್ಜಂ ಇಮಂ ಪಹತ್ವಾನ [ಪಹನ್ತ್ವಾನ (ಸ್ಯಾ. ಕ.)];

ಕಾಸಾಯವತ್ಥವಸನೋ, ನಾಗೋವ ಏಕಕೋ [ಏಕಕೋವ (ಸೀ.)] ಚರತಿ’’.

೨೪೪. ‘‘ಮಾಸ್ಸು ಪುಬ್ಬೇ ರತಿಕೀಳಿತಾನಿ, ಹಸಿತಾನಿ ಚ ಅನುಸ್ಸರಿತ್ಥ [ಅನುಸ್ಸರಿತ್ಥೋ (ಪೀ.)];

ಮಾ ವೋ ಕಾಮಾ ಹನಿಂಸು, ರಮ್ಮಂ ಹಿ [ಸುರಮ್ಮಞ್ಹಿ (ಸ್ಯಾ. ಕ.)] ಸುದಸ್ಸನಂ [ಸುದಸ್ಸನಂ ನಾಮ (ಸೀ.)] ನಗರಂ.

೨೪೫. ‘‘ಮೇತ್ತಚಿತ್ತಞ್ಚ [ಮೇತ್ತಞ್ಚ (ಪೀ.)] ಭಾವೇಥ, ಅಪ್ಪಮಾಣಂ ದಿವಾ ಚ ರತ್ತೋ ಚ;

ಅಗಚ್ಛಿತ್ಥ [ಅಥ ಗಞ್ಛಿತ್ಥ (ಸೀ. ಸ್ಯಾ. ಪೀ.)] ದೇವಪುರ, ಆವಾಸಂ ಪುಞ್ಞಕಮ್ಮಿನ’’ನ್ತಿ [ಪುಞ್ಞಕಮ್ಮಾನನ್ತಿ (ಪೀ.)].

ಚೂಳಸುತಸೋಮಜಾತಕಂ ಪಞ್ಚಮಂ.

ಚತ್ತಾಲೀಸನಿಪಾತಂ ನಿಟ್ಠಿತಂ.