೪೯೭. ಮಾತಙ್ಗಜಾತಕಂ (೧)

೧. ಕುತೋ ನು ಆಗಚ್ಛಸಿ ದುಮ್ಮವಾಸೀ [ರುಮ್ಮವಾಸೀ (ಸೀ. ಪೀ.)], ಓತಲ್ಲಕೋ ಪಂಸುಪಿಸಾಚಕೋವ;

ಸಙ್ಕಾರಚೋಳಂ ಪಟಿಮುಞ್ಚ [ಪಟಿಮುಚ್ಚ (ಸೀ. ಪೀ.)] ಕಣ್ಠೇ, ಕೋ ರೇ ತುವಂ ಹೋಸಿ [ಹೋಹಿಸಿ (ಸೀ. ಪೀ.)] ಅದಕ್ಖಿಣೇಯ್ಯೋ.

೨. ಅನ್ನಂ ತವೇದಂ [ತವ ಇದಂ (ಕ. ಸೀ. ಪೀ.), ತವಯಿದಂ (ಸ್ಯಾ.)] ಪಕತಂ ಯಸಸ್ಸಿ, ತಂ ಖಜ್ಜರೇ ಭುಞ್ಜರೇ ಪಿಯ್ಯರೇ ಚ;

ಜಾನಾಸಿ ಮಂ ತ್ವಂ ಪರದತ್ತೂಪಜೀವಿಂ, ಉತ್ತಿಟ್ಠಪಿಣ್ಡಂ ಲಭತಂ ಸಪಾಕೋ.

೩. ಅನ್ನಂ ಮಮೇದಂ [ಮಮ ಇದಂ (ಕ. ಸೀ. ಪೀ.), ಮಮಯಿದಂ (ಸ್ಯಾ.)] ಪಕತಂ ಬ್ರಾಹ್ಮಣಾನಂ, ಅತ್ತತ್ಥಾಯ ಸದ್ದಹತೋ ಮಮೇದಂ [ಮಮ ಇದಂ (ಕ. ಸೀ. ಪೀ.), ಮಮಯಿದಂ (ಸ್ಯಾ.)];

ಅಪೇಹಿ ಏತ್ತೋ ಕಿಮಿಧಟ್ಠಿತೋಸಿ, ನ ಮಾದಿಸಾ ತುಯ್ಹಂ ದದನ್ತಿ ಜಮ್ಮ.

೪. ಥಲೇ ಚ ನಿನ್ನೇ ಚ ವಪನ್ತಿ ಬೀಜಂ, ಅನೂಪಖೇತ್ತೇ ಫಲಮಾಸಮಾನಾ [ಮಾಸಸಾನಾ (ಸೀ. ಪೀ.), ಮಾಸಿಂ ಸಮಾನಾ (ಸ್ಯಾ.)];

ಏತಾಯ ಸದ್ಧಾಯ ದದಾಹಿ ದಾನಂ, ಅಪ್ಪೇವ ಆರಾಧಯೇ ದಕ್ಖಿಣೇಯ್ಯೇ.

೫. ಖೇತ್ತಾನಿ ಮಯ್ಹಂ ವಿದಿತಾನಿ ಲೋಕೇ, ಯೇಸಾಹಂ ಬೀಜಾನಿ ಪತಿಟ್ಠಪೇಮಿ;

ಯೇ ಬ್ರಾಹ್ಮಣಾ ಜಾತಿಮನ್ತೂಪಪನ್ನಾ, ತಾನೀಧ ಖೇತ್ತಾನಿ ಸುಪೇಸಲಾನಿ.

೬. ಜಾತಿಮದೋ ಚ ಅತಿಮಾನಿತಾ ಚ, ಲೋಭೋ ಚ ದೋಸೋ ಚ ಮದೋ ಚ ಮೋಹೋ;

ಏತೇ ಅಗುಣಾ ಯೇಸು ಚ ಸನ್ತಿ [ಯೇಸು ವಸನ್ತಿ (ಸೀ. ಪೀ.)] ಸಬ್ಬೇ, ತಾನೀಧ ಖೇತ್ತಾನಿ ಅಪೇಸಲಾನಿ.

೭. ಜಾತಿಮದೋ ಚ ಅತಿಮಾನಿತಾ ಚ, ಲೋಭೋ ಚ ದೋಸೋ ಚ ಮದೋ ಚ ಮೋಹೋ;

ಏತೇ ಅಗುಣಾ ಯೇಸು ನ ಸನ್ತಿ ಸಬ್ಬೇ, ತಾನೀಧ ಖೇತ್ತಾನಿ ಸುಪೇಸಲಾನಿ.

೮. ಕ್ವೇತ್ಥ ಗತಾ [ಕ್ವತ್ಥ ಗತಾ (ಸ್ಯಾ.), ಕತ್ಥೇವ ಭಟ್ಠಾ (ಪೀ.)] ಉಪಜೋತಿಯೋ ಚ, ಉಪಜ್ಝಾಯೋ ಚ ಅಥವಾ ಗಣ್ಡಕುಚ್ಛಿ [ಅಣ್ಡಕುಚ್ಛಿ (ಸೀ. ಸ್ಯಾ. ಪೀ.)];

ಇಮಸ್ಸ ದಣ್ಡಞ್ಚ ವಧಞ್ಚ ದತ್ವಾ, ಗಲೇ ಗಹೇತ್ವಾ ಖಲಯಾಥ [ಗಲಯಾಥ (ಕ.)] ಜಮ್ಮಂ.

೯. ಗಿರಿಂ ನಖೇನ ಖಣಸಿ, ಅಯೋ ದನ್ತೇಹಿ [ದನ್ತೇನ (ಸೀ. ಪೀ.)] ಖಾದಸಿ;

ಜಾತವೇದಂ ಪದಹಸಿ, ಯೋ ಇಸಿಂ ಪರಿಭಾಸಸಿ.

೧೦. ಇದಂ ವತ್ವಾನ ಮಾತಙ್ಗೋ, ಇಸಿ ಸಚ್ಚಪರಕ್ಕಮೋ;

ಅನ್ತಲಿಕ್ಖಸ್ಮಿಂ ಪಕ್ಕಾಮಿ [ಪಕ್ಕಮಿ (ಕ.)], ಬ್ರಾಹ್ಮಣಾನಂ ಉದಿಕ್ಖತಂ.

೧೧. ಆವೇಲ್ಲಿತಂ [ಅವೇಠಿತಂ (ಸೀ. ಪೀ.)] ಪಿಟ್ಠಿತೋ ಉತ್ತಮಙ್ಗಂ, ಬಾಹುಂ [ಬಾಹಂ (ಸೀ. ಪೀ.)] ಪಸಾರೇತಿ ಅಕಮ್ಮನೇಯ್ಯಂ [ಅಕಮ್ಪನೇಯ್ಯಂ (ಕ.)];

ಸೇತಾನಿ ಅಕ್ಖೀನಿ ಯಥಾ ಮತಸ್ಸ, ಕೋ ಮೇ ಇಮಂ ಪುತ್ತಮಕಾಸಿ ಏವಂ.

೧೨. ಇಧಾಗಮಾ ಸಮಣೋ ದುಮ್ಮವಾಸೀ, ಓತಲ್ಲಕೋ ಪಂಸುಪಿಸಾಚಕೋವ;

ಸಙ್ಕಾರಚೋಳಂ ಪಟಿಮುಞ್ಚ ಕಣ್ಠೇ, ಸೋ ತೇ ಇಮಂ ಪುತ್ತಮಕಾಸಿ ಏವಂ.

೧೩. ಕತಮಂ ದಿಸಂ ಅಗಮಾ ಭೂರಿಪಞ್ಞೋ, ಅಕ್ಖಾಥ ಮೇ ಮಾಣವಾ ಏತಮತ್ಥಂ;

ಗನ್ತ್ವಾನ ತಂ ಪಟಿಕರೇಮು ಅಚ್ಚಯಂ, ಅಪ್ಪೇವ ನಂ ಪುತ್ತ ಲಭೇಮು ಜೀವಿತಂ.

೧೪. ವೇಹಾಯಸಂ ಅಗಮಾ ಭೂರಿಪಞ್ಞೋ, ಪಥದ್ಧುನೋ ಪನ್ನರಸೇವ ಚನ್ದೋ;

ಅಪಿ ಚಾಪಿ ಸೋ ಪುರಿಮದಿಸಂ ಅಗಚ್ಛಿ, ಸಚ್ಚಪ್ಪಟಿಞ್ಞೋ ಇಸಿ ಸಾಧುರೂಪೋ.

೧೫. ಆವೇಲ್ಲಿತಂ ಪಿಟ್ಠಿತೋ ಉತ್ತಮಙ್ಗಂ, ಬಾಹುಂ ಪಸಾರೇತಿ ಅಕಮ್ಮನೇಯ್ಯಂ;

ಸೇತಾನಿ ಅಕ್ಖೀನಿ ಯಥಾ ಮತಸ್ಸ, ಕೋ ಮೇ ಇಮಂ ಪುತ್ತಮಕಾಸಿ ಏವಂ.

೧೬. ಯಕ್ಖಾ ಹವೇ ಸನ್ತಿ ಮಹಾನುಭಾವಾ, ಅನ್ವಾಗತಾ ಇಸಯೋ ಸಾಧುರೂಪಾ;

ತೇ ದುಟ್ಠಚಿತ್ತಂ ಕುಪಿತಂ ವಿದಿತ್ವಾ, ಯಕ್ಖಾ ಹಿ ತೇ ಪುತ್ತಮಕಂಸು ಏವಂ.

೧೭. ಯಕ್ಖಾ ಚ ಮೇ ಪುತ್ತಮಕಂಸು ಏವಂ, ತ್ವಞ್ಞೇವ ಮೇ ಮಾ ಕುದ್ಧೋ [ಕುದ್ಧ (ಕ.)] ಬ್ರಹ್ಮಚಾರಿ;

ತುಮ್ಹೇವ [ತುಯ್ಹೇವ (ಕ.)] ಪಾದೇ ಸರಣಂ ಗತಾಸ್ಮಿ, ಅನ್ವಾಗತಾ ಪುತ್ತಸೋಕೇನ ಭಿಕ್ಖು.

೧೮. ತದೇವ ಹಿ ಏತರಹಿ ಚ ಮಯ್ಹಂ, ಮನೋಪದೋಸೋ ನ ಮಮತ್ಥಿ [ಮಮ ನತ್ಥಿ (ಪೀ.)] ಕೋಚಿ;

ಪುತ್ತೋ ಚ ತೇ ವೇದಮದೇನ ಮತ್ತೋ, ಅತ್ಥಂ ನ ಜಾನಾತಿ ಅಧಿಚ್ಚ ವೇದೇ.

೧೯. ಅದ್ಧಾ ಹವೇ ಭಿಕ್ಖು ಮುಹುತ್ತಕೇನ, ಸಮ್ಮುಯ್ಹತೇವ ಪುರಿಸಸ್ಸ ಸಞ್ಞಾ;

ಏಕಾಪರಾಧಂ [ಏತಾಪರಾಧಂ (ಕ.)] ಖಮ ಭೂರಿಪಞ್ಞ, ನ ಪಣ್ಡಿತಾ ಕೋಧಬಲಾ ಭವನ್ತಿ.

೨೦. ಇದಞ್ಚ ಮಯ್ಹಂ ಉತ್ತಿಟ್ಠಪಿಣ್ಡಂ, ತವ [ನತ್ಥಿ ಸೀ. ಪೀ. ಪೋತ್ಥಕೇಸು] ಮಣ್ಡಬ್ಯೋ ಭುಞ್ಜತು ಅಪ್ಪಪಞ್ಞೋ;

ಯಕ್ಖಾ ಚ ತೇ ನಂ [ತೇ ಪುತ್ತಂ (ಸ್ಯಾ.)] ನ ವಿಹೇಠಯೇಯ್ಯುಂ, ಪುತ್ತೋ ಚ ತೇ ಹೇಸ್ಸತಿ [ಹೋಹಿತಿ (ಸೀ. ಪೀ.)] ಸೋ ಅರೋಗೋ.

೨೧. ಮಣ್ಡಬ್ಯ ಬಾಲೋಸಿ ಪರಿತ್ತಪಞ್ಞೋ, ಯೋ ಪುಞ್ಞಖೇತ್ತಾನಮಕೋವಿದೋಸಿ;

ಮಹಕ್ಕಸಾವೇಸು ದದಾಸಿ ದಾನಂ, ಕಿಲಿಟ್ಠಕಮ್ಮೇಸು ಅಸಞ್ಞತೇಸು.

೨೨. ಜಟಾ ಚ ಕೇಸಾ ಅಜಿನಾ ನಿವತ್ಥಾ, ಜರೂದಪಾನಂವ ಮುಖಂ ಪರೂಳ್ಹಂ;

ಪಜಂ ಇಮಂ ಪಸ್ಸಥ ದುಮ್ಮರೂಪಂ [ರುಮ್ಮರೂಪಿಂ (ಸೀ. ಪೀ.)], ನ ಜಟಾಜಿನಂ ತಾಯತಿ ಅಪ್ಪಪಞ್ಞಂ.

೨೩. ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ;

ಖೀಣಾಸವಾ ಅರಹನ್ತೋ, ತೇಸು ದಿನ್ನಂ ಮಹಪ್ಫಲನ್ತಿ.

ಮಾತಙ್ಗಜಾತಕಂ ಪಠಮಂ.