೪೭೯. ಕಾಲಿಙ್ಗಬೋಧಿಜಾತಕಂ (೬)

೬೭. ರಾಜಾ ಕಾಲಿಙ್ಗೋ ಚಕ್ಕವತ್ತಿ, ಧಮ್ಮೇನ ಪಥವಿಮನುಸಾಸಂ [ಮನುಸಾಸಿ (ಸ್ಯಾ. ಕ.)];

ಅಗಮಾ [ಅಗಮಾಸಿ (ಸ್ಯಾ. ಕ.)] ಬೋಧಿಸಮೀಪಂ, ನಾಗೇನ ಮಹಾನುಭಾವೇನ.

೬೮. ಕಾಲಿಙ್ಗೋ ಭಾರದ್ವಾಜೋ ಚ, ರಾಜಾನಂ ಕಾಲಿಙ್ಗಂ ಸಮಣಕೋಲಞ್ಞಂ;

ಚಕ್ಕಂ ವತ್ತಯತೋ ಪರಿಗ್ಗಹೇತ್ವಾ [ಪರಿಣೇತ್ವಾ (ಪೀ.)], ಪಞ್ಜಲೀ ಇದಮವೋಚ.

೬೯. ಪಚ್ಚೋರೋಹ ಮಹಾರಾಜ, ಭೂಮಿಭಾಗೋ ಯಥಾ ಸಮಣುಗ್ಗತೋ [ಸಮನುಗೀತೋ (ಸೀ. ಸ್ಯಾ. ಪೀ.)];

ಇಧ ಅನಧಿವರಾ ಬುದ್ಧಾ, ಅಭಿಸಮ್ಬುದ್ಧಾ ವಿರೋಚನ್ತಿ.

೭೦. ಪದಕ್ಖಿಣತೋ ಆವಟ್ಟಾ, ತಿಣಲತಾ ಅಸ್ಮಿಂ ಭೂಮಿಭಾಗಸ್ಮಿಂ;

ಪಥವಿಯಾ ನಾಭಿಯಂ [ಪುಥುವಿಯಾ ಅಯಂ (ಸೀ.), ಪಠವಿಯಾ ಅಯಂ (ಸ್ಯಾ.), ಪುಥವಿಯಾ’ಯಂ (ಪೀ.)] ಮಣ್ಡೋ, ಇತಿ ನೋ ಸುತಂ ಮನ್ತೇ ಮಹಾರಾಜ [ಸುತಂ ಮಹಾರಾಜ (ಸೀ. ಸ್ಯಾ. ಪೀ.)].

೭೧. ಸಾಗರಪರಿಯನ್ತಾಯ, ಮೇದಿನಿಯಾ ಸಬ್ಬಭೂತಧರಣಿಯಾ;

ಪಥವಿಯಾ ಅಯಂ ಮಣ್ಡೋ, ಓರೋಹಿತ್ವಾ ನಮೋ ಕರೋಹಿ.

೭೨. ಯೇ ತೇ ಭವನ್ತಿ ನಾಗಾ ಚ, ಅಭಿಜಾತಾ ಚ ಕುಞ್ಜರಾ;

ಏತ್ತಾವತಾ ಪದೇಸಂ ತೇ, ನಾಗಾ ನೇವ ಮುಪಯನ್ತಿ.

೭೩. ಅಭಿಜಾತೋ ನಾಗೋ [ಅಭಿಜಾತೋ ತೇ ನಾಗೋ (ಸೀ. ಪೀ. ಅಟ್ಠ.)] ಕಾಮಂ, ಪೇಸೇಹಿ ಕುಞ್ಜರಂ ದನ್ತಿಂ;

ಏತ್ತಾವತಾ ಪದೇಸೋ [ಪದೇಸೋ ಚ (ಸ್ಯಾ. ಕ.)], ಸಕ್ಕಾ [ನ ಸಕ್ಕಾ (ಸ್ಯಾ.)] ನಾಗೇನ ಮುಪಗನ್ತುಂ.

೭೪. ತಂ ಸುತ್ವಾ ರಾಜಾ ಕಾಲಿಙ್ಗೋ, ವೇಯ್ಯಞ್ಜನಿಕವಚೋ ನಿಸಾಮೇತ್ವಾ;

ಸಮ್ಪೇಸೇಸಿ ನಾಗಂ ಞಸ್ಸಾಮ, ಮಯಂ ಯಥಿಮಸ್ಸಿದಂ [ಯಥಾ ಇದಂ (ಸೀ. ಸ್ಯಾ. ಪೀ.)] ವಚನಂ.

೭೫. ಸಮ್ಪೇಸಿತೋ ಚ ರಞ್ಞಾ, ನಾಗೋ ಕೋಞ್ಚೋವ ಅಭಿನದಿತ್ವಾನ;

ಪಟಿಸಕ್ಕಿತ್ವಾ [ಪಟಿಓಸಕ್ಕಿತ್ವಾ (ಕ.)] ನಿಸೀದಿ, ಗರುಂವ ಭಾರಂ ಅಸಹಮಾನೋ.

೭೬. ಕಾಲಿಙ್ಗಭಾರದ್ವಾಜೋ, ನಾಗಂ ಖೀಣಾಯುಕಂ ವಿದಿತ್ವಾನ;

ರಾಜಾನಂ ಕಾಲಿಙ್ಗಂ, ತರಮಾನೋ ಅಜ್ಝಭಾಸಿತ್ಥ;

ಅಞ್ಞಂ ಸಙ್ಕಮ ನಾಗಂ, ನಾಗೋ ಖೀಣಾಯುಕೋ ಮಹಾರಾಜ.

೭೭. ತಂ ಸುತ್ವಾ ಕಾಲಿಙ್ಗೋ, ತರಮಾನೋ ಸಙ್ಕಮೀ ನಾಗಂ;

ಸಙ್ಕನ್ತೇವ ರಞ್ಞೇ, ನಾಗೋ ತತ್ಥೇವ ಪತಿ [ಪತಿತೋ (ಕ.)] ಭುಮ್ಯಾ;

ವೇಯ್ಯಞ್ಜನಿಕವಚೋ, ಯಥಾ ತಥಾ ಅಹು ನಾಗೋ.

೭೮. ಕಾಲಿಙ್ಗೋ ರಾಜಾ ಕಾಲಿಙ್ಗಂ, ಬ್ರಾಹ್ಮಣಂ ಏತದವೋಚ;

ತ್ವಮೇವ ಅಸಿ ಸಮ್ಬುದ್ಧೋ, ಸಬ್ಬಞ್ಞೂ ಸಬ್ಬದಸ್ಸಾವೀ.

೭೯. ತಂ ಅನಧಿವಾಸೇನ್ತೋ ಕಾಲಿಙ್ಗಂ [ಕಾಲಿಙ್ಗೋ (ಸೀ. ಸ್ಯಾ. ಪೀ.)], ಬ್ರಾಹ್ಮಣೋ ಇದಮವೋಚ;

ವೇಯ್ಯಞ್ಜನಿಕಾ ಹಿ ಮಯಂ, ಬುದ್ಧಾ ಸಬ್ಬಞ್ಞುನೋ ಮಹಾರಾಜ.

೮೦. ಸಬ್ಬಞ್ಞೂ ಸಬ್ಬವಿದೂ ಚ, ಬುದ್ಧಾ ನ ಲಕ್ಖಣೇನ ಜಾನನ್ತಿ;

ಆಗಮಬಲಸಾ [ಆಗಮಪುರಿಸಾ (ಪೀ.)] ಹಿ ಮಯಂ, ಬುದ್ಧಾ ಸಬ್ಬಂ ಪಜಾನನ್ತಿ.

೮೧. ಮಹಯಿತ್ವಾ ಸಮ್ಬೋಧಿಂ [ಮಹಾಯಿತ್ವಾನ ಸಮ್ಬೋಧಿಂ (ಸೀ. ಪೀ.), ಪಹಂಸಿತ್ವಾನ ಸಮ್ಬೋಧಿಂ (ಸ್ಯಾ.), ಮಮಾಯಿತ್ವಾನ ತಂ ಬೋಧಿಂ (ಕ.)], ನಾನಾತುರಿಯೇಹಿ ವಜ್ಜಮಾನೇಹಿ;

ಮಾಲಾವಿಲೇಪನಂ ಅಭಿಹರಿತ್ವಾ [ಮಾಲಾಗನ್ಧವಿಲೇಪನಂ ಆಹರಿತ್ವಾ (ಸೀ. ಪೀ.); ಪಾಕಾರಪರಿಕ್ಖೇಪಂ ಕಾರೇಸಿ; ಅಥ ರಾಜಾ ಪಾಯಾಸಿ (ಸೀ. ಸ್ಯಾ. ಪೀ.)] ಅಥ ರಾಜಾ ಮನುಪಾಯಾಸಿ [ಪಾಕಾರಪರಿಕ್ಖೇಪಂ ಕಾರೇಸಿ; ಅಥ ರಾಜಾ ಪಾಯಾಸಿ (ಸೀ. ಸ್ಯಾ. ಪೀ.)].

೮೨. ಸಟ್ಠಿ ವಾಹಸಹಸ್ಸಾನಿ, ಪುಪ್ಫಾನಂ ಸನ್ನಿಪಾತಯಿ;

ಪೂಜೇಸಿ ರಾಜಾ ಕಾಲಿಙ್ಗೋ, ಬೋಧಿಮಣ್ಡಮನುತ್ತರನ್ತಿ [ವರುತ್ತಮೇತಿ (ಸೀ.)].

ಕಾಲಿಙ್ಗಬೋಧಿಜಾತಕಂ ಛಟ್ಠಂ.