೪೬೧. ದಸರಥಜಾತಕಂ (೭)

೮೪. ಏಥ ಲಕ್ಖಣ ಸೀತಾ ಚ, ಉಭೋ ಓತರಥೋದಕಂ;

ಏವಾಯಂ ಭರತೋ ಆಹ, ‘‘ರಾಜಾ ದಸರಥೋ ಮತೋ’’.

೮೫. ಕೇನ ರಾಮಪ್ಪಭಾವೇನ, ಸೋಚಿತಬ್ಬಂ ನ ಸೋಚಸಿ;

ಪಿತರಂ ಕಾಲಕತಂ [ಕಾಲಙ್ಕತಂ (ಕ.)] ಸುತ್ವಾ, ನ ತಂ ಪಸಹತೇ ದುಖಂ.

೮೬. ಯಂ ನ ಸಕ್ಕಾ ನಿಪಾಲೇತುಂ, ಪೋಸೇನ ಲಪತಂ ಬಹುಂ;

ಸ ಕಿಸ್ಸ ವಿಞ್ಞೂ ಮೇಧಾವೀ, ಅತ್ತಾನಮುಪತಾಪಯೇ.

೮೭. ದಹರಾ ಚ ಹಿ ವುದ್ಧಾ ಚ [ಯೇ ವುದ್ಧಾ (ಸೀ. ಅಟ್ಠ.), ಯೇ ವುಡ್ಢಾ (ಸ್ಯಾ.)], ಯೇ ಬಾಲಾ ಯೇ ಚ ಪಣ್ಡಿತಾ;

ಅಡ್ಢಾ ಚೇವ ದಲಿದ್ದಾ ಚ, ಸಬ್ಬೇ ಮಚ್ಚುಪರಾಯಣಾ.

೮೮. ಫಲಾನಮಿವ ಪಕ್ಕಾನಂ, ನಿಚ್ಚಂ ಪತನತೋ ಭಯಂ;

ಏವಂ ಜಾತಾನ ಮಚ್ಚಾನಂ, ನಿಚ್ಚ ಮರಣತೋ ಭಯಂ.

೮೯. ಸಾಯಮೇಕೇ ನ ದಿಸ್ಸನ್ತಿ, ಪಾತೋ ದಿಟ್ಠಾ ಬಹುಜ್ಜನಾ;

ಪಾತೋ ಏಕೇ ನ ದಿಸ್ಸನ್ತಿ, ಸಾಯಂ ದಿಟ್ಠಾ ಬಹುಜ್ಜನಾ.

೯೦. ಪರಿದೇವಯಮಾನೋ ಚೇ, ಕಿಞ್ಚಿದತ್ಥಂ ಉದಬ್ಬಹೇ;

ಸಮ್ಮೂಳ್ಹೋ ಹಿಂಸಮತ್ತಾನಂ, ಕಯಿರಾ ತಂ ವಿಚಕ್ಖಣೋ.

೯೧. ಕಿಸೋ ವಿವಣ್ಣೋ ಭವತಿ, ಹಿಂಸಮತ್ತಾನಮತ್ತನೋ [ಮತ್ತನಾ (ಸೀ. ಅಟ್ಠ. ಸು. ನಿ. ೫೯೦)];

ನ ತೇನ ಪೇತಾ ಪಾಲೇನ್ತಿ, ನಿರತ್ಥಾ ಪರಿದೇವನಾ.

೯೨. ಯಥಾ ಸರಣಮಾದಿತ್ತಂ, ವಾರಿನಾ ಪರಿನಿಬ್ಬಯೇ [ವಾರಿನಾವನಿಬ್ಬಾಪಯೇ (ಸ್ಯಾ. ಕ.)];

ಏವಮ್ಪಿ ಧೀರೋ ಸುತವಾ, ಮೇಧಾವೀ ಪಣ್ಡಿತೋ ನರೋ;

ಖಿಪ್ಪಮುಪ್ಪತಿತಂ ಸೋಕಂ, ವಾತೋ ತೂಲಂವ ಧಂಸಯೇ.

೯೩. ಮಚ್ಚೋ ಏಕೋವ [ಏಕೋವ ಮಚ್ಚೋ (ಸೀ. ಸ್ಯಾ. ಪೀ.)] ಅಚ್ಚೇತಿ, ಏಕೋವ ಜಾಯತೇ ಕುಲೇ;

ಸಂಯೋಗಪರಮಾತ್ವೇವ, ಸಮ್ಭೋಗಾ ಸಬ್ಬಪಾಣಿನಂ.

೯೪. ತಸ್ಮಾ ಹಿ ಧೀರಸ್ಸ ಬಹುಸ್ಸುತಸ್ಸ, ಸಮ್ಪಸ್ಸತೋ ಲೋಕಮಿಮಂ ಪರಞ್ಚ;

ಅಞ್ಞಾಯ ಧಮ್ಮಂ ಹದಯಂ ಮನಞ್ಚ, ಸೋಕಾ ಮಹನ್ತಾಪಿ ನ ತಾಪಯನ್ತಿ.

೯೫. ಸೋಹಂ ದಸ್ಸಞ್ಚ ಭೋಕ್ಖಞ್ಚ, ಭರಿಸ್ಸಾಮಿ ಚ [ಸೋಹಂ ಯಸಞ್ಚ ಭೋಗಞ್ಚ, ಭರಿಯಾಪಿ ಚ (ಸ್ಯಾ. ಕ.)] ಞಾತಕೇ;

ಸೇಸಞ್ಚ ಪಾಲಯಿಸ್ಸಾಮಿ, ಕಿಚ್ಚಮೇತಂ [ಕಿಚ್ಚಮೇವಂ (ಪೀ.)] ವಿಜಾನತೋ.

೯೬. ದಸ ವಸ್ಸಸಹಸ್ಸಾನಿ, ಸಟ್ಠಿ ವಸ್ಸಸತಾನಿ ಚ;

ಕಮ್ಬುಗೀವೋ ಮಹಾಬಾಹು, ರಾಮೋ ರಜ್ಜಮಕಾರಯೀತಿ.

ದಸರಥಜಾತಕಂ ಸತ್ತಮಂ.