೫೧೬. ಮಹಾಕಪಿಜಾತಕಂ (೬)

೧೭೮. ಬಾರಾಣಸ್ಯಂ [ಬಾರಾಣಸ್ಸಂ (ಸೀ. ಪೀ.)] ಅಹೂ ರಾಜಾ, ಕಾಸೀನಂ ರಟ್ಠವಡ್ಢನೋ;

ಮಿತ್ತಾಮಚ್ಚಪರಿಬ್ಯೂಳ್ಹೋ, ಅಗಮಾಸಿ ಮಿಗಾಜಿನಂ [ಮಿಗಾಜಿರಂ (ಸೀ.), ಮಿಗಾಚಿರಂ (ಪೀ.)].

೧೭೯. ತತ್ಥ ಬ್ರಾಹ್ಮಣಮದ್ದಕ್ಖಿ, ಸೇತಂ ಚಿತ್ರಂ ಕಿಲಾಸಿನಂ;

ವಿದ್ಧಸ್ತಂ ಕೋವಿಳಾರಂವ, ಕಿಸಂ ಧಮನಿಸನ್ಥತಂ.

೧೮೦. ಪರಮಕಾರುಞ್ಞತಂ ಪತ್ತಂ, ದಿಸ್ವಾ ಕಿಚ್ಛಗತಂ ನರಂ;

ಅವಚ ಬ್ಯಮ್ಹಿತೋ ರಾಜಾ, ‘‘ಯಕ್ಖಾನಂ ಕತಮೋ ನುಸಿ.

೧೮೧. ‘‘ಹತ್ಥಪಾದಾ ಚ ತೇ ಸೇತಾ, ತತೋ ಸೇತತರಂ [ಸೇತತರೋ (ಪೀ.)] ಸಿರೋ;

ಗತ್ತಂ ಕಮ್ಮಾಸವಣ್ಣಂ ತೇ, ಕಿಲಾಸಬಹುಲೋ ಚಸಿ.

೧೮೨. ‘‘ವಟ್ಟನಾವಳಿ [ವಟ್ಠನಾವಲಿ (ಪೀ.)] ಸಙ್ಕಾಸಾ, ಪಿಟ್ಠಿ ತೇ ನಿನ್ನತುನ್ನತಾ;

ಕಾಳಪಬ್ಬಾವ [ಕಾಳಪಬ್ಬಾ ಚ (ಸ್ಯಾ.), ಕಾಳಾ ಪಬ್ಬಾ ಚ (ಪೀ.)] ತೇ ಅಙ್ಗಾ, ನಾಞ್ಞಂ ಪಸ್ಸಾಮಿ ಏದಿಸಂ.

೧೮೩. ‘‘ಉಗ್ಘಟ್ಟಪಾದೋ ತಸಿತೋ, ಕಿಸೋ ಧಮನಿಸನ್ಥತೋ;

ಛಾತೋ ಆತತ್ತರೂಪೋಸಿ [ಆದಿತ್ತರೂಪೋಸಿ (ಕ.), ಅತಿತ್ತರೂಪೋಸಿ (ಸ್ಯಾ. ಕ. ಅಟ್ಠ.)], ಕುತೋಸಿ ಕತ್ಥ ಗಚ್ಛಸಿ.

೧೮೪. ‘‘ದುದ್ದಸೀ ಅಪ್ಪಕಾರೋಸಿ, ದುಬ್ಬಣ್ಣೋ ಭೀಮದಸ್ಸನೋ;

ಜನೇತ್ತಿ ಯಾಪಿ ತೇ ಮಾತಾ, ನ ತಂ ಇಚ್ಛೇಯ್ಯ ಪಸ್ಸಿತುಂ.

೧೮೫. ‘‘ಕಿಂ ಕಮ್ಮಮಕರಂ [ಕಮ್ಮಮಕರಾ (ಸೀ. ಸ್ಯಾ. ಪೀ.)] ಪುಬ್ಬೇ, ಕಂ ಅವಜ್ಝಂ ಅಘಾತಯಿ;

ಕಿಬ್ಬಿಸಂ ಯಂ ಕರಿತ್ವಾನ, ಇದಂ ದುಕ್ಖಂ ಉಪಾಗಮಿ’’.

೧೮೬. ತಗ್ಘ ತೇ ಅಹಮಕ್ಖಿಸ್ಸಂ, ಯಥಾಪಿ ಕುಸಲೋ ತಥಾ;

ಸಚ್ಚವಾದಿಞ್ಹಿ ಲೋಕಸ್ಮಿಂ, ಪಸಂಸನ್ತೀಧ ಪಣ್ಡಿತಾ.

೧೮೭. ಏಕೋ ಚರಂ ಗೋಗವೇಸೋ, ಮೂಳ್ಹೋ ಅಚ್ಚಸರಿಂ ವನೇ;

ಅರಞ್ಞೇ ಇರೀಣೇ [ಈರಿಣೇ (ಸೀ. ಸ್ಯಾ. ಪೀ.)] ವಿವನೇ, ನಾನಾಕುಞ್ಜರಸೇವಿತೇ.

೧೮೮. ವಾಳಮಿಗಾನುಚರಿತೇ, ವಿಪ್ಪನಟ್ಠೋಸ್ಮಿ ಕಾನನೇ;

ಅಚರಿಂ ತತ್ಥ ಸತ್ತಾಹಂ, ಖುಪ್ಪಿಪಾಸ [ಖುಪ್ಪಿಪಾಸಾ (ಸೀ. ಪೀ.)] ಸಮಪ್ಪಿತೋ.

೧೮೯. ತತ್ಥ ತಿನ್ದುಕಮದ್ದಕ್ಖಿಂ, ವಿಸಮಟ್ಠಂ ಬುಭುಕ್ಖಿತೋ;

ಪಪಾತಮಭಿಲಮ್ಬನ್ತಂ, ಸಮ್ಪನ್ನಫಲಧಾರಿನಂ.

೧೯೦. ವಾತಸ್ಸಿತಾನಿ ಭಕ್ಖೇಸಿಂ, ತಾನಿ ರುಚ್ಚಿಂಸು ಮೇ ಭುಸಂ;

ಅತಿತ್ತೋ ರುಕ್ಖಮಾರೂಹಿಂ [ಮಾರುಯ್ಹ (ಸೀ. ಸ್ಯಾ.)], ತತ್ಥ ಹೇಸ್ಸಾಮಿ ಆಸಿತೋ.

೧೯೧. ಏಕಂ ಮೇ ಭಕ್ಖಿತಂ ಆಸಿ, ದುತಿಯಂ ಅಭಿಪತ್ಥಿತಂ;

ತತೋ ಸಾ ಭಞ್ಜಥ ಸಾಖಾ, ಛಿನ್ನಾ ಫರಸುನಾ ವಿಯ.

೧೯೨. ಸೋಹಂ ಸಹಾವ ಸಾಖಾಹಿ, ಉದ್ಧಂಪಾದೋ ಅವಂಸಿರೋ;

ಅಪ್ಪತಿಟ್ಠೇ ಅನಾಲಮ್ಬೇ, ಗಿರಿದುಗ್ಗಸ್ಮಿ ಪಾಪತಂ.

೧೯೩. ಯಸ್ಮಾ ಚ ವಾರಿ ಗಮ್ಭೀರಂ, ತಸ್ಮಾ ನ ಸಮಪಜ್ಜಿಸಂ [ಸಮಪಜ್ಜಸಿಂ (ಸೀ.), ಸಮಭಜ್ಜಿಸಂ (ಪೀ.)];

ತತ್ಥ ಸೇಸಿಂ ನಿರಾನನ್ದೋ, ಅನೂನಾ [ಅನಾಥೋ (ಸೀ.)] ದಸ ರತ್ತಿಯೋ.

೧೯೪. ಅಥೇತ್ಥ ಕಪಿ ಮಾಗಞ್ಛಿ [ಮಾಗಚ್ಛಿ (ಸ್ಯಾ. ಕ.)], ಗೋನಙ್ಗುಲೋ ದರೀಚರೋ;

ಸಾಖಾಹಿ ಸಾಖಂ ವಿಚರನ್ತೋ, ಖಾದಮಾನೋ ದುಮಪ್ಫಲಂ.

೧೯೫. ಸೋ ಮಂ ದಿಸ್ವಾ ಕಿಸಂ ಪಣ್ಡುಂ, ಕಾರುಞ್ಞಮಕರಂ ಮಯಿ;

ಅಮ್ಭೋ ಕೋ ನಾಮ ಸೋ ಏತ್ಥ, ಏವಂ ದುಕ್ಖೇನ ಅಟ್ಟಿತೋ.

೧೯೬. ಮನುಸ್ಸೋ ಅಮನುಸ್ಸೋ ವಾ, ಅತ್ತಾನಂ ಮೇ ಪವೇದಯ;

ತಸ್ಸಞ್ಜಲಿಂ ಪಣಾಮೇತ್ವಾ, ಇದಂ ವಚನಮಬ್ರವಿಂ.

೧೯೭. ಮನುಸ್ಸೋಹಂ ಬ್ಯಸಮ್ಪತ್ತೋ [ವಸಮ್ಪತ್ತೋ (ಸ್ಯಾ. ಕ.)], ಸಾ ಮೇ ನತ್ಥಿ ಇತೋ ಗತಿ;

ತಂ ವೋ ವದಾಮಿ ಭದ್ದಂ ವೋ, ತ್ವಞ್ಚ ಮೇ ಸರಣಂ ಭವ.

೧೯೮. ಗರುಂ [ಗರು (ಸೀ. ಪೀ.)] ಸಿಲಂ ಗಹೇತ್ವಾನ, ವಿಚರೀ [ವಿಚರಿ (ಪೀ.)] ಪಬ್ಬತೇ ಕಪಿ;

ಸಿಲಾಯ ಯೋಗ್ಗಂ ಕತ್ವಾನ, ನಿಸಭೋ ಏತದಬ್ರವಿ.

೧೯೯. ಏಹಿ ಮೇ ಪಿಟ್ಠಿಮಾರುಯ್ಹ, ಗೀವಂ ಗಣ್ಹಾಹಿ ಬಾಹುಭಿ;

ಅಹಂ ತಂ ಉದ್ಧರಿಸ್ಸಾಮಿ, ಗಿರಿದುಗ್ಗತ ವೇಗಸಾ.

೨೦೦. ತಸ್ಸ ತಂ ವಚನಂ ಸುತ್ವಾ, ವಾನರಿನ್ದಸ್ಸ ಸಿರೀಮತೋ;

ಪಿಟ್ಠಿಮಾರುಯ್ಹ ಧೀರಸ್ಸ, ಗೀವಂ ಬಾಹಾಹಿ ಅಗ್ಗಹಿಂ.

೨೦೧. ಸೋ ಮಂ ತತೋ ಸಮುಟ್ಠಾಸಿ, ತೇಜಸ್ಸೀ [ತೇಜಸೀ (ಸ್ಯಾ. ಪೀ. ಕ.)] ಬಲವಾ ಕಪಿ;

ವಿಹಞ್ಞಮಾನೋ ಕಿಚ್ಛೇನ, ಗಿರಿದುಗ್ಗತ ವೇಗಸಾ.

೨೦೨. ಉದ್ಧರಿತ್ವಾನ ಮಂ ಸನ್ತೋ, ನಿಸಭೋ ಏತದಬ್ರವಿ;

ಇಙ್ಘ ಮಂ ಸಮ್ಮ ರಕ್ಖಸ್ಸು, ಪಸ್ಸುಪಿಸ್ಸಂ ಮುಹುತ್ತಕಂ.

೨೦೩. ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಯೋ;

ತೇ ಮಂ ಪಮತ್ತಂ ಹಿಂಸೇಯ್ಯುಂ, ತೇ ತ್ವಂ ದಿಸ್ವಾ ನಿವಾರಯ [ದಿಸ್ವಾನ ವಾರಯ (ಪೀ.)].

೨೦೪. ಏವಂ ಮೇ ಪರಿತ್ತಾತೂನ [ಪರಿತ್ತಾತುನ (ಕ.)], ಪಸ್ಸುಪಿ ಸೋ ಮುಹುತ್ತಕಂ;

ತದಾಹಂ ಪಾಪಿಕಂ ದಿಟ್ಠಿಂ, ಪಟಿಲಚ್ಛಿಂ ಅಯೋನಿಸೋ.

೨೦೫. ಭಕ್ಖೋ ಅಯಂ ಮನುಸ್ಸಾನಂ, ಯಥಾ ಚಞ್ಞೇ ವನೇ ಮಿಗಾ;

ಯಂ ನೂನಿಮಂ ವಧಿತ್ವಾನ, ಛಾತೋ ಖಾದೇಯ್ಯ ವಾನರಂ.

೨೦೬. ಅಸಿತೋ [ಆಸಿಕೋ (ಪೀ.)] ಚ ಗಮಿಸ್ಸಾಮಿ, ಮಂಸಮಾದಾಯ ಸಮ್ಬಲಂ;

ಕನ್ತಾರಂ ನಿತ್ಥರಿಸ್ಸಾಮಿ, ಪಾಥೇಯ್ಯಂ ಮೇ ಭವಿಸ್ಸತಿ.

೨೦೭. ತತೋ ಸಿಲಂ ಗಹೇತ್ವಾನ, ಮತ್ಥಕಂ ಸನ್ನಿತಾಳಯಿಂ;

ಮಮ ಗತ್ತ [ಭತ್ತ (ಸೀ. ಸ್ಯಾ.), ಹತ್ಥ (ಪೀ.)] ಕಿಲನ್ತಸ್ಸ, ಪಹಾರೋ ದುಬ್ಬಲೋ ಅಹು.

೨೦೮. ಸೋ ಚ ವೇಗೇನುದಪ್ಪತ್ತೋ, ಕಪಿ ರುಹಿರ [ರುಧಿರ (ಸೀ.)] ಮಕ್ಖಿತೋ;

ಅಸ್ಸುಪುಣ್ಣೇಹಿ ನೇತ್ತೇಹಿ, ರೋದನ್ತೋ ಮಂ ಉದಿಕ್ಖತಿ.

೨೦೯. ಮಾಯ್ಯೋಮಂ ಕರಿ ಭದ್ದನ್ತೇ, ತ್ವಞ್ಚ ನಾಮೇದಿಸಂ ಕರಿ;

ತ್ವಞ್ಚ ಖೋ ನಾಮ ದೀಘಾವು [ದೀಘಾಯು (ಪೀ.)], ಅಞ್ಞೇ [ಅಞ್ಞಂ (ಪೀ.)] ವಾರೇತುಮರಹಸಿ.

೨೧೦. ಅಹೋ ವತ ರೇ ಪುರಿಸ, ತಾವ ದುಕ್ಕರಕಾರಕ;

ಏದಿಸಾ ವಿಸಮಾ ದುಗ್ಗಾ, ಪಪಾತಾ ಉದ್ಧತೋ [ಉದ್ಧಟೋ (ಪೀ.)] ಮಯಾ.

೨೧೧. ಆನೀತೋ ಪರಲೋಕಾವ, ದುಬ್ಭೇಯ್ಯಂ ಮಂ ಅಮಞ್ಞಥ;

ತಂ ತೇನ ಪಾಪಧಮ್ಮೇನ, ಪಾಪಂ ಪಾಪೇನ ಚಿನ್ತಿತಂ.

೨೧೨. ಮಾ ಹೇವ ತ್ವಂ ಅಧಮ್ಮಟ್ಠ, ವೇದನಂ ಕಟುಕಂ ಫುಸಿ;

ಮಾ ಹೇವ ಪಾಪಕಮ್ಮಂ ತಂ, ಫಲಂ ವೇಳುಂವ ತಂ ವಧಿ.

೨೧೩. ತಯಿಮೇ ನತ್ಥಿ ವಿಸ್ಸಾಸೋ, ಪಾಪಧಮ್ಮ ಅಸಞ್ಞತ [ಪಾಪಧಮ್ಮಂ ಅಮಞ್ಞಥ (ಪೀ.)];

ಏಹಿ ಮೇ ಪಿಟ್ಠಿತೋ ಗಚ್ಛ, ದಿಸ್ಸಮಾನೋವ ಸನ್ತಿಕೇ.

೨೧೪. ಮುತ್ತೋಸಿ ಹತ್ಥಾ ವಾಳಾನಂ, ಪತ್ತೋಸಿ ಮಾನುಸಿಂ ಪದಂ;

ಏಸ ಮಗ್ಗೋ ಅಧಮ್ಮಟ್ಠ, ತೇನ ಗಚ್ಛ ಯಥಾಸುಖಂ.

೨೧೫. ಇದಂ ವತ್ವಾ ಗಿರಿಚರೋ, ರಹದೇ [ರುಹಿರಂ (ಸ್ಯಾ. ಕ.)] ಪಕ್ಖಲ್ಯ ಮತ್ಥಕಂ;

ಅಸ್ಸೂನಿ ಸಮ್ಪಮಜ್ಜಿತ್ವಾ, ತತೋ ಪಬ್ಬತಮಾರುಹಿ.

೨೧೬. ಸೋಹಂ ತೇನಾಭಿಸತ್ತೋಸ್ಮಿ, ಪರಿಳಾಹೇನ ಅಟ್ಟಿತೋ;

ಡಯ್ಹಮಾನೇನ ಗತ್ತೇನ, ವಾರಿಂ ಪಾತುಂ ಉಪಾಗಮಿಂ.

೨೧೭. ಅಗ್ಗಿನಾ ವಿಯ ಸನ್ತತ್ತೋ, ರಹದೋ ರುಹಿರಮಕ್ಖಿತೋ;

ಪುಬ್ಬಲೋಹಿತಸಙ್ಕಾಸೋ, ಸಬ್ಬೋ ಮೇ ಸಮಪಜ್ಜಥ.

೨೧೮. ಯಾವನ್ತೋ ಉದಬಿನ್ದೂನಿ, ಕಾಯಸ್ಮಿಂ ನಿಪತಿಂಸು ಮೇ;

ತಾವನ್ತೋ ಗಣ್ಡ [ಗಣ್ಡೂ (ಸೀ. ಪೀ.), ಗಣ್ಡು (ಸ್ಯಾ.)] ಜಾಯೇಥ, ಅದ್ಧಬೇಲುವಸಾದಿಸಾ.

೨೧೯. ಪಭಿನ್ನಾ ಪಗ್ಘರಿಂಸು ಮೇ, ಕುಣಪಾ ಪುಬ್ಬಲೋಹಿತಾ;

ಯೇನ ಯೇನೇವ ಗಚ್ಛಾಮಿ, ಗಾಮೇಸು ನಿಗಮೇಸು ಚ.

೨೨೦. ದಣ್ಡಹತ್ಥಾ ನಿವಾರೇನ್ತಿ, ಇತ್ಥಿಯೋ ಪುರಿಸಾ ಚ ಮಂ;

ಓಕ್ಕಿತಾ [ಓಕಿಣ್ಣಾ (ಸೀ.)] ಪೂತಿಗನ್ಧೇನ, ಮಾಸ್ಸು ಓರೇನ ಆಗಮಾ [ಮಾಗಮಾ (ಸೀ. ಪೀ.)].

೨೨೧. ಏತಾದಿಸಂ ಇದಂ ದುಕ್ಖಂ, ಸತ್ತ ವಸ್ಸಾನಿ ದಾನಿ ಮೇ;

ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ದುಕ್ಕಟಮತ್ತನೋ.

೨೨೨. ತಂ ವೋ ವದಾಮಿ ಭದ್ದನ್ತೇ [ಭದ್ದಂ ವೋ (ಸೀ. ಪೀ.)], ಯಾವನ್ತೇತ್ಥ ಸಮಾಗತಾ;

ಮಾಸ್ಸು ಮಿತ್ತಾನ [ಮಿತ್ತಾನಂ (ಸೀ. ಪೀ.)] ದುಬ್ಭಿತ್ಥೋ, ಮಿತ್ತದುಬ್ಭೋ ಹಿ ಪಾಪಕೋ.

೨೨೩. ಕುಟ್ಠೀ ಕಿಲಾಸೀ ಭವತಿ, ಯೋ ಮಿತ್ತಾನಿಧ ದುಬ್ಭತಿ [ಯೋ ಮಿತ್ತಾನಂ ಇಧದ್ದುಭಿ (ಸೀ. ಅಟ್ಠ.), ಯೋ ಮಿತ್ತಾನಂ ಇಧ ದುಬ್ಭತಿ (ಪೀ.)];

ಕಾಯಸ್ಸ ಭೇದಾ ಮಿತ್ತದ್ದು [ಮಿತ್ತದುಬ್ಭೀ (ಸ್ಯಾ. ಕ.)], ನಿರಯಂ ಸೋಪಪಜ್ಜತೀತಿ [ಸೋ ಉಪಪಜ್ಜತೀತಿ (ಸೀ. ಸ್ಯಾ. ಪೀ.)].

ಮಹಾಕಪಿಜಾತಕಂ ಛಟ್ಠಂ.