೫೧೨. ಕುಮ್ಭಜಾತಕಂ (೨)

೩೩. ಕೋ ಪಾತುರಾಸೀ ತಿದಿವಾ ನಭಮ್ಹಿ, ಓಭಾಸಯಂ ಸಂವರಿಂ ಚನ್ದಿಮಾವ;

ಗತ್ತೇಹಿ ತೇ ರಸ್ಮಿಯೋ ನಿಚ್ಛರನ್ತಿ, ಸತೇರತಾ [ಸತೇರಿತಾ (ಸೀ. ಸ್ಯಾ. ಕ.)] ವಿಜ್ಜುರಿವನ್ತಲಿಕ್ಖೇ.

೩೪. ಸೋ ಛಿನ್ನವಾತಂ ಕಮಸೀ ಅಘಮ್ಹಿ, ವೇಹಾಯಸಂ ಗಚ್ಛಸಿ ತಿಟ್ಠಸೀ ಚ;

ಇದ್ಧೀ ನು ತೇ ವತ್ಥುಕತಾ ಸುಭಾವಿತಾ, ಅನದ್ಧಗೂನಂ ಅಪಿ ದೇವತಾನಂ.

೩೫. ವೇಹಾಯಸಂ ಗಮ್ಮಮಾಗಮ್ಮ [ಕಮಮಾಗಮ್ಮ (ಸೀ. ಸ್ಯಾ.)] ತಿಟ್ಠಸಿ, ಕುಮ್ಭಂ ಕಿಣಾಥಾತಿ ಯಮೇತಮತ್ಥಂ;

ಕೋ ವಾ ತುವಂ ಕಿಸ್ಸ ವಾ ತಾಯ ಕುಮ್ಭೋ, ಅಕ್ಖಾಹಿ ಮೇ ಬ್ರಾಹ್ಮಣ ಏತಮತ್ಥಂ.

೩೬. ನ ಸಪ್ಪಿಕುಮ್ಭೋ ನಪಿ ತೇಲಕುಮ್ಭೋ, ನ ಫಾಣಿತಸ್ಸ ನ ಮಧುಸ್ಸ ಕುಮ್ಭೋ;

ಕುಮ್ಭಸ್ಸ ವಜ್ಜಾನಿ ಅನಪ್ಪಕಾನಿ, ದೋಸೇ ಬಹೂ ಕುಮ್ಭಗತೇ ಸುಣಾಥ.

೩೭. ಗಳೇಯ್ಯ ಯಂ ಪಿತ್ವಾ [ಪೀತ್ವಾ (ಸೀ. ಪೀ.)] ಪತೇ ಪಪಾತಂ, ಸೋಬ್ಭಂ ಗುಹಂ ಚನ್ದನಿಯೋಳಿಗಲ್ಲಂ;

ಬಹುಮ್ಪಿ ಭುಞ್ಜೇಯ್ಯ ಅಭೋಜನೇಯ್ಯಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೩೮. ಯಂ ಪಿತ್ವಾ [ಯಂ ವೇ ಪೀತ್ವಾ (ಸೀ.)] ಚಿತ್ತಸ್ಮಿಮನೇಸಮಾನೋ, ಆಹಿಣ್ಡತೀ ಗೋರಿವ ಭಕ್ಖಸಾರೀ [ಭಕ್ಖಸಾದೀ (ಸೀ. ಸ್ಯಾ. ಅಟ್ಠ.)];

ಅನಾಥಮಾನೋ ಉಪಗಾಯತಿ ನಚ್ಚತಿ ಚ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೩೯. ಯಂ ವೇ ಪಿವಿತ್ವಾ ಅಚೇಲೋವ ನಗ್ಗೋ, ಚರೇಯ್ಯ ಗಾಮೇ ವಿಸಿಖನ್ತರಾನಿ;

ಸಮ್ಮೂಳ್ಹಚಿತ್ತೋ ಅತಿವೇಲಸಾಯೀ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೦. ಯಂ ಪಿತ್ವಾ ಉಟ್ಠಾಯ ಪವೇಧಮಾನೋ, ಸೀಸಞ್ಚ ಬಾಹುಞ್ಚ [ಬಾಹಞ್ಚ (ಪೀ.)] ಪಚಾಲಯನ್ತೋ;

ಸೋ ನಚ್ಚತೀ ದಾರುಕಟಲ್ಲಕೋವ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೧. ಯಂ ವೇ ಪಿವಿತ್ವಾ ಅಗ್ಗಿದಡ್ಢಾ ಸಯನ್ತಿ, ಅಥೋ ಸಿಗಾಲೇಹಿಪಿ ಖಾದಿತಾಸೇ;

ಬನ್ಧಂ ವಧಂ ಭೋಗಜಾನಿಞ್ಚುಪೇನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೨. ಯಂ ಪಿತ್ವಾ ಭಾಸೇಯ್ಯ ಆಭಾಸನೇಯ್ಯಂ, ಸಭಾಯಮಾಸೀನೋ ಅಪೇತವತ್ಥೋ;

ಸಮ್ಮಕ್ಖಿತೋ [ಸಮಕ್ಖಿತೋ (ಸೀ.)] ವನ್ತಗತೋ ಬ್ಯಸನ್ನೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೩. ಯಂ ವೇ ಪಿವಿತ್ವಾ ಉಕ್ಕಟ್ಠೋ ಆವಿಲಕ್ಖೋ, ಮಮೇವ ಸಬ್ಬಾ ಪಥವೀತಿ ಮಞ್ಞೇ [ಮಞ್ಞತಿ (ಸೀ.)];

ನ ಮೇ ಸಮೋ ಚಾತುರನ್ತೋಪಿ ರಾಜಾ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೪. ಮಾನಾತಿಮಾನಾ ಕಲಹಾನಿ ಪೇಸುಣೀ, ದುಬ್ಬಣ್ಣಿನೀ ನಗ್ಗಯಿನೀ ಪಲಾಯಿನೀ;

ಚೋರಾನ ಧುತ್ತಾನ ಗತೀ ನಿಕೇತೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೫. ಇದ್ಧಾನಿ ಫೀತಾನಿ ಕುಲಾನಿ ಅಸ್ಸು, ಅನೇಕಸಾಹಸ್ಸಧನಾನಿ ಲೋಕೇ;

ಉಚ್ಛಿನ್ನದಾಯಜ್ಜಕತಾನಿಮಾಯ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೬. ಧಞ್ಞಂ ಧನಂ ರಜತಂ ಜಾತರೂಪಂ, ಖೇತ್ತಂ ಗವಂ ಯತ್ಥ ವಿನಾಸಯನ್ತಿ;

ಉಚ್ಛೇದನೀ ವಿತ್ತವತಂ [ಉಚ್ಛೇದನೀ ವಿತ್ತಗತಂ (ಸ್ಯಾ.), ಉಚ್ಛೇದನಿವಿತ್ತಗತಂ (ಕ.)] ಕುಲಾನಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೭. ಯಂ ವೇ ಪಿತ್ವಾ ದಿತ್ತರೂಪೋವ [ದುಟ್ಠರೂಪೋವ (ಸೀ.)] ಪೋಸೋ, ಅಕ್ಕೋಸತಿ ಮಾತರಂ ಪಿತರಞ್ಚ;

ಸಸ್ಸುಮ್ಪಿ ಗಣ್ಹೇಯ್ಯ ಅಥೋಪಿ ಸುಣ್ಹಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೮. ಯಂ ವೇ ಪಿತ್ವಾ ದಿತ್ತರೂಪಾವ ನಾರೀ, ಅಕ್ಕೋಸತಿ ಸಸುರಂ ಸಾಮಿಕಞ್ಚ;

ದಾಸಮ್ಪಿ ಗಣ್ಹೇ ಪರಿಚಾರಕಮ್ಪಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೪೯. ಯಂ ವೇ ಪಿವಿತ್ವಾನ [ಯಞ್ಚೇ ಪೀತ್ವಾನ (ಪೀ.)] ಹನೇಯ್ಯ ಪೋಸೋ, ಧಮ್ಮೇ ಠಿತಂ ಸಮಣಂ ಬ್ರಾಹ್ಮಣಂ ವಾ;

ಗಚ್ಛೇ ಅಪಾಯಮ್ಪಿ ತತೋನಿದಾನಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೦. ಯಂ ವೇ ಪಿವಿತ್ವಾ ದುಚ್ಚರಿತಂ ಚರನ್ತಿ, ಕಾಯೇನ ವಾಚಾಯ ಚ ಚೇತಸಾ ಚ;

ನಿರಯಂ ವಜನ್ತಿ ದುಚ್ಚರಿತಂ ಚರಿತ್ವಾ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೧. ಯಂ ಯಾಚಮಾನಾ ನ ಲಭನ್ತಿ ಪುಬ್ಬೇ, ಬಹುಂ ಹಿರಞ್ಞಮ್ಪಿ ಪರಿಚ್ಚಜನ್ತಾ;

ಸೋ ತಂ ಪಿವಿತ್ವಾ ಅಲಿಕಂ ಭಣಾತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೨. ಯಂ ವೇ ಪಿತ್ವಾ ಪೇಸನೇ ಪೇಸಿಯನ್ತೋ, ಅಚ್ಚಾಯಿಕೇ ಕರಣೀಯಮ್ಹಿ ಜಾತೇ;

ಅತ್ಥಮ್ಪಿ ಸೋ ನಪ್ಪಜಾನಾತಿ ವುತ್ತೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೩. ಹಿರೀಮನಾಪಿ ಅಹಿರೀಕಭಾವಂ, ಪಾತುಂ ಕರೋನ್ತಿ ಮದನಾಯ [ಮದಿರಾಯ (ಪೀ.)] ಮತ್ತಾ;

ಧೀರಾಪಿ ಸನ್ತಾ ಬಹುಕಂ ಭಣನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೪. ಯಂ ವೇ ಪಿತ್ವಾ ಏಕಥೂಪಾ ಸಯನ್ತಿ, ಅನಾಸಕಾ ಥಣ್ಡಿಲದುಕ್ಖಸೇಯ್ಯಂ;

ದುಬ್ಬಣ್ಣಿಯಂ ಆಯಸಕ್ಯಞ್ಚುಪೇನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೫. ಯಂ ವೇ ಪಿತ್ವಾ ಪತ್ತಖನ್ಧಾ ಸಯನ್ತಿ, ಗಾವೋ ಕುಟಹತಾವ ನ ಹಿ ವಾರುಣಿಯಾ;

[ಯಂ ವೇ ಪಿತ್ವಾ ಪತ್ತಕ್ಖನ್ಧಾ, ಸಯನ್ತಿ ಗಾವೋ ಕೂಟಹತಾರಿವ; ನ ಹಿ ವಾರುಣಿಯಾ ವೇಗೋ, ನರೇನ ಸುಸ್ಸಹೋರಿವ; (ಸೀ.)] ವೇಗೋ ನರೇನ ಸುಸಹೋರಿವ [ಯಂ ವೇ ಪಿತ್ವಾ ಪತ್ತಕ್ಖನ್ಧಾ, ಸಯನ್ತಿ ಗಾವೋ ಕೂಟಹತಾರಿವ; ನ ಹಿ ವಾರುಣಿಯಾ ವೇಗೋ, ನರೇನ ಸುಸ್ಸಹೋರಿವ; (ಸೀ.)], ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೬. ಯಂ ಮನುಸ್ಸಾ ವಿವಜ್ಜೇನ್ತಿ, ಸಪ್ಪಂ ಘೋರವಿಸಂ ಮಿವ [ವಿಸಮಿವ (ಸ್ಯಾ.), ವಿಸಂ ಇವ (ಕ.), ವಿಸಾಮಿವ (?)];

ತಂ ಲೋಕೇ ವಿಸಸಮಾನಂ, ಕೋ ನರೋ ಪಾತುಮರಹತಿ.

೫೭. ಯಂ ವೇ ಪಿತ್ವಾ ಅನ್ಧಕವೇಣ್ಡಪುತ್ತಾ, ಸಮುದ್ದತೀರೇ ಪರಿಚಾರಯನ್ತಾ [ಅನ್ಧಕವೇಣ್ಹುಪುತ್ತಾ (ಸೀ. ಪೀ.), ಅಣ್ಡಕವೇಣ್ಡಪುತ್ತಾ (ಕ.)];

ಉಪಕ್ಕಮುಂ ಮುಸಲೇಹಞ್ಞಮಞ್ಞಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ.

೫೮. ಯಂ ವೇ ಪಿತ್ವಾ ಪುಬ್ಬದೇವಾ ಪಮತ್ತಾ, ತಿದಿವಾ ಚುತಾ ಸಸ್ಸತಿಯಾ ಸಮಾಯ;

ತಂ ತಾದಿಸಂ ಮಜ್ಜಮಿಮಂ ನಿರತ್ಥಕಂ, ಜಾನಂ ಮಹಾರಾಜ ಕಥಂ ಪಿವೇಯ್ಯ.

೫೯. ನಯಿಮಸ್ಮಿಂ ಕುಮ್ಭಸ್ಮಿಂ ದಧಿ ವಾ ಮಧು ವಾ, ಏವಂ ಅಭಿಞ್ಞಾಯ ಕಿಣಾಹಿ ರಾಜ;

ಏವಞ್ಹಿಮಂ ಕುಮ್ಭಗತಾ ಮಯಾ ತೇ, ಅಕ್ಖಾತರೂಪಂ ತವ ಸಬ್ಬಮಿತ್ತ.

೬೦. ನ ಮೇ ಪಿತಾ ವಾ ಅಥವಾಪಿ ಮಾತಾ, ಏತಾದಿಸಾ ಯಾದಿಸಕೋ ತುವಂಸಿ;

ಹಿತಾನುಕಮ್ಪೀ ಪರಮತ್ಥಕಾಮೋ, ಸೋಹಂ ಕರಿಸ್ಸಂ ವಚನಂ ತವಜ್ಜ.

೬೧. ದದಾಮಿ ತೇ ಗಾಮವರಾನಿ ಪಞ್ಚ, ದಾಸೀಸತಂ ಸತ್ತ ಗವಂ ಸತಾನಿ;

ಆಜಞ್ಞಯುತ್ತೇ ಚ ರಥೇ ದಸ ಇಮೇ, ಆಚರಿಯೋ ಹೋಸಿ ಮಮತ್ಥಕಾಮೋ.

೬೨. ತವೇವ ದಾಸೀಸತಮತ್ಥು ರಾಜ, ಗಾಮಾ ಚ ಗಾವೋ ಚ ತವೇವ ಹೋನ್ತು;

ಆಜಞ್ಞಯುತ್ತಾ ಚ ರಥಾ ತವೇವ, ಸಕ್ಕೋಹಮಸ್ಮೀ ತಿದಸಾನಮಿನ್ದೋ.

೬೩. ಮಂಸೋದನಂ ಸಪ್ಪಿಪಾಯಾಸಂ [ಸಪ್ಪಿಪಾಯಞ್ಚ (ಸೀ.)] ಭುಞ್ಜ, ಖಾದಸ್ಸು ಚ ತ್ವಂ ಮಧುಮಾಸಪೂವೇ;

ಏವಂ ತುವಂ ಧಮ್ಮರತೋ ಜನಿನ್ದ, ಅನಿನ್ದಿತೋ ಸಗ್ಗಮುಪೇಹಿ ಠಾನನ್ತಿ.

ಕುಮ್ಭಜಾತಕಂ ದುತಿಯಂ.