೫೧೫. ಸಮ್ಭವಜಾತಕಂ (೫)

೧೩೮. ರಜ್ಜಞ್ಚ ಪಟಿಪನ್ನಾಸ್ಮ, ಆಧಿಪಚ್ಚಂ ಸುಚೀರತ;

ಮಹತ್ತಂ ಪತ್ತುಮಿಚ್ಛಾಮಿ, ವಿಜೇತುಂ ಪಥವಿಂ ಇಮಂ.

೧೩೯. ಧಮ್ಮೇನ ನೋ ಅಧಮ್ಮೇನ, ಅಧಮ್ಮೋ ಮೇ ನ ರುಚ್ಚತಿ;

ಕಿಚ್ಚೋವ ಧಮ್ಮೋ ಚರಿತೋ, ರಞ್ಞೋ ಹೋತಿ ಸುಚೀರತ.

೧೪೦. ಇಧ ಚೇವಾನಿನ್ದಿತಾ ಯೇನ, ಪೇಚ್ಚ ಯೇನ ಅನಿನ್ದಿತಾ;

ಯಸಂ ದೇವಮನುಸ್ಸೇಸು, ಯೇನ ಪಪ್ಪೋಮು [ಪಪ್ಪೇಮು (ಸೀ. ಅಟ್ಠ.)] ಬ್ರಾಹ್ಮಣ.

೧೪೧. ಯೋಹಂ ಅತ್ಥಞ್ಚ ಧಮ್ಮಞ್ಚ, ಕತ್ತುಮಿಚ್ಛಾಮಿ ಬ್ರಾಹ್ಮಣ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಬ್ರಾಹ್ಮಣಕ್ಖಾಹಿ ಪುಚ್ಛಿತೋ.

೧೪೨. ನಾಞ್ಞತ್ರ ವಿಧುರಾ ರಾಜ, ಏತದಕ್ಖಾತುಮರಹತಿ;

ಯಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಕತ್ತುಮಿಚ್ಛಸಿ ಖತ್ತಿಯ.

೧೪೩. ಏಹಿ ಖೋ ಪಹಿತೋ ಗಚ್ಛ, ವಿಧುರಸ್ಸ ಉಪನ್ತಿಕಂ;

ನಿಕ್ಖಞ್ಚಿಮಂ [ನಿಕ್ಖಂ ರತ್ತ (ಸೀ.), ನಿಕ್ಖಮಿಮಂ (ಪೀ.)] ಸುವಣ್ಣಸ್ಸ, ಹರಂ ಗಚ್ಛ ಸುಚೀರತ;

ಅಭಿಹಾರಂ ಇಮಂ ದಜ್ಜಾ, ಅತ್ಥಧಮ್ಮಾನುಸಿಟ್ಠಿಯಾ.

೧೪೪. ಸ್ವಾಧಿಪ್ಪಾಗಾ ಭಾರದ್ವಾಜೋ, ವಿಧುರಸ್ಸ ಉಪನ್ತಿಕಂ;

ತಮದ್ದಸ ಮಹಾಬ್ರಹ್ಮಾ, ಅಸಮಾನಂ ಸಕೇ ಘರೇ.

೧೪೫. ರಞ್ಞೋಹಂ ಪಹಿತೋ ದೂತೋ, ಕೋರಬ್ಯಸ್ಸ ಯಸಸ್ಸಿನೋ;

‘‘ಅತ್ಥಂ ಧಮ್ಮಞ್ಚ ಪುಚ್ಛೇಸಿ’’, ಇಚ್ಚಬ್ರವಿ ಯುಧಿಟ್ಠಿಲೋ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ವಿಧುರಕ್ಖಾಹಿ ಪುಚ್ಛಿತೋ.

೧೪೬. ಗಙ್ಗಂ ಮೇ ಪಿದಹಿಸ್ಸನ್ತಿ, ನ ತಂ ಸಕ್ಕೋಮಿ ಬ್ರಾಹ್ಮಣ;

ಅಪಿಧೇತುಂ ಮಹಾಸಿನ್ಧುಂ, ತಂ ಕಥಂ ಸೋ ಭವಿಸ್ಸತಿ.

೧೪೭. ನ ತೇ ಸಕ್ಕೋಮಿ ಅಕ್ಖಾತುಂ, ಅತ್ಥಂ ಧಮ್ಮಞ್ಚ ಪುಚ್ಛಿತೋ;

ಭದ್ರಕಾರೋ ಚ ಮೇ ಪುತ್ತೋ, ಓರಸೋ ಮಮ ಅತ್ರಜೋ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಗನ್ತ್ವಾ ಪುಚ್ಛಸ್ಸು ಬ್ರಾಹ್ಮಣ.

೧೪೮. ಸ್ವಾಧಿಪ್ಪಾಗಾ ಭಾರದ್ವಾಜೋ, ಭದ್ರಕಾರಸ್ಸುಪನ್ತಿಕಂ [ಭದ್ರಕಾರಸ್ಸ ಸನ್ತಿಕಂ (ಸೀ. ಸ್ಯಾ.)];

ತಮದ್ದಸ ಮಹಾಬ್ರಹ್ಮಾ, ನಿಸಿನ್ನಂ ಸಮ್ಹಿ ವೇಸ್ಮನಿ.

೧೪೯. ರಞ್ಞೋಹಂ ಪಹಿತೋ ದೂತೋ, ಕೋರಬ್ಯಸ್ಸ ಯಸಸ್ಸಿನೋ;

‘‘ಅತ್ಥಂ ಧಮ್ಮಞ್ಚ ಪುಚ್ಛೇಸಿ’’, ಇಚ್ಚಬ್ರವಿ ಯುಧಿಟ್ಠಿಲೋ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಭದ್ರಕಾರ ಪಬ್ರೂಹಿ [ಬ್ರವೀಹಿ (ಸೀ. ಪೀ.)] ಮೇ.

೧೫೦. ಮಂಸಕಾಜಂ [ಮಂಸಕಾಚಂ (ಪೀ.)] ಅವಹಾಯ, ಗೋಧಂ ಅನುಪತಾಮಹಂ;

ನ ತೇ ಸಕ್ಕೋಮಿ ಅಕ್ಖಾತುಂ, ಅತ್ಥಂ ಧಮ್ಮಞ್ಚ ಪುಚ್ಛಿತೋ.

೧೫೧. ಸಞ್ಚಯೋ [ಸಞ್ಜಯೋ (ಸೀ. ಸ್ಯಾ. ಪೀ.)] ನಾಮ ಮೇ ಭಾತಾ, ಕನಿಟ್ಠೋ ಮೇ ಸುಚೀರತ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಗನ್ತ್ವಾ ಪುಚ್ಛಸ್ಸು ಬ್ರಾಹ್ಮಣ.

೧೫೨. ಸ್ವಾಧಿಪ್ಪಾಗಾ ಭಾರದ್ವಾಜೋ, ಸಞ್ಚಯಸ್ಸ ಉಪನ್ತಿಕಂ;

ತಮದ್ದಸ ಮಹಾಬ್ರಹ್ಮಾ, ನಿಸಿನ್ನಂ ಸಮ್ಹಿ ವೇಸ್ಮನಿ [ಪರಿಸತಿ (ಸ್ಯಾ.), ಪರೀಸತಿ (ಪೀ.)].

೧೫೩. ರಞ್ಞೋಹಂ ಪಹಿತೋ ದೂತೋ, ಕೋರಬ್ಯಸ್ಸ ಯಸಸ್ಸಿನೋ;

‘‘ಅತ್ಥಂ ಧಮ್ಮಞ್ಚ ಪುಚ್ಛೇಸಿ’’, ಇಚ್ಚಬ್ರವಿ ಯುಧಿಟ್ಠಿಲೋ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಸಞ್ಚಯಕ್ಖಾಹಿ ಪುಚ್ಛಿತೋ.

೧೫೪. ಸದಾ ಮಂ ಗಿಲತೇ [ಗಿಲತೀ (ಸೀ.), ಗಿಲತಿ (ಪೀ.)] ಮಚ್ಚು, ಸಾಯಂ ಪಾತೋ ಸುಚೀರತ;

ನ ತೇ ಸಕ್ಕೋಮಿ ಅಕ್ಖಾತುಂ, ಅತ್ಥಂ ಧಮ್ಮಞ್ಚ ಪುಚ್ಛಿತೋ.

೧೫೫. ಸಮ್ಭವೋ ನಾಮ ಮೇ ಭಾತಾ, ಕನಿಟ್ಠೋ ಮೇ ಸುಚೀರತ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಗನ್ತ್ವಾ ಪುಚ್ಛಸ್ಸು ಬ್ರಾಹ್ಮಣ.

೧೫೬. ಅಬ್ಭುತೋ ವತ ಭೋ ಧಮ್ಮೋ, ನಾಯಂ ಅಸ್ಮಾಕ ರುಚ್ಚತಿ;

ತಯೋ ಜನಾ ಪಿತಾಪುತ್ತಾ, ತೇಸು ಪಞ್ಞಾಯ ನೋ ವಿದೂ.

೧೫೭. ನ ತಂ ಸಕ್ಕೋಥ ಅಕ್ಖಾತುಂ, ಅತ್ಥಂ ಧಮ್ಮಞ್ಚ ಪುಚ್ಛಿತಾ;

ಕಥಂ ನು ದಹರೋ ಜಞ್ಞಾ, ಅತ್ಥಂ ಧಮ್ಮಞ್ಚ ಪುಚ್ಛಿತೋ.

೧೫೮. ಮಾ ನಂ ದಹರೋತಿ ಉಞ್ಞಾಸಿ [ಮಞ್ಞಾಸಿ (ಸ್ಯಾ. ಕ.)], ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೫೯. ಯಥಾಪಿ ಚನ್ದೋ ವಿಮಲೋ, ಗಚ್ಛಂ ಆಕಾಸಧಾತುಯಾ;

ಸಬ್ಬೇ ತಾರಾಗಣೇ ಲೋಕೇ, ಆಭಾಯ ಅತಿರೋಚತಿ.

೧೬೦. ಏವಮ್ಪಿ ದಹರೂಪೇತೋ, ಪಞ್ಞಾಯೋಗೇನ ಸಮ್ಭವೋ;

ಮಾ ನಂ ದಹರೋತಿ ಉಞ್ಞಾಸಿ, ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೬೧. ಯಥಾಪಿ ರಮ್ಮಕೋ ಮಾಸೋ, ಗಿಮ್ಹಾನಂ ಹೋತಿ ಬ್ರಾಹ್ಮಣ;

ಅತೇವಞ್ಞೇಹಿ ಮಾಸೇಹಿ, ದುಮಪುಪ್ಫೇಹಿ ಸೋಭತಿ.

೧೬೨. ಏವಮ್ಪಿ ದಹರೂಪೇತೋ, ಪಞ್ಞಾಯೋಗೇನ ಸಮ್ಭವೋ;

ಮಾ ನಂ ದಹರೋತಿ ಉಞ್ಞಾಸಿ, ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೬೩. ಯಥಾಪಿ ಹಿಮವಾ ಬ್ರಹ್ಮೇ, ಪಬ್ಬತೋ ಗನ್ಧಮಾದನೋ;

ನಾನಾರುಕ್ಖೇಹಿ ಸಞ್ಛನ್ನೋ, ಮಹಾಭೂತಗಣಾಲಯೋ;

ಓಸಧೇಹಿ ಚ ದಿಬ್ಬೇಹಿ, ದಿಸಾ ಭಾತಿ ಪವಾತಿ ಚ.

೧೬೪. ಏವಮ್ಪಿ ದಹರೂಪೇತೋ, ಪಞ್ಞಾಯೋಗೇನ ಸಮ್ಭವೋ;

ಮಾ ನಂ ದಹರೋತಿ ಉಞ್ಞಾಸಿ, ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೬೫. ಯಥಾಪಿ ಪಾವಕೋ ಬ್ರಹ್ಮೇ, ಅಚ್ಚಿಮಾಲೀ ಯಸಸ್ಸಿಮಾ;

ಜಲಮಾನೋ ವನೇ ಗಚ್ಛೇ [ಚರಂ ಕಚ್ಛೇ (ಪೀ.)], ಅನಲೋ ಕಣ್ಹವತ್ತನೀ.

೧೬೬. ಘತಾಸನೋ ಧೂಮಕೇತು, ಉತ್ತಮಾಹೇವನನ್ದಹೋ;

ನಿಸೀಥೇ [ನಿಸ್ಸೀವೇ (ಸ್ಯಾ.), ನಿಸಿವೇ (ಕ.)] ಪಬ್ಬತಗ್ಗಸ್ಮಿಂ, ಪಹೂತೇಧೋ [ಬಹುತೇಜೋ (ಸ್ಯಾ. ಕ.)] ವಿರೋಚತಿ.

೧೬೭. ಏವಮ್ಪಿ ದಹರೂಪೇತೋ, ಪಞ್ಞಾಯೋಗೇನ ಸಮ್ಭವೋ;

ಮಾ ನಂ ದಹರೋತಿ ಉಞ್ಞಾಸಿ, ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೬೮. ಜವೇನ ಭದ್ರಂ ಜಾನನ್ತಿ, ಬಲಿಬದ್ದಞ್ಚ [ಬಲಿವದ್ದಞ್ಚ (ಸೀ. ಪೀ.)] ವಾಹಿಯೇ;

ದೋಹೇನ ಧೇನುಂ ಜಾನನ್ತಿ, ಭಾಸಮಾನಞ್ಚ ಪಣ್ಡಿತಂ.

೧೬೯. ಏವಮ್ಪಿ ದಹರೂಪೇತೋ, ಪಞ್ಞಾಯೋಗೇನ ಸಮ್ಭವೋ;

ಮಾ ನಂ ದಹರೋತಿ ಉಞ್ಞಾಸಿ, ಅಪುಚ್ಛಿತ್ವಾನ ಸಮ್ಭವಂ;

ಪುಚ್ಛಿತ್ವಾ ಸಮ್ಭವಂ ಜಞ್ಞಾ, ಅತ್ಥಂ ಧಮ್ಮಞ್ಚ ಬ್ರಾಹ್ಮಣ.

೧೭೦. ಸ್ವಾಧಿಪ್ಪಾಗಾ ಭಾರದ್ವಾಜೋ, ಸಮ್ಭವಸ್ಸ ಉಪನ್ತಿಕಂ;

ತಮದ್ದಸ ಮಹಾಬ್ರಹ್ಮಾ, ಕೀಳಮಾನಂ ಬಹೀಪುರೇ.

೧೭೧. ರಞ್ಞೋಹಂ ಪಹಿತೋ ದೂತೋ, ಕೋರಬ್ಯಸ್ಸ ಯಸಸ್ಸಿನೋ;

‘‘ಅತ್ಥಂ ಧಮ್ಮಞ್ಚ ಪುಚ್ಛೇಸಿ’’, ಇಚ್ಚಬ್ರವಿ ಯುಧಿಟ್ಠಿಲೋ;

ತಂ ತ್ವಂ ಅತ್ಥಞ್ಚ ಧಮ್ಮಞ್ಚ, ಸಮ್ಭವಕ್ಖಾಹಿ ಪುಚ್ಛಿತೋ.

೧೭೨. ತಗ್ಘ ತೇ ಅಹಮಕ್ಖಿಸ್ಸಂ, ಯಥಾಪಿ ಕುಸಲೋ ತಥಾ;

ರಾಜಾ ಚ ಖೋ ತಂ ಜಾನಾತಿ, ಯದಿ ಕಾಹತಿ ವಾ ನ ವಾ.

೧೭೩. ‘‘ಅಜ್ಜ ಸುವೇ’’ತಿ ಸಂಸೇಯ್ಯ, ರಞ್ಞಾ ಪುಟ್ಠೋ ಸುಚೀರತ;

ಮಾ ಕತ್ವಾ ಅವಸೀ ರಾಜಾ, ಅತ್ಥೇ ಜಾತೇ ಯುಧಿಟ್ಠಿಲೋ.

೧೭೪. ಅಜ್ಝತ್ತಞ್ಞೇವ ಸಂಸೇಯ್ಯ, ರಞ್ಞಾ ಪುಟ್ಠೋ ಸುಚೀರತ;

ಕುಮ್ಮಗ್ಗಂ ನ ನಿವೇಸೇಯ್ಯ, ಯಥಾ ಮೂಳ್ಹೋ ಅಚೇತಸೋ [ಅಚೇತನೋ (ಕ.)].

೧೭೫. ಅತ್ತಾನಂ ನಾತಿವತ್ತೇಯ್ಯ, ಅಧಮ್ಮಂ ನ ಸಮಾಚರೇ;

ಅತಿತ್ಥೇ ನಪ್ಪತಾರೇಯ್ಯ, ಅನತ್ಥೇ ನ ಯುತೋ ಸಿಯಾ.

೧೭೬. ಯೋ ಚ ಏತಾನಿ ಠಾನಾನಿ, ಕತ್ತುಂ ಜಾನಾತಿ ಖತ್ತಿಯೋ;

ಸದಾ ಸೋ ವಡ್ಢತೇ ರಾಜಾ, ಸುಕ್ಕಪಕ್ಖೇವ ಚನ್ದಿಮಾ.

೧೭೭. ಞಾತೀನಞ್ಚ ಪಿಯೋ ಹೋತಿ, ಮಿತ್ತೇಸು ಚ ವಿರೋಚತಿ;

ಕಾಯಸ್ಸ ಭೇದಾ ಸಪ್ಪಞ್ಞೋ, ಸಗ್ಗಂ ಸೋ ಉಪಪಜ್ಜತೀತಿ.

ಸಮ್ಭವಜಾತಕಂ ಪಞ್ಚಮಂ.