೪೫೮. ಉದಯಜಾತಕಂ (೪)

೩೭. ಏಕಾ ನಿಸಿನ್ನಾ ಸುಚಿ ಸಞ್ಞತೂರೂ, ಪಾಸಾದಮಾರುಯ್ಹ ಅನಿನ್ದಿತಙ್ಗೀ;

ಯಾಚಾಮಿ ತಂ ಕಿನ್ನರನೇತ್ತಚಕ್ಖು, ಇಮೇಕರತ್ತಿಂ ಉಭಯೋ ವಸೇಮ.

೩೮. ಓಕಿಣ್ಣನ್ತರಪರಿಖಂ, ದಳ್ಹಮಟ್ಟಾಲಕೋಟ್ಠಕಂ;

ರಕ್ಖಿತಂ ಖಗ್ಗಹತ್ಥೇಹಿ, ದುಪ್ಪವೇಸಮಿದಂ ಪುರಂ.

೩೯. ದಹರಸ್ಸ ಯುವಿನೋ ಚಾಪಿ, ಆಗಮೋ ಚ ನ ವಿಜ್ಜತಿ;

ಅಥ ಕೇನ ನು ವಣ್ಣೇನ, ಸಙ್ಗಮಂ ಇಚ್ಛಸೇ ಮಯಾ.

೪೦. ಯಕ್ಖೋಹಮಸ್ಮಿ ಕಲ್ಯಾಣಿ, ಆಗತೋಸ್ಮಿ ತವನ್ತಿಕೇ [ತವನ್ತಿಕಂ (ಸೀ. ಪೀ.)];

ತ್ವಂ ಮಂ ನನ್ದಯ [ನನ್ದಸ್ಸು (ಸ್ಯಾ. ಕ.)] ಭದ್ದನ್ತೇ, ಪುಣ್ಣಕಂಸಂ ದದಾಮಿ ತೇ.

೪೧. ದೇವಂ ವ ಯಕ್ಖಂ ಅಥ ವಾ ಮನುಸ್ಸಂ, ನ ಪತ್ಥಯೇ ಉದಯಮತಿಚ್ಚ ಅಞ್ಞಂ;

ಗಚ್ಛೇವ ತ್ವಂ ಯಕ್ಖ ಮಹಾನುಭಾವ, ಮಾ ಚಸ್ಸು ಗನ್ತ್ವಾ ಪುನರಾವಜಿತ್ಥ.

೪೨. ಯಾ ಸಾ ರತಿ ಉತ್ತಮಾ ಕಾಮಭೋಗಿನಂ, ಯಂ ಹೇತು ಸತ್ತಾ ವಿಸಮಂ ಚರನ್ತಿ;

ಮಾ ತಂ ರತಿಂ ಜೀಯಿ ತುವಂ ಸುಚಿಮ್ಹಿ ತೇ, ದದಾಮಿ ತೇ ರೂಪಿಯಂ ಕಂಸಪೂರಂ.

೪೩. ನಾರಿಂ ನರೋ ನಿಜ್ಝಪಯಂ ಧನೇನ, ಉಕ್ಕಂಸತೀ ಯತ್ಥ ಕರೋತಿ ಛನ್ದಂ;

ವಿಪಚ್ಚನೀಕೋ ತವ ದೇವಧಮ್ಮೋ, ಪಚ್ಚಕ್ಖತೋ ಥೋಕತರೇನ ಏಸಿ.

೪೪. ಆಯು ಚ ವಣ್ಣೋ ಚ [ಆಯುಂ ಚ ವಣ್ಣಂ ಚ (ಕ. ಸೀ. ಪೀ.)] ಮನುಸ್ಸಲೋಕೇ, ನಿಹೀಯತಿ ಮನುಜಾನಂ ಸುಗ್ಗತ್ತೇ;

ತೇನೇವ ವಣ್ಣೇನ ಧನಮ್ಪಿ ತುಯ್ಹಂ, ನಿಹೀಯತಿ ಜಿಣ್ಣತರಾಸಿ ಅಜ್ಜ.

೪೫. ಏವಂ ಮೇ ಪೇಕ್ಖಮಾನಸ್ಸ, ರಾಜಪುತ್ತಿ ಯಸಸ್ಸಿನಿ;

ಹಾಯತೇವ ತವ [ಹಾಯತೇ ವತ ತೇ (ಸೀ. ಸ್ಯಾ. ಕ.), ಹಾಯತೇವ ತತೋ (ಪೀ.)] ವಣ್ಣೋ, ಅಹೋರತ್ತಾನಮಚ್ಚಯೇ.

೪೬. ಇಮಿನಾವ ತ್ವಂ ವಯಸಾ, ರಾಜಪುತ್ತಿ ಸುಮೇಧಸೇ;

ಬ್ರಹ್ಮಚರಿಯಂ ಚರೇಯ್ಯಾಸಿ, ಭಿಯ್ಯೋ ವಣ್ಣವತೀ ಸಿಯಾ.

೪೭. ದೇವಾ ನ ಜೀರನ್ತಿ ಯಥಾ ಮನುಸ್ಸಾ, ಗತ್ತೇಸು ತೇಸಂ ವಲಿಯೋ ನ ಹೋನ್ತಿ;

ಪುಚ್ಛಾಮಿ ತಂ ಯಕ್ಖ ಮಹಾನುಭಾವ, ಕಥಂ ನು ದೇವಾನ [ಕಥಂ ನ ದೇವಾನಂ (ಪೀ.)] ಸರೀರದೇಹೋ.

೪೮. ದೇವಾ ನ ಜೀರನ್ತಿ ಯಥಾ ಮನುಸ್ಸಾ, ಗತ್ತೇಸು ತೇಸಂ ವಲಿಯೋ ನ ಹೋನ್ತಿ;

ಸುವೇ ಸುವೇ ಭಿಯ್ಯತರೋವ [ಭಿಯ್ಯತರೋ ಚ (ಕ.)] ತೇಸಂ, ದಿಬ್ಬೋ ಚ ವಣ್ಣೋ ವಿಪುಲಾ ಚ ಭೋಗಾ.

೪೯. ಕಿಂಸೂಧ ಭೀತಾ ಜನತಾ ಅನೇಕಾ, ಮಗ್ಗೋ ಚ ನೇಕಾಯತನಂ ಪವುತ್ತೋ;

ಪುಚ್ಛಾಮಿ ತಂ ಯಕ್ಖ ಮಹಾನುಭಾವ, ಕತ್ಥಟ್ಠಿತೋ ಪರಲೋಕಂ ನ ಭಾಯೇ.

೫೦. ವಾಚಂ ಮನಞ್ಚ ಪಣಿಧಾಯ ಸಮ್ಮಾ, ಕಾಯೇನ ಪಾಪಾನಿ ಅಕುಬ್ಬಮಾನೋ;

ಬಹುನ್ನಪಾನಂ ಘರಮಾವಸನ್ತೋ, ಸದ್ಧೋ ಮುದೂ ಸಂವಿಭಾಗೀ ವದಞ್ಞೂ;

ಸಙ್ಗಾಹಕೋ ಸಖಿಲೋ ಸಣ್ಹವಾಚೋ, ಏತ್ಥಟ್ಠಿತೋ ಪರಲೋಕಂ ನ ಭಾಯೇ.

೫೧. ಅನುಸಾಸಸಿ ಮಂ ಯಕ್ಖ, ಯಥಾ ಮಾತಾ ಯಥಾ ಪಿತಾ;

ಉಳಾರವಣ್ಣಂ ಪುಚ್ಛಾಮಿ, ಕೋ ನು ತ್ವಮಸಿ ಸುಬ್ರಹಾ.

೫೨. ಉದಯೋಹಮಸ್ಮಿ ಕಲ್ಯಾಣಿ, ಸಙ್ಕರತ್ತಾ ಇಧಾಗತೋ [ಸಙ್ಗರತ್ಥಾ ಇಧಾಗತೋ (ಸೀ. ಪೀ.), ಸಙ್ಗರತ್ಥಾಯಿಧಾಗತೋ (ಸ್ಯಾ.)];

ಆಮನ್ತ ಖೋ ತಂ ಗಚ್ಛಾಮಿ, ಮುತ್ತೋಸ್ಮಿ ತವ ಸಙ್ಕರಾ [ಸಙ್ಗರಾ (ಸೀ. ಸ್ಯಾ. ಪೀ.)].

೫೩. ಸಚೇ ಖೋ ತ್ವಂ ಉದಯೋಸಿ, ಸಙ್ಕರತ್ತಾ ಇಧಾಗತೋ;

ಅನುಸಾಸ ಮಂ ರಾಜಪುತ್ತ, ಯಥಾಸ್ಸ ಪುನ ಸಙ್ಗಮೋ.

೫೪. ಅತಿಪತತಿ [ಅಧಿಪತತೀ (ಸೀ. ಪೀ.)] ವಯೋ ಖಣೋ ತಥೇವ, ಠಾನಂ ನತ್ಥಿ ಧುವಂ ಚವನ್ತಿ ಸತ್ತಾ;

ಪರಿಜಿಯ್ಯತಿ ಅದ್ಧುವಂ ಸರೀರಂ, ಉದಯೇ ಮಾ ಪಮಾದ [ಮಾ ಪಮಾದಂ (ಸೀ.)] ಚರಸ್ಸು ಧಮ್ಮಂ.

೫೫. ಕಸಿಣಾ ಪಥವೀ ಧನಸ್ಸ ಪೂರಾ, ಏಕಸ್ಸೇವ ಸಿಯಾ ಅನಞ್ಞಧೇಯ್ಯಾ;

ತಞ್ಚಾಪಿ ಜಹತಿ [ಜಹಾತಿ (ಸೀ. ಸ್ಯಾ. ಪೀ.), ಜಹಾತೀ (?)] ಅವೀತರಾಗೋ, ಉದಯೇ ಮಾ ಪಮಾದ ಚರಸ್ಸು ಧಮ್ಮಂ.

೫೬. ಮಾತಾ ಚ ಪಿತಾ ಚ ಭಾತರೋ ಚ, ಭರಿಯಾ ಯಾಪಿ ಧನೇನ ಹೋತಿ ಕೀತಾ [ಭರಿಯಾಪಿ ಧನೇನ ಹೋನ್ತಿ ಅತಿತ್ತಾ (ಕ.)];

ತೇ ಚಾಪಿ ಜಹನ್ತಿ ಅಞ್ಞಮಞ್ಞಂ, ಉದಯೇ ಮಾ ಪಮಾದ ಚರಸ್ಸು ಧಮ್ಮಂ.

೫೭. ಕಾಯೋ ಪರಭೋಜನನ್ತಿ ಞತ್ವಾ [ಕಾಯೋ ಚ ಪರಭೋಜನಂ ವಿದಿತ್ವಾ (ಕ.)], ಸಂಸಾರೇ ಸುಗತಿಞ್ಚ ದುಗ್ಗತಿಞ್ಚ [ಸುಗತೀ ಚ ದುಗ್ಗತೀ ಚ (ಸೀ. ಸ್ಯಾ. ಪೀ.), ಸುಗ್ಗತಿಂ ದುಗ್ಗತಿಞ್ಚ (ಕ.)];

ಇತ್ತರವಾಸೋತಿ ಜಾನಿಯಾನ, ಉದಯೇ ಮಾ ಪಮಾದ ಚರಸ್ಸು ಧಮ್ಮಂ.

೫೮. ಸಾಧು ಭಾಸತಿಯಂ [ಭಾಸತಯಂ (ಸೀ. ಪೀ.)] ಯಕ್ಖೋ, ಅಪ್ಪಂ ಮಚ್ಚಾನ ಜೀವಿತಂ;

ಕಸಿರಞ್ಚ ಪರಿತ್ತಞ್ಚ, ತಞ್ಚ ದುಕ್ಖೇನ ಸಂಯುತಂ;

ಸಾಹಂ ಏಕಾ ಪಬ್ಬಜಿಸ್ಸಾಮಿ, ಹಿತ್ವಾ ಕಾಸಿಂ ಸುರುನ್ಧನನ್ತಿ.

ಉದಯಜಾತಕಂ ಚತುತ್ಥಂ.