೫೧೮. ಪಣ್ಡರನಾಗರಾಜಜಾತಕಂ (೮)

೨೫೮. ವಿಕಿಣ್ಣವಾಚಂ ಅನಿಗುಯ್ಹ [ಅನಿಗೂಳ್ಹ (ಪೀ.)] ಮನ್ತಂ, ಅಸಞ್ಞತಂ ಅಪರಿಚಕ್ಖಿತಾರಂ [ಅಪರಿರಕ್ಖಿತಾರಂ (ಕ.)];

ಭಯಂ ತಮನ್ವೇತಿ ಸಯಂ ಅಬೋಧಂ, ನಾಗಂ ಯಥಾ ಪಣ್ಡರಕಂ ಸುಪಣ್ಣೋ [ಸುವಣ್ಣೋ (ಕ.)].

೨೫೯. ಯೋ ಗುಯ್ಹಮನ್ತಂ ಪರಿರಕ್ಖನೇಯ್ಯಂ, ಮೋಹಾ ನರೋ ಸಂಸತಿ ಹಾಸಮಾನೋ [ಭಾಸಮಾನೋ (ಪೀ.)];

ತಂ ಭಿನ್ನಮನ್ತಂ ಭಯಮನ್ವೇತಿ ಖಿಪ್ಪಂ, ನಾಗಂ ಯಥಾ ಪಣ್ಡರಕಂ ಸುಪಣ್ಣೋ.

೨೬೦. ನಾನುಮಿತ್ತೋ ಗರುಂ ಅತ್ಥಂ, ಗುಯ್ಹಂ ವೇದಿತುಮರಹತಿ;

ಸುಮಿತ್ತೋ ಚ ಅಸಮ್ಬುದ್ಧಂ, ಸಮ್ಬುದ್ಧಂ ವಾ ಅನತ್ಥ ವಾ.

೨೬೧. ವಿಸ್ಸಾಸಮಾಪಜ್ಜಿಮಹಂ ಅಚೇಲಂ [ಅಚೇಲೋ (ಸೀ. ಪೀ.)], ಸಮಣೋ ಅಯಂ ಸಮ್ಮತೋ ಭಾವಿತತ್ತೋ;

ತಸ್ಸಾಹಮಕ್ಖಿಂ ವಿವರಿಂ [ವಿವರಂ (ಸೀ.)] ಗುಯ್ಹಮತ್ಥಂ, ಅತೀತಮತ್ಥೋ ಕಪಣಂ [ಕಪಣೋ (ಪೀ.)] ರುದಾಮಿ.

೨೬೨. ತಸ್ಸಾಹಂ ಪರಮಂ [ಪುರಿಮಂ (ಸೀ.)] ಬ್ರಹ್ಮೇ ಗುಯ್ಹಂ, ವಾಚಞ್ಹಿ ಮಂ ನಾಸಕ್ಖಿಂ [ನಾಸಕ್ಖಿ (ಪೀ.)] ಸಂಯಮೇತುಂ;

ತಪ್ಪಕ್ಖತೋ ಹಿ ಭಯಮಾಗತಂ ಮಮಂ, ಅತೀತಮತ್ಥೋ ಕಪಣಂ ರುದಾಮಿ.

೨೬೩. ಯೋ ವೇ ನರೋ ಸುಹದಂ ಮಞ್ಞಮಾನೋ, ಗುಯ್ಹಮತ್ಥಂ ಸಂಸತಿ ದುಕ್ಕುಲೀನೇ;

ದೋಸಾ ಭಯಾ ಅಥವಾ ರಾಗರತ್ತಾ [ರಾಗರತ್ತೋ (ಸೀ. ಸ್ಯಾ. ಪೀ.)], ಪಲ್ಲತ್ಥಿತೋ [ಪಲ್ಲಿತ್ಥೋ (ಪೀ.), ಪಲ್ಲತ್ತಿತೋ (ಕ.)] ಬಾಲೋ ಅಸಂಸಯಂ ಸೋ.

೨೬೪. ತಿರೋಕ್ಖವಾಚೋ ಅಸತಂ ಪವಿಟ್ಠೋ, ಯೋ ಸಙ್ಗತೀಸು ಮುದೀರೇತಿ ವಾಕ್ಯಂ;

ಆಸೀವಿಸೋ ದುಮ್ಮುಖೋತ್ಯಾಹು ತಂ ನರಂ, ಆರಾ ಆರಾ [ಆರಾ ಅರಾ (ಪೀ.)] ಸಂಯಮೇ ತಾದಿಸಮ್ಹಾ.

೨೬೫. ಅನ್ನಂ ಪಾನಂ ಕಾಸಿಕ [ಕಾಸಿಕಂ (ಪೀ.)] ಚನ್ದನಞ್ಚ, ಮನಾಪಿತ್ಥಿಯೋ ಮಾಲಮುಚ್ಛಾದನಞ್ಚ;

ಓಹಾಯ ಗಚ್ಛಾಮಸೇ ಸಬ್ಬಕಾಮೇ, ಸುಪಣ್ಣ ಪಾಣೂಪಗತಾವ ತ್ಯಮ್ಹಾ.

೨೬೬. ಕೋ ನೀಧ ತಿಣ್ಣಂ ಗರಹಂ ಉಪೇತಿ, ಅಸ್ಮಿಂಧ ಲೋಕೇ ಪಾಣಭೂ ನಾಗರಾಜ;

ಸಮಣೋ ಸುಪಣ್ಣೋ ಅಥ ವಾ ತ್ವಮೇವ, ಕಿಂ ಕಾರಣಾ ಪಣ್ಡರಕಗ್ಗಹೀತೋ.

೨೬೭. ಸಮಣೋತಿ ಮೇ ಸಮ್ಮತತ್ತೋ ಅಹೋಸಿ, ಪಿಯೋ ಚ ಮೇ ಮನಸಾ ಭಾವಿತತ್ತೋ;

ತಸ್ಸಾಹಮಕ್ಖಿಂ ವಿವರಿಂ ಗುಯ್ಹಮತ್ಥಂ, ಅತೀತಮತ್ಥೋ ಕಪಣಂ ರುದಾಮಿ.

೨೬೮. ನ ಚತ್ಥಿ ಸತ್ತೋ ಅಮರೋ ಪಥಬ್ಯಾ, ಪಞ್ಞಾವಿಧಾ ನತ್ಥಿ ನ ನಿನ್ದಿತಬ್ಬಾ;

ಸಚ್ಚೇನ ಧಮ್ಮೇನ ಧಿತಿಯಾ [ಧಿಯಾ (ಸೀ. ಪೀ.)] ದಮೇನ, ಅಲಬ್ಭಮಬ್ಯಾಹರತೀ ನರೋ ಇಧ.

೨೬೯. ಮಾತಾಪಿತಾ ಪರಮಾ ಬನ್ಧವಾನಂ, ನಾಸ್ಸ ತತಿಯೋ ಅನುಕಮ್ಪಕತ್ಥಿ;

ತೇಸಮ್ಪಿ ಗುಯ್ಹಂ ಪರಮಂ ನ ಸಂಸೇ, ಮನ್ತಸ್ಸ ಭೇದಂ ಪರಿಸಙ್ಕಮಾನೋ.

೨೭೦. ಮಾತಾಪಿತಾ ಭಗಿನೀ ಭಾತರೋ ಚ, ಸಹಾಯಾ ವಾ ಯಸ್ಸ ಹೋನ್ತಿ ಸಪಕ್ಖಾ;

ತೇಸಮ್ಪಿ ಗುಯ್ಹಂ ಪರಮಂ ನ ಸಂಸೇ, ಮನ್ತಸ್ಸ ಭೇದಂ ಪರಿಸಙ್ಕಮಾನೋ.

೨೭೧. ಭರಿಯಾ ಚೇ ಪುರಿಸಂ ವಜ್ಜಾ, ಕೋಮಾರೀ ಪಿಯಭಾಣಿನೀ;

ಪುತ್ತರೂಪಯಸೂಪೇತಾ, ಞಾತಿಸಙ್ಘಪುರಕ್ಖತಾ, ತಸ್ಸಾಪಿ ಗುಯ್ಹಂ ಪರಮಂ ನ ಸಂಸೇ;

ಮನ್ತಸ್ಸ ಭೇದಂ ಪರಿಸಙ್ಕಮಾನೋ.

೨೭೨. ನ ಗುಯ್ಹಮತ್ಥಂ [ಗುಯ್ಹತ್ಥಂ (ಕ.)] ವಿವರೇಯ್ಯ, ರಕ್ಖೇಯ್ಯ ನಂ ಯಥಾ ನಿಧಿಂ;

ನ ಹಿ ಪಾತುಕತೋ ಸಾಧು, ಗುಯ್ಹೋ ಅತ್ಥೋ ಪಜಾನತಾ.

೨೭೩. ಥಿಯಾ ಗುಯ್ಹಂ ನ ಸಂಸೇಯ್ಯ, ಅಮಿತ್ತಸ್ಸ ಚ ಪಣ್ಡಿತೋ;

ಯೋ ಚಾಮಿಸೇನ ಸಂಹೀರೋ, ಹದಯತ್ಥೇನೋ ಚ ಯೋ ನರೋ.

೨೭೪. ಗುಯ್ಹಮತ್ಥಂ ಅಸಮ್ಬುದ್ಧಂ, ಸಮ್ಬೋಧಯತಿ ಯೋ ನರೋ;

ಮನ್ತಭೇದಭಯಾ ತಸ್ಸ, ದಾಸಭೂತೋ ತಿತಿಕ್ಖತಿ.

೨೭೫. ಯಾವನ್ತೋ ಪುರಿಸಸ್ಸತ್ಥಂ, ಗುಯ್ಹಂ ಜಾನನ್ತಿ ಮನ್ತಿನಂ;

ತಾವನ್ತೋ ತಸ್ಸ ಉಬ್ಬೇಗಾ, ತಸ್ಮಾ ಗುಯ್ಹಂ ನ ವಿಸ್ಸಜೇ.

೨೭೬. ವಿವಿಚ್ಚ ಭಾಸೇಯ್ಯ ದಿವಾ ರಹಸ್ಸಂ, ರತ್ತಿಂ ಗಿರಂ ನಾತಿವೇಲಂ ಪಮುಞ್ಚೇ;

ಉಪಸ್ಸುತಿಕಾ ಹಿ ಸುಣನ್ತಿ ಮನ್ತಂ, ತಸ್ಮಾ ಮನ್ತೋ ಖಿಪ್ಪಮುಪೇತಿ ಭೇದಂ.

೨೭೭. ಯಥಾಪಿ ಅಸ್ಸ [ಅಯೋ (ಸ್ಯಾ.), ಅಯ (ಕ.)] ನಗರಂ ಮಹನ್ತಂ, ಅದ್ವಾರಕಂ [ಆಳಾರಕಂ (ಪೀ.)] ಆಯಸಂ ಭದ್ದಸಾಲಂ;

ಸಮನ್ತಖಾತಾಪರಿಖಾಉಪೇತಂ, ಏವಮ್ಪಿ ಮೇ ತೇ ಇಧ ಗುಯ್ಹಮನ್ತಾ.

೨೭೮. ಯೇ ಗುಯ್ಹಮನ್ತಾ ಅವಿಕಿಣ್ಣವಾಚಾ, ದಳ್ಹಾ ಸದತ್ಥೇಸು ನರಾ ದುಜಿವ್ಹ [ದುಜಿವ್ಹಾ (ಸ್ಯಾ. ಪೀ.)];

ಆರಾ ಅಮಿತ್ತಾ ಬ್ಯವಜನ್ತಿ ತೇಹಿ, ಆಸೀವಿಸಾ ವಾ ರಿವ ಸತ್ತುಸಙ್ಘಾ [ಸತ್ತಸಙ್ಘಾ (ಸೀ. ಸ್ಯಾ.)].

೨೭೯. ಹಿತ್ವಾ ಘರಂ ಪಬ್ಬಜಿತೋ ಅಚೇಲೋ, ನಗ್ಗೋ ಮುಣ್ಡೋ ಚರತಿ ಘಾಸಹೇತು;

ತಮ್ಹಿ [ತಮ್ಹೀ (ಪೀ.)] ನು ಖೋ ವಿವರಿಂ ಗುಯ್ಹಮತ್ಥಂ, ಅತ್ಥಾ ಚ ಧಮ್ಮಾ ಚ ಅಪಗ್ಗತಮ್ಹಾ [ಅಪಾಗತಮ್ಹಾ (ಸೀ.), ಅಪಗತಮ್ಹಾ (ಸ್ಯಾ.), ಅವಾಗತಮ್ಹಾ (ಪೀ.)].

೨೮೦. ಕಥಂಕರೋ ಹೋತಿ ಸುಪಣ್ಣರಾಜ, ಕಿಂಸೀಲೋ ಕೇನ ವತೇನ ವತ್ತಂ;

ಸಮಣೋ ಚರಂ ಹಿತ್ವಾ ಮಮಾಯಿತಾನಿ, ಕಥಂಕರೋ ಸಗ್ಗಮುಪೇತಿ ಠಾನಂ.

೨೮೧. ಹಿರಿಯಾ ತಿತಿಕ್ಖಾಯ ದಮೇನುಪೇತೋ [ದಮೇನ ಖನ್ತಿಯಾ (ಸೀ. ಸ್ಯಾ. ಪೀ.)], ಅಕ್ಕೋಧನೋ ಪೇಸುಣಿಯಂ ಪಹಾಯ;

ಸಮಣೋ ಚರಂ ಹಿತ್ವಾ ಮಮಾಯಿತಾನಿ, ಏವಂಕರೋ ಸಗ್ಗಮುಪೇತಿ ಠಾನಂ.

೨೮೨. ಮಾತಾವ ಪುತ್ತಂ ತರುಣಂ ತನುಜ್ಜಂ [ತನೂಜಂ (ಸೀ.)], ಸಮ್ಫಸ್ಸತಾ [ಸಮ್ಪಸ್ಸ ತಂ (ಸೀ. ಪೀ.)] ಸಬ್ಬಗತ್ತಂ ಫರೇತಿ;

ಏವಮ್ಪಿ ಮೇ ತ್ವಂ ಪಾತುರಹು ದಿಜಿನ್ದ, ಮಾತಾವ ಪುತ್ತಂ ಅನುಕಮ್ಪಮಾನೋ.

೨೮೩. ಹನ್ದಜ್ಜ ತ್ವಂ ಮುಞ್ಚ [ಮುಚ್ಚ (ಸೀ.)] ವಧಾ ದುಜಿವ್ಹ, ತಯೋ ಹಿ ಪುತ್ತಾ ನ ಹಿ ಅಞ್ಞೋ ಅತ್ಥಿ;

ಅನ್ತೇವಾಸೀ ದಿನ್ನಕೋ ಅತ್ರಜೋ ಚ, ರಜ್ಜಸ್ಸು [ರಜಸ್ಸು (ಸೀ. ಸ್ಯಾ. ಪೀ.)] ಪುತ್ತಞ್ಞತರೋ ಮೇ ಅಹೋಸಿ.

೨೮೪. ಇಚ್ಚೇವ ವಾಕ್ಯಂ ವಿಸಜ್ಜೀ ಸುಪಣ್ಣೋ, ಭುಮ್ಯಂ ಪತಿಟ್ಠಾಯ ದಿಜೋ ದುಜಿವ್ಹಂ;

ಮುತ್ತಜ್ಜ ತ್ವಂ ಸಬ್ಬಭಯಾತಿವತ್ತೋ, ಥಲೂದಕೇ ಹೋಹಿ ಮಯಾಭಿಗುತ್ತೋ.

೨೮೫. ಆತಙ್ಕಿನಂ ಯಥಾ ಕುಸಲೋ ಭಿಸಕ್ಕೋ, ಪಿಪಾಸಿತಾನಂ ರಹದೋವ ಸೀತೋ;

ವೇಸ್ಮಂ ಯಥಾ ಹಿಮಸೀತಟ್ಟಿತಾನಂ [ಹಿಮಸಿಸಿರಟ್ಟಿತಾನಂ (ಪೀ.)], ಏವಮ್ಪಿ ತೇ ಸರಣಮಹಂ ಭವಾಮಿ.

೨೮೬. ಸನ್ಧಿಂ ಕತ್ವಾ ಅಮಿತ್ತೇನ, ಅಣ್ಡಜೇನ ಜಲಾಬುಜ;

ವಿವರಿಯ ದಾಠಂ ಸೇಸಿ, ಕುತೋ ತಂ ಭಯಮಾಗತಂ.

೨೮೭. ಸಙ್ಕೇಥೇವ ಅಮಿತ್ತಸ್ಮಿಂ, ಮಿತ್ತಸ್ಮಿಮ್ಪಿ ನ ವಿಸ್ಸಸೇ;

ಅಭಯಾ ಭಯಮುಪ್ಪನ್ನಂ, ಅಪಿ ಮೂಲಾನಿ ಕನ್ತತಿ.

೨೮೮. ಕಥಂ ನು ವಿಸ್ಸಸೇ ತ್ಯಮ್ಹಿ, ಯೇನಾಸಿ ಕಲಹೋ ಕತೋ;

ನಿಚ್ಚಯತ್ತೇನ ಠಾತಬ್ಬಂ, ಸೋ ದಿಸಬ್ಭಿ [ಸೋ ದಿಸಮ್ಹಿ (ಪೀ.)] ನ ರಜ್ಜತಿ.

೨೮೯. ವಿಸ್ಸಾಸಯೇ ನ ಚ ತಂ [ನಂ (ಸೀ. ಸ್ಯಾ. ಪೀ.)] ವಿಸ್ಸಯೇಯ್ಯ, ಅಸಙ್ಕಿತೋ ಸಙ್ಕಿತೋ ಚ [ಅಸಙ್ಕಿತೋ ಚ ಸಙ್ಕಿತೋ (ಸೀ. ಪೀ.)] ಭವೇಯ್ಯ;

ತಥಾ ತಥಾ ವಿಞ್ಞೂ ಪರಕ್ಕಮೇಯ್ಯ, ಯಥಾ ಯಥಾ ಭಾವಂ ಪರೋ ನ ಜಞ್ಞಾ.

೨೯೦. ತೇ ದೇವವಣ್ಣಾ [ದೇವವಣ್ಣೀ (ಪೀ.)] ಸುಖುಮಾಲರೂಪಾ, ಉಭೋ ಸಮಾ ಸುಜಯಾ [ಸುಜಯೋ (ಸೀ. ಸ್ಯಾ. ಪೀ.)] ಪುಞ್ಞಖನ್ಧಾ [ಪುಞ್ಞಗನ್ಧಾ (ಪೀ.)];

ಉಪಾಗಮುಂ ಕರಮ್ಪಿಯಂ [ಕಾದಮ್ಬಿಯಂ (ಸೀ.), ಕಾರಮ್ಬಿಯಂ (ಪೀ.)] ಅಚೇಲಂ, ಮಿಸ್ಸೀಭೂತಾ ಅಸ್ಸವಾಹಾವ ನಾಗಾ.

೨೯೧. ತತೋ ಹವೇ ಪಣ್ಡರಕೋ ಅಚೇಲಂ, ಸಯಮೇವುಪಾಗಮ್ಮ ಇದಂ ಅವೋಚ;

ಮುತ್ತಜ್ಜಹಂ ಸಬ್ಬಭಯಾತಿವತ್ತೋ, ನ ಹಿ [ಹ (ಪೀ.)] ನೂನ ತುಯ್ಹಂ ಮನಸೋ ಪಿಯಮ್ಹಾ.

೨೯೨. ಪಿಯೋ ಹಿ ಮೇ ಆಸಿ ಸುಪಣ್ಣರಾಜಾ, ಅಸಂಸಯಂ ಪಣ್ಡರಕೇನ ಸಚ್ಚಂ;

ಸೋ ರಾಗರತ್ತೋವ ಅಕಾಸಿಮೇತಂ, ಪಾಪಕಮ್ಮಂ [ಪಾಪಂ ಕಮ್ಮಂ (ಸೀ. ಪೀ.)] ಸಮ್ಪಜಾನೋ ನ ಮೋಹಾ.

೨೯೩. ನ ಮೇ ಪಿಯಂ ಅಪ್ಪಿಯಂ ವಾಪಿ ಹೋತಿ, ಸಮ್ಪಸ್ಸತೋ ಲೋಕಮಿಮಂ ಪರಞ್ಚ;

ಸುಸಞ್ಞತಾನಞ್ಹಿ ವಿಯಞ್ಜನೇನ, ಅಸಞ್ಞತೋ ಲೋಕಮಿಮಂ ಚರಾಸಿ.

೨೯೪. ಅರಿಯಾವಕಾಸೋಸಿ ಅನರಿಯೋವಾಸಿ [ಅನರಿಯೋ ಚಾಸಿ (ಸೀ. ಪೀ.)], ಅಸಞ್ಞತೋ ಸಞ್ಞತಸನ್ನಿಕಾಸೋ;

ಕಣ್ಹಾಭಿಜಾತಿಕೋಸಿ ಅನರಿಯರೂಪೋ, ಪಾಪಂ ಬಹುಂ ದುಚ್ಚರಿತಂ ಅಚಾರಿ.

೨೯೫. ಅದುಟ್ಠಸ್ಸ ತುವಂ ದುಬ್ಭಿ, ದುಬ್ಭೀ [ದೂಭಿ, ದೂಭೀ (ಪೀ.)] ಚ ಪಿಸುಣೋ ಚಸಿ;

ಏತೇನ ಸಚ್ಚವಜ್ಜೇನ, ಮುದ್ಧಾ ತೇ ಫಲತು ಸತ್ತಧಾ.

೨೯೬. ತಸ್ಮಾ ಹಿ ಮಿತ್ತಾನಂ ನ ದುಬ್ಭಿತಬ್ಬಂ, ಮಿತ್ತದುಬ್ಭಾ [ಮಿತ್ತದುಬ್ಭಾ ಹಿ (ಸ್ಯಾ.)] ಪಾಪಿಯೋ ನತ್ಥಿ ಅಞ್ಞೋ;

ಆಸಿತ್ತಸತ್ತೋ ನಿಹತೋ ಪಥಬ್ಯಾ, ಇನ್ದಸ್ಸ ವಾಕ್ಯೇನ ಹಿ ಸಂವರೋ ಹತೋತಿ.

ಪಣ್ಡರನಾಗರಾಜಜಾತಕಂ [ಪಣ್ಡರಕಜಾತಕಂ (ಸೀ. ಸ್ಯಾ. ಪೀ.)] ಅಟ್ಠಮಂ.