೫೧೩. ಜಯದ್ದಿಸಜಾತಕಂ (೩)

೬೪. ಚಿರಸ್ಸಂ ವತ ಮೇ ಉದಪಾದಿ ಅಜ್ಜ, ಭಕ್ಖೋ ಮಹಾ ಸತ್ತಮಿಭತ್ತಕಾಲೇ;

ಕುತೋಸಿ ಕೋ ವಾಸಿ ತದಿಙ್ಘ ಬ್ರೂಹಿ, ಆಚಿಕ್ಖ ಜಾತಿಂ ವಿದಿತೋ ಯಥಾಸಿ.

೬೫. ಪಞ್ಚಾಲರಾಜಾ ಮಿಗವಂ ಪವಿಟ್ಠೋ, ಜಯದ್ದಿಸೋ ನಾಮ ಯದಿಸ್ಸುತೋ ತೇ;

ಚರಾಮಿ ಕಚ್ಛಾನಿ ವನಾನಿ ಚಾಹಂ, ಪಸದಂ ಇಮಂ ಖಾದ ಮಮಜ್ಜ ಮುಞ್ಚ.

೬೬. ಸೇನೇವ ತ್ವಂ ಪಣಸಿ ಸಸ್ಸಮಾನೋ [ಸಯ್ಹಮಾನೋ (ಸ್ಯಾ. ಕ.)], ಮಮೇಸ ಭಕ್ಖೋ ಪಸದೋ ಯಂ ವದೇಸಿ;

ತಂ ಖಾದಿಯಾನ ಪಸದಂ ಜಿಘಞ್ಞಂ [ಜಿಘಚ್ಛಂ (?)], ಖಾದಿಸ್ಸಂ ಪಚ್ಛಾ ನ ವಿಲಾಪಕಾಲೋ.

೬೭. ನ ಚತ್ಥಿ ಮೋಕ್ಖೋ ಮಮ ನಿಕ್ಕಯೇನ [ವಿಕ್ಕಯೇನ (ಸೀ.)], ಗನ್ತ್ವಾನ ಪಚ್ಚಾಗಮನಾಯ ಪಣ್ಹೇ;

ತಂ ಸಙ್ಕರಂ [ಸಙ್ಗರಂ (ಸೀ. ಸ್ಯಾ. ಪೀ.)] ಬ್ರಾಹ್ಮಣಸ್ಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಿಸ್ಸಂ.

೬೮. ಕಿಂ ಕಮ್ಮಜಾತಂ ಅನುತಪ್ಪತೇ ತ್ವಂ [ಅನುತಪ್ಪತೀ ತಂ (ಸೀ. ಪೀ.)], ಪತ್ತಂ ಸಮೀಪಂ ಮರಣಸ್ಸ ರಾಜ;

ಆಚಿಕ್ಖ ಮೇ ತಂ ಅಪಿ ಸಕ್ಕುಣೇಮು, ಅನುಜಾನಿತುಂ ಆಗಮನಾಯ ಪಣ್ಹೇ.

೬೯. ಕತಾ ಮಯಾ ಬ್ರಾಹ್ಮಣಸ್ಸ ಧನಾಸಾ, ತಂ ಸಙ್ಕರಂ ಪಟಿಮುಕ್ಕಂ ನ ಮುತ್ತಂ;

ತಂ ಸಙ್ಕರಂ ಬ್ರಾಹ್ಮಣಸ್ಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಿಸ್ಸಂ.

೭೦. ಯಾ ತೇ ಕತಾ ಬ್ರಾಹ್ಮಣಸ್ಸ ಧನಾಸಾ, ತಂ ಸಙ್ಕರಂ ಪಟಿಮುಕ್ಕಂ ನ ಮುತ್ತಂ;

ತಂ ಸಙ್ಕರಂ ಬ್ರಾಹ್ಮಣಸ್ಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಸ್ಸು.

೭೧. ಮುತ್ತೋ ಚ ಸೋ ಪೋರಿಸಾದಸ್ಸ [ಪುರಿಸಾದಸ್ಸ (ಪೀ.)] ಹತ್ಥಾ, ಗನ್ತ್ವಾ ಸಕಂ ಮನ್ದಿರಂ ಕಾಮಕಾಮೀ;

ತಂ ಸಙ್ಕರಂ ಬ್ರಾಹ್ಮಣಸ್ಸಪ್ಪದಾಯ, ಆಮನ್ತಯೀ ಪುತ್ತಮಲೀನಸತ್ತಂ [ಸತ್ತುಂ (ಸ್ಯಾ. ಪೀ. ಕ.)].

೭೨. ಅಜ್ಜೇವ ರಜ್ಜಂ ಅಭಿಸಿಞ್ಚಯಸ್ಸು, ಧಮ್ಮಂ ಚರ ಸೇಸು ಪರೇಸು ಚಾಪಿ;

ಅಧಮ್ಮಕಾರೋ ಚ ತೇ ಮಾಹು ರಟ್ಠೇ, ಗಚ್ಛಾಮಹಂ ಪೋರಿಸಾದಸ್ಸ ಞತ್ತೇ [ಞನ್ತೇ (ಸ್ಯಾ.)].

೭೩. ಕಿಂ ಕಮ್ಮ ಕುಬ್ಬಂ ತವ ದೇವ ಪಾವ [ದೇವಪಾದೇ (ಸೀ. ಸ್ಯಾ. ಪೀ.)], ನಾರಾಧಯೀ ತಂ ತದಿಚ್ಛಾಮಿ ಸೋತುಂ;

ಯಮಜ್ಜ ರಜ್ಜಮ್ಹಿ ಉದಸ್ಸಯೇ ತುವಂ, ರಜ್ಜಮ್ಪಿ ನಿಚ್ಛೇಯ್ಯಂ ತಯಾ ವಿನಾಹಂ.

೭೪. ನ ಕಮ್ಮುನಾ ವಾ ವಚಸಾ ವ ತಾತ, ಅಪರಾಧಿತೋಹಂ ತುವಿಯಂ ಸರಾಮಿ;

ಸನ್ಧಿಞ್ಚ [ಸದ್ಧಿಂ ಚ (ಕ.)] ಕತ್ವಾ ಪುರಿಸಾದಕೇನ, ಸಚ್ಚಾನುರಕ್ಖೀ ಪುನಾಹಂ ಗಮಿಸ್ಸಂ.

೭೫. ಅಹಂ ಗಮಿಸ್ಸಾಮಿ ಇಧೇವ ಹೋಹಿ, ನತ್ಥಿ ತತೋ ಜೀವತೋ ವಿಪ್ಪಮೋಕ್ಖೋ;

ಸಚೇ ತುವಂ ಗಚ್ಛಸಿಯೇವ ರಾಜ, ಅಹಮ್ಪಿ ಗಚ್ಛಾಮಿ ಉಭೋ ನ ಹೋಮ.

೭೬. ಅದ್ಧಾ ಹಿ ತಾತ ಸತಾನೇಸ ಧಮ್ಮೋ, ಮರಣಾ ಚ ಮೇ ದುಕ್ಖತರಂ ತದಸ್ಸ;

ಕಮ್ಮಾಸಪಾದೋ ತಂ ಯದಾ ಪಚಿತ್ವಾ, ಪಸಯ್ಹ ಖಾದೇ ಭಿದಾ ರುಕ್ಖಸೂಲೇ.

೭೭. ಪಾಣೇನ ತೇ ಪಾಣಮಹಂ ನಿಮಿಸ್ಸಂ, ಮಾ ತ್ವಂ ಅಗಾ ಪೋರಿಸಾದಸ್ಸ ಞತ್ತೇ;

ಏತಞ್ಚ ತೇ ಪಾಣಮಹಂ ನಿಮಿಸ್ಸಂ, ತಸ್ಮಾ ಮತಂ ಜೀವಿತಸ್ಸ ವಣ್ಣೇಮಿ [ವರೇಮಿ (ಸೀ.)].

೭೮. ತತೋ ಹವೇ ಧಿತಿಮಾ ರಾಜಪುತ್ತೋ, ವನ್ದಿತ್ವಾ ಮಾತು ಚ ಪಿತು ಚ [ವನ್ದಿತ್ಥ ಮಾತುಚ್ಚ ಪಿತುಚ್ಚ (ಸೀ. ಪೀ.)] ಪಾದೇ;

ದುಖಿನಿಸ್ಸ ಮಾತಾ ನಿಪತಾ [ನಿಪತೀ (ಸೀ. ಪೀ.)] ಪಥಬ್ಯಾ, ಪಿತಾಸ್ಸ ಪಗ್ಗಯ್ಹ ಭುಜಾನಿ ಕನ್ದತಿ.

೭೯. ತಂ ಗಚ್ಛನ್ತಂ ತಾವ ಪಿತಾ ವಿದಿತ್ವಾ, ಪರಮ್ಮುಖೋ ವನ್ದತಿ ಪಞ್ಜಲೀಕೋ;

ಸೋಮೋ ಚ ರಾಜಾ ವರುಣೋ ಚ ರಾಜಾ, ಪಜಾಪತೀ ಚನ್ದಿಮಾ ಸೂರಿಯೋ ಚ;

ಏತೇಹಿ ಗುತ್ತೋ ಪುರಿಸಾದಕಮ್ಹಾ, ಅನುಞ್ಞಾತೋ ಸೋತ್ಥಿ ಪಚ್ಚೇಹಿ ತಾತ.

೮೦. ಯಂ ದಣ್ಡಕಿರಞ್ಞೋ ಗತಸ್ಸ [ಯಂ ದಣ್ಡಕಾರಞ್ಞಗತಸ್ಸ (ಪೀ.)] ಮಾತಾ, ರಾಮಸ್ಸಕಾಸಿ ಸೋತ್ಥಾನಂ ಸುಗುತ್ತಾ;

ತಂ ತೇ ಅಹಂ ಸೋತ್ಥಾನಂ ಕರೋಮಿ, ಏತೇನ ಸಚ್ಚೇನ ಸರನ್ತು ದೇವಾ;

ಅನುಞ್ಞಾತೋ ಸೋತ್ಥಿ ಪಚ್ಚೇಹಿ ಪುತ್ತ.

೮೧. ಆವೀ ರಹೋ ವಾಪೀ ಮನೋಪದೋಸಂ, ನಾಹಂ ಸರೇ ಜಾತು ಮಲೀನಸತ್ತೇ;

ಏತೇನ ಸಚ್ಚೇನ ಸರನ್ತು ದೇವಾ, ಅನುಞ್ಞಾತೋ ಸೋತ್ಥಿ ಪಚ್ಚೇಹಿ ಭಾತಿಕ [ಭಾತ (ಸೀ.), ಭಾತಾ (ಸ್ಯಾ. ಪೀ.)].

೮೨. ಯಸ್ಮಾ ಚ ಮೇ ಅನಧಿಮನೋಸಿ ಸಾಮಿ, ನ ಚಾಪಿ ಮೇ ಮನಸಾ ಅಪ್ಪಿಯೋಸಿ;

ಏತೇನ ಸಚ್ಚೇನ ಸರನ್ತು ದೇವಾ, ಅನುಞ್ಞಾತೋ ಸೋತ್ಥಿ ಪಚ್ಚೇಹಿ ಸಾಮಿ.

೮೩. ಬ್ರಹಾ ಉಜೂ ಚಾರುಮುಖೋ ಕುತೋಸಿ, ನ ಮಂ ಪಜಾನಾಸಿ ವನೇ ವಸನ್ತಂ;

ಲುದ್ದಂ ಮಂ ಞತ್ವಾ ‘‘ಪುರಿಸಾದಕೋ’’ತಿ, ಕೋ ಸೋತ್ಥಿ ಮಾಜಾನಮಿಧಾ’ವಜೇಯ್ಯ.

೮೪. ಜಾನಾಮಿ ಲುದ್ದ ಪುರಿಸಾದಕೋ ತ್ವಂ, ನ ತಂ ನ ಜಾನಾಮಿ ವನೇ ವಸನ್ತಂ;

ಅಹಞ್ಚ ಪುತ್ತೋಸ್ಮಿ ಜಯದ್ದಿಸಸ್ಸ, ಮಮಜ್ಜ ಖಾದ ಪಿತುನೋ ಪಮೋಕ್ಖಾ.

೮೫. ಜಾನಾಮಿ ಪುತ್ತೋತಿ [ಪುತ್ತೋಸಿ (ಸ್ಯಾ. ಕ.)] ಜಯದ್ದಿಸಸ್ಸ, ತಥಾ ಹಿ ವೋ ಮುಖವಣ್ಣೋ ಉಭಿನ್ನಂ;

ಸುದುಕ್ಕರಞ್ಞೇವ [ಸುದುಕ್ಕರಞ್ಚೇವ (ಸ್ಯಾ. ಪೀ. ಕ.)] ಕತಂ ತವೇದಂ, ಯೋ ಮತ್ತುಮಿಚ್ಛೇ ಪಿತುನೋ ಪಮೋಕ್ಖಾ.

೮೬. ನ ದುಕ್ಕರಂ ಕಿಞ್ಚಿ ಮಹೇತ್ಥ ಮಞ್ಞೇ, ಯೋ ಮತ್ತುಮಿಚ್ಛೇ ಪಿತುನೋ ಪಮೋಕ್ಖಾ;

ಮಾತು ಚ [ಮಾತುಚ್ಚ (ಸೀ.)] ಹೇತು ಪರಲೋಕ ಗನ್ತ್ವಾ [ಗಮ್ಯಾ (ಸೀ. ಸ್ಯಾ.), ಗಮ್ಯ (ಪೀ.)], ಸುಖೇನ ಸಗ್ಗೇನ ಚ ಸಮ್ಪಯುತ್ತೋ.

೮೭. ಅಹಞ್ಚ ಖೋ ಅತ್ತನೋ ಪಾಪಕಿರಿಯಂ, ಆವೀ ರಹೋ ವಾಪಿ ಸರೇ ನ ಜಾತು;

ಸಙ್ಖಾತಜಾತೀಮರಣೋಹಮಸ್ಮಿ, ಯಥೇವ ಮೇ ಇಧ ತಥಾ ಪರತ್ಥ.

೮೮. ಖಾದಜ್ಜ ಮಂ ದಾನಿ ಮಹಾನುಭಾವ, ಕರಸ್ಸು ಕಿಚ್ಚಾನಿ ಇಮಂ ಸರೀರಂ;

ರುಕ್ಖಸ್ಸ ವಾ ತೇ ಪಪತಾಮಿ ಅಗ್ಗಾ, ಛಾದಯಮಾನೋ ಮಯ್ಹಂ ತ್ವಮದೇಸಿ ಮಂಸಂ.

೮೯. ಇದಞ್ಚ ತೇ ರುಚ್ಚತಿ ರಾಜಪುತ್ತ, ಚಜೇಸಿ [ಚಜಾಸಿ (ಸೀ. ಪೀ.)] ಪಾಣಂ ಪಿತುನೋ ಪಮೋಕ್ಖಾ;

ತಸ್ಮಾ ಹಿ ಸೋ [ತಸ್ಮಾತಿಹ (ಸೀ. ಸ್ಯಾ.)] ತ್ವಂ ತರಮಾನರೂಪೋ, ಸಮ್ಭಞ್ಜ ಕಟ್ಠಾನಿ ಜಲೇಹಿ ಅಗ್ಗಿಂ.

೯೦. ತತೋ ಹವೇ ಧಿತಿಮಾ ರಾಜಪುತ್ತೋ, ದಾರುಂ ಸಮಾಹತ್ವಾ ಮಹನ್ತಮಗ್ಗಿಂ;

ಸನ್ದೀಪಯಿತ್ವಾ ಪಟಿವೇದಯಿತ್ಥ, ಆದೀಪಿತೋ ದಾನಿ ಮಹಾಯಮಗ್ಗಿ [ಮಯಾ ಯಕ್ಖಮಗ್ಗಿ (ಕ.)].

೯೧. ಖಾದಜ್ಜ ಮಂ ದಾನಿ ಪಸಯ್ಹಕಾರೀ, ಕಿಂ ಮಂ ಮುಹುಂ ಪೇಕ್ಖಸಿ ಹಟ್ಠಲೋಮೋ;

ತಥಾ ತಥಾ ತುಯ್ಹಮಹಂ ಕರೋಮಿ, ಯಥಾ ಯಥಾ ಮಂ ಛಾದಯಮಾನೋ ಅದೇಸಿ.

೯೨. ಕೋ ತಾದಿಸಂ ಅರಹತಿ ಖಾದಿತಾಯೇ, ಧಮ್ಮೇ ಠಿತಂ ಸಚ್ಚವಾದಿಂ ವದಞ್ಞುಂ;

ಮುದ್ಧಾಪಿ ತಸ್ಸ ವಿಫಲೇಯ್ಯ ಸತ್ತಧಾ, ಯೋ ತಾದಿಸಂ ಸಚ್ಚವಾದಿಂ ಅದೇಯ್ಯ.

೯೩. ಇದಞ್ಹಿ ಸೋ ಬ್ರಾಹ್ಮಣಂ ಮಞ್ಞಮಾನೋ, ಸಸೋ ಅವಾಸೇಸಿ ಸಕೇ ಸರೀರೇ;

ತೇನೇವ ಸೋ ಚನ್ದಿಮಾ ದೇವಪುತ್ತೋ, ಸಸತ್ಥುತೋ [ಸಸಟ್ಠಕೋ (ಸ್ಯಾ.)] ಕಾಮದುಹಜ್ಜ [ಕಾಮರುಹಜ್ಜ (ಕ.)] ಯಕ್ಖ.

೯೪. ಚನ್ದೋ ಯಥಾ ರಾಹುಮುಖಾ ಪಮುತ್ತೋ, ವಿರೋಚತೇ ಪನ್ನರಸೇವ ಭಾಣುಮಾ [ಭಾನುಮಾ (ಸೀ. ಪೀ.)];

ಏವಂ ತುವಂ ಪೋರಿಸಾದಾ ಪಮುತ್ತೋ, ವಿರೋಚ ಕಪಿಲೇ [ಕಮ್ಪಿಲ್ಲ (ಸೀ. ಪೀ.), ಕಪಿಲ್ಲೇ (ಸ್ಯಾ.)] ಮಹಾನುಭಾವ;

ಆಮೋದಯಂ ಪಿತರಂ ಮಾತರಞ್ಚ, ಸಬ್ಬೋ ಚ ತೇ ನನ್ದತು ಞಾತಿಪಕ್ಖೋ.

೯೫. ತತೋ ಹವೇ ಧಿತಿಮಾ ರಾಜಪುತ್ತೋ, ಕತಞ್ಜಲೀ ಪರಿಯಾಯ [ಪರಿಯಗಾ (ಸೀ.), ಪಗ್ಗಯ್ಹ (ಸ್ಯಾ. ಪೀ.)] ಪೋರಿಸಾದಂ;

ಅನುಞ್ಞಾತೋ ಸೋತ್ಥಿ ಸುಖೀ ಅರೋಗೋ, ಪಚ್ಚಾಗಮಾ [ಪಚ್ಚಾಗ (ಪೀ.)] ಕಪಿಲಮಲೀನಸತ್ತಾ [ಕಮ್ಪಿಲ್ಲ’ಮಲೀನಸತ್ತೋ (ಸೀ. ಪೀ.), ಕಪಿಲ’ಮಲೀನಸತ್ತಾ (ಕ.)].

೯೬. ತಂ ನೇಗಮಾ ಜಾನಪದಾ ಚ ಸಬ್ಬೇ, ಹತ್ಥಾರೋಹಾ ರಥಿಕಾ ಪತ್ತಿಕಾ ಚ;

ನಮಸ್ಸಮಾನಾ ಪಞ್ಜಲಿಕಾ ಉಪಾಗಮುಂ, ನಮತ್ಥು ತೇ ದುಕ್ಕರಕಾರಕೋಸೀತಿ.

ಜಯದ್ದಿಸಜಾತಕಂ [ಜಯದಿಸಜಾತಕಂ (ಕ.)] ತತಿಯಂ.