೫೨೨. ಸರಭಙ್ಗಜಾತಕಂ (೨)

೫೦. ‘‘ಅಲಙ್ಕತಾ ಕುಣ್ಡಲಿನೋ ಸುವತ್ಥಾ, ವೇಳುರಿಯಮುತ್ತಾಥರುಖಗ್ಗಬನ್ಧಾ [ಬದ್ಧಾ (ಪೀ.)];

ರಥೇಸಭಾ ತಿಟ್ಠಥ ಕೇ ನು ತುಮ್ಹೇ, ಕಥಂ ವೋ ಜಾನನ್ತಿ ಮನುಸ್ಸಲೋಕೇ’’.

೫೧. ‘‘ಅಹಮಟ್ಠಕೋ ಭೀಮರಥೋ ಪನಾಯಂ, ಕಾಲಿಙ್ಗರಾಜಾ ಪನ ಉಗ್ಗತೋಯಂ [ಉಗ್ಗತೋ ಅಯಂ (ಪೀ.), ಉಗ್ಗತಾಯಂ (ಕ.)];

ಸುಸಞ್ಞತಾನಂ ಇಸೀನಂ [ಸುಸಞ್ಞತಾನಿಸಿನಂ (ಪೀ.)] ದಸ್ಸನಾಯ, ಇಧಾಗತಾ ಪುಚ್ಛಿತಾಯೇಮ್ಹ ಪಞ್ಹೇ’’.

೫೨. ‘‘ವೇಹಾಯಸಂ ತಿಟ್ಠಸಿ [ತಿಟ್ಠತಿ (ಪೀ.)] ಅನ್ತಲಿಕ್ಖೇ, ಪಥದ್ಧುನೋ ಪನ್ನರಸೇವ ಚನ್ದೋ;

ಪುಚ್ಛಾಮಿ ತಂ ಯಕ್ಖ ಮಹಾನುಭಾವ, ಕಥಂ ತಂ ಜಾನನ್ತಿ ಮನುಸ್ಸಲೋಕೇ’’.

೫೩. ‘‘ಯಮಾಹು ದೇವೇಸು ಸುಜಮ್ಪತೀತಿ, ಮಘವಾತಿ ತಂ ಆಹು ಮನುಸ್ಸಲೋಕೇ;

ಸ ದೇವರಾಜಾ ಇದಮಜ್ಜ ಪತ್ತೋ, ಸುಸಞ್ಞತಾನಂ ಇಸೀನಂ ದಸ್ಸನಾಯ’’.

೫೪. ‘‘ದೂರೇ ಸುತಾ ನೋ ಇಸಯೋ ಸಮಾಗತಾ, ಮಹಿದ್ಧಿಕಾ ಇದ್ಧಿಗುಣೂಪಪನ್ನಾ;

ವನ್ದಾಮಿ ತೇ ಅಯಿರೇ ಪಸನ್ನಚಿತ್ತೋ, ಯೇ ಜೀವಲೋಕೇತ್ಥ ಮನುಸ್ಸಸೇಟ್ಠಾ’’.

೫೫. ಗನ್ಧೋ ಇಸೀನಂ ಚಿರದಿಕ್ಖಿತಾನಂ [ದಕ್ಖಿತಾನಂ (ಸ್ಯಾ. ಪೀ.)], ಕಾಯಾ ಚುತೋ ಗಚ್ಛತಿ ಮಾಲುತೇನ;

ಇತೋ ಪಟಿಕ್ಕಮ್ಮ ಸಹಸ್ಸನೇತ್ತ, ಗನ್ಧೋ ಇಸೀನಂ ಅಸುಚಿ ದೇವರಾಜ’’.

೫೬. ‘‘ಗನ್ಧೋ ಇಸೀನಂ ಚಿರದಿಕ್ಖಿತಾನಂ, ಕಾಯಾ ಚುತೋ ಗಚ್ಛತು ಮಾಲುತೇನ;

ವಿಚಿತ್ರಪುಪ್ಫಂ ಸುರಭಿಂವ ಮಾಲಂ, ಗನ್ಧಞ್ಚ ಏತಂ ಪಾಟಿಕಙ್ಖಾಮ ಭನ್ತೇ;

ನ ಹೇತ್ಥ ದೇವಾ ಪಟಿಕ್ಕೂಲಸಞ್ಞಿನೋ’’.

೫೭. ‘‘ಪುರಿನ್ದದೋ ಭೂತಪತೀ ಯಸಸ್ಸೀ, ದೇವಾನಮಿನ್ದೋ ಸಕ್ಕೋ [ಇದಂ ಪದಂ ನತ್ಥಿ (ಸೀ. ಸ್ಯಾ. ಪೀ. ಪೋತ್ಥಕೇಸು)] ಮಘವಾ ಸುಜಮ್ಪತಿ;

ಸ ದೇವರಾಜಾ ಅಸುರಗಣಪ್ಪಮದ್ದನೋ, ಓಕಾಸಮಾಕಙ್ಖತಿ ಪಞ್ಹ ಪುಚ್ಛಿತುಂ.

೫೮. ‘‘ಕೋ ನೇವಿಮೇಸಂ ಇಧ ಪಣ್ಡಿತಾನಂ, ಪಞ್ಹೇ ಪುಟ್ಠೋ ನಿಪುಣೇ ಬ್ಯಾಕರಿಸ್ಸತಿ;

ತಿಣ್ಣಞ್ಚ ರಞ್ಞಂ ಮನುಜಾಧಿಪಾನಂ, ದೇವಾನಮಿನ್ದಸ್ಸ ಚ ವಾಸವಸ್ಸ’’.

೫೯. ‘‘ಅಯಂ ಇಸಿ [ಇಸೀ (ಸೀ. ಪೀ.)] ಸರಭಙ್ಗೋ ತಪಸ್ಸೀ [ಯಸಸ್ಸೀ (ಸೀ.)], ಯತೋ ಜಾತೋ ವಿರತೋ ಮೇಥುನಸ್ಮಾ;

ಆಚೇರಪುತ್ತೋ [ಆಚರಿಯಪುತ್ತೋ (ಪೀ. ಕ.)] ಸುವಿನೀತರೂಪೋ, ಸೋ ನೇಸಂ ಪಞ್ಹಾನಿ ವಿಯಾಕರಿಸ್ಸತಿ’’.

೬೦. ‘‘ಕೋಣ್ಡಞ್ಞ ಪಞ್ಹಾನಿ ವಿಯಾಕರೋಹಿ, ಯಾಚನ್ತಿ ತಂ ಇಸಯೋ ಸಾಧುರೂಪಾ;

ಕೋಣ್ಡಞ್ಞ ಏಸೋ ಮನುಜೇಸು ಧಮ್ಮೋ, ಯಂ ವುದ್ಧ [ವದ್ಧ (ಪೀ.), ಬುದ್ಧ (ಕ.)] ಮಾಗಚ್ಛತಿ ಏಸ ಭಾರೋ’’.

೬೧. ‘‘ಕತಾವಕಾಸಾ ಪುಚ್ಛನ್ತು ಭೋನ್ತೋ, ಯಂ ಕಿಞ್ಚಿ ಪಞ್ಹಂ ಮನಸಾಭಿಪತ್ಥಿತಂ;

ಅಹಞ್ಹಿ ತಂ ತಂ ವೋ ವಿಯಾಕರಿಸ್ಸಂ, ಞತ್ವಾ ಸಯಂ ಲೋಕಮಿಮಂ ಪರಞ್ಚ’’.

೬೨. ‘‘ತತೋ ಚ ಮಘವಾ ಸಕ್ಕೋ, ಅತ್ಥದಸ್ಸೀ ಪುರಿನ್ದದೋ;

ಅಪುಚ್ಛಿ ಪಠಮಂ ಪಞ್ಹಂ, ಯಞ್ಚಾಸಿ ಅಭಿಪತ್ಥಿತಂ’’.

೬೩. ‘‘ಕಿಂ ಸೂ ವಧಿತ್ವಾ ನ ಕದಾಚಿ ಸೋಚತಿ, ಕಿಸ್ಸಪ್ಪಹಾನಂ ಇಸಯೋ ವಣ್ಣಯನ್ತಿ;

ಕಸ್ಸೀಧ ವುತ್ತಂ ಫರುಸಂ ಖಮೇಥ, ಅಕ್ಖಾಹಿ ಮೇ ಕೋಣ್ಡಞ್ಞ ಏತಮತ್ಥಂ’’.

೬೪. ‘‘ಕೋಧಂ ವಧಿತ್ವಾ ನ ಕದಾಚಿ ಸೋಚತಿ, ಮಕ್ಖಪ್ಪಹಾನಂ ಇಸಯೋ ವಣ್ಣಯನ್ತಿ;

ಸಬ್ಬೇಸಂ ವುತ್ತಂ ಫರುಸಂ ಖಮೇಥ, ಏತಂ ಖನ್ತಿಂ ಉತ್ತಮಮಾಹು ಸನ್ತೋ’’.

೬೫. ‘‘ಸಕ್ಕಾ ಉಭಿನ್ನಂ [ಹಿ ದ್ವಿನ್ನಂ (ಪೀ.)] ವಚನಂ ತಿತಿಕ್ಖಿತುಂ, ಸದಿಸಸ್ಸ ವಾ ಸೇಟ್ಠತರಸ್ಸ [ಸೇಟ್ಠನರಸ್ಸ (ಪೀ.)] ವಾಪಿ;

ಕಥಂ ನು ಹೀನಸ್ಸ ವಚೋ ಖಮೇಥ, ಅಕ್ಖಾಹಿ ಮೇ ಕೋಣ್ಡಞ್ಞ ಏತಮತ್ಥಂ’’.

೬೬. ‘‘ಭಯಾ ಹಿ ಸೇಟ್ಠಸ್ಸ ವಚೋ ಖಮೇಥ, ಸಾರಮ್ಭಹೇತೂ ಪನ ಸಾದಿಸಸ್ಸ;

ಯೋ ಚೀಧ ಹೀನಸ್ಸ ವಚೋ ಖಮೇಥ, ಏತಂ ಖನ್ತಿಂ ಉತ್ತಮಮಾಹು ಸನ್ತೋ’’.

೬೭. ‘‘ಕಥಂ ವಿಜಞ್ಞಾ ಚತುಪತ್ಥರೂಪಂ [ಚತುಮಟ್ಠರೂಪಂ (ಸ್ಯಾ. ಪೀ.)], ಸೇಟ್ಠಂ ಸರಿಕ್ಖಂ ಅಥವಾಪಿ ಹೀನಂ;

ವಿರೂಪರೂಪೇನ ಚರನ್ತಿ ಸನ್ತೋ, ತಸ್ಮಾ ಹಿ ಸಬ್ಬೇಸಂ ವಚೋ ಖಮೇಥ’’.

೬೮. ‘‘ನ ಹೇತಮತ್ಥಂ ಮಹತೀಪಿ ಸೇನಾ, ಸರಾಜಿಕಾ ಯುಜ್ಝಮಾನಾ ಲಭೇಥ;

ಯಂ ಖನ್ತಿಮಾ ಸಪ್ಪುರಿಸೋ ಲಭೇಥ, ಖನ್ತೀ ಬಲಸ್ಸೂಪಸಮನ್ತಿ ವೇರಾ’’.

೬೯. ‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಯಥಾ ಅಹುಂ [ಅಹೂ (ಸೀ. ಸ್ಯಾ. ಪೀ.)] ದಣ್ಡಕೀ ನಾಳಿಕೇರೋ [ನಾಳಿಕೀರೋ (ಸೀ. ಸ್ಯಾ. ಪೀ.)], ಅಥಜ್ಜುನೋ ಕಲಾಬು ಚಾಪಿ ರಾಜಾ;

ತೇಸಂ ಗತಿಂ ಬ್ರೂಹಿ ಸುಪಾಪಕಮ್ಮಿನಂ, ಕತ್ಥೂಪಪನ್ನಾ ಇಸಿನಂ ವಿಹೇಠಕಾ’’.

೭೦. ‘‘ಕಿಸಞ್ಹಿ [ಕಿಸಂಪಿ (ಪೀ.)] ವಚ್ಛಂ ಅವಕಿರಿಯ ದಣ್ಡಕೀ, ಉಚ್ಛಿನ್ನಮೂಲೋ ಸಜನೋ ಸರಟ್ಠೋ;

ಕುಕ್ಕುಳನಾಮೇ ನಿರಯಮ್ಹಿ ಪಚ್ಚತಿ, ತಸ್ಸ ಫುಲಿಙ್ಗಾನಿ ಪತನ್ತಿ ಕಾಯೇ.

೭೧. ‘‘ಯೋ ಸಞ್ಞತೇ ಪಬ್ಬಜಿತೇ ಅಹೇಠಯಿ [ಅವಞ್ಚಸಿ (ಪೀ.)], ಧಮ್ಮಂ ಭಣನ್ತೇ ಸಮಣೇ ಅದೂಸಕೇ;

ತಂ ನಾಳಿಕೇರಂ ಸುನಖಾ ಪರತ್ಥ, ಸಙ್ಗಮ್ಮ ಖಾದನ್ತಿ ವಿಫನ್ದಮಾನಂ.

೭೨. ‘‘ಅಥಜ್ಜುನೋ ನಿರಯೇ ಸತ್ತಿಸೂಲೇ, ಅವಂಸಿರೋ ಪತಿತೋ ಉದ್ಧಂಪಾದೋ [ಉದ್ಧಪಾದೋ (ಸ್ಯಾ.), ಅದ್ಧಪಾದೋ (ಪೀ.)];

ಅಙ್ಗೀರಸಂ ಗೋತಮಂ ಹೇಠಯಿತ್ವಾ, ಖನ್ತಿಂ ತಪಸ್ಸಿಂ ಚಿರಬ್ರಹ್ಮಚಾರಿಂ.

೭೩. ‘‘ಯೋ ಖಣ್ಡಸೋ ಪಬ್ಬಜಿತಂ ಅಛೇದಯಿ, ಖನ್ತಿಂ ವದನ್ತಂ ಸಮಣಂ ಅದೂಸಕಂ;

ಕಲಾಬುವೀಚಿಂ ಉಪಪಜ್ಜ ಪಚ್ಚತಿ, ಮಹಾಪತಾಪಂ [ಮಹಾಭಿತಾಪಂ (ಪೀ.)] ಕಟುಕಂ ಭಯಾನಕಂ.

೭೪. ‘‘ಏತಾನಿ ಸುತ್ವಾ ನಿರಯಾನಿ ಪಣ್ಡಿತೋ, ಅಞ್ಞಾನಿ ಪಾಪಿಟ್ಠತರಾನಿ ಚೇತ್ಥ;

ಧಮ್ಮಂ ಚರೇ ಸಮಣಬ್ರಾಹ್ಮಣೇಸು, ಏವಙ್ಕರೋ ಸಗ್ಗಮುಪೇತಿ ಠಾನಂ’’.

೭೫. ‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಕಥಂವಿಧಂ ಸೀಲವನ್ತಂ ವದನ್ತಿ, ಕಥಂವಿಧಂ ಪಞ್ಞವನ್ತಂ ವದನ್ತಿ;

ಕಥಂವಿಧಂ ಸಪ್ಪುರಿಸಂ ವದನ್ತಿ, ಕಥಂವಿಧಂ ನೋ ಸಿರಿ ನೋ ಜಹಾತಿ’’.

೭೬. ‘‘ಕಾಯೇನ ವಾಚಾಯ ಚ ಯೋ’ಧ [ಯೋ ಚ (ಪೀ.)] ಸಞ್ಞತೋ, ಮನಸಾ ಚ ಕಿಞ್ಚಿ ನ ಕರೋತಿ ಪಾಪಂ;

ನ ಅತ್ತಹೇತೂ ಅಲಿಕಂ ಭಣೇತಿ [ಭಣಾತಿ (ಸೀ. ಸ್ಯಾ. ಪೀ.)], ತಥಾವಿಧಂ ಸೀಲವನ್ತಂ ವದನ್ತಿ.

೭೭. ‘‘ಗಮ್ಭೀರಪಞ್ಹಂ ಮನಸಾಭಿಚಿನ್ತಯಂ [ಮನಸಾ ವಿಚಿನ್ತಯಂ (ಸೀ.)], ನಾಚ್ಚಾಹಿತಂ ಕಮ್ಮ ಕರೋತಿ ಲುದ್ದಂ;

ಕಾಲಾಗತಂ [ಕಾಲಾಭತಂ (ಪೀ.)] ಅತ್ಥಪದಂ ನ ರಿಞ್ಚತಿ, ತಥಾವಿಧಂ ಪಞ್ಞವನ್ತಂ ವದನ್ತಿ.

೭೮. ‘‘ಯೋ ವೇ ಕತಞ್ಞೂ ಕತವೇದಿ ಧೀರೋ, ಕಲ್ಯಾಣಮಿತ್ತೋ ದಳ್ಹಭತ್ತಿ ಚ ಹೋತಿ;

ದುಖಿತಸ್ಸ ಸಕ್ಕಚ್ಚ ಕರೋತಿ ಕಿಚ್ಚಂ, ತಥಾವಿಧಂ ಸಪ್ಪುರಿಸಂ ವದನ್ತಿ.

೭೯. ‘‘ಏತೇಹಿ ಸಬ್ಬೇಹಿ ಗುಣೇಹುಪೇತೋ, ಸದ್ಧೋ ಮುದೂ ಸಂವಿಭಾಗೀ ವದಞ್ಞೂ;

ಸಙ್ಗಾಹಕಂ ಸಖಿಲಂ ಸಣ್ಹವಾಚಂ, ತಥಾವಿಧಂ ನೋ ಸಿರಿ ನೋ ಜಹಾತಿ’’.

೮೦. ‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಸೀಲಂ ಸಿರಿಞ್ಚಾಪಿ ಸತಞ್ಚ ಧಮ್ಮಂ, ಪಞ್ಞಞ್ಚ ಕಂ ಸೇಟ್ಠತರಂ ವದನ್ತಿ’’.

೮೧. ‘‘ಪಞ್ಞಾ ಹಿ ಸೇಟ್ಠಾ ಕುಸಲಾ ವದನ್ತಿ, ನಕ್ಖತ್ತರಾಜಾರಿವ ತಾರಕಾನಂ;

ಸೀಲಂ ಸೀರೀ ಚಾಪಿ ಸತಞ್ಚ ಧಮ್ಮೋ [ಧಮ್ಮಾ (ಪೀ.)], ಅನ್ವಾಯಿಕಾ ಪಞ್ಞವತೋ ಭವನ್ತಿ’’.

೮೨. ‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಕಥಂಕರೋ ಕಿನ್ತಿಕರೋ ಕಿಮಾಚರಂ, ಕಿಂ ಸೇವಮಾನೋ ಲಭತೀಧ ಪಞ್ಞಂ;

ಪಞ್ಞಾಯ ದಾನಿಪ್ಪಟಿಪಂ [ದಾನಿ ಪಟಿಪದಂ (ಸೀ. ಸ್ಯಾ. ಪೀ.)] ವದೇಹಿ, ಕಥಂಕರೋ ಪಞ್ಞವಾ ಹೋತಿ ಮಚ್ಚೋ’’.

೮೩. ‘‘ಸೇವೇಥ ವುದ್ಧೇ ನಿಪುಣೇ ಬಹುಸ್ಸುತೇ, ಉಗ್ಗಾಹಕೋ ಚ ಪರಿಪುಚ್ಛಕೋ ಸಿಯಾ;

ಸುಣೇಯ್ಯ ಸಕ್ಕಚ್ಚ ಸುಭಾಸಿತಾನಿ, ಏವಂಕರೋ ಪಞ್ಞವಾ ಹೋತಿ ಮಚ್ಚೋ.

೮೪. ‘‘ ಪಞ್ಞವಾ ಕಾಮಗುಣೇ ಅವೇಕ್ಖತಿ, ಅನಿಚ್ಚತೋ ದುಕ್ಖತೋ ರೋಗತೋ ಚ;

ಏವಂ ವಿಪಸ್ಸೀ ಪಜಹಾತಿ ಛನ್ದಂ, ದುಕ್ಖೇಸು ಕಾಮೇಸು ಮಹಬ್ಭಯೇಸು.

೮೫. ‘‘ಸ ವೀತರಾಗೋ ಪವಿನೇಯ್ಯ ದೋಸಂ, ಮೇತ್ತಂ [ಮೇತ್ತ (ಸ್ಯಾ. ಕ.)] ಚಿತ್ತಂ ಭಾವಯೇ [ಭಾವೇಯ್ಯ (ಸೀ. ಸ್ಯಾ. ಕ.)] ಅಪ್ಪಮಾಣಂ;

ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅನಿನ್ದಿತೋ ಬ್ರಹ್ಮಮುಪೇತಿ ಠಾನಂ’’.

೮೬. ‘‘ಮಹತ್ಥಿಯಂ [ಮಹಿದ್ಧಿಯಂ (ಸೀ. ಸ್ಯಾ. ಪೀ.)] ಆಗಮನಂ ಅಹೋಸಿ, ತವಮಟ್ಠಕಾ [ಮಟ್ಠಕ (ಸೀ. ಸ್ಯಾ. ಕ.)] ಭೀಮರಥಸ್ಸ ಚಾಪಿ;

ಕಾಲಿಙ್ಗರಾಜಸ್ಸ ಚ ಉಗ್ಗತಸ್ಸ, ಸಬ್ಬೇಸ ವೋ ಕಾಮರಾಗೋ ಪಹೀನೋ’’.

೮೭. ‘‘ಏವಮೇತಂ ಪರಚಿತ್ತವೇದಿ, ಸಬ್ಬೇಸ ನೋ ಕಾಮರಾಗೋ ಪಹೀನೋ;

ಕರೋಹಿ ಓಕಾಸಮನುಗ್ಗಹಾಯ, ಯಥಾ ಗತಿಂ ತೇ ಅಭಿಸಮ್ಭವೇಮ’’.

೮೮. ‘‘ಕರೋಮಿ ಓಕಾಸಮನುಗ್ಗಹಾಯ, ತಥಾ ಹಿ ವೋ ಕಾಮರಾಗೋ ಪಹೀನೋ;

ಫರಾಥ ಕಾಯಂ ವಿಪುಲಾಯ ಪೀತಿಯಾ, ಯಥಾ ಗತಿಂ ಮೇ ಅಭಿಸಮ್ಭವೇಥ’’.

೮೯. ‘‘ಸಬ್ಬಂ ಕರಿಸ್ಸಾಮ ತವಾನುಸಾಸನಿಂ, ಯಂ ಯಂ ತುವಂ ವಕ್ಖಸಿ ಭೂರಿಪಞ್ಞ;

ಫರಾಮ ಕಾಯಂ ವಿಪುಲಾಯ ಪೀತಿಯಾ, ಯಥಾ ಗತಿಂ ತೇ ಅಭಿಸಮ್ಭವೇಮ’’.

೯೦. ‘‘ಕತಾಯ [ಕತಾಯಂ (ಸೀ. ಪೀ.)] ವಚ್ಛಸ್ಸ ಕಿಸಸ್ಸ ಪೂಜಾ, ಗಚ್ಛನ್ತು ಭೋನ್ತೋ ಇಸಯೋ ಸಾಧುರೂಪಾ;

ಝಾನೇ ರತಾ ಹೋಥ ಸದಾ ಸಮಾಹಿತಾ, ಏಸಾ ರತೀ ಪಬ್ಬಜಿತಸ್ಸ ಸೇಟ್ಠಾ’’.

೯೧. ‘‘ಸುತ್ವಾನ ಗಾಥಾ ಪರಮತ್ಥಸಂಹಿತಾ, ಸುಭಾಸಿತಾ ಇಸಿನಾ ಪಣ್ಡಿತೇನ;

ತೇ ವೇದಜಾತಾ ಅನುಮೋದಮಾನಾ, ಪಕ್ಕಾಮು [ಪಕ್ಕಮು (ಕ.)] ದೇವಾ ದೇವಪುರಂ ಯಸಸ್ಸಿನೋ.

೯೨. ‘‘ಗಾಥಾ ಇಮಾ ಅತ್ಥವತೀ ಸುಬ್ಯಞ್ಜನಾ, ಸುಭಾಸಿತಾ ಇಸಿನಾ ಪಣ್ಡಿತೇನ;

ಯೋ ಕೋಚಿಮಾ ಅಟ್ಠಿಕತ್ವಾ [ಅಟ್ಠಿಂ ಕತ್ವಾ (ಕ.)] ಸುಣೇಯ್ಯ, ಲಭೇಥ ಪುಬ್ಬಾಪರಿಯಂ ವಿಸೇಸಂ;

ಲದ್ಧಾನ ಪುಬ್ಬಾಪರಿಯಂ ವಿಸೇಸಂ, ಅದಸ್ಸನಂ ಮಚ್ಚುರಾಜಸ್ಸ ಗಚ್ಛೇ’’.

೯೩. ‘‘ಸಾಲಿಸ್ಸರೋ ಸಾರಿಪುತ್ತೋ, ಮೇಣ್ಡಿಸ್ಸರೋ ಚ ಕಸ್ಸಪೋ;

ಪಬ್ಬತೋ ಅನುರುದ್ಧೋ ಚ, ಕಚ್ಚಾಯನೋ ಚ ದೇವಲೋ [ದೇವಿಲೋ (ಸ್ಯಾ. ಕ.)].

೯೪. ‘‘ಅನುಸಿಸ್ಸೋ ಚ ಆನನ್ದೋ, ಕಿಸವಚ್ಛೋ ಚ ಕೋಲಿತೋ;

ನಾರದೋ ಉದಾಯೀ ಥೇರೋ [ನಾರದೋ ಪುಣ್ಣೋ ಮನ್ತಾನೀಪುತ್ತೋ (ಸೀ.)], ಪರಿಸಾ ಬುದ್ಧಪರಿಸಾ;

ಸರಭಙ್ಗೋ ಲೋಕನಾಥೋ, ಏವಂ ಧಾರೇಥ ಜಾತಕ’’ನ್ತಿ.

ಸರಭಙ್ಗಜಾತಕಂ ದುತಿಯಂ.