೪೬೦. ಯುಧಞ್ಚಯಜಾತಕಂ (೬)

೭೩. ಮಿತ್ತಾಮಚ್ಚಪರಿಬ್ಯೂಳ್ಹಂ [ಪರಿಬ್ಬೂಳ್ಹಂ (ಸೀ. ಪೀ.)], ಅಹಂ ವನ್ದೇ ರಥೇಸಭಂ;

ಪಬ್ಬಜಿಸ್ಸಾಮಹಂ ರಾಜ [ಪಬ್ಬಜಿಸ್ಸಂ ಮಹಾರಾಜ (ಸೀ. ಪೀ.)], ತಂ ದೇವೋ ಅನುಮಞ್ಞತು.

೭೪. ಸಚೇ ತೇ ಊನಂ ಕಾಮೇಹಿ, ಅಹಂ ಪರಿಪೂರಯಾಮಿ [ಅಹಂವ ಪೂರಯಾಮಿ (ಕ.)] ತೇ;

ಯೋ ತಂ ಹಿಂಸತಿ ವಾರೇಮಿ, ಮಾ ಪಬ್ಬಜ [ಪಬ್ಬಜಿ (ಪೀ.)] ಯುಧಞ್ಚಯ [ಯುಧಞ್ಜಯ (ಸೀ. ಸ್ಯಾ.), ಯುವಞ್ಜಯ (ಪೀ.)].

೭೫. ನ ಮತ್ಥಿ ಊನಂ ಕಾಮೇಹಿ, ಹಿಂಸಿತಾ ಮೇ ನ ವಿಜ್ಜತಿ;

ದೀಪಞ್ಚ ಕಾತುಮಿಚ್ಛಾಮಿ, ಯಂ ಜರಾ ನಾಭಿಕೀರತಿ.

೭೬. ಪುತ್ತೋ ವಾ ಪಿತರಂ ಯಾಚೇ, ಪಿತಾ ವಾ ಪುತ್ತಮೋರಸಂ;

ನೇಗಮೋ ತಂ ಯಾಚೇ [ನೇಗಮೋ ಯಾಚತೇ (ಸೀ. ಸ್ಯಾ. ಪೀ.)] ತಾತ, ಮಾ ಪಬ್ಬಜ ಯುಧಞ್ಚಯ.

೭೭. ಮಾ ಮಂ ದೇವ ನಿವಾರೇಹಿ, ಪಬ್ಬಜನ್ತಂ ರಥೇಸಭ;

ಮಾಹಂ ಕಾಮೇಹಿ ಸಮ್ಮತ್ತೋ, ಜರಾಯ ವಸಮನ್ವಗೂ.

೭೮. ಅಹಂ ತಂ ತಾತ ಯಾಚಾಮಿ, ಅಹಂ ಪುತ್ತ ನಿವಾರಯೇ;

ಚಿರಂ ತಂ ದಟ್ಠುಮಿಚ್ಛಾಮಿ, ಮಾ ಪಬ್ಬಜ ಯುಧಞ್ಚಯ.

೭೯. ಉಸ್ಸಾವೋವ ತಿಣಗ್ಗಮ್ಹಿ, ಸೂರಿಯುಗ್ಗಮನಂ ಪತಿ;

ಏವಮಾಯು ಮನುಸ್ಸಾನಂ, ಮಾ ಮಂ ಅಮ್ಮ ನಿವಾರಯ.

೮೦. ತರಮಾನೋ ಇಮಂ ಯಾನಂ, ಆರೋಪೇತು [ತರಮಾನಾ ಇಮಂ ಯಾನಂ, ಆರೋಪೇನ್ತು (ಸೀ. ಪೀ.)] ರಥೇಸಭ;

ಮಾ ಮೇ ಮಾತಾ ತರನ್ತಸ್ಸ, ಅನ್ತರಾಯಕರಾ ಅಹು.

೮೧. ಅಭಿಧಾವಥ ಭದ್ದನ್ತೇ, ಸುಞ್ಞಂ ಹೇಸ್ಸತಿ ರಮ್ಮಕಂ;

ಯುಧಞ್ಚಯೋ ಅನುಞ್ಞಾತೋ, ಸಬ್ಬದತ್ತೇನ ರಾಜಿನಾ.

೮೨. ಯೋಹು ಸೇಟ್ಠೋ ಸಹಸ್ಸಸ್ಸ [ಮನುಸ್ಸಾನಂ (ಸ್ಯಾ.), ಸಹಸ್ಸಾನಂ (ಕ.)], ಯುವಾ ಕಞ್ಚನಸನ್ನಿಭೋ;

ಸೋಯಂ ಕುಮಾರೋ ಪಬ್ಬಜಿತೋ, ಕಾಸಾಯವಸನೋ ಬಲೀ.

೮೩. ಉಭೋ ಕುಮಾರಾ ಪಬ್ಬಜಿತಾ, ಯುಧಞ್ಚಯೋ ಯುಧಿಟ್ಠಿಲೋ;

ಪಹಾಯ ಮಾತಾಪಿತರೋ, ಸಙ್ಗಂ ಛೇತ್ವಾನ ಮಚ್ಚುನೋತಿ.

ಯುಧಞ್ಚಯಜಾತಕಂ ಛಟ್ಠಂ.