೪೮೪. ಸಾಲಿಕೇದಾರಜಾತಕಂ (೧)

೧. ಸಮ್ಪನ್ನಂ ಸಾಲಿಕೇದಾರಂ, ಸುವಾ ಭುಞ್ಜನ್ತಿ ಕೋಸಿಯ;

ಪಟಿವೇದೇಮಿ ತೇ ಬ್ರಹ್ಮೇ, ನ ನೇ [ತೇ (ಸೀ. ಸ್ಯಾ.), ನಂ (ಸೀ. ಸ್ಯಾ. ಪೀ. ಅಟ್ಠ.), ತಂ (ಕ. ಅಟ್ಠ.)] ವಾರೇತುಮುಸ್ಸಹೇ.

೨. ಏಕೋ ಚ ತತ್ಥ ಸಕುಣೋ, ಯೋ ನೇಸಂ [ತೇಸಂ (ಸೀ. ಅಟ್ಠ.)] ಸಬ್ಬಸುನ್ದರೋ;

ಭುತ್ವಾ ಸಾಲಿಂ ಯಥಾಕಾಮಂ, ತುಣ್ಡೇನಾದಾಯ ಗಚ್ಛತಿ.

೩. ಓಡ್ಡೇನ್ತು [ಉಜ್ಝುನ್ತು (ಸ್ಯಾ. ಕ.) ಅಙ್ಗುತ್ತರನಿಕಾಯೇ ಪಸ್ಸಿತಬ್ಬಂ] ವಾಳಪಾಸಾನಿ, ಯಥಾ ವಜ್ಝೇಥ ಸೋ ದಿಜೋ;

ಜೀವಞ್ಚ ನಂ ಗಹೇತ್ವಾನ, ಆನಯೇಹಿ [ಆನಯೇಥ (ಸೀ. ಪೀ.)] ಮಮನ್ತಿಕೇ.

೪. ಏತೇ ಭುತ್ವಾ ಪಿವಿತ್ವಾ ಚ [ಭುತ್ವಾ ಚ ಪಿತ್ವಾ ಚ (ಪೀ.)], ಪಕ್ಕಮನ್ತಿ ವಿಹಙ್ಗಮಾ;

ಏಕೋ ಬದ್ಧೋಸ್ಮಿ ಪಾಸೇನ, ಕಿಂ ಪಾಪಂ ಪಕತಂ ಮಯಾ.

೫. ಉದರಂ ನೂನ ಅಞ್ಞೇಸಂ, ಸುವ ಅಚ್ಚೋದರಂ ತವ;

ಭುತ್ವಾ ಸಾಲಿಂ ಯಥಾಕಾಮಂ, ತುಣ್ಡೇನಾದಾಯ ಗಚ್ಛಸಿ.

೬. ಕೋಟ್ಠಂ ನು ತತ್ಥ ಪೂರೇಸಿ, ಸುವ ವೇರಂ ನು ತೇ ಮಯಾ;

ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕುಹಿಂ ಸಾಲಿಂ ನಿದಾಹಸಿ [ನಿಧೀಯಸಿ (ಪೀ.)].

೭. ನ ಮೇ ವೇರಂ ತಯಾ ಸದ್ಧಿಂ, ಕೋಟ್ಠೋ ಮಯ್ಹಂ ನ ವಿಜ್ಜತಿ;

ಇಣಂ ಮುಞ್ಚಾಮಿಣಂ ದಮ್ಮಿ, ಸಮ್ಪತ್ತೋ ಕೋಟಸಿಮ್ಬಲಿಂ;

ನಿಧಿಮ್ಪಿ ತತ್ಥ ನಿದಹಾಮಿ, ಏವಂ ಜಾನಾಹಿ ಕೋಸಿಯ.

೮. ಕೀದಿಸಂ ತೇ ಇಣದಾನಂ, ಇಣಮೋಕ್ಖೋ ಚ ಕೀದಿಸೋ;

ನಿಧಿನಿಧಾನಮಕ್ಖಾಹಿ, ಅಥ ಪಾಸಾ ಪಮೋಕ್ಖಸಿ.

೯. ಅಜಾತಪಕ್ಖಾ ತರುಣಾ, ಪುತ್ತಕಾ ಮಯ್ಹ ಕೋಸಿಯ;

ತೇ ಮಂ ಭತಾ ಭರಿಸ್ಸನ್ತಿ, ತಸ್ಮಾ ತೇಸಂ ಇಣಂ ದದೇ.

೧೦. ಮಾತಾ ಪಿತಾ ಚ ಮೇ ವುದ್ಧಾ, ಜಿಣ್ಣಕಾ ಗತಯೋಬ್ಬನಾ;

ತೇಸಂ ತುಣ್ಡೇನ ಹಾತೂನ, ಮುಞ್ಚೇ ಪುಬ್ಬಕತಂ [ಪುಬ್ಬೇ ಕತಂ (ಸೀ.)] ಇಣಂ.

೧೧. ಅಞ್ಞೇಪಿ ತತ್ಥ ಸಕುಣಾ, ಖೀಣಪಕ್ಖಾ ಸುದುಬ್ಬಲಾ;

ತೇಸಂ ಪುಞ್ಞತ್ಥಿಕೋ ದಮ್ಮಿ, ತಂ ನಿಧಿಂ ಆಹು ಪಣ್ಡಿತಾ.

೧೨. ಈದಿಸಂ [ಏದಿಸಂ (ಸೀ. ಪೀ.)] ಮೇ ಇಣದಾನಂ, ಇಣಮೋಕ್ಖೋ ಚ ಈದಿಸೋ;

ನಿಧಿನಿಧಾನಮಕ್ಖಾಮಿ [ನಿಧಿಂ ನಿಧಾನಂ ಅಕ್ಖಾತಂ (ಸೀ. ಪೀ.)], ಏವಂ ಜಾನಾಹಿ ಕೋಸಿಯ.

೧೩. ಭದ್ದಕೋ ವತಯಂ ಪಕ್ಖೀ, ದಿಜೋ ಪರಮಧಮ್ಮಿಕೋ;

ಏಕಚ್ಚೇಸು ಮನುಸ್ಸೇಸು, ಅಯಂ ಧಮ್ಮೋ ನ ವಿಜ್ಜತಿ.

೧೪. ಭುಞ್ಜ ಸಾಲಿಂ ಯಥಾಕಾಮಂ, ಸಹ ಸಬ್ಬೇಹಿ ಞಾತಿಭಿ;

ಪುನಾಪಿ ಸುವ ಪಸ್ಸೇಮು, ಪಿಯಂ ಮೇ ತವ ದಸ್ಸನಂ.

೧೫. ಭುತ್ತಞ್ಚ ಪೀತಞ್ಚ ತವಸ್ಸಮಮ್ಹಿ [ತವಸ್ಸಬ್ಯಮ್ಹಿ (ಕ.)], ರತ್ತಿಞ್ಚ [ರತೀ ಚ (ಸೀ. ಪೀ.)] ನೋ ಕೋಸಿಯ ತೇ ಸಕಾಸೇ;

ನಿಕ್ಖಿತ್ತದಣ್ಡೇಸು ದದಾಹಿ ದಾನಂ, ಜಿಣ್ಣೇ ಚ ಮಾತಾಪಿತರೋ ಭರಸ್ಸು.

೧೬. ಲಕ್ಖೀ ವತ ಮೇ ಉದಪಾದಿ ಅಜ್ಜ, ಯೋ ಅದ್ದಸಾಸಿಂ ಪವರಂ [ಯೋಹಂ ಅದಸ್ಸಂ ಪರಮಂ (ಸ್ಯಾ. ಕ.)] ದಿಜಾನಂ;

ಸುವಸ್ಸ ಸುತ್ವಾನ ಸುಭಾಸಿತಾನಿ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ.

೧೭. ಸೋ ಕೋಸಿಯೋ ಅತ್ತಮನೋ ಉದಗ್ಗೋ, ಅನ್ನಞ್ಚ ಪಾನಞ್ಚಭಿಸಙ್ಖರಿತ್ವಾ [ಅನ್ನಞ್ಚ ಪಾನಂ ಅಭಿಸಂಹರಿತ್ವಾ (ಕ.)];

ಅನ್ನೇನ ಪಾನೇನ ಪಸನ್ನಚಿತ್ತೋ, ಸನ್ತಪ್ಪಯಿ ಸಮಣಬ್ರಾಹ್ಮಣೇ ಚಾತಿ.

ಸಾಲಿಕೇದಾರಜಾತಕಂ [ಕೇದಾರಜಾತಕಂ (ಕ.)] ಪಠಮಂ.