೪೬೯. ಮಹಾಕಣ್ಹಜಾತಕಂ (೬)

೬೧. ಕಣ್ಹೋ ಕಣ್ಹೋ ಚ ಘೋರೋ ಚ, ಸುಕ್ಕದಾಠೋ ಪಭಾಸವಾ [ಪತಾಪವಾ (ಸೀ. ಸ್ಯಾ. ಪೀ.)];

ಬದ್ಧೋ ಪಞ್ಚಹಿ ರಜ್ಜೂಹಿ, ಕಿಂ ರವಿ [ಧೀರ (ಸೀ. ಪೀ.), ವೀರ (ಸ್ಯಾ.)] ಸುನಖೋ ತವ.

೬೨. ನಾಯಂ ಮಿಗಾನಮತ್ಥಾಯ, ಉಸೀನಕ [ಉಸೀನರ (ಸೀ. ಪೀ.), ಉಸೀನ್ನರ (ಸ್ಯಾ.)] ಭವಿಸ್ಸತಿ;

ಮನುಸ್ಸಾನಂ ಅನಯೋ ಹುತ್ವಾ, ತದಾ ಕಣ್ಹೋ ಪಮೋಕ್ಖತಿ.

೬೩. ಪತ್ತಹತ್ಥಾ ಸಮಣಕಾ, ಮುಣ್ಡಾ ಸಙ್ಘಾಟಿಪಾರುತಾ;

ನಙ್ಗಲೇಹಿ ಕಸಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೪. ತಪಸ್ಸಿನಿಯೋ [ತಪನೀಯಾ (ಕ.) ದುತಿಯನ್ತಪದಾನಿ ಹೇತಾನಿ] ಪಬ್ಬಜಿತಾ, ಮುಣ್ಡಾ ಸಙ್ಘಾಟಿಪಾರುತಾ;

ಯದಾ ಲೋಕೇ ಗಮಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೫. ದೀಘೋತ್ತರೋಟ್ಠಾ ಜಟಿಲಾ, ಪಙ್ಕದನ್ತಾ ರಜಸ್ಸಿರಾ;

ಇಣಂ ಚೋದಾಯ [ವೋದಾಯ (ಸೀ. ಪೀ.), ಚೋದಯ (ಸ್ಯಾ.)] ಗಚ್ಛನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೬. ಅಧಿಚ್ಚ ವೇದೇ [ವೇದಂ (ಕ.)] ಸಾವಿತ್ತಿಂ, ಯಞ್ಞತನ್ತಞ್ಚ [ತನ್ತ್ರಞ್ಚ (ಸೀ. ಸ್ಯಾ. ಪೀ.)] ಬ್ರಾಹ್ಮಣಾ;

ಭತಿಕಾಯ ಯಜಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೭. ಮಾತರಂ ಪಿತರಞ್ಚಾಪಿ, ಜಿಣ್ಣಕಂ ಗತಯೋಬ್ಬನಂ;

ಪಹೂ ಸನ್ತೋ [ಸನ್ತಾ (ಸೀ.)] ನ ಭರನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೮. ಮಾತರಂ ಪಿತರಞ್ಚಾಪಿ, ಜಿಣ್ಣಕಂ ಗತಯೋಬ್ಬನಂ;

ಬಾಲಾ ತುಮ್ಹೇತಿ ವಕ್ಖನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೯. ಆಚರಿಯಭರಿಯಂ ಸಖಿಂ [ಆಚರಿಯಭರಿಯಂ ಸಖಾಭರಿಯಂ (ಸೀ. ಪೀ.)], ಮಾತುಲಾನಿಂ ಪಿತುಚ್ಛಕಿಂ [ಪಿತುಚ್ಛಯಂ (ಸೀ.), ಪಿತುಚ್ಛಸಂ (ಪೀ.)];

ಯದಾ ಲೋಕೇ ಗಮಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೭೦. ಅಸಿಚಮ್ಮಂ ಗಹೇತ್ವಾನ, ಖಗ್ಗಂ ಪಗ್ಗಯ್ಹ ಬ್ರಾಹ್ಮಣಾ;

ಪನ್ಥಘಾತಂ ಕರಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೭೧. ಸುಕ್ಕಚ್ಛವೀ ವೇಧವೇರಾ, ಥೂಲಬಾಹೂ ಅಪಾತುಭಾ;

ಮಿತ್ತಭೇದಂ ಕರಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೭೨. ಮಾಯಾವಿನೋ ನೇಕತಿಕಾ, ಅಸಪ್ಪುರಿಸಚಿನ್ತಕಾ;

ಯದಾ ಲೋಕೇ ಭವಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತೀತಿ.

ಮಹಾಕಣ್ಹಜಾತಕಂ ಛಟ್ಠಂ.