೫೧೪. ಛದ್ದನ್ತಜಾತಕಂ (೪)

೯೭. ಕಿಂ ನು ಸೋಚಸಿನುಚ್ಚಙ್ಗಿ, ಪಣ್ಡೂಸಿ ವರವಣ್ಣಿನಿ;

ಮಿಲಾಯಸಿ ವಿಸಾಲಕ್ಖಿ, ಮಾಲಾವ ಪರಿಮದ್ದಿತಾ.

೯೮. ದೋಹಳೋ ಮೇ ಮಹಾರಾಜ, ಸುಪಿನನ್ತೇನುಪಜ್ಝಗಾ [ನು’ಪಚ್ಚಗಾ (ಸೀ. ಸ್ಯಾ. ಪೀ.)];

ನ ಸೋ ಸುಲಭರೂಪೋವ, ಯಾದಿಸೋ ಮಮ ದೋಹಳೋ.

೯೯. ಯೇ ಕೇಚಿ ಮಾನುಸಾ ಕಾಮಾ, ಇಧ ಲೋಕಸ್ಮಿ ನನ್ದನೇ;

ಸಬ್ಬೇ ತೇ ಪಚುರಾ ಮಯ್ಹಂ, ಅಹಂ ತೇ ದಮ್ಮಿ ದೋಹಳಂ.

೧೦೦. ಲುದ್ದಾ ದೇವ ಸಮಾಯನ್ತು, ಯೇ ಕೇಚಿ ವಿಜಿತೇ ತವ;

ಏತೇಸಂ ಅಹಮಕ್ಖಿಸ್ಸಂ, ಯಾದಿಸೋ ಮಮ ದೋಹಳೋ.

೧೦೧. ಇಮೇ ತೇ ಲುದ್ದಕಾ ದೇವಿ, ಕತಹತ್ಥಾ ವಿಸಾರದಾ;

ವನಞ್ಞೂ ಚ ಮಿಗಞ್ಞೂ ಚ, ಮಮತ್ಥೇ [ಮಮ ತೇ (ಪೀ.)] ಚತ್ತಜೀವಿತಾ.

೧೦೨. ಲುದ್ದಪುತ್ತಾ ನಿಸಾಮೇಥ, ಯಾವನ್ತೇತ್ಥ ಸಮಾಗತಾ;

ಛಬ್ಬಿಸಾಣಂ ಗಜಂ ಸೇತಂ, ಅದ್ದಸಂ ಸುಪಿನೇ ಅಹಂ;

ತಸ್ಸ ದನ್ತೇಹಿ ಮೇ ಅತ್ಥೋ, ಅಲಾಭೇ ನತ್ಥಿ ಜೀವಿತಂ.

೧೦೩. ನ ನೋ ಪಿತೂನಂ ನ ಪಿತಾಮಹಾನಂ, ದಿಟ್ಠೋ ಸುತೋ ಕುಞ್ಜರೋ ಛಬ್ಬಿಸಾಣೋ;

ಯಮದ್ದಸಾ ಸುಪಿನೇ ರಾಜಪುತ್ತೀ, ಅಕ್ಖಾಹಿ ನೋ ಯಾದಿಸೋ ಹತ್ಥಿನಾಗೋ.

೧೦೪. ದಿಸಾ ಚತಸ್ಸೋ ವಿದಿಸಾ ಚತಸ್ಸೋ, ಉದ್ಧಂ ಅಧೋ ದಸ ದಿಸಾ ಇಮಾಯೋ;

ಕತಮಂ ದಿಸಂ ತಿಟ್ಠತಿ ನಾಗರಾಜಾ, ಯಮದ್ದಸಾ ಸುಪಿನೇ ಛಬ್ಬಿಸಾಣಂ.

೧೦೫. ಇತೋ ಉಜುಂ ಉತ್ತರಿಯಂ ದಿಸಾಯಂ, ಅತಿಕ್ಕಮ್ಮ ಸೋ ಸತ್ತಗಿರೀ ಬ್ರಹನ್ತೇ;

ಸುವಣ್ಣಪಸ್ಸೋ ನಾಮ ಗಿರೀ ಉಳಾರೋ, ಸುಪುಪ್ಫಿತೋ [ಸಮ್ಪುಪ್ಫಿತೋ (ಸ್ಯಾ.)] ಕಿಮ್ಪುರಿಸಾನುಚಿಣ್ಣೋ.

೧೦೬. ಆರುಯ್ಹ ಸೇಲಂ ಭವನಂ ಕಿನ್ನರಾನಂ, ಓಲೋಕಯ ಪಬ್ಬತಪಾದಮೂಲಂ;

ಅಥ ದಕ್ಖಸೀ ಮೇಘಸಮಾನವಣ್ಣಂ, ನಿಗ್ರೋಧರಾಜಂ ಅಥ ಸಹಸ್ಸಪಾದಂ [ಪೋರಂ (ಕ.)].

೧೦೭. ತತ್ಥಚ್ಛತೀ ಕುಞ್ಜರೋ ಛಬ್ಬಿಸಾಣೋ, ಸಬ್ಬಸೇತೋ ದುಪ್ಪಸಹೋ ಪರೇಭಿ;

ರಕ್ಖನ್ತಿ ನಂ ಅಟ್ಠಸಹಸ್ಸನಾಗಾ, ಈಸಾದನ್ತಾ ವಾತಜವಪ್ಪಹಾರಿನೋ.

೧೦೮. ತಿಟ್ಠನ್ತಿ ತೇ ತುಮೂಲಂ [ತುಮೂಲ (ಸ್ಯಾ.), ಭಿಮೂಲ (ಪೀ. ಕ.)] ಪಸ್ಸಸನ್ತಾ, ಕುಪ್ಪನ್ತಿ ವಾತಸ್ಸಪಿ ಏರಿತಸ್ಸ;

ಮನುಸ್ಸಭೂತಂ ಪನ ತತ್ಥ ದಿಸ್ವಾ, ಭಸ್ಮಂ ಕರೇಯ್ಯುಂ ನಾಸ್ಸ ರಜೋಪಿ ತಸ್ಸ.

೧೦೯. ಬಹೂ ಹಿಮೇ ರಾಜಕುಲಮ್ಹಿ ಸನ್ತಿ, ಪಿಳನ್ಧನಾ ಜಾತರೂಪಸ್ಸ ದೇವೀ;

ಮುತ್ತಾಮಣೀವೇಳುರಿಯಾಮಯಾ ಚ, ಕಿಂ ಕಾಹಸಿ ದನ್ತಪಿಳನ್ಧನೇನ;

ಮಾರೇತುಕಾಮಾ ಕುಞ್ಜರಂ ಛಬ್ಬಿಸಾಣಂ, ಉದಾಹು ಘಾತೇಸ್ಸಸಿ ಲುದ್ದಪುತ್ತೇ.

೧೧೦. ಸಾ ಇಸ್ಸಿತಾ ದುಕ್ಖಿತಾ ಚಸ್ಮಿ ಲುದ್ದ, ಉದ್ಧಞ್ಚ ಸುಸ್ಸಾಮಿ ಅನುಸ್ಸರನ್ತೀ;

ಕರೋಹಿ ಮೇ ಲುದ್ದಕ ಏತಮತ್ಥಂ, ದಸ್ಸಾಮಿ ತೇ ಗಾಮವರಾನಿ ಪಞ್ಚ.

೧೧೧. ಕತ್ಥಚ್ಛತೀ ಕತ್ಥಮುಪೇತಿ ಠಾನಂ, ವೀಥಿಸ್ಸ ಕಾ ನ್ಹಾನ [ನಹಾನ (ಸೀ. ಪೀ.)] ಗತಸ್ಸ ಹೋತಿ;

ಕಥಞ್ಹಿ ಸೋ ನ್ಹಾಯತಿ [ನಹಾಯತಿ (ಸೀ. ಪೀ.)] ನಾಗರಾಜಾ, ಕಥಂ ವಿಜಾನೇಮು ಗತಿಂ ಗಜಸ್ಸ.

೧೧೨. ತತ್ಥೇವ ಸಾ ಪೋಕ್ಖರಣೀ ಅದೂರೇ [ಅವಿದೂರೇ (ಸ್ಯಾ. ಕ.)], ರಮ್ಮಾ ಸುತಿತ್ಥಾ ಚ ಮಹೋದಿಕಾ [ಮಹೋದಕಾ (ಸ್ಯಾ. ಕ.)] ಚ;

ಸಮ್ಪುಪ್ಫಿತಾ ಭಮರಗಣಾನುಚಿಣ್ಣಾ [ಕಿಣ್ಣಾ (ಕತ್ಥಚಿ)], ಏತ್ಥ ಹಿ ಸೋ ನ್ಹಾಯತಿ ನಾಗರಾಜಾ.

೧೧೩. ಸೀಸಂ ನಹಾತುಪ್ಪಲ [ನಹಾತೋ ಉಪ್ಪಲ (ಸೀ. ಸ್ಯಾ. ಪೀ.)] ಮಾಲಭಾರೀ, ಸಬ್ಬಸೇತೋ ಪುಣ್ಡರೀಕತ್ತಚಙ್ಗೀ;

ಆಮೋದಮಾನೋ ಗಚ್ಛತಿ ಸನ್ನಿಕೇತಂ, ಪುರಕ್ಖತ್ವಾ ಮಹೇಸಿಂ ಸಬ್ಬಭದ್ದಂ.

೧೧೪. ತತ್ಥೇವ ಸೋ ಉಗ್ಗಹೇತ್ವಾನ ವಾಕ್ಯಂ, ಆದಾಯ ತೂಣಿಞ್ಚ ಧನುಞ್ಚ ಲುದ್ದೋ;

ವಿತುರಿಯತಿ [ವಿತುರಿಯ ಸೋ (ಸೀ. ಅಟ್ಠ.)] ಸತ್ತಗಿರೀ ಬ್ರಹನ್ತೇ, ಸುವಣ್ಣಪಸ್ಸಂ ನಾಮ ಗಿರಿಂ ಉಳಾರಂ.

೧೧೫. ಆರುಯ್ಹ ಸೇಲಂ ಭವನಂ ಕಿನ್ನರಾನಂ, ಓಲೋಕಯೀ ಪಬ್ಬತಪಾದಮೂಲಂ;

ತತ್ಥದ್ದಸಾ ಮೇಘಸಮಾನವಣ್ಣಂ, ನಿಗ್ರೋಧರಾಜಂ ಅಟ್ಠಸಹಸ್ಸಪಾದಂ.

೧೧೬. ತತ್ಥದ್ದಸಾ ಕುಞ್ಜರಂ ಛಬ್ಬಿಸಾಣಂ, ಸಬ್ಬಸೇತಂ ದುಪ್ಪಸಹಂ ಪರೇಭಿ;

ರಕ್ಖನ್ತಿ ನಂ ಅಟ್ಠಸಹಸ್ಸನಾಗಾ, ಈಸಾದನ್ತಾ ವಾತಜವಪ್ಪಹಾರಿನೋ.

೧೧೭. ತತ್ಥದ್ದಸಾ ಪೋಕ್ಖರಣಿಂ ಅದೂರೇ, ರಮ್ಮಂ ಸುತಿತ್ಥಞ್ಚ ಮಹೋದಿಕಞ್ಚ;

ಸಮ್ಪುಪ್ಫಿತಂ ಭಮರಗಣಾನುಚಿಣ್ಣಂ, ಯತ್ಥ ಹಿ ಸೋ ನ್ಹಾಯತಿ ನಾಗರಾಜಾ.

೧೧೮. ದಿಸ್ವಾನ ನಾಗಸ್ಸ ಗತಿಂ ಠಿತಿಞ್ಚ, ವೀಥಿಸ್ಸ ಯಾ ನ್ಹಾನಗತಸ್ಸ ಹೋತಿ;

ಓಪಾತಮಾಗಚ್ಛಿ ಅನರಿಯರೂಪೋ, ಪಯೋಜಿತೋ ಚಿತ್ತವಸಾನುಗಾಯ.

೧೧೯. ಖಣಿತ್ವಾನ ಕಾಸುಂ ಫಲಕೇಹಿ ಛಾದಯಿ, ಅತ್ತಾನಮೋಧಾಯ ಧನುಞ್ಚ ಲುದ್ದೋ;

ಪಸ್ಸಾಗತಂ ಪುಥುಸಲ್ಲೇನ ನಾಗಂ, ಸಮಪ್ಪಯೀ ದುಕ್ಕಟಕಮ್ಮಕಾರೀ.

೧೨೦. ವಿದ್ಧೋ ಚ ನಾಗೋ ಕೋಞ್ಚಮನಾದಿ ಘೋರಂ, ಸಬ್ಬೇ ಚ [ಸಬ್ಬೇವ (ಸೀ. ಸ್ಯಾ. ಪೀ.)] ನಾಗಾ ನಿನ್ನದುಂ [ನಿನ್ನಾದು (ಸ್ಯಾ.), ನಿನ್ನಾದಂ (ಕ.)] ಘೋರರೂಪಂ;

ತಿಣಞ್ಚ ಕಟ್ಠಞ್ಚ ರಣಂ [ಚುಣ್ಣಂ (ಕ. ಸೀ. ಪೀ.)] ಕರೋನ್ತಾ, ಧಾವಿಂಸು ತೇ ಅಟ್ಠದಿಸಾ ಸಮನ್ತತೋ.

೧೨೧. ವಧಿಸ್ಸಮೇತನ್ತಿ [ವಧಿಸ್ಸಮೇನನ್ತಿ (ಸ್ಯಾ.)] ಪರಾಮಸನ್ತೋ, ಕಾಸಾವಮದ್ದಕ್ಖಿ ಧಜಂ ಇಸೀನಂ;

ದುಕ್ಖೇನ ಫುಟ್ಠಸ್ಸುದಪಾದಿ ಸಞ್ಞಾ, ಅರಹದ್ಧಜೋ ಸಬ್ಭಿ ಅವಜ್ಝರೂಪೋ.

೧೨೨. ಅನಿಕ್ಕಸಾವೋ ಕಾಸಾವಂ, ಯೋ ವತ್ಥಂ ಪರಿದಹಿಸ್ಸತಿ [ಪರಿದಹೇಸ್ಸತಿ (ಸೀ. ಪೀ.), ಪರಿಧಸ್ಸತಿ (ಕತ್ಥಚಿ)];

ಅಪೇತೋ ದಮಸಚ್ಚೇನ, ನ ಸೋ ಕಾಸಾವಮರಹತಿ.

೧೨೩. ಯೋ ಚ ವನ್ತಕಸಾವಸ್ಸ, ಸೀಲೇಸು ಸುಸಮಾಹಿತೋ;

ಉಪೇತೋ ದಮಸಚ್ಚೇನ, ಸ ವೇ ಕಾಸಾವಮರಹತಿ.

೧೨೪. ಸಮಪ್ಪಿತೋ ಪುಥುಸಲ್ಲೇನ ನಾಗೋ, ಅದುಟ್ಠಚಿತ್ತೋ ಲುದ್ದಕಮಜ್ಝಭಾಸಿ;

ಕಿಮತ್ಥಯಂ ಕಿಸ್ಸ ವಾ ಸಮ್ಮ ಹೇತು, ಮಮಂ ವಧೀ ಕಸ್ಸ ವಾಯಂ ಪಯೋಗೋ.

೧೨೫. ಕಾಸಿಸ್ಸ ರಞ್ಞೋ ಮಹೇಸೀ ಭದನ್ತೇ, ಸಾ ಪೂಜಿತಾ ರಾಜಕುಲೇ ಸುಭದ್ದಾ;

ತಂ ಅದ್ದಸಾ ಸಾ ಚ ಮಮಂ ಅಸಂಸಿ, ದನ್ತೇಹಿ ಅತ್ಥೋತಿ ಚ ಮಂ [ಅತ್ಥೋತಿ ಮಮಂ (ಸ್ಯಾ. ಕ.)] ಅವೋಚ.

೧೨೬. ಬಹೂ ಹಿ ಮೇ ದನ್ತಯುಗಾ ಉಳಾರಾ, ಯೇ ಮೇ ಪಿತೂನಞ್ಚ [ಪಿತುನ್ನಮ್ಪಿ (ಪೀ.)] ಪಿತಾಮಹಾನಂ;

ಜಾನಾತಿ ಸಾ ಕೋಧನಾ ರಾಜಪುತ್ತೀ, ವಧತ್ಥಿಕಾ ವೇರಮಕಾಸಿ ಬಾಲಾ.

೧೨೭. ಉಟ್ಠೇಹಿ ತ್ವಂ ಲುದ್ದ ಖರಂ ಗಹೇತ್ವಾ, ದನ್ತೇ ಇಮೇ ಛಿನ್ದ ಪುರಾ ಮರಾಮಿ;

ವಜ್ಜಾಸಿ ತಂ ಕೋಧನಂ ರಾಜಪುತ್ತಿಂ, ‘‘ನಾಗೋ ಹತೋ ಹನ್ದ ಇಮಸ್ಸ ದನ್ತಾ’’.

೧೨೮. ಉಟ್ಠಾಯ ಸೋ ಲುದ್ದೋ ಖರಂ ಗಹೇತ್ವಾ, ಛೇತ್ವಾನ ದನ್ತಾನಿ ಗಜುತ್ತಮಸ್ಸ;

ವಗ್ಗೂ ಸುಭೇ ಅಪ್ಪಟಿಮೇ ಪಥಬ್ಯಾ, ಆದಾಯ ಪಕ್ಕಾಮಿ ತತೋ ಹಿ ಖಿಪ್ಪಂ.

೧೨೯. ಭಯಟ್ಟಿತಾ [ಭಯದ್ದಿತಾ (ಸೀ. ಪೀ.)] ನಾಗವಧೇನ ಅಟ್ಟಾ, ಯೇ ತೇ ನಾಗಾ ಅಟ್ಠ ದಿಸಾ ವಿಧಾವುಂ;

ಅದಿಸ್ವಾನ [ಅದಿಸ್ವ (ಸೀ. ಪೀ.)] ಪೋಸಂ ಗಜಪಚ್ಚಮಿತ್ತಂ, ಪಚ್ಚಾಗಮುಂ ಯೇನ ಸೋ ನಾಗರಾಜಾ.

೧೩೦. ತೇ ತತ್ಥ ಕನ್ದಿತ್ವಾ ರೋದಿತ್ವಾನ [ರೋದಿತ್ವ (ಸೀ. ಪೀ.)] ನಾಗಾ, ಸೀಸೇ ಸಕೇ ಪಂಸುಕಂ ಓಕಿರಿತ್ವಾ;

ಅಗಮಂಸು ತೇ ಸಬ್ಬೇ ಸಕಂ ನಿಕೇತಂ, ಪುರಕ್ಖತ್ವಾ ಮಹೇಸಿಂ ಸಬ್ಬಭದ್ದಂ.

೧೩೧. ಆದಾಯ ದನ್ತಾನಿ ಗಜುತ್ತಮಸ್ಸ, ವಗ್ಗೂ ಸುಭೇ ಅಪ್ಪಟಿಮೇ ಪಥಬ್ಯಾ;

ಸುವಣ್ಣರಾಜೀಹಿ ಸಮನ್ತಮೋದರೇ, ಸೋ ಲುದ್ದಕೋ ಕಾಸಿಪುರಂ ಉಪಾಗಮಿ;

ಉಪನೇಸಿ ಸೋ ರಾಜಕಞ್ಞಾಯ ದನ್ತೇ, ನಾಗೋ ಹತೋ ಹನ್ದ ಇಮಸ್ಸ ದನ್ತಾ.

೧೩೨. ದಿಸ್ವಾನ ದನ್ತಾನಿ ಗಜುತ್ತಮಸ್ಸ, ಭತ್ತುಪ್ಪಿಯಸ್ಸ ಪುರಿಮಾಯ ಜಾತಿಯಾ;

ತತ್ಥೇವ ತಸ್ಸಾ ಹದಯಂ ಅಫಾಲಿ, ತೇನೇವ ಸಾ ಕಾಲಮಕಾಸಿ ಬಾಲಾ.

೧೩೩. ಸಮ್ಬೋಧಿಪತ್ತೋ ಸ [ಚ (ಸೀ. ಸ್ಯಾ.), ವ (ಪೀ.)] ಮಹಾನುಭಾವೋ, ಸಿತಂ ಅಕಾಸಿ ಪರಿಸಾಯ ಮಜ್ಝೇ;

ಪುಚ್ಛಿಂಸು ಭಿಕ್ಖೂ ಸುವಿಮುತ್ತಚಿತ್ತಾ, ನಾಕಾರಣೇ ಪಾತುಕರೋನ್ತಿ ಬುದ್ಧಾ.

೧೩೪. ಯಮದ್ದಸಾಥ ದಹರಿಂ ಕುಮಾರಿಂ, ಕಾಸಾಯವತ್ಥಂ ಅನಗಾರಿಯಂ ಚರನ್ತಿಂ;

ಸಾ ಖೋ ತದಾ ರಾಜಕಞ್ಞಾ ಅಹೋಸಿ, ಅಹಂ ತದಾ ನಾಗರಾಜಾ ಅಹೋಸಿಂ.

೧೩೫. ಆದಾಯ ದನ್ತಾನಿ ಗಜುತ್ತಮಸ್ಸ, ವಗ್ಗೂ ಸುಭೇ ಅಪ್ಪಟಿಮೇ ಪಥಬ್ಯಾ;

ಯೋ ಲುದ್ದಕೋ ಕಾಸಿಪುರಂ ಉಪಾಗಮಿ, ಸೋ ಖೋ ತದಾ ದೇವದತ್ತೋ ಅಹೋಸಿ.

೧೩೬. ಅನಾವಸೂರಂ ಚಿರರತ್ತಸಂಸಿತಂ, ಉಚ್ಚಾವಚಂ [ಉಚಂ ನೀಚಂ (ಸೀ. ಸ್ಯಾ. ಪೀ.)] ಚರಿತಮಿದಂ ಪುರಾಣಂ;

ವೀತದ್ದರೋ ವೀತಸೋಕೋ ವಿಸಲ್ಲೋ, ಸಯಂ ಅಭಿಞ್ಞಾಯ ಅಭಾಸಿ ಬುದ್ಧೋ.

೧೩೭. ಅಹಂ ವೋ ತೇನ ಕಾಲೇನ, ಅಹೋಸಿಂ ತತ್ಥ ಭಿಕ್ಖವೋ;

ನಾಗರಾಜಾ ತದಾ ಹೋಮಿ [ಹೋಸಿಂ (ಸೀ. ಸ್ಯಾ. ಪೀ.)], ಏವಂ ಧಾರೇಥ ಜಾತಕನ್ತಿ.

ಛದ್ದನ್ತಜಾತಕಂ ಚತುತ್ಥಂ.