೪೬೨. ಸಂವರಜಾತಕಂ (೮)

೯೭. ಜಾನನ್ತೋ ನೋ ಮಹಾರಾಜ, ತವ ಸೀಲಂ ಜನಾಧಿಪೋ;

ಇಮೇ ಕುಮಾರೇ ಪೂಜೇನ್ತೋ, ನ ತಂ ಕೇನಚಿ ಮಞ್ಞಥ.

೯೮. ತಿಟ್ಠನ್ತೇ ನೋ ಮಹಾರಾಜೇ, ಅದು [ಆದು (ಸೀ. ಪೀ.), ಆದೂ (ಸ್ಯಾ.)] ದೇವೇ ದಿವಙ್ಗತೇ;

ಞಾತೀ ತಂ ಸಮನುಞ್ಞಿಂಸು, ಸಮ್ಪಸ್ಸಂ ಅತ್ಥಮತ್ತನೋ.

೯೯. ಕೇನ ಸಂವರವತ್ತೇನ, ಸಞ್ಜಾತೇ ಅಭಿತಿಟ್ಠಸಿ;

ಕೇನ ತಂ ನಾತಿವತ್ತನ್ತಿ, ಞಾತಿಸಙ್ಘಾ ಸಮಾಗತಾ.

೧೦೦. ನ ರಾಜಪುತ್ತ ಉಸೂಯಾಮಿ [ರಾಜಪುತ್ತ ನುಸ್ಸುಯ್ಯಾಮಿ (ಕ.)], ಸಮಣಾನಂ ಮಹೇಸಿನಂ;

ಸಕ್ಕಚ್ಚಂ ತೇ ನಮಸ್ಸಾಮಿ, ಪಾದೇ ವನ್ದಾಮಿ ತಾದಿನಂ.

೧೦೧. ತೇ ಮಂ ಧಮ್ಮಗುಣೇ ಯುತ್ತಂ, ಸುಸ್ಸೂಸಮನುಸೂಯಕಂ;

ಸಮಣಾ ಮನುಸಾಸನ್ತಿ [ಸಮನುಸಾಸನ್ತಿ (ಸೀ. ಸ್ಯಾ. ಪೀ.)], ಇಸೀ ಧಮ್ಮಗುಣೇ ರತಾ.

೧೦೨. ತೇಸಾಹಂ ವಚನಂ ಸುತ್ವಾ, ಸಮಣಾನಂ ಮಹೇಸಿನಂ;

ನ ಕಿಞ್ಚಿ ಅತಿಮಞ್ಞಾಮಿ, ಧಮ್ಮೇ ಮೇ ನಿರತೋ ಮನೋ.

೧೦೩. ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;

ತೇಸಂ [ತೇಸು (ಪೀ.)] ನಪ್ಪಟಿಬನ್ಧಾಮಿ, ನಿವಿಟ್ಠಂ [ನಿಬದ್ಧಂ (ಸೀ. ಪೀ.)] ಭತ್ತವೇತನಂ.

೧೦೪. ಮಹಾಮತ್ತಾ ಚ ಮೇ ಅತ್ಥಿ, ಮನ್ತಿನೋ ಪರಿಚಾರಕಾ;

ಬಾರಾಣಸಿಂ ವೋಹರನ್ತಿ, ಬಹುಮಂಸಸುರೋದಕಂ.

೧೦೫. ಅಥೋಪಿ ವಾಣಿಜಾ ಫೀತಾ, ನಾನಾರಟ್ಠೇಹಿ ಆಗತಾ;

ತೇಸು ಮೇ ವಿಹಿತಾ ರಕ್ಖಾ, ಏವಂ ಜಾನಾಹುಪೋಸಥ.

೧೦೬. ಧಮ್ಮೇನ ಕಿರ ಞಾತೀನಂ, ರಜ್ಜಂ ಕಾರೇಹಿ ಸಂವರ;

ಮೇಧಾವೀ ಪಣ್ಡಿತೋ ಚಾಸಿ [ಚಾಪಿ (ಸೀ. ಪೀ.)], ಅಥೋಪಿ ಞಾತಿನಂ ಹಿತೋ.

೧೦೭. ತಂ ತಂ ಞಾತಿಪರಿಬ್ಯೂಳ್ಹಂ, ನಾನಾರತನಮೋಚಿತಂ;

ಅಮಿತ್ತಾ ನಪ್ಪಸಹನ್ತಿ, ಇನ್ದಂವ ಅಸುರಾಧಿಪೋತಿ.

ಸಂವರಜಾತಕಂ ಅಟ್ಠಮಂ.