೪೪೧. ಚತುಪೋಸಥಿಯಜಾತಕಂ (೩)

೨೪. ಯೋ ಕೋಪನೇಯ್ಯೇ ನ ಕರೋತಿ ಕೋಪಂ, ನ ಕುಜ್ಝತಿ ಸಪ್ಪುರಿಸೋ ಕದಾಚಿ;

ಕುದ್ಧೋಪಿ ಸೋ ನಾವಿಕರೋತಿ ಕೋಪಂ, ತಂ ವೇ ನರಂ ಸಮಣಮಾಹು [ಸಮಣಂ ಆಹು (ಸೀ.)] ಲೋಕೇ.

೨೫. ಊನೂದರೋ ಯೋ ಸಹತೇ ಜಿಘಚ್ಛಂ, ದನ್ತೋ ತಪಸ್ಸೀ ಮಿತಪಾನಭೋಜನೋ;

ಆಹಾರಹೇತು ನ ಕರೋತಿ ಪಾಪಂ, ತಂ ವೇ ನರಂ ಸಮಣಮಾಹು ಲೋಕೇ.

೨೬. ಖಿಡ್ಡಂ ರತಿಂ ವಿಪ್ಪಜಹಿತ್ವಾನ ಸಬ್ಬಂ, ನ ಚಾಲಿಕಂ ಭಾಸಸಿ ಕಿಞ್ಚಿ ಲೋಕೇ;

ವಿಭೂಸಟ್ಠಾನಾ ವಿರತೋ ಮೇಥುನಸ್ಮಾ, ತಂ ವೇ ನರಂ ಸಮಣಮಾಹು ಲೋಕೇ.

೨೭. ಪರಿಗ್ಗಹಂ ಲೋಭಧಮ್ಮಞ್ಚ ಸಬ್ಬಂ, ಯೋ ವೇ ಪರಿಞ್ಞಾಯ ಪರಿಚ್ಚಜೇತಿ;

ದನ್ತಂ ಠಿತತ್ತಂ ಅಮಮಂ ನಿರಾಸಂ, ತಂ ವೇ ನರಂ ಸಮಣಮಾಹು ಲೋಕೇ.

೨೮. ಪುಚ್ಛಾಮ ಕತ್ತಾರಮನೋಮಪಞ್ಞಂ [ಮನೋಮಪಞ್ಞ (ಸ್ಯಾ. ಕ.)], ಕಥಾಸು ನೋ ವಿಗ್ಗಹೋ ಅತ್ಥಿ ಜಾತೋ;

ಛಿನ್ದಜ್ಜ ಕಙ್ಖಂ ವಿಚಿಕಿಚ್ಛಿತಾನಿ, ತದಜ್ಜ [ತಯಾಜ್ಜ (ಸೀ.)] ಕಙ್ಖಂ ವಿತರೇಮು ಸಬ್ಬೇ.

೨೯. ಯೇ ಪಣ್ಡಿತಾ ಅತ್ಥದಸಾ ಭವನ್ತಿ, ಭಾಸನ್ತಿ ತೇ ಯೋನಿಸೋ ತತ್ಥ ಕಾಲೇ;

ಕಥಂ ನು ಕಥಾನಂ ಅಭಾಸಿತಾನಂ, ಅತ್ಥಂ ನಯೇಯ್ಯುಂ ಕುಸಲಾ ಜನಿನ್ದಾ.

೩೦. ಕಥಂ ಹವೇ ಭಾಸತಿ ನಾಗರಾಜಾ, ಗರುಳೋ ಪನ ವೇನತೇಯ್ಯೋ ಕಿಮಾಹ;

ಗನ್ಧಬ್ಬರಾಜಾ ಪನ ಕಿಂ ವದೇಸಿ, ಕಥಂ ಪನ ಕುರೂನಂ ರಾಜಸೇಟ್ಠೋ.

೩೧. ಖನ್ತಿಂ ಹವೇ ಭಾಸತಿ ನಾಗರಾಜಾ, ಅಪ್ಪಾಹಾರಂ ಗರುಳೋ ವೇನತೇಯ್ಯೋ;

ಗನ್ಧಬ್ಬರಾಜಾ ರತಿವಿಪ್ಪಹಾನಂ, ಅಕಿಞ್ಚನಂ ಕುರೂನಂ ರಾಜಸೇಟ್ಠೋ.

೩೨. ಸಬ್ಬಾನಿ ಏತಾನಿ ಸುಭಾಸಿತಾನಿ, ನ ಹೇತ್ಥ ದುಬ್ಭಾಸಿತಮತ್ಥಿ ಕಿಞ್ಚಿ;

ಯಸ್ಮಿಞ್ಚ ಏತಾನಿ ಪತಿಟ್ಠಿತಾನಿ, ಅರಾವ ನಾಭ್ಯಾ ಸುಸಮೋಹಿತಾನಿ;

ಚತುಬ್ಭಿ ಧಮ್ಮೇಹಿ ಸಮಙ್ಗಿಭೂತಂ, ತಂ ವೇ ನರಂ ಸಮಣಮಾಹು ಲೋಕೇ.

೩೩. ತುವಞ್ಹಿ [ತುವಂ ನು (ಸೀ. ಪೀ.)] ಸೇಟ್ಠೋ ತ್ವಮನುತ್ತರೋಸಿ, ತ್ವಂ ಧಮ್ಮಗೂ ಧಮ್ಮವಿದೂ ಸುಮೇಧೋ;

ಪಞ್ಞಾಯ ಪಞ್ಹಂ ಸಮಧಿಗ್ಗಹೇತ್ವಾ, ಅಚ್ಛೇಚ್ಛಿ ಧೀರೋ ವಿಚಿಕಿಚ್ಛಿತಾನಿ;

ಅಚ್ಛೇಚ್ಛಿ ಕಙ್ಖಂ ವಿಚಿಕಿಚ್ಛಿತಾನಿ, ಚುನ್ದೋ ಯಥಾ ನಾಗದನ್ತಂ ಖರೇನ.

೩೪. ನೀಲುಪ್ಪಲಾಭಂ ವಿಮಲಂ ಅನಗ್ಘಂ, ವತ್ಥಂ ಇದಂ ಧೂಮಸಮಾನವಣ್ಣಂ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೫. ಸುವಣ್ಣಮಾಲಂ ಸತಪತ್ತಫುಲ್ಲಿತಂ, ಸಕೇಸರಂ ರತ್ನಸಹಸ್ಸಮಣ್ಡಿತಂ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೬. ಮಣಿಂ ಅನಗ್ಘಂ ರುಚಿರಂ ಪಭಸ್ಸರಂ, ಕಣ್ಠಾವಸತ್ತಂ [ವಸಿತಂ (ಕ.)] ಮಣಿಭೂಸಿತಂ ಮೇ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ.

೩೭. ಗವಂ ಸಹಸ್ಸಂ ಉಸಭಞ್ಚ ನಾಗಂ, ಆಜಞ್ಞಯುತ್ತೇ ಚ ರಥೇ ದಸ ಇಮೇ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಗಾಮವರಾನಿ ಸೋಳಸ.

೩೮. ಸಾರಿಪುತ್ತೋ ತದಾ ನಾಗೋ, ಸುಪಣ್ಣೋ ಪನ ಕೋಲಿತೋ;

ಗನ್ಧಬ್ಬರಾಜಾ ಅನುರುದ್ಧೋ, ರಾಜಾ ಆನನ್ದ ಪಣ್ಡಿತೋ;

ವಿಧುರೋ ಬೋಧಿಸತ್ತೋ ಚ, ಏವಂ ಧಾರೇಥ ಜಾತಕನ್ತಿ.

ಚತುಪೋಸಥಿಯಜಾತಕಂ ತತಿಯಂ.