೪೫೯. ಪಾನೀಯಜಾತಕಂ (೫)

೫೯. ಮಿತ್ತೋ ಮಿತ್ತಸ್ಸ ಪಾನೀಯಂ, ಅದಿನ್ನಂ ಪರಿಭುಞ್ಜಿಸಂ;

ತೇನ ಪಚ್ಛಾ ವಿಜಿಗುಚ್ಛಿಂ, ತಂ ಪಾಪಂ ಪಕತಂ ಮಯಾ;

ಮಾ ಪುನ ಅಕರಂ ಪಾಪಂ, ತಸ್ಮಾ ಪಬ್ಬಜಿತೋ ಅಹಂ.

೬೦. ಪರದಾರಞ್ಚ ದಿಸ್ವಾನ, ಛನ್ದೋ ಮೇ ಉದಪಜ್ಜಥ [ಉಪಪಜ್ಜಥ (ಸ್ಯಾ. ಕ.)];

ತೇನ ಪಚ್ಛಾ ವಿಜಿಗುಚ್ಛಿಂ, ತಂ ಪಾಪಂ ಪಕತಂ ಮಯಾ;

ಮಾ ಪುನ ಅಕರಂ ಪಾಪಂ, ತಸ್ಮಾ ಪಬ್ಬಜಿತೋ ಅಹಂ.

೬೧. ಪಿತರಂ ಮೇ ಮಹಾರಾಜ, ಚೋರಾ ಅಗಣ್ಹು [ಅಗಣ್ಹುಂ (ಸೀ. ಪೀ.), ಅಗಣ್ಹಿ (ಕ.)] ಕಾನನೇ;

ತೇಸಾಹಂ ಪುಚ್ಛಿತೋ ಜಾನಂ, ಅಞ್ಞಥಾ ನಂ ವಿಯಾಕರಿಂ.

೬೨. ತೇನ ಪಚ್ಛಾ ವಿಜಿಗುಚ್ಛಿಂ, ತಂ ಪಾಪಂ ಪಕತಂ ಮಯಾ;

ಮಾ ಪುನ ಅಕರಂ ಪಾಪಂ, ತಸ್ಮಾ ಪಬ್ಬಜಿತೋ ಅಹಂ.

೬೩. ಪಾಣಾತಿಪಾತಮಕರುಂ, ಸೋಮಯಾಗೇ ಉಪಟ್ಠಿತೇ;

ತೇಸಾಹಂ ಸಮನುಞ್ಞಾಸಿಂ, ತೇನ ಪಚ್ಛಾ ವಿಜಿಗುಚ್ಛಿಂ.

೬೪. ತಂ ಪಾಪಂ ಪಕತಂ ಮಯಾ, ಮಾ ಪುನ ಅಕರಂ ಪಾಪಂ;

ತಸ್ಮಾ ಪಬ್ಬಜಿತೋ ಅಹಂ.

೬೫. ಸುರಾಮೇರಯಮಾಧುಕಾ [ಮಧುಕಾ (ಸೀ. ಸ್ಯಾ. ಪೀ.)], ಯೇ ಜನಾ ಪಠಮಾಸು ನೋ;

ಬಹೂನಂ ತೇ ಅನತ್ಥಾಯ, ಮಜ್ಜಪಾನಮಕಪ್ಪಯುಂ.

೬೬. ತೇಸಾಹಂ ಸಮನುಞ್ಞಾಸಿಂ, ತೇನ ಪಚ್ಛಾ ವಿಜಿಗುಚ್ಛಿಂ;

ತಂ ಪಾಪಂ ಪಕತಂ ಮಯಾ, ಮಾ ಪುನ ಅಕರಂ ಪಾಪಂ;

ತಸ್ಮಾ ಪಬ್ಬಜಿತೋ ಅಹಂ.

೬೭. ಧಿರತ್ಥು ಸುಬಹೂ ಕಾಮೇ, ದುಗ್ಗನ್ಧೇ ಬಹುಕಣ್ಟಕೇ;

ಯೇ ಅಹಂ ಪಟಿಸೇವನ್ತೋ, ನಾಲಭಿಂ ತಾದಿಸಂ ಸುಖಂ.

೬೮. ಮಹಸ್ಸಾದಾ ಸುಖಾ ಕಾಮಾ, ನತ್ಥಿ ಕಾಮಾ ಪರಂ [ಕಾಮಪರಂ (ಸೀ. ಪೀ.)] ಸುಖಂ;

ಯೇ ಕಾಮೇ ಪಟಿಸೇವನ್ತಿ, ಸಗ್ಗಂ ತೇ ಉಪಪಜ್ಜರೇ.

೬೯. ಅಪ್ಪಸ್ಸಾದಾ ದುಖಾ ಕಾಮಾ, ನತ್ಥಿ ಕಾಮಾ ಪರಂ ದುಖಂ;

ಯೇ ಕಾಮೇ ಪಟಿಸೇವನ್ತಿ, ನಿರಯಂ ತೇ ಉಪಪಜ್ಜರೇ.

೭೦. ಅಸೀ ಯಥಾ ಸುನಿಸಿತೋ, ನೇತ್ತಿಂಸೋವ ಸುಪಾಯಿಕೋ [ಸುಪಾಸಿತೋ (ಕ. ಸೀ. ನಿಯ್ಯ), ಸುಪಾಯಿತೋ (ಕ. ಅಟ್ಠ.)];

ಸತ್ತೀವ ಉರಸಿ ಖಿತ್ತಾ, ಕಾಮಾ ದುಕ್ಖತರಾ ತತೋ.

೭೧. ಅಙ್ಗಾರಾನಂವ ಜಲಿತಂ, ಕಾಸುಂ ಸಾಧಿಕಪೋರಿಸಂ;

ಫಾಲಂವ ದಿವಸಂತತ್ತಂ, ಕಾಮಾ ದುಕ್ಖತರಾ ತತೋ.

೭೨. ವಿಸಂ ಯಥಾ ಹಲಾಹಲಂ, ತೇಲಂ ಪಕ್ಕುಥಿತಂ [ಉಕ್ಕಟ್ಠಿತಂ (ಸೀ. ಪೀ.), ಪಕ್ಕುಟ್ಠಿತಂ (ಸ್ಯಾ.)] ಯಥಾ;

ತಮ್ಬಲೋಹ [ತಮ್ಪಲೋಹಂ (ಸ್ಯಾ.)] ವಿಲೀನಂವ, ಕಾಮಾ ದುಕ್ಖತರಾ ತತೋತಿ.

ಪಾನೀಯಜಾತಕಂ ಪಞ್ಚಮಂ.