೫೧೭. ದಕರಕ್ಖಸಜಾತಕಂ (೭)

೨೨೪. ಸಚೇ ವೋ ವುಯ್ಹಮಾನಾನಂ, ಸತ್ತನ್ನಂ ಉದಕಣ್ಣವೇ;

ಮನುಸ್ಸಬಲಿಮೇಸಾನೋ, ನಾವಂ ಗಣ್ಹೇಯ್ಯ ರಕ್ಖಸೋ;

ಅನುಪುಬ್ಬಂ ಕಥಂ ದತ್ವಾ, ಮುಞ್ಚೇಸಿ ದಕರಕ್ಖಸಾ [ದಕರಕ್ಖತೋ (ಪೀ.)].

೨೨೫. ಮಾತರಂ ಪಠಮಂ ದಜ್ಜಂ, ಭರಿಯಂ ದತ್ವಾನ ಭಾತರಂ;

ತತೋ ಸಹಾಯಂ ದತ್ವಾನ, ಪಞ್ಚಮಂ ದಜ್ಜಂ [ದಜ್ಜ (ಸ್ಯಾ.)] ಬ್ರಾಹ್ಮಣಂ;

ಛಟ್ಠಾಹಂ ದಜ್ಜಮತ್ತಾನಂ, ನೇವ ದಜ್ಜಂ ಮಹೋಸಧಂ.

೨೨೬. ಪೋಸೇತಾ ತೇ ಜನೇತ್ತೀ ಚ, ದೀಘರತ್ತಾನುಕಮ್ಪಿಕಾ;

ಛಬ್ಭೀ ತಯಿ ಪದುಸ್ಸತಿ [ಪದುಟ್ಠಸ್ಮಿಂ (ಸೀ. ಸ್ಯಾ.)], ಪಣ್ಡಿತಾ ಅತ್ಥದಸ್ಸಿನೀ;

ಅಞ್ಞಂ ಉಪನಿಸಂ ಕತ್ವಾ, ವಧಾ ತಂ ಪರಿಮೋಚಯಿ.

೨೨೭. ತಂ ತಾದಿಸಿಂ [ತಾದಿಸಂ (ಕ.)] ಪಾಣದದಿಂ, ಓರಸಂ ಗಬ್ಭಧಾರಿನಿಂ [ಗಬ್ಭಧಾರಿಣಿಂ (ಸೀ. ಸ್ಯಾ.)];

ಮಾತರಂ ಕೇನ ದೋಸೇನ, ದಜ್ಜಾಸಿ ದಕರಕ್ಖಿನೋ [ದಕರಕ್ಖತೋ (ಪೀ.)].

೨೨೮. ದಹರಾ ವಿಯಲಙ್ಕಾರಂ, ಧಾರೇತಿ ಅಪಿಳನ್ಧನಂ;

ದೋವಾರಿಕೇ ಅನೀಕಟ್ಠೇ, ಅತಿವೇಲಂ ಪಜಗ್ಘತಿ [ಸಞ್ಜಗ್ಘತಿ (ಕ.)].

೨೨೯. ಅಥೋಪಿ ಪಟಿರಾಜೂನಂ, ಸಯಂ ದೂತಾನಿ ಸಾಸತಿ;

ಮಾತರಂ ತೇನ ದೋಸೇನ, ದಜ್ಜಾಹಂ ದಕರಕ್ಖಿನೋ.

೨೩೦. ಇತ್ಥಿಗುಮ್ಬಸ್ಸ ಪವರಾ, ಅಚ್ಚನ್ತಂ ಪಿಯಭಾಣಿನೀ [ಅಚ್ಚನ್ತಪಿಯವಾದಿನೀ (ಸೀ. ಪೀ.)];

ಅನುಗ್ಗತಾ [ಅನುಬ್ಬತಾ (ಸ್ಯಾ.), ಅನುಪುಬ್ಬತಾ (ಕ.)] ಸೀಲವತೀ, ಛಾಯಾವ ಅನಪಾಯಿನೀ.

೨೩೧. ಅಕ್ಕೋಧನಾ ಪುಞ್ಞವತೀ [ಪಞ್ಞವತೀ (ಸೀ. ಪೀ.)], ಪಣ್ಡಿತಾ ಅತ್ಥದಸ್ಸಿನೀ;

ಉಬ್ಬರಿಂ [ಉಪ್ಪರಿಂ (ಸೀ.)] ಕೇನ ದೋಸೇನ, ದಜ್ಜಾಸಿ ದಕರಕ್ಖಿನೋ.

೨೩೨. ಖಿಡ್ಡಾರತಿಸಮಾಪನ್ನಂ, ಅನತ್ಥವಸಮಾಗತಂ;

ಸಾ ಮಂ ಸಕಾನ ಪುತ್ತಾನಂ, ಅಯಾಚಂ ಯಾಚತೇ ಧನಂ.

೨೩೩. ಸೋಹಂ ದದಾಮಿ ಸಾರತ್ತೋ [ಸಾರತೋ (ಸ್ಯಾ.)], ಬಹುಂ ಉಚ್ಚಾವಚಂ ಧನಂ;

ಸುದುಚ್ಚಜಂ ಚಜಿತ್ವಾನ, ಪಚ್ಛಾ ಸೋಚಾಮಿ ದುಮ್ಮನೋ;

ಉಬ್ಬರಿಂ ತೇನ ದೋಸೇನ, ದಜ್ಜಾಹಂ ದಕರಕ್ಖಿನೋ.

೨೩೪. ಯೇನೋಚಿತಾ ಜನಪದಾ [ಜಾನಪದಾ (ಸೀ. ಸ್ಯಾ. ಪೀ.)], ಆನೀತಾ ಚ ಪಟಿಗ್ಗಹಂ;

ಆಭತಂ ಪರರಜ್ಜೇಭಿ, ಅಭಿಟ್ಠಾಯ ಬಹುಂ ಧನಂ.

೨೩೫. ಧನುಗ್ಗಹಾನಂ ಪವರಂ, ಸೂರಂ ತಿಖಿಣಮನ್ತಿನಂ;

ಭಾತರಂ ಕೇನ ದೋಸೇನ, ದಜ್ಜಾಸಿ ದಕರಕ್ಖಿನೋ.

೨೩೬. ಯೇನೋಚಿತಾ [ಮಯೋಚಿತಾ (ಸೀ.), ಮಯಾಚಿತಾ (ಪೀ.)] ಜನಪದಾ, ಆನೀತಾ ಚ ಪಟಿಗ್ಗಹಂ;

ಆಭತಂ ಪರರಜ್ಜೇಭಿ, ಅಭಿಟ್ಠಾಯ ಬಹುಂ ಧನಂ.

೨೩೭. ಧನುಗ್ಗಹಾನಂ ಪವರೋ, ಸೂರೋ ತಿಖಿಣಮನ್ತಿ ಚ [ತಿಖಿಣಮನ್ತಿನೋ (ಕ.)];

ಮಯಾಯಂ [ಮಯಾ ಸೋ (ಸೀ. ಪೀ.)] ಸುಖಿತೋ ರಾಜಾ, ಅತಿಮಞ್ಞತಿ ದಾರಕೋ.

೨೩೮. ಉಪಟ್ಠಾನಮ್ಪಿ ಮೇ ಅಯ್ಯೇ, ನ ಸೋ ಏತಿ ಯಥಾ ಪುರೇ;

ಭಾತರಂ ತೇನ ದೋಸೇನ, ದಜ್ಜಾಹಂ ದಕರಕ್ಖಿನೋ.

೨೩೯. ಏಕರತ್ತೇನ ಉಭಯೋ, ತ್ವಞ್ಚೇವ ಧನುಸೇಖ ಚ [ಧನುಸೇಖವಾ (ಸೀ. ಸ್ಯಾ. ಪೀ.)];

ಉಭೋ ಜಾತೇತ್ಥ ಪಞ್ಚಾಲಾ, ಸಹಾಯಾ ಸುಸಮಾವಯಾ.

೨೪೦. ಚರಿಯಾ ತಂ ಅನುಬನ್ಧಿತ್ಥೋ [ಅನುಬನ್ಧೋ (ಕ.)], ಏಕದುಕ್ಖಸುಖೋ ತವ;

ಉಸ್ಸುಕ್ಕೋ ತೇ ದಿವಾರತ್ತಿಂ, ಸಬ್ಬಕಿಚ್ಚೇಸು ಬ್ಯಾವಟೋ;

ಸಹಾಯಂ ಕೇನ ದೋಸೇನ, ದಜ್ಜಾಸಿ ದಕರಕ್ಖಿನೋ.

೨೪೧. ಚರಿಯಾ ಮಂ ಅಯಂ [ಚರಿಯಾಯ ಅಯಂ (ಸೀ. ಪೀ.)] ಅಯ್ಯೇ, ಪಜಗ್ಘಿತ್ಥೋ [ಸಞ್ಜಗ್ಘಿತ್ಥೋ (ಸ್ಯಾ.)] ಮಯಾ ಸಹ;

ಅಜ್ಜಾಪಿ ತೇನ ವಣ್ಣೇನ, ಅತಿವೇಲಂ ಪಜಗ್ಘತಿ.

೨೪೨. ಉಬ್ಬರಿಯಾಪಿಹಂ ಅಯ್ಯೇ, ಮನ್ತಯಾಮಿ ರಹೋಗತೋ;

ಅನಾಮನ್ತೋ [ಅನಾಮನ್ತಾ (ಸೀ.)] ಪವಿಸತಿ, ಪುಬ್ಬೇ ಅಪ್ಪಟಿವೇದಿತೋ.

೨೪೩. ಲದ್ಧದ್ವಾರೋ [ಲದ್ಧವಾರೋ (ಸೀ. ಪೀ.)] ಕತೋಕಾಸೋ, ಅಹಿರಿಕಂ ಅನಾದರಂ;

ಸಹಾಯಂ ತೇನ ದೋಸೇನ, ದಜ್ಜಾಹಂ ದಕರಕ್ಖಿನೋ.

೨೪೪. ಕುಸಲೋ ಸಬ್ಬನಿಮಿತ್ತಾನಂ, ರುತಞ್ಞೂ [ರುದಞ್ಞೂ (ಸೀ. ಸ್ಯಾ. ಪೀ.)] ಆಗತಾಗಮೋ;

ಉಪ್ಪಾತೇ ಸುಪಿನೇ ಯುತ್ತೋ, ನಿಯ್ಯಾನೇ ಚ ಪವೇಸನೇ.

೨೪೫. ಪಟ್ಠೋ [ಪದ್ಧೋ (ಸೀ. ಪೀ.)] ಭೂಮನ್ತಲಿಕ್ಖಸ್ಮಿಂ, ನಕ್ಖತ್ತಪದಕೋವಿದೋ;

ಬ್ರಾಹ್ಮಣಂ ಕೇನ ದೋಸೇನ, ದಜ್ಜಾಸಿ ದಕರಕ್ಖಿನೋ.

೨೪೬. ಪರಿಸಾಯಮ್ಪಿ ಮೇ ಅಯ್ಯೇ, ಉಮ್ಮೀಲಿತ್ವಾ ಉದಿಕ್ಖತಿ;

ತಸ್ಮಾ ಅಚ್ಚಭಮುಂ ಲುದ್ದಂ, ದಜ್ಜಾಹಂ ದಕರಕ್ಖಿನೋ.

೨೪೭. ಸಸಮುದ್ದಪರಿಯಾಯಂ, ಮಹಿಂ ಸಾಗರಕುಣ್ಡಲಂ;

ವಸುನ್ಧರಂ ಆವಸಸಿ, ಅಮಚ್ಚಪರಿವಾರಿತೋ.

೨೪೮. ಚಾತುರನ್ತೋ ಮಹಾರಟ್ಠೋ, ವಿಜಿತಾವೀ ಮಹಬ್ಬಲೋ;

ಪಥಬ್ಯಾ ಏಕರಾಜಾಸಿ, ಯಸೋ ತೇ ವಿಪುಲಂ ಗತೋ.

೨೪೯. ಸೋಳಸಿತ್ಥಿಸಹಸ್ಸಾನಿ, ಆಮುತ್ತಮಣಿಕುಣ್ಡಲಾ;

ನಾನಾಜನಪದಾ ನಾರೀ, ದೇವಕಞ್ಞೂಪಮಾ ಸುಭಾ.

೨೫೦. ಏವಂ ಸಬ್ಬಙ್ಗಸಮ್ಪನ್ನಂ, ಸಬ್ಬಕಾಮಸಮಿದ್ಧಿನಂ;

ಸುಖಿತಾನಂ ಪಿಯಂ ದೀಘಂ, ಜೀವಿತಂ ಆಹು ಖತ್ತಿಯ.

೨೫೧. ಅಥ ತ್ವಂ ಕೇನ ವಣ್ಣೇನ, ಕೇನ ವಾ ಪನ ಹೇತುನಾ;

ಪಣ್ಡಿತಂ ಅನುರಕ್ಖನ್ತೋ, ಪಾಣಂ ಚಜಸಿ ದುಚ್ಚಜಂ.

೨೫೨. ಯತೋಪಿ ಆಗತೋ ಅಯ್ಯೇ, ಮಮ ಹತ್ಥಂ ಮಹೋಸಧೋ;

ನಾಭಿಜಾನಾಮಿ ಧೀರಸ್ಸ, ಅನುಮತ್ತಮ್ಪಿ ದುಕ್ಕಟಂ.

೨೫೩. ಸಚೇ ಚ ಕಿಸ್ಮಿಚಿ ಕಾಲೇ, ಮರಣಂ ಮೇ ಪುರೇ ಸಿಯಾ;

ಸೋ ಮೇ ಪುತ್ತೇ [ಪುತ್ತೇ ಚ ಮೇ (ಸೀ. ಸ್ಯಾ. ಪೀ.] ಪಪುತ್ತೇ ಚ, ಸುಖಾಪೇಯ್ಯ ಮಹೋಸಧೋ.

೨೫೪. ಅನಾಗತಂ ಪಚ್ಚುಪ್ಪನ್ನಂ, ಸಬ್ಬಮತ್ಥಮ್ಪಿ ಪಸ್ಸತಿ [ಸಬ್ಬಮತ್ಥಂ ವಿಪಸ್ಸತಿ (ಸೀ. ಸ್ಯಾ. ಪೀ.)];

ಅನಾಪರಾಧಕಮ್ಮನ್ತಂ, ನ ದಜ್ಜಂ ದಕರಕ್ಖಿನೋ.

೨೫೫. ಇದಂ ಸುಣಾಥ ಪಞ್ಚಾಲಾ, ಚೂಳನೇಯ್ಯಸ್ಸ [ಚೂಳನೀಯಸ್ಸ (ಸೀ.)] ಭಾಸಿತಂ;

ಪಣ್ಡಿತಂ ಅನುರಕ್ಖನ್ತೋ, ಪಾಣಂ ಚಜತಿ ದುಚ್ಚಜಂ.

೨೫೬. ಮಾತು ಭರಿಯಾಯ ಭಾತುಚ್ಚ, ಸಖಿನೋ ಬ್ರಾಹ್ಮಣಸ್ಸ ಚ;

ಅತ್ತನೋ ಚಾಪಿ ಪಞ್ಚಾಲೋ, ಛನ್ನಂ ಚಜತಿ ಜೀವಿತಂ.

೨೫೭. ಏವಂ ಮಹತ್ಥಿಕಾ [ಖಹಿದ್ಧಿಯಾ (ಸ್ಯಾ.), ಮಹಿದ್ಧಿಕಾ (ಕ.)] ಪಞ್ಞಾ, ನಿಪುಣಾ ಸಾಧುಚಿನ್ತಿನೀ;

ದಿಟ್ಠಧಮ್ಮಹಿತತ್ಥಾಯ, ಸಮ್ಪರಾಯಸುಖಾಯ ಚಾತಿ.

ದಕರಕ್ಖಸಜಾತಕಂ ಸತ್ತಮಂ.