೫೨೩. ಅಲಮ್ಬುಸಾಜಾತಕಂ (೩)

೯೫. ‘‘ಅಥ ಬ್ರವಿ ಬ್ರಹಾ ಇನ್ದೋ, ವತ್ರಭೂ ಜಯತಂ ಪಿತಾ;

ದೇವಕಞ್ಞಂ ಪರಾಭೇತ್ವಾ, ಸುಧಮ್ಮಾಯಂ ಅಲಮ್ಬುಸಂ.

೯೬. ‘‘ಮಿಸ್ಸೇ ದೇವಾ ತಂ ಯಾಚನ್ತಿ, ತಾವತಿಂಸಾ ಸಇನ್ದಕಾ;

ಇಸಿಪ್ಪಲೋಭನೇ [ಇಸಿಪಲೋಭಿಕೇ (ಸೀ. ಸ್ಯಾ.), ಇಸಿಂ ಪಲೋಭಿಕೇ (ಪೀ.)] ಗಚ್ಛ, ಇಸಿಸಿಙ್ಗಂ ಅಲಮ್ಬುಸೇ.

೯೭. ‘‘ಪುರಾಯಂ ಅಮ್ಹೇ ಅಚ್ಚೇತಿ [ನಾಚ್ಚೇತಿ (ಸ್ಯಾ. ಕ.)], ವತ್ತವಾ [ವತವಾ (ಸೀ. ಸ್ಯಾ. ಪೀ.)] ಬ್ರಹ್ಮಚರಿಯವಾ;

ನಿಬ್ಬಾನಾಭಿರತೋ ವುದ್ಧೋ [ವದ್ಧೋ (ಪೀ.), ಬುದ್ಧೋ (ಸ್ಯಾ. ಕ.)], ತಸ್ಸ ಮಗ್ಗಾನಿ ಆವರ’’.

೯೮. ‘‘ದೇವರಾಜ ಕಿಮೇವ ತ್ವಂ, ಮಮೇವ ತುವಂ ಸಿಕ್ಖಸಿ;

ಇಸಿಪ್ಪಲೋಭನೇ [ಇಸಿಪಲೋಭಿಕೇ (ಸೀ. ಸ್ಯಾ.), ಇಸಿಂ ಪಲೋಭಿಕೇ (ಪೀ.)] ಗಚ್ಛ, ಸನ್ತಿ ಅಞ್ಞಾಪಿ ಅಚ್ಛರಾ.

೯೯. ‘‘ಮಾದಿಸಿಯೋ ಪವರಾ ಚೇವ, ಅಸೋಕೇ ನನ್ದನೇ ವನೇ;

ತಾಸಮ್ಪಿ ಹೋತು ಪರಿಯಾಯೋ, ತಾಪಿ ಯನ್ತು ಪಲೋಭನಾ’’ [ಪಲೋಭಿಕಾ (ಸ್ಯಾ. ಪೀ.)].

೧೦೦. ‘‘ಅದ್ಧಾ ಹಿ ಸಚ್ಚಂ ಭಣಸಿ, ಸನ್ತಿ ಅಞ್ಞಾಪಿ ಅಚ್ಛರಾ;

ತಾದಿಸಿಯೋ ಪವರಾ ಚೇವ, ಅಸೋಕೇ ನನ್ದನೇ ವನೇ.

೧೦೧. ‘‘ನ ತಾ ಏವಂ ಪಜಾನನ್ತಿ, ಪಾರಿಚರಿಯಂ ಪುಮಂ ಗತಾ;

ಯಾದಿಸಂ ತ್ವಂ ಪಜಾನಾಸಿ, ನಾರಿ ಸಬ್ಬಙ್ಗಸೋಭನೇ.

೧೦೨. ‘‘ತ್ವಮೇವ ಗಚ್ಛ ಕಲ್ಯಾಣಿ, ಇತ್ಥೀನಂ ಪವರಾ ಚಸಿ;

ತವೇವ ವಣ್ಣರೂಪೇನ, ಸವಸಮಾನಯಿಸ್ಸಸಿ’’ [ವಸಮಾನಾಪಯಿಸ್ಸಸಿ (ಸ್ಯಾ.), ವಸಮಾನಾಮಯಿಸ್ಸಸಿ (ಪೀ.), ತಂ ವಸಮಾನಯಿಸ್ಸಸಿ (ಕ.)].

೧೦೩. ‘‘ನ ವಾಹಂ ನ ಗಮಿಸ್ಸಾಮಿ, ದೇವರಾಜೇನ ಪೇಸಿತಾ;

ವಿಭೇಮಿ ಚೇತಂ ಆಸಾದುಂ, ಉಗ್ಗತೇಜೋ ಹಿ ಬ್ರಾಹ್ಮಣೋ.

೧೦೪. ‘‘ಅನೇಕೇ ನಿರಯಂ ಪತ್ತಾ, ಇಸಿಮಾಸಾದಿಯಾ ಜನಾ;

ಆಪನ್ನಾ ಮೋಹಸಂಸಾರಂ, ತಸ್ಮಾ ಲೋಮಾನಿ ಹಂಸಯೇ’’.

೧೦೫. ‘‘ಇದಂ ವತ್ವಾನ ಪಕ್ಕಾಮಿ, ಅಚ್ಛರಾ ಕಾಮವಣ್ಣಿನೀ;

ಮಿಸ್ಸಾ ಮಿಸ್ಸಿತು [ಮಿಸ್ಸೇತು (ಸೀ. ಸ್ಯಾ. ಪೀ.)] ಮಿಚ್ಛನ್ತೀ, ಇಸಿಸಿಙ್ಗಂ ಅಲಮ್ಬುಸಾ.

೧೦೬. ‘‘ಸಾ ಚ ತಂ ವನಮೋಗಯ್ಹ, ಇಸಿಸಿಙ್ಗೇನ ರಕ್ಖಿತಂ;

ಬಿಮ್ಬಜಾಲಕಸಞ್ಛನ್ನಂ, ಸಮನ್ತಾ ಅಡ್ಢಯೋಜನಂ.

೧೦೭. ‘‘ಪಾತೋವ ಪಾತರಾಸಮ್ಹಿ, ಉದಣ್ಹಸಮಯಂ [ಉದಯಸಮಯಂ (ಸ್ಯಾ.), ಉದನ್ತಸಮಯಂ (ಕ.)] ಪತಿ;

ಅಗ್ಗಿಟ್ಠಂ ಪರಿಮಜ್ಜನ್ತಂ, ಇಸಿಸಿಙ್ಗಂ ಉಪಾಗಮಿ’’.

೧೦೮. ‘‘ಕಾ ನು ವಿಜ್ಜುರಿವಾಭಾಸಿ, ಓಸಧೀ ವಿಯ ತಾರಕಾ;

ವಿಚಿತ್ತಹತ್ಥಾಭರಣಾ [ವಿಚಿತ್ತವತ್ಥಾಭರಣಾ (ಸೀ.)], ಆಮುತ್ತಮಣಿಕುಣ್ಡಲಾ [ಆಮುಕ್ಕಮಣಿಕುಣ್ಡಲಾ (?)].

೧೦೯. ‘‘ಆದಿಚ್ಚವಣ್ಣಸಙ್ಕಾಸಾ, ಹೇಮಚನ್ದನಗನ್ಧಿನೀ;

ಸಞ್ಞತೂರೂ ಮಹಾಮಾಯಾ, ಕುಮಾರೀ ಚಾರುದಸ್ಸನಾ.

೧೧೦. ‘‘ವಿಲಗ್ಗಾ [ವಿಲಾಕಾ (ಸೀ. ಸ್ಯಾ. ಪೀ.)] ಮುದುಕಾ ಸುದ್ಧಾ, ಪಾದಾ ತೇ ಸುಪ್ಪತಿಟ್ಠಿತಾ;

ಗಮನಾ ಕಾಮನೀಯಾ [ಕಮನಾ ಕಮನೀಯಾ (ಸೀ. ಪೀ.)] ತೇ, ಹರನ್ತಿಯೇವ ಮೇ ಮನೋ.

೧೧೧. ‘‘ಅನುಪುಬ್ಬಾವ ತೇ ಊರೂ, ನಾಗನಾಸಸಮೂಪಮಾ;

ವಿಮಟ್ಠಾ ತುಯ್ಹಂ ಸುಸ್ಸೋಣೀ, ಅಕ್ಖಸ್ಸ ಫಲಕಂ ಯಥಾ.

೧೧೨. ‘‘ಉಪ್ಪಲಸ್ಸೇವ ಕಿಞ್ಜಕ್ಖಾ, ನಾಭಿ ತೇ ಸಾಧು ಸಣ್ಠಿತಾ;

ಪೂರಾ ಕಣ್ಹಞ್ಜನಸ್ಸೇವ, ದೂರತೋ ಪಟಿದಿಸ್ಸತಿ.

೧೧೩. ‘‘ದುವಿಧಾ ಜಾತಾ ಉರಜಾ, ಅವಣ್ಟಾ ಸಾಧು ಪಚ್ಚುದಾ;

ಪಯೋಧರಾ ಅಪತಿತಾ [ಅಪ್ಪತೀತಾ (ಸೀ. ಸ್ಯಾ. ಪೀ.)], ಅಡ್ಢಲಾಬುಸಮಾ ಥನಾ.

೧೧೪. ‘‘ದೀಘಾ ಕಮ್ಬುತಲಾಭಾಸಾ, ಗೀವಾ ಏಣೇಯ್ಯಕಾ ಯಥಾ;

ಪಣ್ಡರಾವರಣಾ ವಗ್ಗು, ಚತುತ್ಥಮನಸನ್ನಿಭಾ.

೧೧೫. ‘‘ಉದ್ಧಗ್ಗಾ ಚ ಅಧಗ್ಗಾ ಚ, ದುಮಗ್ಗಪರಿಮಜ್ಜಿತಾ;

ದುವಿಜಾ ನೇಲಸಮ್ಭೂತಾ, ದನ್ತಾ ತವ ಸುದಸ್ಸನಾ.

೧೧೬. ‘‘ಅಪಣ್ಡರಾ ಲೋಹಿತನ್ತಾ, ಜಿಞ್ಜೂಕ [ಜಿಞ್ಜುಕ (ಸೀ. ಸ್ಯಾ. ಪೀ.)] ಫಲಸನ್ನಿಭಾ;

ಆಯತಾ ಚ ವಿಸಾಲಾ ಚ, ನೇತ್ತಾ ತವ ಸುದಸ್ಸನಾ.

೧೧೭. ‘‘ನಾತಿದೀಘಾ ಸುಸಮ್ಮಟ್ಠಾ, ಕನಕಬ್ಯಾ [ಕನಕಗ್ಗಾ (ಪೀ.)] ಸಮೋಚಿತಾ;

ಉತ್ತಮಙ್ಗರುಹಾ ತುಯ್ಹಂ, ಕೇಸಾ ಚನ್ದನಗನ್ಧಿಕಾ.

೧೧೮. ‘‘ಯಾವತಾ ಕಸಿಗೋರಕ್ಖಾ, ವಾಣಿಜಾನಂ [ವಣಿಜಾನಂ (ಪೀ.)] ಚ ಯಾ ಗತಿ;

ಇಸೀನಞ್ಚ ಪರಕ್ಕನ್ತಂ, ಸಞ್ಞತಾನಂ ತಪಸ್ಸಿನಂ.

೧೧೯. ‘‘ನ ತೇ ಸಮಸಮಂ ಪಸ್ಸೇ, ಅಸ್ಮಿಂ ಪಥವಿ [ಪುಥುವಿ (ಪೀ.)] ಮಣ್ಡಲೇ;

ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ’’.

೧೨೦. ‘‘ನ ಪಞ್ಹಕಾಲೋ ಭದ್ದನ್ತೇ, ಕಸ್ಸಪೇವಂ ಗತೇ ಸತಿ;

ಏಹಿ ಸಮ್ಮ ರಮಿಸ್ಸಾಮ, ಉಭೋ ಅಸ್ಮಾಕಮಸ್ಸಮೇ;

ಏಹಿ ತಂ ಉಪಗೂಹಿಸ್ಸಂ [ಉಪಗುಯ್ಹಿಸ್ಸಂ (ಸ್ಯಾ.)], ರತೀನಂ ಕುಸಲೋ ಭವ’’.

೧೨೧. ‘‘ಇದಂ ವತ್ವಾನ ಪಕ್ಕಾಮಿ, ಅಚ್ಛರಾ ಕಾಮವಣ್ಣಿನೀ;

ಮಿಸ್ಸಾ ಮಿಸ್ಸಿತುಮಿಚ್ಛನ್ತೀ, ಇಸಿಸಿಙ್ಗಂ ಅಲಮ್ಬುಸಾ’’.

೧೨೨. ‘‘ಸೋ ಚ ವೇಗೇನ ನಿಕ್ಖಮ್ಮ, ಛೇತ್ವಾ ದನ್ಧಪರಕ್ಕಮಂ [ದನ್ಧಪದಕ್ಕಮಂ (ಕ.)];

ತಮುತ್ತಮಾಸು ವೇಣೀಸು, ಅಜ್ಝಪ್ಪತ್ತೋ [ಅಜ್ಝಾಪತ್ತೋ (ಪೀ.)] ಪರಾಮಸಿ;

೧೨೩. ‘‘ತಮುದಾವತ್ತ ಕಲ್ಯಾಣೀ, ಪಲಿಸ್ಸಜಿ ಸುಸೋಭನಾ [ಸುಸೋಭಣೀ (ಸ್ಯಾ. ಕ.)];

ಚವಿತಮ್ಹಿ [ಚವಿ ತಮ್ಹಾ (ಸ್ಯಾ. ಕ.)] ಬ್ರಹ್ಮಚರಿಯಾ, ಯಥಾ ತಂ ಅಥ ತೋಸಿತಾ.

೧೨೪. ‘‘ಮನಸಾ ಅಗಮಾ ಇನ್ದಂ, ವಸನ್ತಂ ನನ್ದನೇ ವನೇ;

ತಸ್ಸಾ ಸಙ್ಕಪ್ಪಮಞ್ಞಾಯ, ಮಘವಾ ದೇವಕುಞ್ಜರೋ.

೧೨೫. ‘‘ಪಲ್ಲಙ್ಕಂ ಪಹಿಣೀ ಖಿಪ್ಪಂ, ಸೋವಣ್ಣಂ ಸೋಪವಾಹನಂ;

ಸಉತ್ತರಚ್ಛದಪಞ್ಞಾಸಂ, ಸಹಸ್ಸಪಟಿಯತ್ಥತಂ [ಪಟಿಕತ್ಥತಂ (ಸೀ.)].

೧೨೬. ‘‘ತಮೇನಂ ತತ್ಥ ಧಾರೇಸಿ, ಉರೇ ಕತ್ವಾನ ಸೋಭನಾ;

ಯಥಾ ಏಕಮುಹುತ್ತಂವ, ತೀಣಿ ವಸ್ಸಾನಿ ಧಾರಯಿ.

೧೨೭. ‘‘ವಿಮದೋ ತೀಹಿ ವಸ್ಸೇಹಿ, ಪಬುಜ್ಝಿತ್ವಾನ ಬ್ರಾಹ್ಮಣೋ;

ಅದ್ದಸಾಸಿ ಹರಿತ [ಹರೀ (ಪೀ.)] ರುಕ್ಖೇ, ಸಮನ್ತಾ ಅಗ್ಗಿಯಾಯನಂ.

೧೨೮. ‘‘ನವಪತ್ತವನಂ ಫುಲ್ಲಂ, ಕೋಕಿಲಗ್ಗಣಘೋಸಿತಂ;

ಸಮನ್ತಾ ಪವಿಲೋಕೇತ್ವಾ, ರುದಂ ಅಸ್ಸೂನಿ ವತ್ತಯಿ.

೧೨೯. ‘‘ನ ಜುಹೇ ನ ಜಪೇ [ಜಪ್ಪೇ (ಕ.)] ಮನ್ತೇ, ಅಗ್ಗಿಹುತ್ತಂ ಪಹಾಪಿತಂ;

ಕೋ ನು ಮೇ ಪಾರಿಚರಿಯಾಯ, ಪುಬ್ಬೇ ಚಿತ್ತಂ ಪಲೋಭಯಿ.

೧೩೦. ‘‘ಅರಞ್ಞೇ ಮೇ ವಿಹರತೋ, ಯೋ ಮೇ ತೇಜಾ ಹ ಸಮ್ಭುತಂ [ಸಮ್ಭತಂ (ಪೀ.)];

ನಾನಾರತ್ನಪರಿಪೂರಂ, ನಾವಂವ ಗಣ್ಹಿ ಅಣ್ಣವೇ’’.

೧೩೧. ‘‘ಅಹಂ ತೇ ಪಾರಿಚರಿಯಾಯ, ದೇವರಾಜೇನ ಪೇಸಿತಾ;

ಅವಧಿಂ [ಅವಧೀ (ಸ್ಯಾ. ಪೀ. ಕ.)] ಚಿತ್ತಂ ಚಿತ್ತೇನ, ಪಮಾದೋ [ಪಮಾದಾ (ಸ್ಯಾ. ಪೀ.)] ತ್ವಂ ನ ಬುಜ್ಝಸಿ’’.

೧೩೨. ‘‘ಇಮಾನಿ ಕಿರ ಮಂ ತಾತೋ, ಕಸ್ಸಪೋ ಅನುಸಾಸತಿ;

ಕಮಲಾಸದಿಸಿತ್ಥಿಯೋ [ಸರಿಸಿತ್ಥಿಯೋ (ಸ್ಯಾ. ಪೀ.)], ತಾಯೋ ಬುಜ್ಝೇಸಿ ಮಾಣವ.

೧೩೩. ‘‘ಉರೇ ಗಣ್ಡಾಯೋ ಬುಜ್ಝೇಸಿ, ತಾಯೋ ಬುಜ್ಝೇಸಿ ಮಾಣವ;

ಇಚ್ಚಾನುಸಾಸಿ ಮಂ ತಾತೋ, ಯಥಾ ಮಂ ಅನುಕಮ್ಪಕೋ.

೧೩೪. ‘‘ತಸ್ಸಾಹಂ ವಚನಂ ನಾಕಂ, ಪಿತು ವುದ್ಧಸ್ಸ ಸಾಸನಂ;

ಅರಞ್ಞೇ ನಿಮ್ಮನುಸ್ಸಮ್ಹಿ, ಸ್ವಜ್ಜ ಝಾಯಾಮಿ [ಸ್ವಾಜ್ಜಜ್ಝಾಯಾಮಿ (ಸೀ. ಪೀ.)] ಏಕಕೋ.

೧೩೫. ‘‘ಸೋಹಂ ತಥಾ ಕರಿಸ್ಸಾಮಿ, ಧಿರತ್ಥು ಜೀವಿತೇನ ಮೇ;

ಪುನ ವಾ ತಾದಿಸೋ ಹೇಸ್ಸಂ, ಮರಣಂ ಮೇ ಭವಿಸ್ಸತಿ’’.

೧೩೬. ‘‘ತಸ್ಸ ತೇಜಂ [ತೇಜಞ್ಚ (ಸೀ. ಪೀ.)] ವೀರಿಯಞ್ಚ, ಧಿತಿಂ [ಧಿತಿಞ್ಚ (ಪೀ.)] ಞತ್ವಾ ಅವಟ್ಠಿತಂ [ಸುವಡ್ಢಿತಂ (ಸೀ.)];

ಸಿರಸಾ ಅಗ್ಗಹೀ ಪಾದೇ, ಇಸಿಸಿಙ್ಗಂ ಅಲಮ್ಬುಸಾ.

೧೩೭. ‘‘ಮಾ ಮೇ ಕುಜ್ಝ [ಕುಜ್ಝಿ (ಪೀ.)] ಮಹಾವೀರ, ಮಾ ಮೇ ಕುಜ್ಝ [ಕುಜ್ಝಿ (ಪೀ.)] ಮಹಾಇಸೇ;

ಮಹಾ ಅತ್ಥೋ ಮಯಾ ಚಿಣ್ಣೋ, ತಿದಸಾನಂ ಯಸಸ್ಸಿನಂ;

ತಯಾ ಸಂಕಮ್ಪಿತಂ ಆಸಿ, ಸಬ್ಬಂ ದೇವಪುರಂ ತದಾ’’.

೧೩೮. ‘‘ತಾವತಿಂಸಾ ಚ ಯೇ ದೇವಾ, ತಿದಸಾನಞ್ಚ ವಾಸವೋ;

ತ್ವಞ್ಚ ಭದ್ದೇ ಸುಖೀ ಹೋಹಿ, ಗಚ್ಛ ಕಞ್ಞೇ ಯಥಾಸುಖಂ’’.

೧೩೯. ‘‘ತಸ್ಸ ಪಾದೇ ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;

ಅಞ್ಜಲಿಂ ಪಗ್ಗಹೇತ್ವಾನ, ತಮ್ಹಾ ಠಾನಾ ಅಪಕ್ಕಮಿ.

೧೪೦. ‘‘ಯೋ ಚ ತಸ್ಸಾಸಿ ಪಲ್ಲಙ್ಕೋ, ಸೋವಣ್ಣೋ ಸೋಪವಾಹನೋ;

ಸಉತ್ತರಚ್ಛದಪಞ್ಞಾಸೋ, ಸಹಸ್ಸಪಟಿಯತ್ಥತೋ;

ತಮೇವ ಪಲ್ಲಙ್ಕಮಾರುಯ್ಹ, ಅಗಾ ದೇವಾನ ಸನ್ತಿಕೇ.

೧೪೧. ‘‘ತಮೋಕ್ಕಮಿವ ಆಯನ್ತಿಂ, ಜಲನ್ತಿಂ ವಿಜ್ಜುತಂ ಯಥಾ;

ಪತೀತೋ ಸುಮನೋ ವಿತ್ತೋ, ದೇವಿನ್ದೋ ಅದದಾ ವರಂ’’.

೧೪೨. ‘‘ವರಞ್ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;

ನಿಸಿಪ್ಪಲೋಭಿಕಾ [ನ ಇಸಿಪಲೋಭಿಕಾ (ಸ್ಯಾ.), ನ ಇಸಿಪಲೋಭಿಯಂ (ಪೀ.)] ಗಚ್ಛೇ, ಏತಂ ಸಕ್ಕ ವರಂ ವರೇ’’ತಿ.

ಅಲಮ್ಬುಸಾಜಾತಕಂ ತತಿಯಂ.