೪೫೪. ಘಟಪಣ್ಡಿತಜಾತಕಂ (೧೬)

೧೬೫. ಉಟ್ಠೇಹಿ ಕಣ್ಹ ಕಿಂ ಸೇಸಿ, ಕೋ ಅತ್ಥೋ ಸುಪನೇನ ತೇ;

ಯೋಪಿ ತುಯ್ಹಂ [ತಾಯಂ (ಪೀ.)] ಸಕೋ ಭಾತಾ, ಹದಯಂ ಚಕ್ಖು ಚ [ಚಕ್ಖುಂವ (ಪೀ.)] ದಕ್ಖಿಣಂ;

ತಸ್ಸ ವಾತಾ ಬಲೀಯನ್ತಿ, ಘಟೋ ಜಪ್ಪತಿ [ಸಸಂ ಜಪ್ಪತಿ (?)] ಕೇಸವ.

೧೬೬. ತಸ್ಸ ತಂ ವಚನಂ ಸುತ್ವಾ, ರೋಹಿಣೇಯ್ಯಸ್ಸ ಕೇಸವೋ;

ತರಮಾನರೂಪೋ ವುಟ್ಠಾಸಿ, ಭಾತುಸೋಕೇನ ಅಟ್ಟಿತೋ.

೧೬೭. ಕಿಂ ನು ಉಮ್ಮತ್ತರೂಪೋವ, ಕೇವಲಂ ದ್ವಾರಕಂ ಇಮಂ;

ಸಸೋ ಸಸೋತಿ ಲಪಸಿ, ಕೋ ನು ತೇ ಸಸಮಾಹರಿ.

೧೬೮. ಸೋವಣ್ಣಮಯಂ ಮಣೀಮಯಂ, ಲೋಹಮಯಂ ಅಥ ರೂಪಿಯಾಮಯಂ;

ಸಙ್ಖಸಿಲಾಪವಾಳಮಯಂ, ಕಾರಯಿಸ್ಸಾಮಿ ತೇ ಸಸಂ.

೧೬೯. ಸನ್ತಿ ಅಞ್ಞೇಪಿ ಸಸಕಾ, ಅರಞ್ಞೇ ವನಗೋಚರಾ;

ತೇಪಿ ತೇ ಆನಯಿಸ್ಸಾಮಿ, ಕೀದಿಸಂ ಸಸಮಿಚ್ಛಸಿ.

೧೭೦. ನ ಚಾಹಮೇತೇ [ನ ಚಾಹಮೇತಂ (ಸೀ.), ನ ವಾಹಮೇತೇ (ಸ್ಯಾ.), ನ ವಾಹಮೇತಂ (ಪೀ.)] ಇಚ್ಛಾಮಿ, ಯೇ ಸಸಾ ಪಥವಿಸ್ಸಿತಾ [ಪಠವಿಂಸಿತಾ (ಸೀ. ಸ್ಯಾ. ಪೀ.)];

ಚನ್ದತೋ ಸಸಮಿಚ್ಛಾಮಿ, ತಂ ಮೇ ಓಹರ ಕೇಸವ.

೧೭೧. ಸೋ ನೂನ ಮಧುರಂ ಞಾತಿ, ಜೀವಿತಂ ವಿಜಹಿಸ್ಸಸಿ;

ಅಪತ್ಥಿಯಂ ಯೋ ಪತ್ಥಯಸಿ, ಚನ್ದತೋ ಸಸಮಿಚ್ಛಸಿ.

೧೭೨. ಏವಂ ಚೇ ಕಣ್ಹ ಜಾನಾಸಿ, ಯದಞ್ಞಮನುಸಾಸಸಿ;

ಕಸ್ಮಾ ಪುರೇ ಮತಂ ಪುತ್ತಂ, ಅಜ್ಜಾಪಿ ಮನುಸೋಚಸಿ.

೧೭೩. ಯಂ ನ ಲಬ್ಭಾ ಮನುಸ್ಸೇನ, ಅಮನುಸ್ಸೇನ ವಾ ಪುನ [ಪನ (ಪೇ. ವ. ೨೧೫)];

ಜಾತೋ ಮೇ ಮಾ ಮರೀ ಪುತ್ತೋ, ಕುತೋ ಲಬ್ಭಾ ಅಲಬ್ಭಿಯಂ.

೧೭೪. ನ ಮನ್ತಾ ಮೂಲಭೇಸಜ್ಜಾ, ಓಸಧೇಹಿ ಧನೇನ ವಾ;

ಸಕ್ಕಾ ಆನಯಿತುಂ ಕಣ್ಹ, ಯಂ ಪೇತಮನುಸೋಚಸಿ.

೧೭೫. ಯಸ್ಸ ಏತಾದಿಸಾ ಅಸ್ಸು, ಅಮಚ್ಚಾ ಪುರಿಸಪಣ್ಡಿತಾ;

ಯಥಾ ನಿಜ್ಝಾಪಯೇ ಅಜ್ಜ, ಘಟೋ ಪುರಿಸಪಣ್ಡಿತೋ.

೧೭೬. ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ;

ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ.

೧೭೭. ಅಬ್ಬಹೀ ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ;

ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ.

೧೭೮. ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ;

ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ಮಾಣವ [ಭಾತಿಕ (ಪೇ. ವ. ೨೨೪)].

೧೭೯. ಏವಂ ಕರೋನ್ತಿ ಸಪ್ಪಞ್ಞಾ, ಯೇ ಹೋನ್ತಿ ಅನುಕಮ್ಪಕಾ;

ನಿವತ್ತಯನ್ತಿ ಸೋಕಮ್ಹಾ, ಘಟೋ ಜೇಟ್ಠಂವ ಭಾತರನ್ತಿ.

ಘಟಪಣ್ಡಿತಜಾತಕಂ ಸೋಳಸಮಂ.

ದಸಕನಿಪಾತಂ ನಿಟ್ಠಿತಂ.